11:8

Ang Tawo nga Nakig-angot kay Jehova

Ni Elder Kyle S. McKay

Sang Sitenta

Si Joseph Smith “ginpakamaayo sa pagbukas sang katapusan nga dispensasyon,” kag kita ginpakamaayo nga ginhimo niya ini.

Ang akon katuyuan sini nga adlaw kag sa gihapon amo ang magsaksi kay Jesucristo, nga Sia ang Anak sang Dios, ang Manunuga kag Manluluwas sang kalibutan, ang aton Manluluwas kag Manunubos. Bangod “ang sadsaran nga mga prinsipyo sang aton relihiyon amo ang panaksihon sang mga Apostoles kag mga Propeta nahanungod kay Jesucristo,” subong nga adlaw ginapaambit ko sa inyo ang akon ihibalo kag panaksihon parte sa Manluluwas samtang ini ginpabakod kag ginpadalum sang kabuhi kag mga pinanudlo sang isa ka importante gid nga apostoles kag propeta.

Ang Panugod sang Kaalam

Sang aga sang isa ka matahum matin-aw nga adlaw sang temprano nga bahin sang tigpamulak sang 1820, ang 14-anyos nga si Joseph Smith nagsulod sa isa ka kakahuyan malapit sa puluy-an sang ila pamilya agud magpangamuyo para sa iya mga sala kag mamangkot kon diin nga simbahan ang iya pagabuylugan. Ang iya sinsero nga pangamuyo, nga ginhalad nga may dimationg nga pagtuo, nakabaton sang igtalupangod sang labing gamhanan nga mga puersa sa uniberso, lakip ang Amay kag ang Anak. Kag ang yawa. Ang tagsa sa ila may daku nga interes sa sina nga pangamuyo kag sa sina nga bata nga lalaki.

Ang ginatawag naton karon nga Unang Panan-awon nagmarka sang pagsugod sang Pagpanumbalik sang tanan nga butang sa sining katapusan nga dispensasyon. Apang para kay Joseph, ang eksperiyensia personal kag panghanda man. Ang iya lang luyag amo ang kapatawaran kag panuytoy. Ginhatag sa iya sang Ginuo ang duha. Ang instruksyon nga “indi mag-upod sa bisan diin sa [mga simbahan]” isa ka sugo. Ang mga pulong nga, “Ginpatawad ang imo mga sala” nagatubos.

Para sa tanan nga matahum nga mga kamatuoran nga mahimo naton matun-an gikan sa sinang Una nga Panan-awon, ayhan ang panguna nga natun-an ni Joseph amo ang, “Nasalapoan ko ang testimonya ni Santiago nga matuod—nga ang tawo nga nakulangan sang kaalam sarang magpangayo sa Dios, kag makabaton.”

Pareho sang ginsiling sang isa ka iskolar: “Ang pinakadaku nga mensahe sang Unang Panan-awon karon amo ang paghibalo nga kinaugali sang Dios ang paghatag sa mga kulang sing kaalam. … Ang Dios nga nagpahayag sang Iya kaugalingon kay Joseph Smith sa sagrado nga kakahuyan isa ka Dios nga nagasabat sa mga pamatan-on sa tion sang kabudlayan.”

Ang eksperiyensya ni Joseph sa kakahuyan naghatag sa iya sang pagsalig sa pagpangayo sang kapatawaran kag direksyon sa nabilin nga bahin sang iya kabuhi. Ang iya eksperiyensya naghatag man sa akon sang pagsalig sa pagpangayo sang kapatawaran kag direksyon sa nabilin nga bahin sang akon kabuhi.

Tayuyon nga Paghinulsol

Sang Septyembre 21, 1823, si Joseph hanuot nga nangamuyo para sa kapatawaran, nagasalig nga bangod sang iya eksperiyensia sa kakahuyan tatlo ka tuig na ang nagligad, ang langit magasabat liwat. Kag natabo gid man! Ang Ginuo nagpadala sang isa ka anghel, si Moroni, agud tudloan si Joseph kag ipahibalo sa iya ang isa ka dumaan nga rekord nga iya igalubad sa ulihi paagi sa dulot kag gahum sang Dios—ang Libro ni Mormon.

Halos 13 ka tuig pagkatapos sadto, sanday Joseph kag Oliver Cowdery nagluhod sa maligdong, mahipos nga pangamuyo sa bag-o nga gindedikar nga Kirtland Temple. Wala kita makahibalo kon ano ang ila ginpangamuyo, apang ang ila mga pangamuyo mahimo nga naglakip sang isa ka pakitluoy para sa kapatawaran, kay, sang nagtindog sila, ang Manluluwas nagpakita kag nagpahayag, “Tan-awa, napatawad na ang inyo mga sala; matinlo na kamo sa akon atubang.”

Sa mga binulan kag mga tinuig pagkatapos sini nga inagihan, sanday Joseph kag Oliver magasala liwat. Kag liwat. Apang sa sina nga tion, para sa sina nga tion, bilang sabat sa ila pakitluoy kag bilang paghanda para sa mahimayaon nga pagpanumbalik sang mga yabi sang priesthood malapit na matabo, ginhimo sila ni Jesus nga wala sing sala.

Ang kabuhi ni Joseph sang tayuyon nga paghinulsol nagahatag sa akon sing pagsalig nga “magpalapit kita nga may pagsalig sa trono sang bugay, agud [ako] makabaton sang kaluoy.” Natun-an ko nga si Jesucristo matuod gid nga “may mapinatawaron nga kinaugali.” Indi Iya katungdanan ukon Iya kinaugali ang magkondenar. Nagkari Sia sa pagluwas.

Nagapamangkot sa Ginuo

Bilang kabahin sang ginpanaad nga “pagpanumbalik sang tanan nga butang,” ang Ginuo, paagi kay Joseph Smith, naghatag sang Libro ni Mormon kag iban pa nga mga rebelasyon nga nagaunod sang kabug-osan sang Iya ebanghelyo. Ang importante nga mga kamatuoran ginhatagan sing kaathagan kag pagkakompleto samtang si Joseph sulitsulit nga nagapangayo sa Ginuo sing panuytoy. Binagbinaga ang masunod:

Ang Amay kag ang Anak may mga lawas “nga mahikap pareho sang tawo.
Dal-on ni Jesus sa Iya kaugalingon indi lamang ang aton mga sala kundi pati man ang aton mga balatian, mga pag-antos, kag mga kahuyangan.”
Ang Iya Pagbayad-sala tuman kasakit nga nagtuga sa Iya nga magdugo halin sa tagsa ka buho-buho sang panit.
Naluwas kita paagi sa Iya grasya “pagkatapos sang tanan nga aton mahimo.”
May mga kondisyon sa kaluoy ni Kristo.
Kon magpalapit kita kay Kristo, indi lamang Niya patawaron ang aton mga sala, kundi bag-uhon man Niya ang aton kaugalingon nga kinaugali agud “nga wala na kita sing huyog sa paghimo sang malain.”
Si Cristo pirme nagasugo sang Iya katawhan sa pagtukod sang mga templo, sa diin magapakita Sia sa ila kag hatagan sila sang gahum halin sa kahitaasan.

Nagasaksi ako nga ining tanan nga mga butang matuod kag kinahanglanon. Nagarepresentar lamang sila sang isa ka bahin sang kabug-usan nga ginpanumbalik ni Jesucristo paagi kay Joseph Smith bilang sabat sa suliltsulit nga mga pangabay ni Joseph para sa direksyon.

Pagpauswag Sini nga Ginharian

Sang 1842, si Joseph nagsulat parte sa makahalawhaw nga mga butang nga mahanabo sa sining katapusan nga dispensasyon. Nagpahayag sia nga sa aton panahon, “ang langitnon nga Priesthood magahiusa sa dutan-on, sa pagdala sadtong dalagko nga mga katuyuan; kag samtang kita sa amo nahiusa sa pareho nga kawsa sa pagpasanyog sang ginharian sang Dios, ang langitnon nga Priesthood indi lamang mga tumalan-aw nga wala sing ginahimo.”

Sa iya abyan nga si Benjamin Johnson, si Joseph nagsiling, “Benjamin, [kon mapatay ako] indi ako [mangin] malayo sa imo, kag kon sa pihak na nga bahin sang tabon, magatrabaho gihapon ako upod sa imo, kag upod ang gahum nga nagdugang sing daku, sa pagpauswag sini nga ginharian.”

Sang Hunyo 27, 1844, si Joseph Smith kag ang iya utod nga si Hyrum ginpatay. Ang bangkay ni Joseph ginlubong, apang ang iya panaksihon padayon nga nagaimpluwensya sa bug-os nga kalibutan kag sa akon kalag:

“Nakakita ako sang isa ka panan-awon; Nahibaloan ko ini, kag nahibaloan ko nga nahibaloan ini sang Dios, kag indi ko ini mapanghiwala.”

“Wala gid ako magsiling sa inyo nga himpit ako; apang wala sing kasaypanan sa mga bugna nga akon gintudlo.”

“Ang sadsaran nga mga prinsipyo sang aton relihiyon amo ang panaksihon sang mga Apostoles kag mga Propeta nahanungod kay Jesucristo, ‘nga napatay Sia, ginlubong, kag nabanhaw sa ikatlo nga adlaw, kag nagkayab sa langit; kag ang tanan nga iban pa nga mga butang nga may kaangtanan sa aton relihiyon mga dugang lamang sa sini.”

Ang ginsiling parte kay Juan Bautista mahimo man nga masiling parte kay Joseph Smith: “May tawo nga ginpadala sang Dios, nga ang ngalan [Joseph]. … “Sia indi amo ang Kapawa, kondi nagkari agud nga makasaksi sia sa Kapawa … “agud nga ang tanan magtuo paagi sa iya.”

Nagatuo ako. Nagatuo ako kag sigurado gid nga si Jesus amo ang Cristo, ang Anak sang buhi nga Diyos. Nagapamatuod ako nga ang buhi nga Dios amo ang aton mahigugmaon nga Amay. Nahibaluan ko ini tungod kay ang tingug sang Ginuo naghambal sini sa akon, kag amo man ang tingug sang Iya mga alagad, ang mga apostoles kag mga propeta, lakip na kag nagasugod kay Joseph Smith.

Nagasaksi ako nga si Joseph Smith isa anay kag isa gihapon ka propeta sang Dios, isa ka saksi kag alagad sang Ginuong Jesucristo. Sia “ginpakamaayo sa pagbukas sang katapusan nga dispensasyon,” kag kita ginpakamaayo nga ginhimo niya.

Ginsugo sang Ginuo si Oliver kag kita tanan, “Magpabilin sa tupad sang akon alagad nga si Joseph sing tampad.” Nagapamatuod ako nga ang Ginuo nagapabilin sa tupad sang Iya alagad nga si Joseph kag sa Pagpanumbalik nga ginhikot paagi sa iya.

Si Joseph Smith kabahin na karon sinang langitnon nga pagkapari nga iya ginhambal. Suno sa iya ginsaad sa iya abyan, indi sia malayo sa aton, kag sa pihak nga bahin sang tabon, nagatrabaho gihapon sia upod sa aton, kag may gahum nga nagdugang sing daku, sa pagpauswag sini nga ginharian. Upod ang kalipay kag pagpasalamat, ginabayaw ko ang akon tingog sa “pagdayaw sa tawo nga nakig-angot kay Jehova.” Kag labaw sa tanan, dayawon si Jehova, nga nakig-angot sa sina nga tawo! Sa ngalan ni Jesucristo, amen.