Wayɛ Krado sɛ Ɔbɛboa Yɛn
Sɛ yɛde gyidie kɔ Yesu Kristo nkyɛn a, Ɔbɛwɔ hɔ berɛ biara.
Meyɛ abɔfra no, me ne m’abusua kɔdii akwamma wɔ mpoano bi a ɛwɔ me man Chile mu. Ɛyɛɛ me dɛ sɛ me ne m’abusua dii nna bi de gyee yɛn ani wɔ ahuhuro berɛ no mu. M’ani san gyee ɛfiri sɛ misusuu sɛ afei deɛ mɛtumi akɔka me nuanom mpanimfoɔ baanu ho ne wɔn ayɛ deɛ wɔtaa yɛ de gye wɔn ani wɔ nsuo no so.
Da bi, me nuanom kɔdii agorɔ wɔ baabi a asorɔkye no rebubu, na ɛyɛɛ me sɛ manyini na me ho akokwa a mɛtumi adi wɔn akyi. Berɛ a mekɔɔ saa bea no, mehunuu sɛ asorɔkye no soso sene sɛdeɛ wohunu wɔ nkonkɔnso no. Mpofirem ara, asorɔkye bi de mmirika baa me nkyɛn, a ɛmaa me ho dwirii me. Metee nka sɛ ahoɔden kɛseɛ bi afa me, na ɛtwee me kɔɔ ɛpo no bunu mu. Na mentumi nhunu anaa nte biribiara nka berɛ a na ɛretoto me kɔ no. Berɛ a na mesusuu sɛ ebia m’akwantuo wɔ asase so reba awieeɛ no, metee nka sɛ nsa bi retwe me akɔ asase so. Awieeɛ no, metumi hunuu owia na mehomee.
Na me nua Claudio ahunu mmɔden a merebɔ sɛ mɛyɛ me ho sɛ ɔpanin na ɔboaa me. Na menkɔɔ bunu mu. Ɛwom sɛ na nsuo no mu nnɔ deɛ, nanso na m’ani so atan me a manhunu sɛ anka mɛtumi aboa me ho. Claudio ka kyerɛɛ me sɛ ɛsɛ sɛ mehwɛ yie na sɛ mepɛ a, ɔbɛtumi akyerɛkyerɛ me. Ɛmfa ho ne nsuo galɔn pii a na mamene no, na m’ahantan ne ɔpɛ a mewɔ sɛ mɛyɛ me ho ɔpanin no mu yɛ den, na mekaa sɛ, “Aane.”
Claudio ka kyerɛɛ me sɛ ɛsɛ sɛ mehyɛ asorɔkye no mu. Meka kyerɛɛ me ho sɛ deɛ ɛteɛ biara mɛdi nkoguo wɔ saa ɔko a ɛtia deɛ ayɛ sɛ nsuo fasuo kɛseɛ bi no mu.
Berɛ a asorɔkye kɛseɛ foforɔ bi rebɛn no, Claudio kaa no ntɛm sɛ: “Hwɛ me; sei na woyɛ no.” Claudio tuu mmirika hyiaa asorɔkye a ɛreba no na ɔdɔɔ asukɔ wom ansa na ɛrebu. M’ani gyee n’asukɔ no ho ara ma m’anhunu asorɔkye a na ɛdi hɔ ɛreba no. Enti, bio, ɛde me kɔɔ ɛpo no bunu mu na ɛde ahoɔden a ɛboro so totoo me. Simma-sini kakraa bi akyi no, nsa bi sɔɔ me deɛ mu, na wɔsan twee me kɔɔ nsuo no ani. Na m’ahantan gya no redum.
Saa berɛ yi, me nua no kaa sɛ me ne no nnɔ asukɔ. Sɛdeɛ ɔfrɛɛ me no, medii n’akyi, na yɛboom dɔɔ asukɔ. Ɛyɛɛ me te sɛ deɛ meredi ɔhaw a ɛmu yɛ den pa ara so nkonim. Nokorɛ mu, na ɛnyɛ mmrɛ koraa, nanso meyɛeɛ, esiane mmoa ne nhwɛsoɔ a me nua no daa no adi nti. Ɔgyee me mprenu; ne nhwɛsoɔ no kyerɛɛ me sɛdeɛ mɛyɛ me haw ho dwuma na madi nkonim saa da no.
Titenani Russell M. Nelson ato nsa afrɛ yɛn sɛ yɛnnwene ɔsoro ho, na mepɛ sɛ medi n’afotuo so na mede di dwuma wɔ m’ahuhuro berɛ mu abasɛm no mu.
Agyenkwa no Tumi wɔ Ɔtamfo no so
Sɛ yedwene ɔsoro ho a, yɛbɛte aseɛ sɛ yɛn abrabɔ mu no yɛbɛhyia ɔhaw ahoroɔ a ayɛ sɛ deɛ ɛso sene yɛn ahoɔden a yɛde bɛdi so. Yɛn asetena berɛ mu no, yɛhyɛ ɔtamfo no haw ase. Te sɛ asorɔkye a na ɛwɔ ahoɔden sene me wɔ saa ahuhuro berɛ mu da no, yɛbɛtumi ate nka sɛ yɛnni ahoɔden na yɛpɛ sɛ yɛpene so ma nkrabea a ɛmu yɛ den. Saa “asorɔkye bɔne” no bɛtumi asunsum yɛn akɔ fa aba fa. Nanso mma wo werɛ mfiri deɛ ɔwɔ tumi wɔ saa asorɔkye no so, ne, nokorɛ mu no, nneɛma nyinaa so no. Ɛno ne yɛn Agyenkwa, Yesu Kristo. Ɔwɔ tumi a ɔde boa yɛn ma yɛfiri tebea a ɛyɛ awerɛhoɔ anaasɛ tebea a ɛnyɛ biara mu. Ɛmfa ho sɛ yɛte nka sɛ yɛbɛn No no, Ɔda so tumi duru yɛn nkyɛn wɔ baabi a yɛwɔ sɛdeɛ yɛteɛ no.
Sɛ yɛde gyedie kɔ Ne nkyɛn a, Ɔbɛtena hɔ daa, na Ne berɛ mu no, Ɔbɛyɛ krado na wapɛ sɛ ɔbɛsɔ yɛn nsa na watwe yɛn akɔ baabi a ahotɔ wɔ.
Agyenkwa no ne Ne Som adwuma Nhwɛsoɔ
Sɛ yedwene ɔsoro ho a, yɛbɛhunu Yesu Kristo sɛ ɔsom adwuma ho nhwɛsoɔ a mfomsoɔ biara nni ho. Nhwɛsoɔ bi wɔ hɔ ma yɛn wɔ twerɛnsɛm mu berɛ a Ɔno anaa N’asuafoɔ boa obi a ɔhia mmoa, gye, anaa hyira berɛ a wɔtene wɔn nsa. Sɛdeɛ ɛwɔ m’asɛm no mu no, na menim sɛ me nua no wɔ hɔ, nanso na ɔwɔ hɔ ma me no nnɔɔso. Na Claudio nim sɛ mewɔ ɔhaw mu, na ɔkɔboaeɛ yii me firii nsuo no mu.
Ɛtɔ da a, yɛdwene sɛ deɛ ɛhia ara ne sɛ yɛbɛwɔ hɔ kɛkɛ ama obi a ɔhia mmoa, na mpɛn pii no, pii wɔ hɔ a yɛbɛtumi ayɛ. Sɛ yɛwɔ daapem nhumu a, ɛbɛtumi aboa ma yɛanya adiyisɛm de aboa afoforɔ a wɔhia mmoa wɔ ne berɛ mu. Yɛbɛtumi de yɛn ho ato Honhom Kronkron no akwankyerɛ ne ne nkanyan so de ahunu mmoa ko a ɛhia, sɛ ɛyɛ honam fam mmoa te sɛ nkateɛ mu awerɛkyekyerɛ, aduane, mmoa a ɛfa daa nnwuma ho, anaa honhom mu akwankyerɛ a yɛde bɛboa afoforɔ wɔ wɔn akwantuo mu ma wɔasiesie wɔn ho, ayɛ, na wɔadi apam kronkron ahoroɔ so.
Agyenkwa no Ayɛ Krado sɛ Ɔbɛgye Yɛn
Berɛ a Petro, Ɔsomafoɔ panin no, “nantee nsuo no so sɛ ɔrekɔ Yesu nkyɛn no, na ɔsuro; na ɔhyɛɛ aseɛ sɛ ɔremem no,” afei “ɔteaam sɛ, Awurade, gye me.” Na Yesu nim gyedie a na Petro wɔ sɛ ɔbɛba Ne nkyɛn wɔ nsuo no so. Na ɔnim Petro suro nso. Sɛdeɛ twerɛtohɔ no kyerɛ no, Yesu “tenee Ne nsa ntɛm ara, na ɔsɔɔ ne mu,” na ɔkaa saa nsɛm yi: “Wo a wo gyidie sua, adɛn nti na wogyee akyinnyeɛ?” Na Ne nsɛm no nka Petro anim na mmom na ɔrekae no sɛ Ɔno, Mesaia no, ka ɔne asuafoɔ no ho.
Sɛ yɛdwene ɔsoro ho a, yɛbɛnya adanseɛ wɔ yɛn akoma mu sɛ Yesu Kristo yɛ yɛn Agyenkwa, yɛn Dimafoɔ wɔ Agya no nkyɛn, ne yɛn Gyefoɔ ampa. Sɛ yɛkyerɛ gyedie wɔ Ne mu a, Ɔbɛgye yɛn afiri yɛn ahweaseɛ tebea mu, atra yɛn haw, mmrɛyɛ, ne ahiadeɛ wɔ honam fam asetena yi mu, na wama yɛn akyɛdeɛ a ɛkyɛn ne nyinaa, a ɛyɛ daa nkwa.
Agyenkwa no Aba mu Mmu wɔ Yɛn ho
Me nua no ampa aba wɔ me ho saa da no na mmom ɔkɔɔ so yɛɛe sɛdeɛ mɛtumi asua sɛdeɛ m’ankasa mɛyɛ ama me ho. Ɔkɔɔ so yɛɛe, sɛ mpo na ɛhia sɛ ɔgye me mprenu a. Ɔkɔɔ so, sɛ mannya no mfitiaseɛ no mpo a. Ɔkɔɔ so sɛdeɛ mɛtumi adi saa ɔhaw no so na madi nkonim. Sɛ yɛdwene ɔsoro ho a, yɛbɛhunu sɛ yɛn Agyenkwa no bɛwɔ hɔ mpɛn dodoɔ a ɛbɛhia aboa sɛ yɛpɛ sɛ yɛsua, sesa, di so nkonim, gyina ano, anaa yɛdi nkonim wɔ biribiara a ɛde nokorɛ ne daa anigyeɛ bɛba yɛn abrabɔ mu a.
Agyenkwa no Nsa
Twerɛnsɛm no ma Agyenkwa no nsa sɛnkyerɛnneɛ ne ne nkyerɛaseɛ yɛ deɛ yɛkae daa. Wɔ Ne mpata afɔrebɔ no mu no, wɔde nnadewa bobɔɔ Ne nsam de No sɛnee asɛnnua no so. Ne Wusɔreɛ akyi no, Ɔyii ne ho adi kyerɛɛ N’asuafoɔ no wɔ nipadua a ɛwie pɛyɛ mu, nanso Ne nsam nsɛnkyerɛnneɛ no da so yɛ N’afɔrebɔ a ɛnni ano no ho nkaeɛ. Ne nsa bɛwɔ hɔ ama yɛn daa, sɛ mpo yɛrentumi nhunu anaa yɛnte nka mfitiaseɛ no a, ɛfiri sɛ yɛn Soro Agya na ɔyii no sɛ ɔnyɛ yɛn Agyenkwa, adasamma nyinaa Gyefoɔ.
Within Our Grasp, ɛfiri Jay Bryant Ward hɔ
The Hand of God, ɛfiri Yongsung Kim hɔ
Sɛ medwene ɔsoro ho a, menim sɛ wɔnnyaa yɛn nko ara wɔ saa asetena yi mu. Berɛ a ɛsɛ sɛ yɛhyia ɔhaw ne nsɔhwɛ ahoroɔ no, yɛn Soro Agya nim yɛn ahoɔden na ɔnim sɛ yɛbɛtumi agyina ano anaa adi yɛn akwansideɛ ahoroɔ so. Ɛsɛ sɛ yɛyɛ yɛn fa mu deɛ na yɛkɔ Ne nkyɛn wɔ gyidie mu. Ne Dɔ Ba, Yesu Kristo, yɛ yɛn agyenkwa na ɔbɛwɔ hɔ daa. Wɔ Ne din mu, Yesu Kristo din kronkron no, amen.