Anigyeɛ Wɔ Yɛn Nkwagyeɛ mu
Yesu Kristo dɔ ne Ne dɔ bɛtumi agye yɛn afiri yɛn mfomsoɔ, mmerɛyɛ, ne bɔne na aboa ma yɛn abɛyɛ atitire.
Ɛbɛyɛ mfeɛ 10 a atwam no, menyaa atenka bi sɛ menyɛ Agyenkwa no mfonini. Ɛwom sɛ meyɛ mfoniyɛfoɔ deɛ, nanso atenka no yɛɛ mmorosoɔ. Sɛn na mɛ yɛ Yesu Kristo mfoni a ɛkyerɛ Ne Honhom? Ɛhefa na mɛhyɛ aseɛ afiri? Na ɛberɛ bɛn na mɛnya?
Mpo wɔ saa me nsɛmmisa yi mu, mesii gyinaeɛ sɛ mɛkɔ so na menyaa awerɛhyɛmu sɛ Awurade no bɛboa me. Nanso na ɛwɔ sɛ metɔkɔso na megyae deɛ ɛbɛtumi asi biara ma no. Mebɔɔ mpaeɛ, dweneeɛ, yɛɛ nhwehwɛmu, na metwerɛe, na me nyaa nhyira wɔ akadeɛ ne mmoa. Na adeɛ a na ɛyɛ ntama fitaa no hyɛɛ aseɛ bɛyɛɛ biribi dodoɔ.
Na kwan no nna fam. Ɛtɔda a na ɛnyɛ sɛdeɛ mepɛ no. Ɛtɔda a nkanyan bi ba wɔ nimdeɛ ne nneyɛɛ no mu. Na mpɛn pii nso no, na ɛwɔ sɛ meyɛ na mesan yɛ no bio ne bio.
Berɛ a mehunuu sɛ maka ngo aduro no awie na awo no, mehyɛɛ aseɛ de ahosuo aduro a ɛmu da hɔ yɛɛ so sɛdeɛ ɛbɛbɔ ho ban afiri efi ne mfuturo ho. Berɛ a meguso de reyɛ no, mehunuu sɛ nwi a ɛwɔ mfonini no mu resesa, ɛrepete, na ɛreyera. Ntɛmso na mehunuu sɛ mede varnish no yɛɛ so ntɛm dodo, sɛɛ na mfonin no fa bi nwooɛ!
Mama ho kwan ama varnish no ahohoro me mfonin no fa kɔ. Oh, sɛdeɛ m’akoma kɔtɔɔɛ. Na mete nka sɛ masɛe adeɛ a Onyankopɔn aboa me ama mayɛ no. Mesuui na meyaree wɔ me mu. Wɔ awerɛhoɔ mu, meyɛɛ deɛ obiara wɔ tebea saa mu: mefrɛɛ me maame. Ɔde nyansa ne brɛoyɛ kaa sɛ, “worennya bio deɛ na wo wɔ no, nanso fa deɛ wo wɔ no yɛ deɛ wobɛtumi biara.”
Na Mediiɛ, Kristin M. Yee
Nti mebɔɔ mpaeɛ srɛɛ mmoa na meyɛɛ mfonin no dasuom nyinaa sɛ mɛsiesie no. Na mekae sɛ mehwɛɛ mfonin no anɔpa no—na ayɛfɛ kyɛn sɛdeɛ na ɛteɛ kanee no. Ɛyɛ dɛn na ɛtumi ba saa? Deɛ na mesusu sɛ ɛyɛ mfomsoɔ no na ɛyɛ akwanya sɛ N’ahummɔborɔ nsa no bɛda adi. Na Ɔnwiee mfoniyɛ no, na na Ɔne me nwieeɛ. Anigyeɛ ne ahomegyeɛ a ɛhyɛɛ m’akoma mu. Meyii Awurade ayɛ maa Ne mmɔborɔhunu, maa saa anwanwa dwuma yi a ɛgyee me mfonin, na ɛsiane nso kyerɛɛ dodoɔ faa Ne dɔ ne tumi ho, sɛ ɔbɛgye yɛn afiri yɛn mfomsoɔ, sintɔ, ne bɔne ho na waboa yɛn ama yɛabɛyɛ biribi dodoɔ.
Sɛdeɛ m’anisɔ anyini ama Agyenkwa no berɛ a Ɔhunuu me mmɔbɔ boaa me maa me tumi siesiee mfonin a na “wontumi nsiesie” no, saa ara na me dɔ ne anisɔ ma Agyenkwa no akɔ soro, na me ne n’ayɔkofa ayɛ kɛseɛ, berɛ a m’ahwehwɛ sɛ me ne No bɛyɛ adwuma wɔ me sintɔ mu na Ɔde me mfomsoɔ bɛkyɛ me. M’ani bɛsɔ Agyenkwa no afebɔɔ sɛ mɛtumi asesa na meho bɛfiri. makoma wɔ no, na manidasoɔ ne sɛ mɛtumi ayɛ deɛ Ɔpɛ sɛ meyɛ biara.
Adwensakyera ma yɛtumi te Onyankopɔn dɔ nka na yɛhunu no na yɛdɔ No wɔ akwan ahodoɔ a anka yɛrenhunu da so. Ɔbaa a ɔde ngo sraa Agyenkwa no nan ase no, Ɔkaa sɛ, “Ne bɔne, a ɛdɔɔso yi, mede akyɛ no; esiane sɛ ɔwɔ ɔdɔ mapa: na deɛ wɔde kakra bi firi no no, ɔdɔ kakra bi.” Na ɔdɔɔ Yesu bebree esiane sɛ na Ɔde ne bɔne akyɛ no bebree.
Ahotɔ ne anidasoɔ a ɛte saa wɔ hɔ a yɛnim sɛ yɛbɛtumi abɔ mmɔden bio —sɛ sɛdeɛ Elder Bednar kyerɛkyerɛɛ no, yɛbɛtumi anya yɛn bɔnefafiri a ɛrekɔ so ɛnam Sunsum Kronkron tumi a ɛte yɛn ho berɛ a yɛdane yɛn akoma kɔ No so na yɛfiri akoma mu sakyera .
Yesu Kristo ɔgyeɛ tumi no yɛ nhyira bɔhyɛ kɛseɛ baako wɔ yɛn apam mu. Dwene yei ho berɛ a woreyɛ ayɛyɛdeɛ kronkron. Sɛ ɛnka ho a, yɛrentumi nsane nkɔ fie wɔ yɛn Soro Agya nkyɛn ne yɛn adɔfonom.
Menim sɛ yɛn Awurade ne Agyenkwa, Yesu Kristo, wɔ tumi a ɔde gye nkwa. Sɛ Onyankopɔn Ba a ɔyɛɛ mpata maa wiase bɔne na Ɔde Ne nkwa too hɔ na Ɔsan faa bio no, Ɔkura ɔgyeɛ ne owusɔreɛ tumi. Wama ɛnwuo tebea ne nkwa a ɛnniawieeɛ aba ama wɔn a wɔayi No. Menim sɛ ɛnam Ne mpata afɔdeɛ so, yɛbɛtumi asakyera na ama wagye yɛn, ate yɛn ho. Ɛyɛ anwanwadeɛ sɛ Ɔdɔ wo ne me wɔ saa kwan yi so.
Waka sɛ, “Morensan mma me hɔ seesei, na monsakyera mfiri mo bɔne ho, na monnya nsakraeɛ, ama matumi asa mo yareɛ?” Ɔbɛtumi asa wo kra “mmeammea a ɛnnyɛ” no yareɛ—mmeammea a bɔne ne awerɛhoɔ ama awoɔ, ayɛ den, na ayɛ amamfo, na “wɔama [wo] serɛ so ayɛ sɛ Eden.”
Sɛdeɛ yɛrentumi nte Kristo yea ne Ne brɛ ase wɔ Getsemane ne asɛnnua no so no, saa ara na “yɛrentumi nsusu ne hyeɛso anaa bɔnefakyɛ a ɛmu dɔ,” mmɔborɔhunu, ne ɔdɔ.
Ɛtɔ da a, ɛbɛyɛ wo sɛ waboro ɔgyeɛ so, sɛ ɛbia wonka Onyankopɔn dɔ ne Agyenkwa no mpata tumi ho, esiane adeɛ bi a worepere anaa wayɛ ho. Medi adanseɛ sɛ wo mmoro baabi a Owura no tumi duru. Agyenkwa no “asiane akɔ yeinom nyinaa ase” na ɔwɔ dibea kronkron sɛ ɔbɛma wo so na wagye wo afiri esum amena mu de wo aba Ne hann nwanwasoɔ no mu.” Ɛnam N’amanehunu so, wayɛ kwan ama obiara sɛdeɛ yɛbɛtumi adi ankasa mmerɛyɛ, bɔne, ne sintɔ so. “Ɔwɔ tumi nyinaa a ɔde gye nkwa, onipa biara a ɔbɛgye ne din adi na ɔso nsakyeraeɛ aba no nkwa.”
Te sɛ sɛdeɛ ɛhia adwuma ne kyɛwpa sɛ ɔsoro mmoa nsiesie mfonin no, ɛhia adwuma, akoma pa, ne ahobrɛaseɛ de “aso adwensakyera aba.” Saa aba no bi ne gyedie ne awerɛhyɛmu wɔ Yesu Kristo mu ne Ne mpata afɔdeɛ a, yɛde akoma a abubuo ne honhom a ɛdwoɔ bɛma Onyankopɔn, bɔneka ne sɛ yɛbɛgyae bɔne, rehyɛ deɛ asɛe ananmu sɛdeɛ yɛn ahoɔden bɛtumi, na yɛbɛyere yɛn ho abɔ tenenee abrabɔ.
Sɛ yɛbɛsakyera na yɛasesa nokorɛ mu a, ɛwɔ sɛ yɛdikan “gye yɛn mmɔne tom.” Obi nnum aduro kwa, gye sɛ ɔteaseɛ sɛ ɔyare. Ɛbɛtumi aduru berɛ bi a yɛrempɛ sɛ yɛbɛhwɛ yɛn mu na yɛahunu deɛ ɛhia ayaresa ne nsiesie.
Wɔ C. S. Lewis ntwerɛeɛ mu no, Aslan de saa nsɛm yi pem onipa biara a nankasa mfidie ayi no: “Oh, [ɔdasani], sɛdeɛ wo sane wo ti firi nneɛma nyinaa a ɛbɛtumi ayɛ wo papa ho!”
Ɛhefa na wo ne me bɛtumi asane yɛn ho afiri nneɛma a ɛbɛtumi ayɛ yɛn papa ho?
Mommma yɛmmmɔ yɛn ho ban mfiri nnepa a Onyankopɔn pɛ sɛ ɔde hyira yɛn ho. Mfiri ɔdɔ ne ahummɔborɔ a Ɔpɛ sɛ yɛte nka. Mfiri ɛhann ne nimdeɛ a Ɔpɛ sɛ ɛgu yɛn so. Ɛfiri ayaresa a Ɔnim sɛ yɛhia yie paa no. Ɛfiri apam ayɔnkofa kɛseɛ a Ɔpɛ sɛ Ne mma nyinaa nya.
Me mpaeɛ ne sɛ yɛde “akodeɛ biara bɛto hɔ” deɛ yɛahyɛda afa ne deɛ yɛnhyɛɛda mfaaeɛ sɛ yɛde bɛbɔ yɛn ho ban afiri Onyankopɔn dɔ nhyira ho. Ahantan akodeɛ, pɛsɛmenkomenya, suro, ɔtan, meneasepɔ, tirimudɛ, ntɛnkyea, anibereɛ—biribiara a ɛtwe yɛn firi sɛ yɛbɛdɔ Onyankopɔn de yɛn akoma nyinaa na yɛadi yɛne No apam nyinaa so.
Berɛ a yɛde yɛn nkwa ma Onyankopɔn na yɛdi yɛapam a yɛne No akɔso no , Awurade ma yɛn mmoa ne tumi a yɛhia de hunu na yɛdi yɛn sintɔ so a honhom mu ahantan ka ho. Yɛn nkɔmhyɛni aka sɛ:
“Adwensakyera yɛ ɔkwan ma ahoteɛ, na ahoteɛ ma tumi.”
“Ɛna oh, sɛdeɛ yɛbɛhia Ne tumi wɔ nna a ɛdi anim no.”
Te sɛ me mfonin no, Awurade ne yɛn nwie sɛ yɛyɛ mfomsoɔ a, na ɔnnwane nnya yɛn sɛ yɛtehwe a. Hia a yɛhia ayaresa ne mmoa nyɛ adesoa mma No, mmom ɛno ne botaeɛ titire nti na Ɔbaaɛ. Agyenkwa no Ankasa kaa sɛ:
“Hwɛ, maba wiase sɛ mede ɔgyeɛ rebrɛ wiase, sɛ meregye wiase afiri bɔne mu.”
“M’ahummɔborɔ abasa no atene wɔ mo so, na obiara a ɔbɛba no, ɔno na mɛgye no; na nhyira ne wɔn a wɔba me hɔ no.”
Ɛno nti bra—bra mo a mo abrɛ, agoɔ, ne awerɛhoɔ, bra na gyae wo brɛ na bɛhwehwɛ ahomee wɔ Ɔno a ɔdɔ wo kɛseɛ no mu. Fa Ne nkɔnnua to wo ho so, na Ɔdwo na ɔbrɛ Ne ho ase wɔ akoma mu.
Yɛn Soro Agya ne Agyenkwa no hu wo. Wɔnim w’akoma. Wɔdwene deɛ wo dwene ho, ne wɔn a wo dɔ wɔn ka ho.
Agyenkwa no bɛtumi agye deɛ wayera, a ayɔnkofa a abubu asɛe ka ho. Wayɛ kwan ama wɔn a wɔahwe ase nyinaa sɛ wɔbɛgye wɔn—sɛ wɔbɛhome nkwa akɔ deɛ ɛte nka sɛ awuo na anidasoɔ biara nni mu no mu.
Sɛ wowɔ tebea bi mu a wosusu sɛ anka ɛwɔ sɛ woafiri mu saa berɛ yi a, mɛmpa aba. Nya ntoboaseɛ ma wo ho, di apam no so, sakyera mpɛn pii, hwehwɛ mmoa firi wo mpanyimfoɔ kyɛn sɛ ɛhia, na taa kɔ Awurade fie ntɛmso berɛbiara a wobɛtumi. Tie na fa yɛ adwuma nkanyan a Ɔde mane wo no. Ɔmpo apam ayɔnkofa a ɔne wo wɔ da.
Mahunu ayɔnkofa a ɛmu yɛ den paa wɔ m’abrabɔ mu a mayere me ho paa sɛ ɛbɛsesa na atu mpɔn. Ɛtɔ da a, na mete nka sɛ meredi nkuguo dodo. Na mɛdwene sɛ, “mannyɛ nneɛma yie berɛ a atwam anaa? Enti mantumi anni me mmerɛyɛ so ampa? Masua wɔ berɛ mu sɛ ɛnyɛ sɛ mewɔ sintɔ; mmom, ɛyɛ a na adwuma wɔ hɔ a ɛwɔ sɛ me yɛ ne ayaresa dodoɔ a me hia.
Elder D. Todd Christofferson akyerɛ sɛ: “Nokorɛ Awurade sere hwɛ deɛ ɔpɛ sɛ ɔba atemmuo tenenee mu, deɛ ɔsi nkete yɛ adwuma dabiara sɛdeɛ ahoɔden bɛhyɛ mmerɛyɛ anan. Adwensakyera ankasa, nsakraeɛ ankasa bɛtumi ahwehwɛ sɛ wɔbɔ mmɔden mpɛn pii, nanso biribi a ɛhote ne kronkron wɔ mmɔdenmmɔ a ɛte saa mu. Bɔnefakyɛ kronkron ne ayaresa sane bɔkɔɔ ba ɔkra saa mu.”
Dabiara yɛ da foforɔ a anidasoɔ ne akwanya ahyɛ no ma esiane Yesu Kristo nti. Dabiara wo ne me bɛtumi abɛhunu sɛdeɛ Maame Eve kaaɛ, “anigyeɛ Wɔ Yɛn Nkwagyeɛ mu,” anigyeɛ a ɛwɔ muayɛ mu, anigyeɛ a ɛyɛ atenka wɔ Onyankopɔn ɛnni awieeɛ dɔ mu ma wo no.
Menim sɛ Ɔsoro Agya ne Agyenkwa no dɔ wo. Yesu Kristo yɛ adasamma nyinaa Agyenkwa ne Gyefoɔ no. Ɔte ase. Ɛnam Ne mpata afɔdeɛ nti, owuo ne bɔne ahoma atete ɛniiawieɛ sɛdeɛ yɛbɛnya fawohodi de ayi ayaresa, ɔgyeɛ, ne ɛniiawieɛ nkwa ma yɛne yɛn adɔfonom. Na medi saa nneɛma yi ho adanseɛ wɔ Yesu Kristo din mu, amen.