Twerɛnsɛm Kronkron—Gyedie Fapem no
Yɛntumi mmu Twerɛnsɛm kronkron hia a ɛho hia wɔ nsakraeɛ ne nokorɛdie a yɛbɛkɔ so adi wɔ asɛmpa no mu nyinaa animtia.
Me ne me yere Mary, hunuu T-hyɛɛte bi a nwoma bi mfonin a nkransɛm bi wɔ animu a ɛka sɛ: “Nwoma Adwinnadeɛ Dada a Wɔkura no.”
Medwenee saa anigyeɛ nkrasɛm yi ne sɛnea nsa mfidie ahoroɔ nyinaa abɛyɛ nea ɛho hia no ho. Berɛ a medwennwenee ho bio no, mehuu sɛ afidie biara anaasɛ mpo deɛ wɔde nyansa a wɔde-ayɛ-nneɛma ahyɛ mu no renyɛ deɛ ɛho hia anaasɛ ɛho nhia te sɛ honhom mu akwankyerɛ a ɛfiri ɔsoro adiyisɛm mu ba no.
Sɛ ɛyɛ nsa-afidie anaasɛ digyital no, Twerɛ Kronkron ne Mormon Nwoma no: Yesu Kristo ho Adanseɛ Foforɔ ma honhom mu akwankyerɛ ne nkyerɛkyerɛ a ɛfiri Yesu Kristo, wiase Agyenkwa no hɔ. Yɛbu saa nwoma yi sɛ ɛsom boɔ wɔ dwumadie a ɛmu dɔ a ɛdi mu wɔ Onyankopɔn akwankyerɛ a ɔde maa tete nkɔmhyɛfoɔ ne nnipa ne akwankyerɛ a ɛde ma yɛn ankasa abrabɔ ho twerɛtohɔ mu.
Sɛ wɔde saa twerɛnsɛm kronkron yi ka nkɔmhyɛfoɔ ateasefoɔ nkyerɛkyerɛ ho a, ɛde nkyerɛkyerɛ akwankyerɛ ma yɛn wɔ nnɛ wiase yi mu. Saa twerɛnsɛm yi wɔ tumi kɛseɛ berɛ a ɛde nkyerɛkyerɛ, nsiesie ma, awerɛkyekyerɛ, ne akorɔkorɔ de ma ankorankoro ne mmusua a wɔhwehwɛ akwankyerɛ firi Awurade hɔ.
Twerɛnsɛm no, a wɔde honhom mu nhyɛsoɔ a efiri Honhom Kronkron mu aka ho no, kɔ so yɛ fibea titire a ɛma wɔn a “wɔn akoma abubu ne ahonhom a anu wɔn ho” no nsakyeraeɛ yɛ mmerɛ” ne ɔpɛ sɛ wɔdi Yesu Kristo akyi. Twerɛnsɛm no boa ma wɔkyekyere fapem a ɛbɛtumi agyina mmɔden a ɔtamfoɔ no bɔ no daa nyinaa sɛ ɔbɛsɛe gyedie no ano.
Wɔn a wɔasakra foforɔ no ahyira na wɔayɛ Asɔre no nkwa wɔ n’abakɔsɛm nyinaa mu. Nhwɛsoɔ baako titire som boɔ ma me. Berɛ a na meyɛ bishop kumaa no, anuammaa asɛmpatrɛfoɔ nwanwasoɔ baanu bi kyerɛkyerɛɛ William Edward Mussman abusua no. Na agya no a ɔyɛ mmaranimfoɔ a wakwadare yie no yɛ adwumakuo kɛse bi mmaranimfoɔ panin. Ne yere Janet ɔsomfoɔ no na ɔreboa abusua no ama wɔabɔ mmɔden sɛ wɔbɛbɔ bra “te sɛ Kristo deɛ no.”
Wɔn mma barima ne ɔbaa soronko, a na wɔwɔ wɔn mfeɛ 20, a ɛdi kan no nso, na wɔrekyerɛkyerɛ wɔn. Na wɔn baanan no nyinaa agye nkyerɛkyerɛ no a wɔrekɔ asɔre. Anuammaa asɛmpatrɛfoɔ no sii so dua sɛ wɔbɛkenkan Mormon Nwoma no na wɔabɔ mpaeɛ apɛ adansedie ama saa twerɛsɛm kronkron no. Anwanwasɛm, abusua no de mpaebɔ kenkan Mormon Nwoma no nyinaa wɔ berɛ tiawa bi mu.
Ward asɛmpatrɛfoɔ no, a wɔn baanu nyinaa ayɛ ward Relief Society titenafoɔ pɛn no, kaa wɔn ho kɔɔ sacrament nhyiamu ase.
Berɛ a na abusua no rebɛn asubɔ no, wɔnyaa nwoma ahoroɔ pii a ɛkasa tiaa Asɔre no. Yei siiɛ ansa na Intanɛt reba, nanso nneɛma no hyɛɛ krataa adaka kɛseɛ bi ma.
Anuammaa asɛmpatrɛfoɔ no too nsa frɛɛ me sɛ bishop a wadi mfeɛ 34 a wɔfrɛɛ me nkyɛreeɛ sɛ memmoa mmua nsɛmmisa a wɔrebisa no. Berɛ a yɛhyiaeɛ wɔ wɔn dan mu no, na adaka kɛseɛ a nkrataa a ɛkasa tia Asɔre no wɔ dan no mfimfini. Na mede mpaebɔ na ɛkɔɔ saa dwumadie yi mu. Wɔ mmueano mpaebɔ berɛ mu no, Honhom no ka kyerɛɛ me sɛ, “Ɔnim dada sɛ ɛyɛ nokorɛ.” Na yei ho hiaa yie. Anuammaa no gye dii sɛ abusua nkaeɛ no anya adansedie dada. Papa no deɛ na wɔnnye no nni.
Ntɛm pa ara na meka kyerɛɛ no sɛ Honhom no akae me sɛ wanya adansedie dada. Na ɛyɛ nokorɛ?” Ɔhwɛɛ me dinn na ɔkaa sɛ Honhom no asi Mormon Nwoma ne Asɔre no mu nokorɛ so dua akyerɛ no.
Afei mebisaa sɛ ɛho bɛhia sɛ wɔsan hwɛ nkrataa no mu, sɛ wɔwɔ honhom mu adanseɛ anaa?
Papa no buaa sɛ ɛho renhia. Abusua nkaeɛ no gyee ne mmuaeɛ no too mu.
Ɔkaa sɛ ɔwɔ asɛmmisa soronko bi: Adeɛ baako nti a wɔanya nwoma pii a ɛsɔre tia Asɔre no ne sɛ na wɔyɛ gyedi foforɔ mu mma. Bio, wahyɛ bɔ kɛseɛ sɛ ɔbɛboa ama wɔasi asɔredan foforɔ ama saa gyedie no. Ɔbɔɔ me amanneɛ sɛ anuammaa asɛmpatrɛfoɔ no akyerɛkyerɛ no hia a ntotosoɔ du ho hia, na ɔde anisɔ gye too mu, nanso ɔsusuu sɛ ɛbɛyɛ bɔne sɛ ɔno nso bɛdi bɔhyɛ a na wadi kan ahyɛ no ni. Memaa no awerɛhyɛm sɛ bɔhyɛ no a wɔbɛtua no bɛyɛ deɛ nidie wom na ɛfata.
Mussmans ne wɔn babarima, asebaa, ne ɔbabaa.
Wɔbɔɔ abusua no nyinaa asu. Afe baako akyiri no wɔsɔɔ wɔn ano sɛ abusua wɔ Oakland California Tɛmpol mu. Menyaa kwan sɛ mekɔɔ hɔ bi. Ɔbabarima no wiee mmaranim sukuu, dii nkonim wɔ California Mmaranimfoɔ sɔhwɛ mu, na ntɛm ara ɔsomm asɛmpatrɛ adwuma nokorɛ mu wɔ Japan. Mahwɛ mfeɛ no mu sɛdeɛ awoɔ ntoatoasoɔ a ɛdi akyire no akɔ so adi asɛmpa no ho nokorɛ. Menyaa kwan yɛɛ adwuma wɔ mmanana mmaa no mu baako nsɔano mu.
Adwensakyera a ɛrekɔ so wɔ yɛn berɛ yi mu no nso yɛ nwanwa saa ara. Kansas City Chiefs kookyi panin, ne me, a afoforɔ ka ho regyina yɛn gyedie ne gyedie afoforɔ anan mu, kasaa wɔ gyedie ahodoɔ dwumadie bi ase wɔ Riverside Asɔre mu wɔ New York City. Kookyi Reid sii hokwan a ɛto so mmienu ne nsatoɔ ne akwanya ahoroɔ ho mmuaeɛ so dua, ɛno na Yesu Kristo asɛmpa no fa ho. Ade kyee anɔpa no, yɛne yɛn yerenom, Tammy Reid ne Mary kɔɔ sacrament nhyiamu wɔ Manhattan Second Ward. Na ɛyɛɛ honhom mu som dwumadie. Na wɔn a wɔasakyera foforɔ bebree wɔ asɔrefoɔ no mu. Na asɔremma baanum a wɔabɔ wɔn asu foforɔ, mmarima baanan ne aberanteɛ baako, ka Aaron Asɔfodiefoɔ a wɔrema sacrament no ho. M’ani agye sɛ merebɔ amaneɛ sɛ asɔremma foforɔ a wɔreba a ɛte saa no rekɔ so wɔ Asɔre no nyinaa mu
Yɛda ase wɔ nkɔanim a ɛda nso wɔ wɔn a wɔgye nsatoɔ kronkron so, sesa wɔn abrabɔ, na wɔgye akwanya a wɔde di Yesu Kristo akyi no to mu. Wɔfa apam kwan no so wɔ gyedie, adwensakyera, asubɔ, ne denhyɛ so sɛdeɛ wɔkyerɛkyerɛ wɔ Twerɛ Kronkron ne Mormon Nwoma no mu no.
Yɛntumi mmu Twerɛnsɛm kronkron hia a ɛho hia wɔ nsakraeɛ ne nokorɛdie a yɛbɛkɔ so adi wɔ asɛmpa no mu nyinaa animtia. Tete nkɔmhyɛfoɔ a wɔaka wɔn ho asɛm wɔ Mormon Nwoma no mu nim Yesu Kristo botaeɛ, na wɔkyerɛkyerɛɛ N’asɛmpa no. Mormon Nwoma no boa yɛn ma yɛbɛn Onyankopɔn yie berɛ a yɛsua, te aseɛ, na yɛde ne nkyerɛkyerɛ yɛ adwuma. Nkɔmhyɛni Joseph Smith kyerɛɛ sɛ “ɔbarima [anaasɛ ɔbaa] bɛbɛn Onyankopɔn nam [nwoma no] ahyɛdeɛ, so sene nwoma foforɔ biara.”
Sɛ yɛbɛhunu sɛ Mormon Nwoma no yɛ Onyankopɔn asɛm no, ɛhia sɛ yɛkenkan, dwennwene, na yɛbɔ ho mpaeɛ na afei yɛyɛ yɛn adwuma sɛdeɛ ne mmara teɛ. Nkɔmhyɛni Moroni hyɛɛ bɔ sɛ Onyankopɔn bɛda nwoma no nokorɛ adi akyerɛ yɛn berɛ a yɛbɔ mpaeɛ akoma pa mu, de adwenepa, ne Kristo mu gyedi. Mormon Nwoma no sua ho hia ma nsakraeɛ a ɛgyina.
Berɛ a yɛredwennwene ayɔnkofa a ɛda Twerɛ Kronkron ne Mormon Nwoma no ntam sɛ nsaano mfidie no, obi bɛtumi abisa asɛm bi. Wodwene sɛ nwoma mmienu yi bɛyɛ mfasoɔ na aboa wɔn ho sɛ Awurade pae mu kaa sɛ “wɔbɛka abom” na “wɔabɛyɛ baako wɔ wo nsam”? Yei ne deɛ Awurade kaeɛ faa “Yuda dua,” Twerɛ Kronkron no, ne “Joseph dua,” Mormon Nwoma no ho.
Wɔ nneɛma a ɛho hia mu no, Mormon Nwoma no de nkyerɛkyerɛ a ɛyɛ fapem ɛma Twerɛ Kronkron no nya nkɔsoɔ na ɛkyekyere no. Yesu Kristo Mpata nkyerɛkyerɛ no yɛ nhwɛsoɔ baako.
Twerɛ Kronkron no de Yesu Kristo som adwuma a ewuo no ho twerɛtohɔ a ɛyɛ nokorɛ ma, a Ne wuo ne Ne Wusɔreɛ ka ho. Mormon Nwoma no mu da hɔ yie fa Jesus Christ Ne Mpata no ho, biribi a nkɔmhyɛfoɔ kyerɛkyerɛɛ mu kɔɔ akyiri ansa na N’awoɔ reba.
Asɛntire de ma Alma ti 42 no da Yesu Kristo Mpata no nkyerɛkyerɛ no adi
Ɛka sɛ “Honam asetena yi yɛ nsɔhwɛ mmerɛ, ama nnipa atumi asakyera na wɔasom Onyankopɔn—Ahweaseɛ no de honam ne honhom mu wuo baa adasamma nyinaa so—Dima nam nsakyeraɛ so na ɛba—Onyankopɔn no ankasa de mpata asi wiase bɔne anan—Mmɔborɔ hunu wɔ hɔ ma wɔn a wɔasakyera—Nkaɛfoɔ no nyina ara hyɛ Onyankopɔn atɛntenenee ase—Ɛnam Mpata no nti na mmɔborɔhunu ba—Deɛ wasakyera ampa ara no na wɔbɛgye no nkwa.
Titenani Russel M. Nelson aka sɛ, “Mehyɛ bɔ sɛ mode mpaebɔ bɛsua Mormon Nwoma no da biara,a, mobɛsi agyinaeɛ papa—da biara. Ɔsa nso hyɛ bɔ nso sɛ sɛ “wode wo ho hyɛ Mormon Nwoma no mu dabiara a wɔbɛtumi abɔ wo ho ban afiri da no mu bɔne ho.”
Sɛnea mekaeɛ no, m’ani gyee adwene a na ɛwɔ mfitiaseɛ mfidie a wɔde nsa yɛ no ho—nwoma—no. Mmom, mehunu hia a Intanɛte ho hia a ɛyɛ nwanwa wɔ wiase mu ɛnnɛ. Abɛɛfo afidie baako a wɔde nsa yɛ bɛtumi de nsɛm a abakɔsɛm mu, ahyɛ nwoma akoraeɛ kɛseɛ bi ma no ama. Yɛn ani sɔ sɛ yɛte berɛ a ɛte sɛɛ mu. M’ani sɔ titire sɛ ɛma kwan ma nwoma kronkron ne Asɔre nneɛma wɔ digyital so. Intanɛte no yɛ tumi adwinnadeɛ bi a yɛde sua asɛmpa no. Ɛnnɛ, nnipa bebree de mfidi-dwuma ho nimdeɛ kyɛ twerɛnsɛm kyerɛ wɔn nnamfonom. Nhwɛsoɔ Mormon Nwoma app, no yɛ ɔkwan nwanwasoɔ a wobɛfa so ama nnamfoɔ ahunu Mormon Nwoma no na ɛnyɛ den sɛ wobɛkyɛ wɔ akwanpa ne abɔdeɛ kwan so wɔ baabiara a, wowɔ.
Berɛ a Intanɛte ma nhyira bebree no, awerɛhosɛm ne sɛ, te sɛ nkrataa a wɔatwerɛ a ɛkasa tia Asɔre a madi kan aka ho asɛm no, wɔasan nso de ayɛ de ɛma adwenem naayɛ aba na ɛsɛe gyedie wɔ asɛmpa nnyinasosɛm mu. Ɛbɛtumi ayɛ “da no mu bɔne” a Titenani Nelson kaa ho asɛm no.
Ɔtamfoɔ ne naboa no, nim anaasɛ wɔahyɛ da, abɔ wɔ Intanɛt so nea ɛne adaka a nsɛm a wɔatwerɛ a ɛkasa tia Asɔre a madi kan aka ho asɛm ahyɛ mu ma no yɛ pɛ, a wɔabɔ wɔn tirim pɔ sɛ wɔbɛtwe mo afiri Onyankopɔn nokorɛ no ho.
Nsɛm a wɔaka de ama adwenem naayɛ aba wɔ mfeɛ no mu no ayɛ nea ɛte saa ara wɔ ɔkwan a ɛyɛ nwanwa so. Titire no yei yɛ nokorɛ berɛ a wode yɛn mmerɛ no toto 1960 mfeɛ no ho, berɛ a na madi mfeɛ 20 no.
Twerɛnsɛm no kyerɛkyerɛ yɛn sɛ yɛmma yɛn ani nna hɔ wɔ nneɛma nyinaa mu. Wɔbɛtumi de intanɛte no ayɛ adeɛ kwan bɔne so anaasɛ kwan papa so.
Ɛsɛ sɛ asɔremma a wɔakyɛre ne wɔn a wɔresua asɛmpa no foforɔ no nyinaa hwɛ yie wɔ nea wɔhwɛ ho. Mma monsosɔ, nneɛma ɛho nte, ɛnyɛ nokorɛ anaasɛ ɛntene so. Sɛ woyɛ saa a, algorithms bɛtumi de wo akɔ ɔkwan bi a ɛsɛe gyedie na asɛe wo ɛnni awieeɛ nkɔsoɔ.so. Wɔbɛtumi de wo ayɛ ade bɔne anaasɛ ade papa. Hwehwɛ tenenee na kwati esum mu Intanɛte so adanko ntokuro a ɛyɛ sum ne ɔsɛe ho nsɛm. Fa adwen pa, tenenee nsusuiɛ hyɛ w’asetena ma, ma w’ani nye, gye w’ani nanso kwati nkwaseasɛm. Nsonoeɛ wɔ hɔ. Gyidika asɛm a ɛtɔ so 13. no yɛ akwankyerɛ nwanwasoɔ. Ne korakora no, fa wo ho hyɛ Mormon Nwoma no mu daa, sɛ ɛbɛtwe Honhom no aba w’abrabɔ mu na aboa wo ama woahunu nokorɛ ne mfomsoɔ.
M’afotuo a mede ma wɔn a wɔatwe wɔn ho afiri apam kwan biara so ne sɛ, wɔbɛsan akɔ twerɛnsɛm kronkron, nkɔmhyɛ akwankyerɛ, nyamesom afahyɛ wɔ fie, ne gyedie nnwom no so. Ɔkra biara som bo ma Awurade no. Yɛhia wo! Awurade hia wo, ɛna wohia No! Berɛ biara ɔbɛgye wo fɛ so. Wɔ mfeɛ bebree a masom Asɔre mu no, madɔ nnipa nwanwasoɔ a wɔsan baa apam kwan no so na afei wɔsom na wɔhyiraa obiara a wɔdɔ no anaasɛ wɔne no dii nkutaho no.
Twerɛ Kronkron ne nkɔmhyɛfoɔ ateasefoɔ no yɛ ɔkwan titire a Ɔsoro Agya a ɔwɔ ɔdɔ ayɛ ama N’anigyeɛ nhyehyɛɛ a ɛwɔ hɔ ma Ne mma nyinaa.
Medi me adanseɛ a ɛyɛ nokorɛ, wɔ Yesu Kristo nyamesu ne Ne Mpata no nokwasɛm ho, wɔ Yesu Kristo din mu, amen.