Yɛrema Yɛ ne N’apɛdeɛ ayɛ pɛ
Awurade apɛdeɛ akyi a yɛbɛdi wɔ yɛn asetena mu no bɛma yɛahu ahwehwɛ a ɛsomboɔ kyɛn biribiara wɔ wiase—ɔsoro ahennie no.
Berɛ bi mu no, Agyenkwa no kaa ɔdwadini bi a na ɔrehwehwɛ “nhwene pa” ho asɛm. Berɛ a ɔdwadini no rehwehwɛ no, ɔhunuu bi a “ɛboɔ yɛ den.” Nanso, sɛnea ɛbɛyɛ na ɔbarima yi anya ahweneɛ a ɛyɛ nwanwa no, na ɛsɛ sɛ ɔtɔn n’agyapadeɛ nyinaa, na ɔde anigye yɛɛ saa ntɛm ara.
Ɛnam saa bɛ tiawa na wɔdwene ho yi so no, Agyenkwa no kyerɛkyerɛɛ fɛfɛɛfɛ sɛ wɔde ɔsoro ahennie no toto ahwehwɛ a ɛsom boɔ ho, ampa ara ademudeɛ a ɛsom boɔ paa a ɛsɛ sɛ wɔpɛ sene adeɛ foforɔ nyinaa. Nokwasɛm ne sɛ odwadifoɔ no tɔnn n’agyapadeɛ nyinaa ntɛm ara sɛnea ɛbɛyɛ a obɛnya saa ahweneɛ a ɛsombo no kyerɛ pefee sɛ ɛsɛ sɛ yɛde yɛn adwene ne yɛn akɔnnɔ hyia Awurade apɛdeɛ na yɛfiri yɛn pɛ mu yɛ biribiara a yɛbɛtumi wɔ yɛn honam akwantuo no mu sɛnea ɛbɛyɛ a wobɛnya Onyankopɔn ahennie mu nhyira a ɛnni awieeɛ.
Sɛ yɛbɛfata akatua kɛseɛ yi a, akyinnyeɛ biara nni ho sɛ ɛhia sɛ, nea ɛka nneɛma foforɔ ho no, yɛde yɛn mmɔdemmɔ a yɛbɛtumi de yɛn ho bɛto nkyɛn na yɛagyae ahokyerɛ biara a ɛsi yɛn kwan wɔ ahofama a ɛwie pɛyɛ mu ma Awurade ne N’akwan a ɛkorɔn na ɛyɛ kronkron no. Ɔsomafoɔ Paul ka saa nneɛma a ɛma kronkronyɛ yi ho asɛm sɛ “wɔ [wɔ] Kristo adwene.” Sɛnea Yesu Kristo yɛ ho nhwɛsoɔ no, yei kyerɛ sɛ “[yɛbɛyɛ] nneɛma a ɛsɔ [Awurade] ani berɛ nyinaa” wɔ yɛn abrabɔ mu, anaa sɛnea nnipa binom ka nnɛ no, yei ne “nea ɛyɛ adwuma ma Awurade a yɛbɛyɛ.”
Wɔ asɛmpa ntease mu no, “[yɛyɛ] nneɛma a ɛsɔ [Awurade] ani daa” no fa yɛn pɛ a yɛde bɛhyɛ N’apɛdeɛ ase ho. Agyenkwa no de adwene kyerɛkyerɛɛ hia a saa nnyinasosɛm yi ho hia berɛ a ɔrekyerɛkyerɛ N’asuafoɔ no:
“Na ɛnyɛ sɛ merebɛyɛ m’ankasa me pɛ, na mmom nea ɔsomaa me no pɛ.
“Na yei ne Agya a ɔsomaa me no apɛdeɛ, sɛ deɛ ɔde ama me nyinaa, merenhwere biribiara, na mmom mɛnyane no bio da a ɛdi akyire no.
“Na yei ne nea ɔsomaa me no apɛdeɛ, sɛ obiara a ɔbɛhunu Ɔba no na ɔgye no di no bɛnya daa nkwa, na mɛnyane no da a ɛdi akyire no.”
Agyenkwa no nyaa ahobrɛaseɛ a ɛyɛ pɛ na ɛyɛ ɔsoro deɛ ma Agya no ɛnam ma a ɔmaa kwan ma wɔmenee N’apɛdeɛ wɔ Agya no apɛdeɛ mu no so Ɔkaa berɛ bi sɛ, “Na nea ɔsomaa me no ka me ho: Agya no nnyaee me nko; ɛfirisɛ meyɛ nneɛma a ɛsɔ n’ani daa.” Berɛ a Agyenkwa no rekyerɛkyerɛ Nkɔmhyɛni Joseph Smith wɔ Mpata no mu awerɛhoɔ ne amanehunu ho no, ɔkaa sɛ:
“Ɛfiri sɛ hwɛ, me, Nyankopɔn, mahu amane wɔ saa nneɛma yi ho ama nnipa nyinaa, sɛnea ɛbɛyɛ a sɛ wɔbɛsakyera a, wɔrenhu amane; …
“Amanehunu a ɛmaa me a meyɛ Onyankopɔn a meso sene obiara mpo no, meho popooe ɛnam yea nti, na mogya kyi firii me honamdua ani nyinaa na mehunuu amane wɔ honam ne sunsum mu—na mepɛɛ sɛ anka mennom kuruwa nwononwono no ama mampompono—
“Nanso, animuonyam nka Agya no, na menomeeɛ na mewiee m’ahoboaboa biara maa adasamma.”
Wɔ yɛn wuo asetena mu no, yɛtaa ne deɛ yɛsusu sɛ yɛnim, deɛ yɛsusu sɛ ɛyɛ papa, ne deɛ yɛfa no sɛ ɛyɛ adwuma ma yɛn di apereapereɛ, a ɛne deɛ Ɔsoro Agya nim ankasa, deɛ ɛyɛ daa yie, ne deɛ ɛyɛ adwuma ma mmɔfra koraa no nteaseɛ bɔ abira. Saa apereapereɛ kɛseɛ yi bɛtumi abɛyɛ nea emu yɛ den yie, titiriw sɛ yɛsusu nkɔmhyɛ ahodoɔ a ɛwɔ twerɛsɛm a ɛfa yɛn berɛ yi ho no ho a: “Hunu yei nso, sɛ nna a edi akyire no mu no nnipa bɛyɛ ahopɛfoɔ, wɔn a wɔdɔ anigyedeɛ sene Onyankopɔn adɔfo.”
Nsɛnkyerɛnne baako a ɛkyerɛ sɛ nkɔmhyɛ yi mmamu ne mprempren su a ɛrenya nkɔanim wɔ wiase, a nnipa pii agye atom, a ɛne sɛ nnipa bɛdi wɔn ho so na wɔabɔ dawuru berɛ nyinaa sɛ, “Ɛmfa ho nea ɛbɛba biara no, mebɔ me bra wɔ m’ankasa nokorɛ mu anaasɛ meyɛ nea ɛyɛ adwuma ma me. Sɛnea Ɔsomafo Paul kaeɛ no, “wɔhwehwɛ wɔn ankasa deɛ, na ɛnyɛ nea ɛyɛ Yesu Kristo deɛ no.” Mpɛn pii no, wɔn a wɔde wɔn ho hyɛ nneɛma a wɔpɛ, wɔn ankasa nneɛma a wɔpɛ mu, anaasɛ wɔpɛ sɛ wobu nneyɛeɛ ahodoɔ bi a mpɛn pii no ɛne Onyankopɔn dɔ nhyehyɛeɛ ne N’apɛdeɛ a ɔwɔ ma wɔn nhyia no bem no taa bu saa kwan a wɔfa so susu nneɛma yi bem sɛ ɛyɛ “nokorɛ”. Sɛ yɛma yɛn akoma ne yɛn adwene gye saa kwan a yɛfa so susu nneɛma yi tom a, yɛbɛtumi abɔ sintidua a ɛho hia ama yɛn ho wɔ ahwehwɛ a ɛsombo sene biribiara a Onyankopɔn firi ɔdɔ mu asiesie ama Ne mma—daa nkwa.
Berɛ a ɛyɛ nokorɛ sɛ yɛn mu biara tu ankorankoro asuafoyɛ akwantuo wɔ apam kwan no so, bɔ mmɔden sɛ yɛbɛma yɛn akoma ne yɛn adwene agyina Kristo Yesu so no, ɛsɛ sɛ yɛhwɛ yie na yɛma yɛn ani da hɔ berɛ nyinaa na wɔansɔ yɛn anhwɛ sɛ yɛmfa wiase nyansapɛ a ɛte sɛɛ ntom wɔ yɛn asetena mu. Elder Quentin L. Cook kaa sɛ “wobɛfiri nokorɛ mu sɛ yɛbɛyɛ sɛ Kristo no yɛ botaeɛ a ɛhia mpo sene sɛ yɛbɛyɛ nokorɛ.”
Me nnamfonom adɔfoɔ, sɛ yɛfa sɛ yɛbɛma Onyankopɔn ayɛ nkɛntɛnsoɔ a tumi wom kyɛn biribiara wɔ yɛn abrabɔ mu asene yɛn ankasa som akyidie a, yɛbɛtumi anya nkɔsoɔ wɔ yɛn asuafoɔyɛ mu na yɛama yɛn tumi a yɛde bɛka yɛn adwene ne yɛn akoma abom ne Agyenkwa no ayɛ kɛse. Ɔkwan foforɔ so no, sɛ yɛmma kwan mma Onyankopɔn kwan nni nkonim wɔ yɛn abrabɔ mu a, ɔgyae yɛn ma yɛn ho, na sɛ Awurade akwankyerɛ a ɛkanyan yɛn nni hɔ a, ɛkame ayɛ sɛ yɛbɛtumi abu biribiara a yɛyɛ anaa yɛnyɛ no bem. Yɛbɛtumi nso de anoyie ama yɛn ho ɛnam nneɛma a yɛbɛyɛ wɔ yɛn ankasa kwan so, a yɛbɛka sɛ, “Mereyɛ nneɛma a mepɛ ara kwa.”
Berɛ bi, berɛ a na Agyenkwa no rebɔ Ne nkyerɛkyerɛ no dawuro no, nnipa binom, titire Farasifoɔ a wɔyɛ wɔn ho treneefoɔ, poo Ne nkrasɛm no na wɔde akokoɔduro kaa sɛ wɔyɛ Abraham mma, na wɔkyerɛeɛ sɛ wɔn abusua no bɛma wɔanya hokwan sononko wɔ Onyankopɔn ani so. Saa adwene no maa wɔde wɔn ho too wɔn ankasa nteaseɛ so na wɔannye deɛ Agyenkwa no rekyerɛkyerɛ no anni. Farasifoɔ no nneyɔeɛ wɔ Yesu ho no yɛ adanseɛ a ɛda adi pefee sɛ wɔn ahantan su no annya baabiara wɔ wɔn akoma mu amma Agyenkwa no nsɛm ne Onyankopɔn kwan. Wɔ mmuae ma mu no, Yesu de nyansa ne akokoɔduro kaa sɛ sɛ wɔyɛ Abraham apam mma ampa a, wɔbɛyɛ Abraham nnwuma, titiriw berɛ a wɔsusu sɛ “Abraham Nyankopɔn” no gyina wɔn anim na ɔrekyerɛkyerɛ wɔn nokorɛ no saa berɛ no ara mu no.
Anuanom , sɛnea mobɛtumi ahu no, adwene mu apɔmuteɛ a ɛne “nea ɛyɛ adwuma ma me ne nea ɛyɛ adwuma ma Awurade” yi a wobɛyɛ no nyɛ ade foforɔ a ɛyɛ sononko wɔ yɛn berɛ yi mu. Ɛyɛ adwene a akyɛ a atwa mfeɛ ɔha pii na ɛtaa bu anyansafoɔ-wɔ-wɔn-ankasa-aniso na ɛma Onyankopɔn mma pii adwene yɛ wɔn ntanta na wɔbrɛ. Wɔ nokorɛ no, saa adwene yi yɛ ɔtamfo no nnaadaa dadaa; ɛyɛ nnaadaa kwan a ɛde ahwɛyie de Onyankopɔn mma kwan firi apam kwan a ɛyɛ ampa na ɛyɛ nokorɛ no so. Berɛ a ankorankoro tebea ahodoɔ te sɛ awosuo, asase ho nsɛm, ne honam fam ne adwene mu nsɛmdenden nya yɛn akwantuo so nkɛntɛnsoɔ no, wɔ nneɛma a ɛho hia ankasa mu no, yɛn mu ahunmu bi wɔ hɔ a yɛwɔ ahofadie sɛ yɛbɛfa sɛ ebia yɛbɛsi gyinaeɛ sɛ yɛbɛdi nhwɛsoɔ a Awurade asiesie ama yɛn abrabɔ no akyi. Ampa, “Ɔhyɛɛ kwan no agyirae na odii kwan no anim, Na nsɛntitire biara [a wɔakyerɛkyerɛ mu].”
Sɛ Kristo asuafoɔ no, yɛpɛ sɛ yɛnante ɔkwan a Ɔhyɛɛ no agyiraeɛ maa yɛn wɔ Ne som adwuma wɔ owuo mu no so. Ɛnyɛ sɛ yɛpɛ sɛ yɛyɛ N’apɛdeɛ ne nea ɛbɛsɔ N’ani nyinaa nko na mmom yɛhwehwɛ sɛ yɛbɛsua No. Berɛ a yɛbɔ mmɔden sɛ yɛbɛdi nokorɛ wɔ apam biara a yɛahyɛ mu na yɛde “asɛm biara a ɛfiri Onyankopɔn anom,” tena ase no,wɔbɛbɔ yɛn ho ban na yɛanhwe ase wɔ wiase bɔne ne mfomsoɔ ahodoɔ mu —nyansapɛ ne nkyerɛkyerɛ mu mfomsoɔ a ɛbɛma yɛatwe yɛn ho afiri saa nhweneɛ a ɛsomboɔ sene biribiara no ho.
M’ankasa manya honhom mu ahobrɛaseɛ a ɛte saa a wɔde ma Onyankopɔn no anya Kristo asuafoɔ anokwafoɔ asetena so nkɛntɛnsoɔ, berɛ a wɔfa sɛ wɔbɛyɛ nea ɛyɛ adwuma ama Awurade no. Menim aberanteɛ bi a na ne ho ntɔ no sɛ ɔbɛkɔ asɛmpatrɛ adwuma mu no tee nka sɛ wɔhyɛɛ no nkuran sɛ ɔbɛkɔ akɔsom Awurade berɛ a ɔtiee Asɔre no kandifoɔ panin bi a ɔrekyɛ n’ankasa adansedie ne suahunu kronkron a ɛfa ɔsom sɛ asɛmpatrɛ adwuma ho.
Wɔ n’ankasa nsɛm mu no, aberanteɛ yi a seesei ɔyɛ ɔsɛmpatrɛni a wasan aba no kaa sɛ: “Berɛ a na meretie Agyenkwa Yesu Kristo Somafoɔ bi adansedie no, metumi tee Onyankopɔn dɔ a ɔwɔ ma me no nka, na na mepɛ sɛ me ne afoforɔ kyɛ saa ɔdɔ no Saa berɛ no na menim sɛ ɛsɛ sɛ mesom asɛmpatrɛ adwuma bi ɛmfa ho sɛ na mewɔ suro, adwene mu naayɛ, ne dadwene. Metee nka sɛ mewɔ ahotosoɔ koraa wɔ Onyankopɔn nhyira ne bɔhyɛ ahodoɔ a ɔde ama Ne mma no mu. Ɛnnɛ, meyɛ onipa foforɔ; Mewɔ adansedie sɛ asɛmpa yi yɛ nokorɛ na wɔasan de Yesu Kristo Asɔre no aba asase so.” Saa aberanteɛ yi faa Awurade kwan na ɔbɛyɛɛ nokorɛ suani nhwɛsoɔ wɔ biribiara mu.
Ababaa nokwafoɔ bi sii gyinaeɛ sɛ ɔrensɛe ne gyinapɛn ahodoɔ berɛ a wɔka kyerɛɛ no sɛ ɔnsiesie ne ho wɔ ɔkwan a ɛmfata so na ama wafata adwumayɛkuo a ɛwɔ ntadehyɛ adwuma a ɔyɛ adwuma wom no adwumayɛ mu no. Berɛ a ɔtee aseɛ sɛ ne nipadua yɛ akyɛdeɛ kronkron a ɛfiri yɛn Soro Agya hɔ ne beaeɛ a Honhom no bɛtumi atena no, wɔkanyann no ma ɔtenaa ase ɛnam gyinapɛn a ɛkorɔn sene wiase deɛ so. Ɛnyɛ sɛ ɔnyaa wɔn a wohunuu no sɛ ɔde Yesu Kristo asɛmpa no mu nokorɛ no tena ase no mu ahotosoɔ nko, na mmom ɔkoraa n’adwuma a na ɛda asiane mu berɛ tiawa bi no nso so. Ɔpɛ a ɔwɔ sɔ ɔbɛyɛ adwuma mma Awurade, sene deɛ ɔbɛyɛ ama wiase, maa no apam awerɛhyɛmu wɔ ɔpɛ a emu yɛ den mu.
Anuanom, yɛhyia agyinaeɛsie a ɛte saa ara berɛ nyinaa wɔ yɛn da biara da akwantuo mu. Ɛhia ma akokoɔduro ne ɔpɛ akoma sɛ yɛbɛgyina kakra na yɛadi nokorɛdie ne ɔdwoɔ mu nhwehwɛmu akyi de agye atom sɛ ɔhonam mmerɛyɛ ahodoɔ wɔ yɛn asetena mu a ɛbɛtumi asi yɛn tumi a yɛde bɛbrɛ yɛn ho ase ama Onyankopɔn, na awieɛ koraa no yɛasi gyinaeɛ sɛ yɛbɛfa Ne kwan so sene yɛn ankasa deɛ. Yɛn asuafoyɛ ho sɔhwɛ a ɛtwa toɔ no wɔ yɛn pɛ a yɛwɔ sɛ yɛbɛpa yɛn ho mu na yɛahwere yɛn nipasu dada no na yɛde yɛn akoma ne yɛn kra nyinaa ahyɛ Onyankopɔn ase sɛnea ɛbɛyɛ a N’apɛdeɛ bɛyɛ yɛn dea.
Owuo mmerɛ a ɛyɛ animuonyam paa no mu baako ba berɛ a yɛhunu anigyeɛ a ɛba berɛ a yɛyɛ saa nneɛma a “ɛyɛ adwuma ma Awurade na ɛsɔ Awurade ani” ne “deɛ ɛyɛ adwuma ma yɛn” no bɛyɛ baako ne pɛ! Sɛ yɛbɛsi gyinaeɛ a akyinnyeɛ biara nni ho sɛ yɛbɛma Awurade apɛdeɛ ayɛ yɛn ankasa deɛ a, ɛhwehwɛ sɛ yɛyɛ asuafoɔ a wɔyɛ animuonyam na wɔyɛ akokoɔdurofoɔ! Saa berɛ a ɛkorɔn no, yɛbɛyɛ wɔn a wɔahyira wɔn ho ama Awurade, na yɛde yɛn apɛdeɛ ma No koraa. Sɛ yɛbɛka a, honhom fam ahobrɛase a ɛte saa no yɛ fɛ, ɛwɔ tumi, na ɛsakra.
Medi mo adanseɛ sɛ Awurade pɛ a yɛdi akyi wɔ yɛn abrabɔ mu no bɛma yɛatumi ahunu ahwehwɛ a ɛsom boɔ paa wɔ wiase —ɔsoro ahennie no. Mebɔ mpaeɛ sɛ yɛn mu biara, wɔ yɛn mmerɛ ne yɛn mmerɛ mu, bɛtumi de apam mu ahotosoɔ akyerɛ yɛn Soro Agya ne Agyenkwa Yesu Kristo sɛ “deɛ ɛyɛ adwuma ma Wo no, ɛyɛ adwuma ma me.” Meka saa nsɛm yi wɔ Agyenkwa Yesu Kristo din kronkron mu, amen.