Worehwehwɛ Mmuaeɛ ama Honhom mu Nsɛmmisa
Yɛn asɛmpa nsɛmmisa a ɛfiri akomam bɛtumi ama Ɔsoro Agya ne Yesu Kristo akwanya a wɔde bɛboa yɛn ama yɛanyini.
Menim sɛ yei bɛyɛ ebinom nwanwa, nanso manyini ara sɛ mɛkae berɛ a wɔkyerɛkyerɛɛ yɛn wɔ sukuu mu sɛ okyinnsoromma nkron na ɛwɔ yɛn owia nhyehyɛeɛ no mu. Venetia Barney a wadi mfeɛ 11 a ɔfiri Oxford, England, na ɔmaa saa okyinnsoromma ahoroɔ no baako, Pluto, din berɛ a wɔhunuu no wɔ 1930 mu no. Na ɛde bɛsi 1992 no, na wɔgye di sɛ Pluto na ɛwɔ akyirikyiri pa ara wɔ yɛn owia nhyehyɛeɛ mu. Saa berɛ yi mu no, na yɛtaa hunu mmɔfraberem nkrataa ne guluu a wɔde afra anwene sɛdeɛ yɛn okyinnsoromma no teɛ, wɔ adesuadan ahoroɔ ne abɔdeɛ nyansahunu ho dwasodeyɛ ahoroɔ mu, a na ɛmu biara kyerɛ Pluto gyinabea wɔ ɛhyeɛ a yɛnim no so. Na abɔdeɛ nyansahufoɔ bebree gye di sɛ saa ɛhyeɛ no akyi no, owia nhyehyɛeɛ a ɛwɔ hɔ no yɛ hunu a hwee nni hɔ.
Nanso, na asɛmmisa bi da so wɔ nyansahufoɔ kuo no mu a ɛfa faako a nsoromma-tua-dua pɔtee bi a na nsoromma mu ahwɛfoɔ taa di akyire no firi ho. Na saa asɛmmisa no kɔɔ so mfeɛ pii ansa na wɔrehunu yɛn owia nhyehyɛeɛ no fa foforɔ a ɛwɔ akyirikyiri. Abɔdeɛ nyansahufoɔ de nimdeɛ kakra a na wɔwɔ no yɛɛ mfidie a ɛkɔ nkan wɔ mfeɛ pii a na ɛda ntam no mu, a ɛmaa wɔtumi yɛɛ nhwehwɛmu. Awieeɛ no, deɛ wɔhunuiɛ no hyehyɛɛ yɛn okyinnsoromma no foforɔ a ɛmaa wɔsan de Pluto kɔɔ saa ewiem bea foforɔ yi, ne yɛn owia nhyehyɛeɛ a ayɛ nwɔtwe no.
Okyinnsoromma ho nyansahufoɔ panin bi a ɔyɛ nhwehwɛmufoɔ titire ma New Horizons ewiem akwantuo adwuma a wɔde hyɛɛ ne nsa sɛ ɔnhwehwɛ Pluto mu yie no,kaa yei faa saa suahunu yi ho: “Na yɛdwene sɛ yɛnim yɛn owia nhyehyɛeɛ no ho nsɛm. Na yɛnnim. Na yɛdwene sɛ yɛte okyinnsoromma ahoroɔ a ɛwɔ yɛn owia nhyehyɛeɛ no mu no dodoɔ ase. Na yɛayɛ mfomsoɔ.”
Deɛ ɛyɛ me nwanwa fa saa ewiem hwehwɛ abakɔsɛm berɛ yi ho ne nsɛdie ne nsonoeɛ atitire bi a ɛda nnyinahɔma akyidie a ɛne sɛ yɛbɛtrɛ ɛhyeɛ a ɛda ewiem mu, ne akwantuo a yɛn, sɛ Onyankopɔn mma no, de hwehwɛ mmuaeɛ ma yɛn honhom mu nsɛmmisa no ntam. Ne titire no, sɛdeɛ yɛbɛtumi ayɛ baabi a yɛn honhom mu nteaseɛ kɔpem ho dwuma na yɛasiesie yɛn ho ama ankorankoro nkɔsoɔ fa a ɛdi hɔ no—ne baabi a yɛbɛtumi akɔpɛ mmoa.
Ahyɛdeɛ akyi Ahyɛdeɛ
Yɛrebisa nsɛm na yɛahwehwɛ nteaseɛ yɛ daa adeyɛ a ɛyɛ ne kwan so na ɛka yɛn asetena mu suahunu ho. Ɛtɔ da a, mmuaeɛ a ɛdi mu a yɛnnya no ntɛm bɛtumi ama yɛadwene sɛ yɛn nteaseɛ apem, na saa sintɔ ahoroɔ no bɛtumi ayɛ abamubuo anaa aboro yɛn so. Anwonwasɛm ne sɛ, wɔayɛ Ɔsoro Agya anigyeɛ nhyehyɛeɛ ama yɛn nyinaa sɛ ɛbɛboa ama yɛanya nkɔsoɔ ɛmfa ho ne yɛn sintɔ, na yɛayɛ deɛ yɛn ankasa ntumi nyɛ, mpo sɛ yɛnni nimdeɛ a ɛwie pɛyɛ wɔ nneɛma nyinaa ho. Onyankopɔn nhyehyɛeɛ yɛ mmɔborɔhunu ma yɛn adasamma sintɔ ahoroɔ; de yɛn Agyenkwa, Yesu Kristo, ma yɛn sɛ ɔnyɛ yɛn Odwanhwɛfoɔ Pa; na ɛkanyan yɛn sɛ yɛmfa yɛn pɛ nyi No.
Elder Dieter F. Uchtdorf akyerɛkyerɛ sɛ “worebisa nsɛm nyɛ mmerɛyɛ ho sɛnkyerɛnneɛ,” na mmom “ɛyɛ onyini kannifoɔ.” Ɔrekasa kyerɛ yɛn ankasa mmɔdemmɔ sɛ nokorɛ ahwehwɛfoɔ no, yɛn nkɔmhyɛnyi, Titenani Russell M. Nelson, akyerɛkyerɛ sɛ ɛsɛ sɛ yɛnya “ɔpɛ a ɛmu dɔ” na “yɛde akoma pa [ne] adwempa bisa, a yɛwɔ gyidie wɔ [Yesu] Kristo mu. Wakyerɛkyerɛ bio sɛ “‘adwempa’ kyerɛ sɛ obi asusu ankasa sɛ ɔbɛdi ɔsoro akwankyerɛ a wɔde ama no so.”
Yɛn ankasa mmɔdemmɔ a yɛde bɛnyini wɔ nyansa mu no bɛtumi ama yɛahwehwɛ yɛn nsɛmmisa mu, sɛ ɛyɛ den anaasɛ ɛnte saa, wɔ biribi farebae ne ne nsunsuansoɔ ho nimdeɛ mu, ahwehwɛ na yɛahunu nhwɛsoɔ ahoroɔ na afei yɛakyerɛkyerɛ mu, na ama yɛanya nteaseɛ na yɛayɛ biribi wɔ nimdeɛ mu sintɔ a yɛsusu sɛ ɛwɔ hɔ no ho. Sɛ yɛsusu yɛn honhom mu nimdeɛ a yɛdi akyire ho a, ebia saa nnweneho akwan yi bɛboa wɔ mmerɛ bi mu, nanso wɔn ankasa ntumi nni mu berɛ a yɛrehwehwɛ sɛ yɛbɛhunu nneɛma a ɛfa Ɔsoro Agya ne yɛn Agyenkwa, Yesu Kristo, Wɔn asɛmpa, Wɔn Asɔre, ne Wɔn nhyehyɛeɛ ma yɛn nyinaa ho no.
Onyankopɔn Agya ne Ne Ba no kwan a wɔfa so de Wɔn nyansa ma yɛn no hwehwɛ sɛ yɛdi kan ma Sunsum Kronkron no tumi yɛ yɛn ankasa kyerɛkyerɛfoɔ berɛ a yɛde Yesu Kristo si yɛn abrabɔ mu ne nokorɛdie a yɛde pɛ Wɔn mmuae ne Wɔn nkyerɛaseɛ mu. Wɔto nsa frɛ yɛn sɛ yɛntu yɛn ho nsi hɔ nsua twerɛsɛm kronkron no nhunu nokorɛ na yɛmpɛ nna a ɛdi akyire nokorɛ a wɔada no adi ama yɛn da ne yɛn berɛ yi, a ɛnnɛ yi nkɔmhyɛfoɔ ne asomafoɔ de ama. Wɔsrɛ yɛn sɛ yɛntaa nsom wɔ Awurade fie na yɛnkɔ yɛn nkotodwe anim mmɔ mpaeɛ “na yɛnya nsɛm mfiri ɔsoro.” Yesu bɔhyɛ a ɔde maa wɔn a na wɔwɔ hɔ retie Ne Bepɔ so Asɛnka no yɛ nokorɛ ma yɛn wɔ yɛn berɛ yi mu sɛdeɛ na ɛteɛ wɔ N’asase so som adwuma no mu no: “Mommisa, na wɔde bɛma mo; monhwehwɛ na mobɛhunu; mommom na wɔbɛbue mo” Yɛn Agyenkwa no ma awerɛhyem sɛ “mo Agya a ɔwɔ soro no ma wɔn a wɔbisa no no nneɛma pa.”
Awurade kwan a ɔfa so kyerɛkyerɛ ne “ahyɛdeɛ akyi ahyɛdeɛ, mmara akyi mmara.” Wɔbɛhwehwɛ sɛ “yɛtwɛn Awurade” wɔ kwan a ɛda yɛn seesei nteaseɛ ne deɛ ɛdi hɔ a wɔnnya mfa mmaeɛ no ntam. Saa bea kronkron yi bɛtumi ayɛ bea a yɛn honhom mu tebea kɛseɛ bɛtumi asi—baabi a yɛbɛtumi “agyina boasetɔ mu” wɔ yɛn anibereɛ hwehwɛ mu, na yɛayɛ yɛn ahoɔden foforɔ ama yɛakɔso adi bɔhyɛ kronkron a yɛnam apam so ahyɛ Onyankopɔn no so.”
Yɛne Ɔsoro Agya ne Yesu Kristo apam abusuabɔ no kyerɛ ɔman-mma a yɛyɛ wɔ Onyankopɔn ahemman mu. Na yɛn atenaeɛ wɔ hɔ hwehwɛ sɛ yɛma yɛn abrabɔ ne ɔsoro nnyinasosɛm ahoroɔ hyia na yɛbɔ mmɔden sɛ yɛbɛnyini wɔ honhom mu.
Setie
Nnyinasosɛm titire baako a wɔkyerɛkyerɛ wɔ Mormon Nwoma no mu nyinaa ne sɛ, sɛ Onyankopɔn mma yi sɛ wɔbɛda setie adi na wɔadi wɔn apam so a, wɔnya honhom mu atenetene ne akwankyerɛ daa. Awurade aka akyerɛ yɛn sɛ, ɛnam yɛn setie ne nsiyɛ so yɛbɛtumi anya nimdeɛ ne nyansa. Wɔanhyehyɛ Onyankopɔn mmara ne ne mmaransɛm sɛ ɛbɛyɛ akwansideɛ wɔ yɛn abrabɔ mu na mmom ɛyɛ kwan a tumi wom ma ankorankoro adiyisɛm ne honhom mu adesua. President Nelson akyerɛkyerɛ nokorɛ a ɛhia sɛ “adiyisɛm a ɛfiri Onyankopɔn hɔ no ne Ne daapem mmara no hyia daa” na ɔsan kɔso sɛ “ɛne Ne nkyerɛkyerɛ mmɔ abira da.” Setie a wofiri wo pɛ mu yɛ ma Onyankopɔn ahyɛdeɛ, ɛmfa ho sɛ wonni Ne botaeɛ ahoroɔ ho nimdeɛ nyinaa no, ɛde wo ka Ne nkɔmhyɛfoɔ ho. Mose 5 kyerɛkyerɛ yɛn nkutahodie pɔtee bi a ɛkɔɔ so wɔ Adam ne Awurade bɔfoɔ bi ntam.
Awurade maa Adam ne Hawa “mmaransɛm, sɛ wɔnsom Awurade wɔn Nyankopɔn, na wɔmfa wɔn nnwan mmakan mmɔ afɔdeɛ mma Awurade” akyire yi no, twerɛnsɛm no ka sɛ “Adam yɛɛ setie maa Awurade mmaransɛm” Yɛtoa so kenkan sɛ “nna pii akyi no, Awurade bɔfoɔ bi yii ne ho adi kyerɛɛ Adam, kaa sɛ: Adɛn nti na wobɔ afɔdeɛ ma Awurade? Na Adam see no sɛ: Mennim, gye sɛ Awurade hyɛɛ me.”
Adam setie dii ne nteaseɛ anim na ɛsiesiee no sɛ ɔbɛnya nimdeɛ kronkron a ɛkyerɛ sɛ na ɔreyɛ Yesu Kristo Mpata no ho sɛnkyerɛnneɛ kronkron bi. Yɛn ahobrɛaseɛ setie nso bɛbue kwan ama yɛn honhom mu nhumu wɔ Onyankopɔn akwan ne N’atirimpɔ kronkron ma yɛn mu biara. Sɛ yɛyɛ setie kɛse a, ɛma yɛbɛn yɛn Agyenkwa, Yesu Kristo, ɛfiri sɛ sɛ yɛyɛ setie ma Ne mmara ne Ne mmaransɛm a na yɛrebɛn No yie.
Bio nso, yɛn nokorɛdie ma nimdeɛ ne nyansa a yɛanya dada ɛnam yɛn nokorɛ a yɛde di asɛmpa nnyinasosɛm ne apam kronkron ahoroɔ so no, ɛyɛ ahosiesie a ɛho hia ma yɛn ahoboa sɛ yɛbɛgye na yɛayɛ ahwɛsofoɔ ama nkutahodie a ɛfiri Honhom Kronkron no hɔ.
Ɔsoro Agya ne Yesu Kristo ne nokorɛ nyinaa fibea na wɔkyɛ Wɔn nyansa ayamyɛ mu. Afei nso, nteaseɛ a yɛwɔ sɛ yɛn ankasa nni nimdeɛ a ɛde ne ho firi Onyankopɔn ho no, bɛtumi aboa ama yɛahunu deɛ yɛbɛkɔ ne nkyɛn ne baabi a yɛde yɛn gyidie titire bɛto.
Gyidie Kɛseɛ
Apam Dada mu twerɛtohɔ a ɛfa Naaman, asraafoɔ panin a nkɔmhyɛni Elisa saa ne kwata yadeɛ no yɛ deɛ m’ani gye ho titire. Abasɛm no kyerɛkyerɛ sɛdeɛ “afenaa kumaa” bi gyidie a ɛmu yɛ den sesaa onipa baako abrabɔ na, wɔ agyidifoɔ nyinaa fam no, ɛdaa Onyankopɔn mmɔborɔhunu adi kyerɛɛ wɔn a wɔde wɔn ho to Ɔne Ne nkɔmhyɛfoɔ so no. Ne din nni hɔ deɛ, nanso abaayewa kumaa yi boae maa yɛn nteaseɛ kɔɔ anim. Na Naaman gyidie wɔ n’adansedie no mu no hyɛɛ no nkuran maa ɔde n’ayaresa adesrɛ kɔmaa Onyankopɔn akoa a wayi no no.
Mfitiaseɛ no, mmuaeɛ a Naaman de maae wɔ nkɔmhyɛni Elisa akwankyerɛ sɛ ɔnnware wɔ asubɔnten Yordan mu no, na ɛyɛ adwenem nnaa ne abufuo. Nanso wɔkaa sɛ ɔnyɛ setie mma nkɔmhyɛni no afotuo no maa no ayaresa ne ne nteaseɛ nwanwasoɔ sɛ, Onyankopɔn wɔ hɔ ankasa, ho kwan.
Yɛbɛtumi ahunu sɛ yɛn honhom fam adesrɛ ahoroɔ no bi wɔ mmuaeɛ a nteaseɛ wom, na ebia ɛremfa ɔhaw titire biara mmrɛ yɛn. Anaasɛ, te sɛ Naaman no, yɛbɛtumi ahunu sɛ ahiadeɛ afoforɔ yɛ den kɛse na ɛbɛtumi ama yɛanya abufuo atenka wɔ yɛn mu. Anaasɛ, te sɛ deɛ nsoromma ho animdefoɔ de baa awieeɛ ntɛm so wɔ yɛn owia nhyehyɛeɛ no ho nkyerɛkyerɛmu no, wɔ yɛn honhom mu nokorɛ, a yɛhwehwɛ mu no, sɛ yɛde yɛn ho to yɛn ankasa nteaseɛ nko ara so a, ebia yɛbɛma nkyerɛaseɛ a ɛnyɛ pɛpɛɛpɛ, awerɛhoɔ nsunsuansoɔ a yɛansusu a ɛbɛtumi de yɛn afiri apam kwan no so. Na bio nso, nsɛmmisa bi bɛtumi akɔ so akɔsi sɛ Onyankopɔn a “ɔwɔ tumi nyinaa” ne “nyansa nyinaa, ne nteaseɛ nyinaa,” a “ɔte nneɛma nyinaa ase” wɔ Ne mmɔborɔhunu mu no, nam Ne din mu gyedie a yɛwɔ no so de hann ma yɛn.
Ahwɛyie titire baako a ɛfiri Naaman twerɛtohɔ no mu ne sɛ, sɛ yɛko tia setie a, yɛbɛyɛ ama Onyankopɔn mmara ne mmaransɛm a ɛbɛtumi ama yɛn nyini akyɛre anaasɛ aka akyire. Wɔahyira yɛn sɛ yɛanya Yesu Kristo sɛ yɛn Ayaresa Wura. Setie a yɛyɛ ma Onyankopɔn mmara ne mmaransɛm no bɛtumi abue kwan ama yɛn Agyenkwa no de nteaseɛ ne ayaresa a Ɔnim sɛ yɛhia no ama, sɛdeɛ N’ayaresa nhyehyɛeɛ a wɔatwerɛ ama yɛn no teɛ.
Elder Richard G. Scott kyerɛkyerɛɛ sɛ “abrabɔ yi yɛ suahunu a ɛwɔ ahotosoɔ kɛseɛ—ahotosoɔ wɔ Yesu Kristo mu, ahotosoɔ wɔ Ne nkyerɛkyerɛ mu, ahotosoɔ wɔ yɛn ahoɔden mu sɛdeɛ Honhom Kronkron no di yɛn anim sɛ yɛbɛtie saa nkyerɛkyerɛ no, na yɛanya anigyeɛ seesei ne anigyeɛ kɛseɛ a ɛnhinhim wɔ daapem asetena mu. Yɛde yɛn ho to so kyerɛ sɛ, yɛfiri yɛn pɛ mu yɛ setie a yɛnnim awieeɛ no mfiri ahyɛaseɛ (hwɛ Mmebusɛm 3:5–7). Sɛ wobɛso aba a, ɛsɛ sɛ ahotosoɔ a wowɔ wɔ Awurade mu no yɛ kɛseɛ na ɛgyina sene akokoɔduro a wowɔ wɔ w’ankasa w’antenka ne suahunu mu.”
Elder Scott toa so sɛ: “Sɛ wobɛda gyidie adi kyerɛ sɛ wobɛnya ahotosoɔ sɛ Awurade nim deɛ Ɔde wo reyɛ na ɔbɛtumi ayɛ ama wo daapem yiedie, ɛwom sɛ wontumi nte sɛdeɛ Ɔbɛtumi ayɛ no ase.”
Awieeɛ Adansedie
Nnamfonom adɔfo, medi adanseɛ sɛ yɛn asɛmpa nsɛmmisa a ɛyɛ nokorɛ no bɛtumi ama Ɔsoro Agya ne Yesu Kristo akwanya a wɔde bɛboa ama yɛanyini. M’ankasa mmɔdemmɔ a mede bɛhwehwɛ mmuaeɛ afiri Awurade hɔ ama m’ankasa honhom mu nsɛmmisa—deɛ atwam ne seesei—ama matumi de kwan a ɛda me nteaseɛ ne Onyankopɔn deɛ ntam no ayɛ setie ama No, ne nokorɛdie ama honhom mu nimdeɛ a mewɔ no seesei.
Medi adanseɛ sɛ, sɛ wode wo ho to Ɔsoro Agya ne Ne nkɔnhyɛfoɔ a Wasoma wɔn no so a, ɛbɛboa apagya wo wɔ honhom mu na apia wo akɔ w’anim akɔ Onyankopɔn anim a ɛtrɛ no mu. Wo gyinabea bɛsesa, ɛfiri sɛ wobɛsesa. Onyankopɔn nim sɛ dodoɔ a wokɔ soro no, dodoɔ no ara na wotumi hu akyirikyiri. Yɛn Agyenkwa no to nsa frɛ wo sɛ foro. Wɔ Yesu Kristo din mu, amen.