Yesu Kristo Nkyerɛkyerɛ no Nyɛ Den
Medi adanseɛ sɛ worekyerɛ Ɔsoro Agya mma Yesu Kristo nkyerɛkyerɛ no wɔ kwan a ɛnyɛ den so no yɛ adwuma kronkron.
Yɛn nyinaa wɔ abusuafoɔ a yɛdɔ wɔn a Satan, ɔsɛefoɔ no a ɔbɛtumi ama Onyankopɔn mma nyinaa ayɛ mmɔbɔ no de tumi a ayɛ sɛ ɔwɔ no kɔso daa sɔ wɔn hwɛ. Yɛn mu bebree da a yɛnna. Yɛde tumi biara abɔ mmɔden sɛ yɛbɛbɛn nkorɔfoɔ a wɔwɔ asiane mu no daa. Yɛasrɛ ama wɔn wɔ mpaebɔ mu. Yɛadɔ wɔn. Yɛayɛ nhwɛsoɔ papa pa ara a yɛbɛtumi.
Alma, tete mmerɛ mu nkɔmhyɛni onyansani, hyiaa nsɔhwɛ a ɛtete saa. Na ɔtamfo a ne ho yɛ hu no taa taataa nkorɔfoɔ a na ɔdi wɔn anim na ɔdɔ wɔn no, nanso na wɔda so ara rebɔ mmɔden sɛ wɔbɛtete mmɔfra atenenee wɔ wiase a amumuyɛ wom mu. Alma tee nka sɛ ne nkonimdie ho anidasoɔ baako pɛ yɛ tumi bi a ɛtɔ da a yɛbu no adewa na yɛtaa de di dwuma kakraa bi. Ɔsrɛɛ Onyankopɔn mmoa.
Na Alma nim sɛ, sɛ Onyankopɔn bɛboa a, na wɔn a ɔdi wɔn anim, ne n’atamfo no nyinaa hia adwensakyera. Enti, ɔfaa ɔkwan foforɔ a ɔde bɛko so.
Mormon Nwoma no kyerɛkyerɛ mu sei: “Na afei, sɛdeɛ asɛm no nkyerɛkyerɛ wɔ su kɛseɛ sɛ ɛbɛdi nkorɔfoɔ no anim ma wɔayɛ deɛ ɛtene—aane, na anya tumi kɛseɛ wɔ nkorɔfoɔ no adwene so sene nkrantɛ, anaa biribi foforɔ biara, a na ato wɔn—ɛno nti Alma susuu sɛ ɛfata sɛ wɔsɔ Onyankopɔn asɛm no su pa hwɛ.”
Onyankopɔn asɛm ne nkyerɛkyerɛ a Yesu Kristo ne Ne nkɔmhyɛfoɔ kyerɛkyerɛɛeɛ. Na Alma nim sɛ nkyerɛkyerɛ nsɛm wɔ tumi kɛseɛ.
Wɔ Nkyerɛkyerɛ ne Apam ɔfa 18 mu no, Awurade daa Ne nkyerɛkyerɛ no fapem adi:
“Ɛfiri sɛ, hwɛ, mehyɛ nnipa nyinaa wɔ baabiara sɛ wɔnsakyera.
“Ɛfiri sɛ, hwɛ, Awurade mo Gyefoɔ no hunuu owuo amaneɛ wɔ honam mu; ɛno nti ɔhunuu nnipa nyinaa yea, ama nnipa nyinaa atumi asakyera na wɔaba ne nkyɛn.
“Na wasɔre bio afiri awufoɔ mu, ama ɔgyina adwensakyera so de nnipa nyinaa aba ne nkyɛn.”
“Na mobɛkoto na moasɔre Agya no wɔ me din mu.
“Ɛsɛ sɛ mosakyera na wɔbɔ mo asu, wɔ Yesu Kristo din mu.”
“Momfa gyedie mmisa Agya no wɔ me din mu, na monnye nni sɛ mo nsa bɛka, na mobɛnya Sunsum Kronkron no.”
“Na afei, moanya yei akyiri no, ɛsɛ sɛ modi me mmaransɛm so wɔ nneɛma nyinaa mu.”
“Momfa Kristo din nto mo so, na momfa anidahɔ nka nokorɛ.
“Na dodoɔ no ara a wɔsakyera na wɔbɔ wɔn asu wɔ me din, a ɛne Yesu Kristo mu, na wɔgyina kɔsi awieeɛ no, wɔn na wɔbɛgye wɔn nkwa.”
Wɔ saa nkyekyɛmu kakra no mu no, Agyenkwa no ma yɛn nhwɛsoɔ a ɛdi mu a ɛkyerɛ sɛdeɛ ɛsɛ sɛ yɛkyerɛ Ne nkyerɛkyerɛ. Saa nkyerɛkyerɛ yi ne sɛ gyidie wɔ Awurade Yesu Kristo mu, adwensakyera, asubɔ, Sunsum Kronkron no akyɛdeɛ gyeɛ, ne sɛ yɛregyina akɔsi awieeɛ hyira Onyankopɔn mma nyinaa.
Sɛ yɛde saa nnyinasosɛm yi kyerɛkyerɛ wɔn a yɛdɔ wɔn a, Sunsum Kronkron no bɛboa yɛn ma yɛahunu nokorɛ no. Esiane sɛ yɛhia Sunsum Kronkron no nkanyan nti, ɛsɛ sɛ yɛkwati nsusuiɛ hunu anaa yɛn ankasa nkyerɛaseɛ a ɛtra nokorɛ nkyerɛkyerɛ a yɛbɛkyerɛkyerɛ.
Ɛno bɛtumi ayɛ den sɛ wobɛyɛ, berɛ a wodɔ onipa a worebɔ mmɔden sɛ wobɛsesa no no. Ebia na ɔbuu n’ani guu nkyerɛkyerɛ a wɔakyerɛkyerɛ no so. Sɛ woreyɛ biribi a ɛyɛ foforɔ anaa ɛyɛ nwanwa a ɛtwe adwene. Nanso Sunsum Kronkron no bɛda nokorɛ honhom adi berɛ a yɛyɛ ahwɛyie na yɛhwɛ sɛ yɛntra nokorɛ nkyerɛkyerɛ a yɛbɛkyerɛkyerɛ. Akwan pa ahoroɔ a yɛbɛfa so akwati sɛ mpo yɛbɛbɛn atorɔ nkyerɛkyerɛ no mu baako ne sɛ yɛbɛma yɛn nkyerɛkyerɛ ayɛ mmerɛ. Saa mmerɛyɛ no ma bammɔ, na kakra bi na ɛyera.
Nkyerɛkyerɛ a ɛnyɛ den ma kwan ma yɛkyɛ nkwagyeɛ nkyerɛkyerɛ no ntɛm, berɛ a mmɔfra mfa ɔdaadaafoɔ no sɔhwɛ ahoroɔ a akyire yi ɛbɛhyia wɔn no ho, berɛ tenten ansa na nokorɛ a wɔhia sɛ wɔsua no amem wɔ sohyia midia, atipɛnfoɔ, ne wɔn ankasa haw ahoroɔ mu. Ɛwɔ sɛ yɛfa akwanya biara a yɛwɔ so ne mmɔfra kyɛ Yesu Kristo nkyerɛkyerɛ no. Saa nkyerɛkyerɛ mmerɛ yi som bo na esua koraa sɛ wode toto tumi ahoroɔ sɔretia a ɛnnyae ho a. Dɔnhwere baako biara a wode nkyerɛkyerɛ bɛhyɛ abɔfra abrabɔ mu no, dɔnhwere bebree wɔ hɔ a nsɛm ne mfonin ahyɛ mu ma a ɛko tia anaa ɛma wɔbu wɔn ani gu nkwagyeɛ nokorɛ yinom so.
Ebia mo mu binom bɛdwene ho sɛ ɛbɛyɛ papa sɛ monam anigyedeɛ so bɛbɛn mo mma, anaasɛ ebia mobɛka sɛ abɔfra no bɛhyɛ aseɛ adwene sɛ mode nkyerɛkyerɛ rehyɛ ne so. Mmom, ɛwɔ sɛ yɛdwene ho sɛ, “Berɛ kakra bi ne akwanya ketewa a yɛwɔ yi, nkyerɛkyerɛ nsɛm bɛn na mɛtumi aka a ɛbɛhyɛ wɔn den atia wɔn gyidie ho ɔhaw ahoroɔ a wɔrentumi nkwati no?” Nsɛm a woka no ɛnnɛ no bɛtumi ayɛ deɛ wɔde bɛnante, na ɛrenkyɛre ɛnnɛ bɛtwam.
M’ani agye me nana-kansoabaa Mary Bommeli ahofama a ɔde ka Yesu Kristo nkyerɛkyerɛ ho asɛm no ho berɛ biara. Asɛmpatrɛfoɔ kyerɛkyerɛɛ n’abusua wɔ Switzerland berɛ a na wadi mfeɛ 24.
Wɔbɔɔ no asu akyire yi no, Mary pɛɛ sɛ ɔbɛka Ahotefoɔ a wɔwɔ Amerika no ho, enti ɔfirii Switzerland kɔɔ Berlin na ɔnyaa adwuma wɔ ɔbaa bi nkyɛn sɛ ɔnnwene ntoma mma abusua no ntadeɛ. Mary tenaa akoa dan mu na ɔde n’asadua sii efie no asaso.
Saa berɛ no, na Yesu Kristo Asɔre a ɛwɔ hɔ ma Nna a ɛdi Akyire Ahotefoɔ nkyerɛkyerɛ no tia mmara wɔ Berlin. Nanso Mary hunuu sɛ ɔrentumi nnyae sɛ ɔbɛkyɛ nneɛma a na wasua no. Na ɔbaa a ɔwɔ fie hɔ no ne n’ayɔnkofoɔ hyia asadua no ho tie Mary nkyerɛkyerɛ. Ɔkasa faa Ɔsoro Agya ne Yesu Kristo a wɔyii wɔn ho adi kyerɛɛ Joseph Smith, abɔfoɔ nsrahwɛ, ne Mormon Nwoma no ho. Ɔkaee Alma twerɛtohɔ no, ɔkyerɛkyerɛɛ Owusɔreɛ nkyerɛkyerɛ no. Ɔdii adanseɛ sɛ mmusua bɛtumi asan aka abom wɔ sɛlɛhyia ahemman no mu.
Mary anigyeɛ a ɔde kyɛɛ asɛmpa a wɔasan de aba no nkyerɛkyerɛ no de amaneɛ baeɛ. Ankyɛre koraa na polisi de Mary kɔɔ afiase. Wɔrekɔ no, ɔka kyerɛɛ polisini no sɛ ɔmma no ɔtemmufoɔ a ɛwɔ sɛ adeɛ kye a ɔba n’anim no din. Ɔsan bisaa n’abusua ho asɛm ɛna sɛ ɔyɛ agya ne okunu pa anaa. Polisini no kaa ɔtemmufoɔ no ho asɛm sɛ ɔyɛ wiaseni.
Afiase hɔ no, Mary srɛɛ pɛnsere ne krataa. Ɔde anadwo no twerɛɛ krataa kɔmaa ɔtemmufoɔ no, dii Yesu Kristo Wusɔreɛ ho adanseɛ sɛdeɛ wɔaka ho asɛm wɔ Mormon Nwoma no mu, kaa honhom wiase ho asɛm, na ɔkyerɛkyerɛɛ adwensakyera mu. Ɔsusuu sɛ ɔtemmufoɔ no bɛhia berɛ de adwene n’abrabɔ ho ansa na wahyia atemmuo a ɛtwa toɔ. Ɔtwerɛɛ sɛ ɔnim sɛ ɔwɔ pii a ɛwɔ sɛ ɔsakyera firi ho, pii a ɛbɛma n’abusua werɛ aho yie na ɛde awerɛhoɔ kɛseɛ abrɛ no. Adeɛ kyeeɛ, berɛ a na wawie ne krataa no, ɔde maa polisini no na ɔka kyerɛɛ no sɛ ɔmfa nkɔma ɔtemmufoɔ no, na ɔpenee so sɛ ɔbɛyɛ saa.
Akyire yi, ɔtemmufoɔ no frɛɛ polisini no kɔɔ ne ɔfese. Krataa a na Mary atwerɛ no yɛ adanseɛ a akyinnyeɛ nni ho a ɛkyerɛ sɛ na ɔrekyerɛkyerɛ asɛmpa a wɔasan de aba no nkyerɛkyerɛ, na ɛnam saayɛ so no, ɔrebu mmara so. Nanso, ankyɛre na polisini no san kɔɔ Mary dan mu. Ɔka kyerɛɛ no sɛ wɔatwa soboɔ ahoroɔ no nyinaa mu na ɔwɔ fahodie sɛ ɔbɛkɔ. Ne nkyerɛkyerɛ a ɛfa Yesu Kristo asɛmpa a wɔasan de aba no ho no maa wɔde no too afiase. Na adwensakyera nkyerɛkyerɛ a ɔka kyerɛɛ ɔtemmufoɔ no maa wɔyii no firii afiase.
Mary Bommeli nkyerɛkyerɛ no amma awieeɛ berɛ a wɔgyaee no no. Ne nsɛm ho twerɛtohɔ no de nokorɛ nkyerɛkyerɛ maa awoɔ ntoatoasoɔ a na wɔnnya nwoo wɔn. Gyidi a na ɔwɔ sɛ obi a wasakra foforɔ mpo bɛtumi akyerɛkyerɛ Yesu Kristo nkyerɛkyerɛ no ahwɛ sɛ n’asefoɔ bɛhyɛ wɔn den wɔ wɔn ankasa akodie mu.
Berɛ a yɛyɛ deɛ yɛbɛtumi biara de Yesu Kristo nkyerɛkyerɛ no akyerɛkyerɛ wɔn a yɛdɔ wɔn no, ebinom bɛtumi awɔ hɔ a wɔmmua. W’adwene mu bɛtumi ayɛ wo naa. Ebia wobɛbisa wo ho sɛ wonim Agyenkwa no nkyerɛkyerɛ no yie a wobɛtumi akyerɛkyerɛ no yie anaa. Na sɛ woabɔ mmɔden dada sɛ wobɛkyerɛkyerɛ a, ebia wobɛdwene deɛ nti a yɛnhunu nneɛma pa a ɛfiri mu ba no yie. Mɛntie saa adwene mu naayɛ no. Hwehwɛ mmoa firi Onyankopɔn hɔ.
“Aane, na su frɛ Onyankopɔn bisa wo mmoa nyinaa; fa w’akoma mu abisadeɛ to Awurade so daa.”
“Na afei mɛpɛ sɛ mobɛbrɛ mo ho ase, na moayɛ asoɔmmrɛ na moadwoɔ; ɛnyɛ den sɛ wɔbɛsrɛ mo adeɛ; aboterɛ ne abodwokyɛre bɛhyɛ mo ma; mobɛto mo bo ase wɔ nneɛma nyinaa mu; mobɛbɔ mmɔden adi Onyankopɔn mmaransɛm no so mmerɛ nyinaa; abisa deɛ mohia biara, honhom ne honam afa mu nyinaa; na mmerɛ nyinaa mode aseda bɛma Onyankopɔn wɔ biribiara a mobɛnya ho.”
Sɛ wobɔ mpaeɛ, sɛ wo ne Onyankopɔn kasa, na sɛ wosrɛ Ne mmoa ma wo dɔfo, na sɛ ɛnyɛ mmoa nko ara ho na woda No ase na mmom boasetɔ ne ɔdwoɔ a ɛba berɛ a woannya deɛ wopɛ nyinaa ntɛm ara anaa ebia da biara da a, ɛnneɛ mehyɛ wo bɔ sɛ wobɛbɛn No. Wobɛyɛ nsiyɛfoɔ ne ɔbodwokyɛrefoɔ. Na afei wobɛtumi ahunu sɛ woayɛ deɛ wobɛtumi nyinaa de aboa wɔn a wodɔ wɔn ne wɔn a wobɔ mpaeɛ ma wɔn no ma wɔafa Satan mmɔdemmɔ a ɔde besi wɔn kwan no mu.
“Na wɔn a wɔtwɛn Awurade no bɛnya ahoɔden foforɔ; wɔde ntaban bɛforo sɛ akɔdeɛ; wɔbɛtu mmirika na wɔmmrɛ; na wɔbɛnante, na wɔntɔ baha.”
Wobɛtumi anya anidasoɔ wɔ mmusua ho twerɛtohɔ a ɛwɔ twerɛsɛm mu. Yɛkenkan fa wɔn a wɔdanee wɔn ho firii deɛ wɔkyerɛkyerɛɛ wɔn no ho anaa wɔne Onyankopɔn repere hwehwɛ bɔne fafiri, te sɛ Alma Kumaa, Mosiah mma mmarima, ne Enos. Wɔ wɔn ahokyere berɛ mu no, wɔkaee wɔn awofoɔ nsɛm, Yesu Kristo nkyerɛkyerɛ nsɛm no. Kae a wɔkaeɛ no gyee wɔn nkwa. Wɔbɛkae wo nkyerɛkyerɛ a ɛfa saa nkyerɛkyerɛ kronkron no ho.
Medi adanseɛ sɛ worekyerɛ Ɔsoro Agya mma Yesu Kristo nkyerɛkyerɛ a ɛnyɛ den, a ɛma yɛn ho te wɔ honhom mu na awieeɛ no wɔgye yɛn kɔ Onyankopɔn anim, sɛ yɛne No ne Ne Ba no bɛtena animuonyam mu daapem yɛ adwuma kronkron. Wɔ Yesu Kristo din mu, amen.