Ua piihia te mau hui mana faatere rahi e te mau mana area, te peresideniraa rahi o te Sotaiete Tauturu

Ua piihia e ua paturuhia te mau hui mana faatere rahi apî, te mau hitu ahuru mana area, e te mau melo no te peresideniraa rahi o te Sotaiete Tauturu i te 6 no eperera i roto i te 172raa o te amuiraa rahi o te matahiti.

Ua piihia o Elder Gerald N. Lund e o Elder William R. Walker no te tavini i roto i te pŭpŭ piti o te mau Hitu Ahuru. Ua piihia o Bonnie D. Parkin ei peresideni rahi no te Sotaiete Tauturu, o Kathleen H. Hughes ei tauturu matamua e o Anne C. Pingree ei tauturu piti.

Ua pii-atoa-hia toru ahuru Hitu Ahuru Mana Area apî—13 no te Fenua Marite, piti no Paratira, piti no te Fenua Tapone, e hoê no te mau fenua tataʻitahi i muri nei Ra-Parata, Auteraria, Bolivia, Tireni, Equateur, Peretane, Ghana, Hong Kong, Korea, Niu Terani, Parague, Peru e Urugue.

I roto i ta’na aʻoraa i te tuhaa amuiraa i te poʻipoʻi mahana maa, ua faaite te Peresideni Gordon B. Hinckley i te tupuraa tamau o te ekalesia. Te parau ra oia ia au i te mau manaʻo no niʻa i te ekalesia tei fariihia na roto mai e rave rahi hanere tauasini mau ratere, te feia faatere o te hau, e te mau veʻa i haere mai i roto miti no teie tuʻaro olympique no te tau toʻetoʻe. Ua parau atoa oia no niʻa i te manuïaraa e i te tupuraa no te tufaa moni no te haapiiraa tamau i te avaʻe eperera i mairi, o te tauturu nei i teie taime 2.400 feia apî no te ekalesia i te faatupuraa e te tururaa i te mau nunaa ia roaa te ite.

I roto i te tuhaa amuiraa a te autahuʻaraa, ua aʻo uʻana faahou te peresideni Hinckley no niʻa i te haamani-ino-raa i te mau hoa faaipoipo, te feia paari, e te mau tamarii. “Eiaha roa’tu e vaiiho i teie ohipa ia tupu noa na,” o ta’na ïa i parau.