Te reo o te here
Te titau nei te mau tamarii tataitahi i te parau haapapuraa e, “Ua ite au ia oe. E mea faufaa rahi oe. E manuïa oe. E mea maitai oe.”
Ei metua vahine apî, ua haere atu vau e toʼu hoa e ta maua e pae tamarii, i raro iho i te vaʻu matahiti, i te Fenua Amerika Apatoa. Aita te hoê o matou i ite i to ratou reo, e e mea fifi roa hoi te reira na ta maua tamahine e ono matahiti toʼna. Ua opua maua ia tuu iaʼna i roto i te fare haapiiraa na te mau tamarii e maha noa matahiti, eiaha i roto i te piha haapiiraa na te mau tamarii e pae e aore râ e ono matahiti. Ua manaʻo maua eita paha ïa oia e haamata ia paraparau atu i teie mau tamarii apî iho iaʼna na roto i te reo Potutara.
Area râ, no taʼu nei tamahine, e mea taa ê ihoa toʼna huru i to te tahi atu mau tamarii. E mea fifi roa oia i te mau mahana atoa, e ua peʻapeʻa noa hoi au noʼna i te mau poipoi atoa vau e haere atu ai na muri iho iaʼna i te fare haapiiraa, e a tiai noa ai hoi au iaʼna ia hoʻi mai i te fare i te pae hopea o te mahana.
I te hoê mahana, e mea huru ino te mau tamarii i nia iʼna. Ua taora te tahi pae i te ofaʻi i nia iaʼna, e ua faaooo noa iaʼna, e ua ataata noa hoi iaʼna i te taime faafaaearaa. Ua riʻariʻa oia e ua oto roa hoi, e aita oia i hinaaro ia hoʻi faahou i te fare haapiiraa. A parahi otahi noa ai oia i te vahi hautiraa, aita e tamarii faahou, ua haamanaʻo ihora oia i te mau mea ta maua i haapii iaʼna no nia i te huru moʻemoʻe. Ua haamanaʻo oia e tei pihai noa iho to tatou Metua i te Ao ra i Taʼna mau tamarii, e e tia hoi iaʼna ia pure atu Iaʼna i te mau taime atoa, eiaha i te taime taotoraa anaʻe iho. E taa mai Oia i toʼna manaʻo na roto i te reo o te mafatu. Ua haere atu oia i te hoê poro no te aua hautiraa, e ua piʻo ihora i toʼna upoo i raro e ua faaoti ihora i te hoê pure. Aita oia i taa eaha te mea taʼna e ani, area râ ua ani oia ia faahaere mai i toʼna papa e mama no te paruru iaʼna. I toʼna hoʻiraaʼtu i roto i te piha haapiiraa, ua ô maira te hoê himene Paraimere i roto i toʼna feruriraa.
E haere pinepine au na roto i te aua
E ohi au i te mau tiare ninamu nehenehe
E ohi haere noa vau i te tiare
Mama, te faahaamanaʻo nei teie mau tiare iaʼu
No nia ia oe na.
(“I Often Go Walking,” Children’s Songbook, 202)
I toʼna araararaa i toʼna mata, ua ite atura oia i te hoê tiare iti e tupu ra i roto i te vahi âfa no te tima. Ua rave oia i te reira e ua tuu i roto i toʼna pute. Aita te fifi i rotopu iaʼna e te tahi atu mau tamarii i ore, tera râ ua hoʻi faahou atu oia i te fare haapiiraa ma te feruri e tei pihai iho toʼna na metua iaʼna.
Ua riro atoa paha te tahi pae o tatou mai teie tamahine taʼu e ono matahiti, ia haere tatou i te tahi mau fenua ê. Peneiaʻe paha teie fenua ê o te haapiiraa ïa i te hoê reo e aore râ i te tahi atu mau mea i te fare haapiiraa. Ua feruri paha outou e tei te hoê fenua ê outou i to outou tomoraa mai i roto i te Ekalesia, noaʼtu e ua bapetizohia outou i to outou iho fenua. A faariro na ia outou mai te hoê melo faafariuhia te huru. E riro paha te tahi mau parau i te mea fifi ia outou, mai te piiraa, te Episekoporaa Faatere Rahi, e te Mau Hui Mana Faatere Rahi o te Ekalesia.
Eaha ïa te huru o to tatou mau misionare o tei maramarama e o tei pahono atu i te mau faaûrûraa a te Varua Moʻa e e parau mau te Ekalesia, e i muri iho ua titauhia ratou ia haapii i te evanelia e te hoê reo apî i te taime hoê? E mea maere mau ia hiʻo i to ratou itoito.
Ua î to tatou oraraa i te mau mea e rave rahi e haafifi nei ia tatou ia haapii i te hoê reo ê. Area râ te vai nei te hoê reo mâtauhia na roto i te ao nei. Mai teie te huru, “Mama, te faahaamanaʻo nei teie mau tiare iaʼu no nia ia oe na.” E auraa to te reira i te hoê tamahine iti. Ua riro te himene Paraimere e te tiare oviri ei pahonoraa no te hoê pure.
I muri iho i to Iesu haapiiraa i te tahi mau taime i roto i te hiero i Bounetifula, ua ite ihora Oia e aita te mau taata i maramarama i te mau parau atoa o Taʼna i parau atu ia ratou. Ua ani atura oia ia ratou ia hoʻi atu i to ratou mau fare e ia feruri maite e ia pure e to ratou mau utuafare e ia faaineine ia hoʻi mai Oia i te mahana i muri ho.
Area râ, ua “hiʻo faahou aʻera toʼna mata i te feia ra, e inaha, tahe atura to ratou roimata, e te hiʻo maite maira ratou iaʼna mai te mea e, ua hinaaro atou ia parahi rii â oia e ratou atoa ra… .
“Ua rave atura oia i ta ratou mau tamarii rii, haamaitai tataihoê ihora ia ratou… .
“E ua parau atura oia te feia ra, na ô atura: A hiʻo na i ta outou mau tamarii rii.
“E te hiʻo aʻera ratou ra … [ite] aʻera ratou i te mau melahi mai te mea ra e, te pou maira ratou no te raʻi mai … na roto i te auahi; e pou maira ratou i raro, e haaati aʻera i te mau tamarii rii ra … e ua tauturu maira te mau melahi ia ratou” (3 Ne. 17:5, 21, 23–24).
No te “haaati” i te auahi no to tatou iteraa papu o te hoê ïa reo o te tia ia tatou paatoa ia haapii e ia maramarama maitai.
Te haapiiraa matamua o te haapiihia i te mau tamarii atoa o te haere ra i te Paraimere na roto ao nei, oia hoi, “E Tamarii Au na te Atua.” E mea papu roa te mau tamarii 18 avaʻe ia hauati mai i to ratou rima a himene ai ratou i teie himene:
Ua ite to tatou Metua i te Ao ra iaʼu
E te au roa iaʼu ia rave.
Ua ite oia i toʼu iʻoa e toʼu vahi faaearaa.
Ua ite au e ua here Oia iaʼu.
(“Heavenly Father Knows Me,” i roto Primary 1: E Tamarii Au na te Atua [1994], 2)
I toʼu haapiiraa i te mau tamarii 12 matahiti i te tahi mau matahiti i mairi aʻenei, ua oomo mai te hoê tamaiti 14 matahiti i te hoê ahu taa ê rii i roto i taʼu piha haapiiraa. E piti matahiti hau atu toʼna i to te tahi atu mau tamarii e e mea huru rahi atoa oia i te tahi atu mau tamarii e 30. Ua ite oioi au e aita o Brian i ite i te taiʻo, e aita atoa oia e haere pinpine nei i te haapiiraa, e ua faaea oia i roto e rave rahi mau utuafare e i roto e rave rahi mau oire.
Ua fatata i te taime faafaaearaa haapiiraa, e ua haere mai au i te fare haapiiraa i te mahana aita taʼu e ohipa. I toʼu haereraaʼtu i roto i te piha haapiiraa, ua ite atura vau ia Brian o te haapʻapeʻa ra i te tahi atu mau tamarii. Ua ani atu vau i te orometua e mono ra iaʼu e mai te mea e nehenehe anei taʼu ia rave mai ia Brian na muri iaʼu. Ua haere atu maua i roto i te piha vairaa buka, ma te paraparau rii no nia iho i te ohipa tuʻeraa popo Marite.
Ua parahi atu maua i nia i te airaa maa, e te tapaʻo noa ra mau i te mau parau hiʻopoaraa a te mau tamarii. Ua ani atu vau iaʼna e ua farii anei oia i te hoê parau tuatapaparaa no taʼna haapiiraa i te matamua.
Ua ueue mai oia i toʼna upoo ma te parau mai, “Aita.” Ua ani atu vau e mai te mea e ua hinaaro anei oia i te hoê.
Ua hiʻo afaro mai oia iaʼu, ma te parau mai, “Mai te mea te faaite ra te reira e tamaiti maitai au.”
Ua faaineine au i te hoê parau taa ê naʼna, ma te faaite i toʼna mau vahi maitai. Ua papai au i toʼna iʻoa taatoa i nia iho, e toʼna aravihi ia faaataata i te tahi atu mau tamarii. Ua faaite atoa vau i nia iho i taua parau ra, e mea au naʼna te ohipa taaro. E mea huru taa ê rii teie parau taʼu i hamani, e ua oaoa roa oia no te reira. Aita i maoro i muri iho i te reira, aita Brian i hoʻi faahou mai i te haapiiraa, ua faanuu atu oia i roto i te tufaa fenua ê. Te tiaturi nei au e te tapea noa ra oia i teie parau i roto i toʼna pute i te mau vahi atoa taʼna e haere, no te mea te faaite ra vau e tamaiti maitai oia.
Te vai ra te mahana e farii tatou paatoa i ta tatou parau hiʻopoaraa hopea. Te tiaturi nei au e faaitehia to tatou mau huru maitai i te tahi e te tahi i nia iho i te reira. Te titau nei te mau tamarii tataitahi i te parau haapapuraa e, “Ua ite au ia oe. E mea faufaa rahi oe. E manuïa oe. E mea maitai oe.”
E mea au roa naʼu te aamu o te mau tamarii pionie. Ua faaroo pinepine tatou i te mau parau no te mau metua i te haereraa mai i Roto Miti. Area râ i roto i te mau parau no te hoê himene Paraimere,
Ia feruri au i te mau pionie,
E feruri au i te mau vahine e te mau tane itoito.
E mea au atoa ia haamanaʻo e te vai atoa ra te mau tamarii;
Ua hinaaro vau ia riro ei tamarii i taua taime ra.”
(“Whenever I Think about Pioneers,” Children’s Songbook, 222)
Te faaite ra Susan Madsen i te aamu no nia ia Agnes Caldwell i roto i te pŭpŭ i parauhia, “Willie Handcart Company.” Ua roaahia ratou e te hiona rahi e ua poʻia e ua toʻetoʻe roa ratou. Ua tae atu te mau pereoo maa e te ahu taoto no te tauturu ia ratou, aita râ i navaʻi te mau pereoo no te faauta i te mau taata maʻi atoa. Noaʼtu te mau tautururaa i tae mai, e mea titauhia i te pae rahi ia faaitoito noa i te haere na raro e rave rahi maile e tae atu ai i te peho no Roto Miti.
E iva matahiti to Agnes e e mea paruparu roa oia ia haere noa. Ua ite mai te taata aratai pereoo i toʼna itoito ia pee noa i te mau pereoo puto e ua ani atu iaʼna e mai te mea ua hinaaro anei oia ia haere mai i nia i te pereoo. E teie ta taua tamahine ra mau parau i faaite i muri iho.
“I taua taime ra, ua faatoro mai teie taata i toʼna rima, e ua tapea mai oia i toʼu rima e no reira e mea tia iaʼu horo noa na muri iho … e ua paruparu roa hoi toʼu na avae. A horoa noa ai au, ua na ô ihora vau i roto iaʼu iho i taua taime ra, o teie ïa te hoê taata ino roa. I taua iho taime ra, ua tapea teie taata, e ua huti atu iaʼu i nia i te pereoo. Ua tapoʻi oia iaʼu i te ahu taoto … no te tamahanahana iaʼu. I teie taime ua taui ihora toʼu feruriraa, e ua ite ihora vau e ua tauturu mai oia iaʼu i roto i teie ati toʻetoʻe rahi na roto i te raveraaʼtu iaʼu i nia i te pereoo” (i roto I Walked to Zion [1994], 59).
Ua faahoro noa teie taata faatere pereoo i teie tamahine iti no te hoê taime roa e ma te vitiviti, ia tia i toʼna toto ia tere maitai na roto i te tino e te avae. Ua na reira teie taata i teie tamahine ia tia iaʼna ia tauturau iaʼna iho.
I teie mahana te vai atoa nei te mau fifi rahi e tupu nei i nia iho i ta tatou mau tamarii. Te ite nei ratou i te mau tamataraa e rave rahi. E mea tia ia tatou ia faaitoito maitai ia ratou ia amo i teie mau hopoia rahi e ia haapuai maitai hoi ia ratou ia tia ia ratou ia farii i te oaoa. I te tahi mau taime, e mea tia ia tatou ia horo e ia pee atu i te faaroo o ta tatou mau tamarii.
I roto i te 3 Nephi i te hoê taime a haamaitai ai te Mesia i taʼna mau pĭpĭ, ua “mauruuru atura taʼna mata ia ratou, e anaanaʼtura te maramarama no toʼna mata i nia ia ratou” (3 Ne. 19:25).
Te faaite mau ra te mata mauruuru e e mea maitai outou. Te tamata nei te mau tamarii ia riro mai ia Iesu. Te hinaaro nei ratou ia riro mai te hoê taata mata ataata. Te hinaaro nei ratou ia riro mai te hoê taata o te pahono oaoa mai ia ratou.
Te na ô ra te Peresideni Hinckley, “Te hinaaro nei te mau tamarii i te maramarama. Te hinaaro nei ratou i te oaoa. Te hinaaro nei ratou i te here e te tautururaa” (“Save the Children,” Ensign, Nov. 1994, 54).
O teie hoi ïa te reo no te haapiiraa evanelia i ta tatou mau tamarii. Noaʼtu te huru o to outou reo, a haapii atu e a paraparau atu i te reo no te pure e te iteraa papu, ia tia i te mau melahi no te raʻi e no te fenua nei ia haaati e ia tauturu mai ia tatou. Te hinaaro nei tatou i te mau taata tauturu o tei ite i te reo no te haamauruuru e no te faahoaraa. E mea tia ia tatou ia hiʻopoa tamau i te huru pae varua no te haapapu i to tatou maitai i roto i te hiʻoraa o vetahi ê. E haamaitairaa rahi ia faatia i te mau tamarii ia horo atea i raro aʻe i to ratou iho puai, no te haapuai i to ratou iho iteraa papu, e e mea tia ia tatou ia haamauruuru atu ia ratou e ia puʻohu ia ratou i roto i te ahu taoto no to tatou here i roto i teie oraraa e i roto i te reo o te ao nei, oia hoi, te here.
Te haamauruuru nei au no te mau haamaitairaa rahi ia “hiʻo atu i [ta tatou] mau tamarii rii.” Ua hinaaro vau ia haamanaʻo noa e ua haere atoa mai te mau tamarii. Na roto i te iʻoa o Iesu Mesia, amene.