Valaauina ma Filifilia
O i latou e valaauina, lagolagoina ma vaetofia i tofiga ua i ai le aia mo la tatou lagolago.
O’u uso pele o le perisitua, faamolemole ia talia mai la matou faafetai mo mea uma o loo outou faia e tulei ai i luma le galuega a le Alii i le lalolagi atoa. Ou te fia tautala e uiga i tofi paia o taitai perisitua o e ua “valaauina ma filifilia”1 e taitaiina le Ekalesia i nei aso. O se tausaga faapitoa lenei mo ni mafuaaga se lua: muamua, o loo tatou faamanatuina le 200 tausaga o le soifua mai o le Perofeta o Iosefa Samita ia Tesema o le tausaga nei, ma lona lua, sa faamanatuina le lona 95 o tausaga o le soifua o Peresitene Gordon B. Hinckley ia Iuni na mavae atu nei. Ou te molimau atu o le Perofeta o Iosefa Samita na valaauina ma filifilia e avea ma uluai perofeta o lenei tisipenisione, ma o Peresitene Gordon B. Hinckley o le perofeta, tagatavaai, ma le tali faaaliga o loo i ai nei o lenei Ekalesia.
Ina ua faatalanoaina e Mike Wallace ia Peresitene Hinckley i nai tausaga ua mavae atu mo le polokalama a le televise o le 60 Minute, na ia faapea atu ai, “[O le a fai mai tagata] o lenei lotu o loo faafoeina e ni toeaiina.” Na tali atu i ai Peresitene Hinckley, “Pe le matagofie ea le i ai o se tagata ua matua i le faauluuluga—o se tagata e loloto le tofa e le fesouaiina gofie e matagi o mataupu eseese?”2 O lea afai e i ai se tasi o outou ua manatu o le taitai o loo i ai nei ua matua tele mo le taitaiga o le Ekalesia, atonu o le a tatau ona tuuina atu e Peresitene Hinckley nisi fautuaga ia te outou e uiga i le atamai lea e maua mai le matua o le soifua!
Mai le 102 o Aposetolo ua valaauina i lenei tisipenisione, e na o le 13 e umi atu le taimi na auauna ai nai lo Peresitene Hinckley. E umi atu lana tautua i le avea ai ma se Aposetolo nai lo Polika Iaga, Peresitene Hunter, Peresitene Lee, Peresitene Kimball, ma le toatele o isi. E matagofie na’ua le mauaina o lana taitaiga musuia. Faamolemole faamagalo mai au i lo’u faapea atu ou te lagonaina i nisi taimi e pei ua ou tu lalata i le oti. I le 85, o tausaga, o au e lona tolu le matua i le Au Pulega Aoao uma o loo soifua. Ou te lei sailia lenei mamalu. E na o lo’u ola lava.
Ou te talitonu e le’i i ai lava i le talafaasolopito o le Ekalesia se lotogatasi tele, nai lo la matou Usoga o le Au Peresitene Sili, o le Korama a le Toasefululua, ma isi Pulega Aoao o le Ekalesia, o e ua valaauina ma filifilia ma e o loo taitaiina nei le Ekalesia. Ou te talitonu ua matuai lava faamaoniga vaaia o lenei mea. O taitai o le malo faalelalolagi o le Atua o loo i ai nei, ua matuai umi atu ona faamanuiaina i le taitaiga musuia a le Faaola nai lo se isi lava vaega. O i matou o le vaega e sili ona matutua ua taitaia le Ekalesia.
O la matou mafutaga ma nisi o nei alii mo le lata atu i le afa seneturi ua faa-agavaaina ai a’u, ma e ou te manatu, ou te faapea atu ma le mautinoa o o’u Uso, e leai se isi e le aofia ai, o ni alii e lelei, mamalu, ma faatuatuaina. Ua ou iloa o latou loto. O i latou o auauna a le Alii. E na o le pau lo latou manao o le galulue lea i o latou valaauga maoae ma fausia le Malo o le Atua i le lalolagi. O o’u Uso o e o loo auauna atu i lenei aso ma lenei taimi ua uma ona faamaoniaina, tofotofoina, ma e faamaoni. O nisi e le o toe tutusa le malosi faaletino e pei ona sa i ai, ae o o latou loto e ese le mama, o o latou aafiaga e maoae, o o latou mafaufau e manino, ma o lo latou atamai faaleagaga e matuai loloto, lea e maua ai lava le mafanafana i le na o lou i ai faatasi ma i latou.
Sa faalotomaulaloina ma lofituina au, ina ua valaauina au e avea ma se Fesoasoani i Aposetolo e Toasefululua i le 33 tausaga ua mavae. I nai aso mulimuli ane na fautuaina ai au e Peresitene Hugh B. Brown o le mea e sili ona taua e tatau ona ou faia o le lotogatasi lea ma le Usoga. E lei auiliiliina mai e Peresitene Brown. Na ona ia faapea mai lava, “Pipii i le Usoga.” Na ou faaliliuina o lona uiga e tatau ona ou mulimuli i fautuaga ma le taitaiga a le Peresitene o le Ekalesia, o le Au Peresitene Sili, ma le Korama a le Toasefululua. O le mea lena na tupu ai se lagona ootia ou te manao e faia ma lo’u loto atoa.
Atonu e le malilie i ai isi i lena fautuaga, ae e manaomia ona mafaufau ma le faaeteete i ai. Na ou faaiuina ai faapea o le taitaiga faaleagaga e matuai faalagolago tele i le lotogatasi ma le Peresitene o le Ekalesia, ma le Korama a le Toasefululua—o e uma ua lagolagoina, e pei ona sa faia i le aso, o ni perofeta, tagatavaai, ma tali faaaliga. Ou te le iloa pe mafai faapefea ona tatou faamoemoe ina ia lotogatasi ma le Agaga o le Alii pe afai tatou te le o lotogatasi ma le Peresitene o le Ekalesia ma isi perofeta, tagatavaai, ma tali faaaliga.
A o avea a’u ma se tiakono, na ave ai ma’ua ma lo’u uso matua e lo ma tama i se sauniga aoao a le au perisitua i le Tapeneko. Ou te manatua lo’u faagaeetia i le i ai faatasi, mo le taimi muamua lava, ma le perofeta a le Atua, o Peresitene Heber J. Grant, ma isi perofeta ma Aposetolo. Sa ou faalogo ma le toto’a i a latou savali ma manatua i lo’u loto mea na latou saunoa ai. I le tele o tausaga sa toe aumaia ai a latou mataupu i le tele o taimi. Ou te faamoemoe o nisi o na mataupu o le a toe tuuina atu foi i lenei konafesi. E taua mo lo tatou faaolataga, ma tatou te moomia ai le saga faia pea lava pea.
Talu mai le amataga o le talafaasolopito o le lalolagi ua faamaumauina ai le tele o faataitaiga o i latou o e na le lotogatasi ma perofeta. I le popofou o lo tatou tisipenisione sa i ai nisi o le Toasefululua, o le mea e faanoanoa ai, sa le tumau lo latou faamaoni i le Perofeta o Iosefa Samita. O se tasi o i latou nei o Lyman E. Johnson, o se sui o le uluai Korama a le Toasefululua o le na tape lona igoa ona o se amioga le tonu. Sa matuai faanoanoa o ia i lona pau faaleagaga. Na fai mai o ia: “Semanu ou te tuuina atu lo’u lima taumatau ina ia tipieseina, pe a na mafai ona ou toe talitonu i ai. Ona toe faatumulia lea o au i le olioli ma le fiafia. Sa mananaia a’u miti. Ina ua ou ala ae i le taeao sa tumu lo’u agaga i le fiafia. Sa ou fiafia i le ao ma le po, ua tumu i le filemu ma le olioli ma le faafetai. Ae o lenei ua pogisa, tiga, faanoanoa, puapuaga i le mea e gata mai ai. Ou te lei toe vaaia lava se taimi fiafia talu mai lena taimi.”3 Na maliu o ia i se faalavelave a o faasee i le 1859 i le 45 o tausaga.
Na valaauina foi Luke S. Johnson i le uluai Korama a le Toasefululua i le 1835. O lona mausali faaleagaga na faavaivaia ona o ni faafitauli i mea tau tupe i le 1837. I le toe tepa i tua mulimuli ane na ia faapea mai ai: “Sa faapogisaina lo’u mafaufau, ma sa tuua ai au e sailia lo’u lava ala. Na ou le toe mauaina le Agaga o le Atua, na ou lafoaiina lo’u tiute; o le taunuuga, i se Konafesi na faia i Katelani, Setema 3, 1837, … sa vavaeeseina au mai le Ekalesia.” E oo mai ia Tesema 1837 ua auai o ia i le au liliuese e tetee faalauaitele i le Ekalesia ma sa tape lona igoa ona o le liliuese i le 1838. E valu tausaga o galue faafomai o ia i Katelani. O le 1846 na toe foi mai ai o ia ma lona aiga e faaaumea ma le Au Paia, Fai mai o ia: “Sa ou tu i autafa o le auala ma ua taumamao ese mai le galuega a le Alii. Ae o lo’u loto o loo i ai i nei tagata. Sa ou fia mafuta ma le au paia; fia o faatasi ma i latou i le vao ma faaauau faatasi ma i latou seia oo i le iuga.” Na toe papatisoina o ia i le masina o Mati 1846 ma malaga mai i sisifo ma le uluai vaega o paionia i le 1847. Na maliu o ia i le Aai o Sate Leki i le 1861 o se uso toaga o le Ekalesia, i le 54 o tausaga.4
O la’u fautuaga i tagata o le Ekalesia ia lagolago le Peresitene o le Ekalesia, le Au Peresitene Sili, o le Korama a le Toasefululua, ma isi pulega aoao ma o tatou loto ma agaga atoa. Afai tatou te faia, o le a tatou i ai i se uafu saogalemu.
Na saunoa Peresitene Polika Iaga e faapea na te toe manatua le tele o taimi e saunoa ai le Perofeta o Iosefa Samita e faapea sa ia “tatalo i taimi uma, faatinoina lona faatuatua, ola ai i lona talitonuga, ma faalauteleina lona valaauga, ina ia maua ai ni asiasiga a le Alii, ma ia tausia o ia lava ina ia tumau i le faatuatua.”5 O i tatou uma lava e mafai ona iloa o le a lu’itauina lo tatou faatuatua. O nei lu’itau e mafai ona auala eseese mai. Atonu e te le fiafia i fautuaga e tuuina atu ia te oe e taitai o le Ekalesia. Latou te le o taumafai ia lauiloa. O loo latou taumafai e fesoasoani ia te oe ina ia aloese mai mala ma faanoanoaga e oo mai ona o le le usiusitai i tulafono a le Atua.
E manaomia foi la tatou lagolago ma le fesoasoani atu i o tatou taitai i le lotoifale aua o i latou foi ua “valaauina ma filifilia.” E mafai e tagata uma lava o lenei Ekalesia ona maua se fautuaga mai se epikopo po o se peresitene o le paranesi, po o se peresitene o se siteki po o se misiona, ma le Peresitene o le Ekalesia ma ona uso a taitai. E leai ma se tasi o nei uso na talosaga mo lona valaauga. E leai se tasi e atoatoa. Ae peitai o i latou o auauna a le Alii, na valaauina e Ia e ala ia i latou ua faatagaina i musumusuga. O i latou e valaauina, lagolagoina ma vaetofia i tofiga ua i ai le aia mo la tatou lagolago.
Ou te faamemelo ma faaaloalo i epikopo uma sa ou i ai [i a latou taitaiga]. Ou te lei taumafai e fesiligia la latou taitaiga ma na ou lagonaina o le lagolagoina ma le mulimuli ia latou fautuaga sa puipuia ai au mai “pepelo a tagata, ma togafiti leaga ua saunia e faasese ai.”6 Na mafua ona o nei taitai uma na valaauina ma filifilia sa i ai le aia e maua ai faaaliga faalelagi lea e oo mai faatasi ma le valaauga. O le le faaaloalo mo taitai faalelotu na tupu ai le mafatia i le vaivai faaleagaga ma le pau. E le tatau ona tatou amanaiaina ni tulaga le atoatoa, o ni pona, po o ni sese, po o ni vaivaiga o alii o e ua valaauina e pulefaamalumalu ia i tatou, ae lagolagoina le tofi o loo latou umia.
I le tele o tausaga ua mavae sa matou masani ai i le faia o sailiga tupe i a matou uarota mo le totogi o mea eseese ma isi tupe faaalu ma gaoioiga i le lotoifale lea ua totogiina nei i tupe lautele a le Ekalesia ma le paketi alauni a le iunite i le lotoifale. Sa fai a matou pasā, o faaaliga, taumafataga i le afiafi, ma isi gaoioiga su’etupe. Sa i ai i le taimi lena i lau uarota se epikopo maelega, lelei, ma le agalelei.
Na iloa mai i se tagata o se uarota tuaoi e faapea e i ai se masini e tauai i ai polo ona masaa ifo lea o se pesini vai, o se gaoioiga lelei lea mo le sailia o tupe. E totogi e tagata e faatinoina se tupe ina ia tauai atu ai ni polo peisipolo i se matati’a o se lima uamea. Afai e tau tonu i le ogatotonu, ona masaa ifo loa lea o se pesini vai malulu i le tagata o loo nofo ai i le nofoa o le masini. Na fuafua la matou uarota e faaaoga le masini lenei, ma sa fautuaina e se tasi o le uarota, o le a toatele tagata e totogi ni tupe mo ni polo e tauai pe afai o le a manao le epikopo e saofai i le nofoa. O lo matou epikopo o se tagata e fiafia tele e faamalie isi tagata, ma e talu ai ona o ia o loo faafoeina le gaoioiga e sue ai ia tupe, o lea na finagalo malie ai e nofo i le nofoa. E lei umi ae amata ona faatauina ia polo ma tauai atu i le matati’a. O nisi na tau tonu lava i le matati’a, ma sa matuai susu pala le epikopo. Ina ua mavae le afa itula o lenei faiga, sa amata ona tetete [le epikopo] i le maalili.
E ui ina sa manatu nisi o tagata o se mea matuai malie tele lea, ae sa matuai le fiafia lava lo’u tama ona ua ta’ufaatauvaaina le tofi o le epikopo ma faalumaina po o le le faaaloalogia foi. E ui o le sailiga tupe sa faamoemoe mo se mafuaaga lelei, ae mafai lava ona ou manatuaina le lagona matamuli ona o nisi o tagata latou te lei faaalia le faaaloalo mo le tofi o le epikopo ma le tagata o le sa tautuaina lelei i matou i le ao ma le po, i le avea ai ma o matou leoleo mamoe lelei. I le avea ai ma e ua umia le perisitua a le Atua, e tatau ona tatou faia se faataitaiga o le lagolagoina lea o taitai o le Ekalesia i o tatou aiga, o a tatou uo, ma e tatou te masani.
O tusitusiga paia e faapea foi i Pulega Aoao o le Ekalesia ma taitai i le lotoifale, o loo tuuina atu se talipupuni o fautuaga ma le taitaiga mo tagata o le Ekalesia. Mo se faataitaiga, i lo’u olaga atoa sa uunaia ai e le Usoga mai lenei pulelaa ma isi pulelaa, o tatou tagata ina ia ola e tusa ma a latou tupe maua, ia aloese mai le nofo aitalafu, ma teu sina seleni mo aso leaga, aua e oo mai lava aso leaga. Sa ou ola i taimi sa matuai faigata ai le tamaoaiga, e pei o le Pau o le Tamaoaiga ma le Taua Lona II a le Lalolagi. O mea na ou oo i ai na ou le fefe ai e fai le mea ou te mafaia e puipuia ai au ma lo’u aiga mai taunuuga o mala faapea. Ou te faafetai i le Usoga mo lenei fautuaga atamai.
O le a le taitaiseseina lava e le Peresitene o le Ekalesia ia tagata o le Ekalesia. O le a le tupu lava. E atoatoa le lagolagoina o Peresitene Hinckley e ona fesoasoani, faapea foi i le Korama a le Toasefululua, o Korama a le Au Fitugafulu, ma le Au Epikopo Pulefaamalumalu. O se taunuuga, e pei ona ou ta’ua muamua, ua faapea ona i ai se alofa faapitoa ma le lotogatasi i aufono pulefaamalumalu a le Ekalesia mo lo tatou Peresitene faapea ma isi.
O le perisitua a le Atua o se talipupuni. O se talipupuni e puipuia ai mai mea faatiapolo o le lalolagi. E ao ona tausisia le mama o lena talipupuni; a leai, o le a faaitiitia la tatou vaai mamao i lo tatou faamoemoega ma mea mata’utia o loo siomia ai i tatou. O le amiotonu o le tagata lava ia, e faamama ai, peitai e le o tagata uma foi o le a totogiina le tau ina ia tausisia ai le mama o a latou talipupuni. Ua fetalai mai le Alii, “Aua e toatele e ua talaiina, a e toaitiiti e ua filifilia.”7 E valaauina i tatou, pe a faae’e mai lima i luga o o tatou ulu ma tuuina mai le perisitua, ae e le filifilia i tatou seia vagana ua tatou faaali atu i le Atua la tatou amiotonu, o lo tatou faatuatua, ma la tatou tautinoga.
Uso e, e moni lenei galuega. Na vaai lava Iosefa Samita i le Tama ma le Alo, ma sa ia faalogo ma mulimuli i a La’ua faatonuga. O le amataga lena o lenei galuega tele, o le tiutetauave mo lea galuega ua i o tatou luga lea. E tuuina atu ai la’u molimau paia i lona mamalu, i le suafa o Iesu Keriso, amene.