Haʻu ʻo Fanongo ki he Leʻo ʻo e Palōfitá
Ko ha Pōpoaki meia Misitī
Mei ha lea ʻi he konifelenisi lahi ʻo ʻEpeleli 2007.
Lolotonga e pōpoaki ne u fai ʻi he konifelenisi lahi ʻi ʻOkatopa 1975, ne ueʻi au ke u lea kau ki ha kiʻi taʻahine ʻulu kelo loloa naʻe tangutu ʻi he tafaʻaki ki ʻolunga ʻo e Tāpanekalé. Naʻá ku taki e tokanga ʻa e haʻofangá kiate ia peá u ongoʻi naʻe fie maʻu ʻe he kiʻi taʻahiné ni ʻa e pōpoaki naʻá ku fakakaukau ke fakahokó.
ʻI he ʻosi ʻa e fakatahaʻangá, ne u foki ki hoku ʻōfisí ʻoku talitali ange ai ha kiʻi taʻahine ko hono hingoá ko Misitī Uaiti, fakataha mo ʻene ongo kuí mo hono mehikitangá. ʻI heʻeku fakafeʻiloaki kiate kinautolú, naʻá ku fakatokangaʻi ko Misitī ʻa e kiʻi taʻahine naʻe nofo mei he tafaʻaki ki ʻolungá ʻa ia ne u lea kau ki aí.
Naʻá ku ʻilo heni kuo mei hoko hono taʻu valú, pea ʻokú ne hohaʻa pe ʻe papitaiso pe ʻikai. Naʻá ne ongoʻi ʻene fie maʻu ke papitaiso iá, pea fie maʻu foki ʻe heʻene ongo kuí ʻa ia ʻoku nau nofó ke papitaiso, ka naʻe fokotuʻu ange ʻe heʻene faʻeé ʻa ia ʻokú ne māmālohi pē he Siasí ke ne tatali ke hoko hono taʻu 18 kae toki fai ʻene filí. Naʻe ʻosi talaange pē ʻe Misitī ki heʻene ongo kuí, “Kapau te tau ō ki he konifelenisí, mahalo pē ʻe talamai ʻe he Tamai Hēvaní ʻa e meʻa ʻoku totonu ke u faí.”
ʻI he hoko atu ʻemau talanoa he ʻosi ʻa e fakatahaʻangá, naʻe pehē mai ʻe he kui fefine ʻa Misitií kiate au, “ʻOku ou tui pē ʻoku ʻi ai ha meʻa ʻoku fie talaatu ʻe Misitī.” Naʻe pehē mai ʻe he kiʻi taʻahine fakaʻofoʻofá ni, “ʻE Misa Monisoni, naʻá ke tali mai ʻeku fehuʻí ʻi hoʻo lea he konifelenisí. ʻOku ou loto ke u papitaiso!”
Naʻe foki e fāmilí ki Kalefōnia, pea naʻe papitaiso ʻa Misitī mo hilifakinima ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.