Ko e Tohinoa ʻa ʻEku Faʻeé
Naʻe meimei taʻu ʻe nima ʻeku nofo mo ʻeku faʻeé. Naʻá ku fiefia ʻi he lava ke u tokangaʻi ia ʻi he ʻofa mo e loto houngaʻia ʻo hangē pē ko ʻene tokangaʻi au ʻi he ngaahi taʻu lahí. Ka ʻoku ou manatu ki heʻene ngaahi malimalí mo ʻene ngaahi tūkuhuá. Ne u fakaʻamu ke ne toe maʻu mai ʻa e fiefia ko ia naʻá ne ongoʻi heʻema faʻa ʻevá. Naʻe tatau ai pē pe ko e fē ha feituʻu te ma ō ki ai. Naʻe faʻa fakahinohino mai ʻe heʻeku faʻeé e ngaahi matalaʻiʻakaú, ʻa e fanga manupuna naʻe tuʻu he uaea telefoní, pe ko e vaʻinga ʻa e fānaú.
ʻOku ou manatu ki heʻema feohi fiefia heʻema tele patetá, ʻauʻau pīní, mo laukonga fakatahá. Ne u ʻunaloto ke vahevahe mo ia e ngaahi meʻa naʻe hoko heʻeku tupu haké mo ʻoange ha ongoongo ʻo kau ki hoku ngaahi tokouá pea mo hono makapuná. Naʻá ne fiefia maʻu pē he ʻeva ange ʻa e fāmilí, kae fakatautefito ki he makapuná. Ka kuo liliu e meʻa kotoa ʻi heʻene ʻatamai ngalongalo tupu mei heʻene motuʻá. Naʻe ʻikai te ne kei ʻiloʻi au, tuku kehe pē ko ha tokotaha makehe au ʻoku ou tokangaʻi ia.
Ko ha ʻaho faingataʻa ʻeni ʻo e nofo mo e fineʻeikí. ʻI heʻeku feinga atu ke ma talanoá naʻe sio fakamamaʻu mai pē ia ʻo hangē ko ia ʻoku hoko maʻu peé, pea ʻi heʻeku feinga ke tokoniʻi iá naʻá ne sio mai ia hangē ʻoku ʻikai te ne falala kiate aú. Ne u helaʻia mo ongoʻi taʻefiemālie ʻi heʻeku tangutu hifo ʻi he seá ʻo fakakaukaú. Ne u kamata ke lau leʻolahi ha taha ʻo e ngaah tohinoa ʻa ʻeku faʻeé ʻi heʻeku ʻamanaki te ne fiefia ai peá ne manatuʻi ha meʻa. Naʻe taʻeʻaonga ʻeku feingá, ka ʻi he hokohoko atu pē ʻeku laú, naʻe kamata ke u manatuʻi e ngaahi meʻa kuo ngalo ʻiate aú.
Naʻe toutou fakahā ʻe heʻeku faʻeé ʻi he ngaahi peesi ko iá ʻa e fiefia naʻá ne ongoʻi ʻi he taimi naʻe ʻaʻahi ange ai hono fāmilí mo ʻene ongoʻi loto-mamahi ʻi he taimi naʻa nau mavahe aí. Naʻá ne hiki ai ʻene faingataʻaʻia ʻi he taimi naʻe puke ai ʻeku tamaí, pea faifai pē ʻo ne mālōlō ka ne hoko ko ha uitou ʻi hono taʻu 59. Naʻá ne hiki ʻene ʻofa ki heʻeku tamaí mo ʻene hohaʻa koeʻuhi ko hoku tuongaʻane lahí, ʻa ia naʻá ne moʻua ʻi he mahaki tatau pē.
Naʻe hiki ʻe heʻeku faʻeé ʻa e ngaahi meʻa fakafiefia naʻá ne aʻusiá hangē ko e faiako he ngaahi kalasi ʻi he Siasí mo e kau ʻi he ngaahi ʻekitivitī ʻa e kakai lalahi kei talavou teʻeki malí. Naʻá ne hiki ʻa e fiemālie naʻá ne ongoʻi ʻi heʻene ʻalu ke akoʻi tuʻo taha he uike ʻa e ongoongoleleí ki he nofoʻanga ʻo e kau ʻInitia Navahō ʻi Tilikoni, ʻAlesoná. Ne u manatuʻi heni ʻa ʻene hanga maʻu pē ʻo fakamamafaʻi ʻa hono mahuʻinga hono falalaʻia kita ʻi he taimi ʻoku fakafalala mai ai ha tahá. Naʻe faʻa nounou e ngaahi meʻa naʻá ne hikí he taimi ʻe niʻihi tupu mei haʻane tokoni ki ha taha; ʻokú ne fakamanatu mai ʻe ia kiate au ʻene faʻa ʻave meʻakai pe meʻaʻofa ki ha taha pē naʻá ne pehē ʻoku fie maʻu tokoni pe ke fakafiefiaʻi. Taimi lahi naʻá ne hiki ʻa ʻene fakamoʻoni ki he ongoongoleleí.
Naʻe ongo makehe kiate au ʻa ʻene fakahā ʻene ongoʻi loto-mamahi mo loto-hohaʻa ʻi hono fāʻeleʻi mai ʻeku kiʻi taʻahiné ʻoku uesia hono kiʻi ʻatamaí (Downʻs syndrome) mo e ngaahi palopalema fekauʻaki mo iá. Ko e moʻoni pē ko ā naʻá ne fakamoleki ha meimei māhina ʻe taha ki hono fafangaʻi mo tokangaʻi ʻema fānaú lolotonga ia ʻokú ma fefokiʻaki mo hoku husepānití ki falemahaki ʻi hono tafa e mafu ʻo Tēpola Suú mo e ngaahi faingataʻa fekauʻaki mo iá? ʻIo! Pea naʻá ne fai ʻeni ʻokú ne taʻu 70!
Ne u manatu ki heʻene ʻi ai maʻu pē ke tokoniʻi au ʻi heʻeku fie maʻu ʻene tokoní. Ne u ʻilo ʻi he ngaahi taʻu kotoa ko ʻení kapau naʻe ʻikai lava ke ne ʻi ai tonu mo au, ʻe poupouʻi pē au ʻe heʻene ngaahi tohí mo ʻene ngaahi lotú.
ʻI heʻeku hivaʻi ha ngaahi himi ki heʻeku faʻeé he pō ko iá ke fakafiemālieʻi ia ke ne mohé, ne ʻalu hake ha fuʻu ongoʻi ʻofa lahi ki heʻeku faʻē loto-toʻa mo faʻa feilaulaú pea mo ha loto-houngaʻia lahi ʻi he ngaahi lea naʻe hiki ʻi heʻene tohinoá ʻo u toe manatu ai kiate iá.