Ko e Fekumi ʻi Finilaní
Naʻá ku ongoʻi taʻefiemālie mo hoku tokouá he naʻe ʻikai te ma ʻilo pe ko hai ʻema ngaahi kui ʻi he fāmili Laluení. Ko e meʻa pē naʻá ma ʻiloʻí naʻa nau haʻu mei Finilani ki ʻAmelika ʻi he 1901. Ko ia ʻi ʻAokosi ʻo e 2004, naʻa mau fononga atu ai mo hoku tokoua ko Senisí, mo Senitī ʻa ia naʻá ku tokoua ʻakí, pea mo hoku husepāniti ko Sialé ke fekumi ki heʻemau ngaahi kuí.
ʻI heʻemau fekumi ko e teuteu ki heʻemau fonongá, naʻe maʻu ai ʻe Senitī ha lipooti peesi ʻe ua kau ki he ʻapi mo e fale ʻo e fāmili Laluení ʻa ia naʻe langa ʻi he 1605. Ko e fakamatala mamaʻo taha kau ki homau fāmilí naʻe fai ia ʻi he 1569 ʻi he kolo ko Kahaoki (Kauhajoki).
ʻI heʻemau aʻu pē ki Finilaní, naʻa mau totongi ha kā ke mau fakaʻaongaʻi pea mau mavahe hengihengia he ʻaho hono hokó ʻi heʻemau fakaʻuli lōloa ko ia ki Kahaokí. Naʻe faingataʻa hono kumi ʻo Kahaokí, pea ʻi heʻemau pehē ko ia he ʻikai te mau toe ʻiló, kuo fakatokangaʻi atu ʻe Siale ha kiʻi malaʻe vakapuna siʻisiʻi. Naʻa mau lele ki ai ʻo kole tokoni. Naʻe fakaʻaliʻali ange ʻe Senitī ʻemau lipōtí ki ha talavou, pea naʻá ne loto fiemālie ke ʻave kimautolu ki he laipeli he koló. ʻOku ou ʻilo fakapapau naʻe ʻikai te mau mei ʻilo ʻa Kahaoki ʻiate kimautolu pē he naʻe pulipulia ia ʻi ha hala naʻe ʻuluʻakauʻia. Hangē naʻe tataki pē kimautolu ʻe he ʻEikí ʻi heʻemau fonongá.
Naʻe ʻomai ʻe ha finemui ha mape kiate kimautolu ʻi he laipelí, ʻo ne siakaleʻi ʻa e siasi Lūteló mo e faʻitoká. Naʻe faingofua pē hono ʻiloʻi ʻo e falelotú. Hili haʻamau fekumi ʻi ha houa ʻe ua, fakataha mo e tokoni ʻa e faifekaú mo ha kau kalake tokolahi, naʻe telefoni hanau taha ki homau kāinga Laluení ʻo talaange ʻoku ʻi ai ha niʻihi mei ʻAmelika ko e ʻaʻahi mai kiate kinautolu. Naʻa nau ō mai he taimi pē ko iá mo ha ngaahi tohihohoko fakafāmili naʻe aʻu ki he 1550.
Naʻa mau lue takai holo he faʻitoka kuo fakaʻofoʻofa hono tauhí pea ko e tangata tauhi tohi ʻa e siasí naʻe fakatonuleá. Ko e fuofua taimi ʻeni ke tuʻu ai ʻa Senitī ʻi he faʻitoka ʻo ʻene kui tangatá. Naʻá ne sio ʻi hano laʻi tā ki mui ai mo toʻotoʻo ʻene vaioliní. Naʻe ongo moʻoni kiate kimautolu hono hanga ʻe he ongo taʻefiemālie ne mau maʻu ki muʻá ʻo fetongi e mahino naʻa mau maʻú.
Hili ia naʻe ʻave kimautolu ʻe kinautolu ko ʻeni ne mau tokoua ʻakí ki he ʻapi fakafāmilí, ʻa ia naʻe hā hono taá ʻi heʻemau lipooti peesi ʻe uá. Naʻa nau talamai ko e kelekele lahi ʻaupito naʻe maʻu ʻe homau fāmilí. Ko e fuʻu fale fakafāmili lahi moʻoni naʻe ʻi he ʻapi fakafāmilí pea naʻe nofo ai e ngaahi fāmili Laluení ʻo kamata mei he 1550. ʻI he taimi naʻe hū mai ai e kau sōtia Lūsiá ki Kahaokí, naʻa nau fakaʻaongaʻi e falé ko honau ʻapitanga. Naʻa nau tutu e falelotú mo e ngaahi ʻapi nofoʻanga kotoa he feituʻu ko iá. Ne hola e tokotaha kotoa pē, kau ai homau fāmilí, ke hao ki he vaotaá. Hili e mavahe atu mei ai ʻa e kau Lūsiá, naʻe taki ʻemau kui tangatá ʻi hono langa ʻo e falelotu foʻou ko ia ne mau mamata ai ki muʻa angé. Naʻe faifai pē pea vahe e konga kelekele takai ʻi he fale nofoʻangá ʻo fakatau atu.
ʻI he 2005, ne ma toe foki ai mo Senitī ʻo ʻaʻahi kiate kinautolu ne ma tokouaʻaki ʻi Kahaokí mo toe hoko atu ʻema fekumí. ʻI he 2006, ne fakahoko ai ʻemau fuofua fakataha fakafāmili ʻa e fāmili Laluení ʻi ʻAmelika, pea naʻe haʻu ki ai ha toko 15 ʻo e niʻihi ne ma tokoua ʻaki ʻi Finilaní. Naʻe fakamanatu ʻe ha kau mēmipa ʻe toko hivangofulu mā nima ʻo e fāmilí ʻa e moʻui ʻa ʻemau ngaahi kuí.
Meʻa fakafiefia moʻoni ke ʻiloʻi ha hisitōlia fakafāmili lelei mo fakaʻofoʻofa pea toe lahi ange ai hono ʻiloʻi pe ko hai aú mo e fonua naʻá ku haʻu mei aí. Ko e hisitōlia fakafāmilí ko e ngāue ia ʻa e ʻEikí.