Ko e ʻOtu Lea ki he ʻOtu Lea
Mātiu 5:14–16
Naʻe akoʻi kiate kitautolu e he Fakamoʻuí ʻi he Malanga he Moʻungá ʻa e mahuʻinga hono tuku ke ulo e maama ʻo e ongoongoleleí ʻi heʻetau moʻuí.
Maama ʻo Māmaní
“ʻOku finangalo ʻa Sīsū ke ʻiloʻi Ia ʻe he tokotaha kotoa pē ʻiate kitautolu koeʻuhí ko e mālohi ʻo e ʻilo ko iá ke liliu kitautolú pea mo e fiefia taʻe-mafakamatalaʻi ʻokú ne ʻomi ki heʻetau moʻuí. Ka ʻoku fie maʻú ke fotu atu mei he tokotaha fakafoʻituituí ʻa e ivi tākiekina ʻo e ongoongoleleí. ʻOku fie maʻu ke hoko ia ko ha maama ʻokú ne tuli ʻa e fakapoʻulí mei he moʻui ʻa kinautolu ʻoku tau feohí. ʻOku ʻikai fakamoʻui ha taha koeʻuhi ko ia toko taha pē, ʻo hangē pē ia ko e ʻikai ke tutu ha maama koeʻuhí ke lelei ki ai peé.”
ʻEletā Joseph B. Wirthlin ʻo e Kōlomu ʻo e Kau ʻAposetolo ʻe Toko Hongofulu Mā Uá, “Build It Right,” Tambuli, Nov. 1990, 47.
Ko e Kolo ʻOku Tuʻu ʻi ha Moʻunga
Naʻe faʻa langa e ngaahi kolo he kuonga muʻá ʻi ha funga moʻunga ke lahi ange ai hono maluʻi iá mo ʻene malú. ʻE lava pē ke sio mamaʻo atu e kakaí ki ai mo nau ʻiloʻi e feituʻu ke nau hola ki ai ʻo ka hoko ha faingataʻa. ʻOku tatau fēfē ha ākonga ʻa Kalaisi mo ha kolo ʻoku tuʻu ʻi ha moʻunga?
Pūseli
Ko e haʻu ʻa e foʻi lea ko ʻení mei he fua mamafa ʻo e meʻakai kuo fakamōmoá ʻe he kakai Kalisi ʻo e kuonga muʻá (fakafuofua ki he lita ʻe 8.7) pea ʻoku toe ʻuhinga foki ia ki he puha ʻoku fua ʻaki e mamafa ko ʻení. Fakakaukau atu ki hano ʻufiʻufi ha foʻi teʻelango ʻaki ha meʻa lahi pehē hangē ko ha kane.
Tuku Ke Ulo Pehē Hoʻomou Māmá
“ʻE lava ke hoko ʻa e teʻelango kuo tutu ʻe he ʻEikí ʻi he kuonga fakakosipeli ko ʻení ko ha māama ki māmani kotoa, pea ʻi he mamata ʻa e kakai kehé ki heʻetau ngaahi ngāue leleí, ʻe lava ke tupu mei ai haʻanau fakamālōʻia ʻa ʻetau Tamai ʻi Hēvaní pea nau moʻui ʻo muimui ʻi he ngaahi faʻifaʻitakiʻanga kuo nau mamata ki ai ʻi heʻetau moʻuí.
“ʻE lava ke ʻi ai ha kakai tokolahi, ʻo kamata pē ʻiate kitaua, ʻe lava ke nau hoko ko ha kolo ʻoku tuʻu ʻi ha funga moʻunga ʻa ia ʻe mamata pea ako mei ai ʻa e kakaí, pea nau hoko ko ha fuka ki he ngaahi puleʻangá ʻa ia ʻe lava ke maʻu mei ai ʻe he kakai ʻo e māmaní ha mālohi, ko e tupu mei heʻetau moʻui anga-māʻoniʻoni ʻi hotau ngaahi ʻapí, ʻi heʻetau ngaahi ngāue maʻuʻanga moʻuí, pea aʻu pē ki heʻetau ngaahi fakafiefiá.”
Palesiteni Gordon B. Hinckley (1910–2008), “A City Set upon a Hill,” Tambuli, Nov. 1990, 8.
Ngaahi Ngāue Lelei
Lau e fakalea ʻo e himi ko e “Kuó u Fai Ha Lelei?” (Ngaahi Himi, fika 129). Hiki ha ngaahi meʻa ʻe niʻihi te ke lava ʻo fai ke tokoniʻi pe fakafiefiaʻi ai ha taha, pea palani e taimi ke fakahoko aí. Tuku hoʻo lisí ʻi ha feituʻu ʻe faingofua hoʻo sio ki aí.
Mei he ʻētitá: ʻOku ʻikai fakataumuʻa e peesi ko ʻení ke fakamatalaʻi kakato e veesi folofola kuo filí, ka ko ha meʻa ke kamata mei ai hoʻo akó.