Pōpoaki ʻa e Faiako ʻAʻahí

‘Oku Akoʻi Mai ʻe he Ongoongolelei ʻo Sīsū Kalaisí ʻa e Ivi Taʻengata ʻo e Fānau ʻa e ʻOtuá

Akoʻi ʻa e ngaahi potufolofola mo e ngaahi fakamatala te ne feau e ngaahi fie maʻu ʻa e kau fefine ʻokú ke ʻaʻahi ki aí. Fakamoʻoni ʻo kau ki he tokāteliné. Fakaafeʻi ʻa kinautolu ʻokú ke akoʻí ke nau vahevahe atu ʻa e meʻa naʻa nau ongoʻi mo akó.

Ko e Hā Hoku Ivi Taʻengatá?

ʻEletā Lāsolo M. Nalesoni ʻo e Kōlomu ʻo e Kau ʻAposetolo ʻe Toko Hongofulu Mā Uá: “Ko e fakapale māʻolunga taha ʻo ha fefiné ʻe maʻu ia ʻi heʻene tuʻu hake ʻo fakahoko ʻa e meʻa naʻe fakataumuʻa ia ki aí ʻi heʻene hoko ko ha ʻofefine moʻui mateaki ʻo e ʻOtuá. Kuó Ne talaʻofaʻaki ki he Kāingalotu moʻui angatonu kotoa pē ha taloni, ngaahi puleʻanga, ngaahi puleʻanga fakapilinisi, nāunau, moʻui taʻe-faʻa-maté mo e moʻui taʻengatá. (Vakai, Loma 2:7; T&F 75:5; 128:12, 23; 132:19.) Ko e ivi ia ʻoku maʻu ʻe he kakai fefine ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOkú ne ʻomi ʻa e hakeakiʻí, ʻoku taʻengata, pea ʻoku faka-ʻOtua ia” (“Woman—Of Infinite Worth,” Ensign, Nov. 1989, 22).

Suli B. Peki, palesiteni lahi ʻo e Fineʻofá: [“Taumaiā ʻe maʻu ʻe he taʻahine mo e fefine kotoa pē ha fakamoʻoni ki he ivi ʻokú ne maʻu ke ne aʻusia e tuʻunga fakafaʻē taʻengatá… . Naʻe ʻikai ke kamata ʻa e fatongia ʻo e fefiné ʻi māmani, pea ʻoku ʻikai ngata ia heni. Ko e fefine ʻokú ne mataʻikoloa ʻaki ʻa e tuʻunga fakafaʻeé ʻi māmaní, te ne mataʻikoloa ʻaki ia ʻi he maama ka haʻú, he ‘ko e potu ʻoku ʻi ai [ʻene] koloá, ʻe ʻi ai foki mo [hono] lotó’ (Mātiu 6:21). ʻI hono fakatupulaki ʻe he taʻahine mo e fefine takitaha ha ongo fakafaʻeé, te ne teuteu ai ki hono misiona fakalangi mo taʻengata ʻo e hoko ko ha faʻeé”] (“Ko e Loto ʻo ha Faʻē,” Liahona, Mē 2004, 76).

Ko e Hā ʻe Lava ʻo Tokoni Ke u Aʻusia Hoku Ivi Taʻengatá?

ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku fakahā ʻe he ʻOtuá ʻEne ʻofa kiate kitautolú ʻaki ʻene ʻomi ʻa e fakahinohino ʻoku tau fie maʻu ke tau fakalakalaka ai pea aʻusia ʻa e tuʻunga ʻe malava ʻe hotau iví… . Kuo hanga ʻe Ia ʻokú Ne ʻafioʻi lahi taha kitautolú, ʻa e meʻa ʻoku malava ʻe hotau iví, mo e ngaahi meʻa te tau malava ke aʻusia ai ʻa e taʻengatá, ʻo tuku mai ha faleʻi fakalangi mo ha ngaahi fekau ʻi Heʻene ngaahi tohi fakahinohinó—ʻa e ngaahi tohi folofola māʻoniʻoní” (“Godʻs Love for His Children,” Ensign, May 1988, 59).

Palesiteni Henelī B. ʻAealingi, Tokoni ʻUluaki ʻi he Kau Palesitenisī ʻUluakí: “Ko e taumuʻa ʻo e ngaahi fakatupu ʻa e ʻOtuá mo ʻEne foaki ʻo e moʻuí kiate kitautolú ke tau lava ai ʻo aʻusia ʻa e ngaahi meʻa ʻe fie maʻu ka tau toe foki atu kiate Ia, ʻo nofo mo Ia ʻi he moʻui taʻengatá. ʻE toki lava pē ʻeni ʻo kapau ʻe liliu hotau ngaahi ʻulungāangá ʻi he tui ki he ʻEiki ko Sīsū Kalaisí, fakatomala moʻoní, mo hono fai mo tauhi ʻo e ngaahi fuakava ʻokú Ne fai ki he fānau kotoa ʻa ʻEne Tamaí ʻo fakafou ʻi he Siasí” (“Education for Real Life,” Ensign, Oct. 2002, 16).

Palesiteni Sione Teila (1808–87): “Ko ʻetau tefitoʻi kaveingá ke teuteuʻi kitautolu, mo hotau hakó mo ʻetau ngaahi kuí ki he ngaahi nofoʻa fakatuʻi, ngaahi pule mo e ngaahi mālohi ʻi he ngaahi maama taʻengatá … ; koeʻuhí … ke lava ʻe kitautolu mo kinautolu, he kuo tau fakahoko e ʻuhinga ho tau fakatupu he māmaní, ʻo mateuteu atu ke feohi mo e ngaahi laumālie ne moʻui ki muʻa ʻi he ngaahi maama taʻengatá; pea ke toe hū atu ki he ʻao ʻo ʻetau Tamaí, ʻa ia ne tau omi mei aí, ʻo tau kau ai ʻi he ngaahi tefitoʻi moʻoni taʻengata ʻoku ʻikai ha ʻilo ki ai ʻa e faʻahinga ʻo e tangatá, ʻo ka ʻikai ha fakahā. ʻOku tau ʻi hení koeʻuhí ko ia; … ʻoku tau langa temipale koeʻuhí ko ia; ʻoku tau maʻu hotau ʻenitaumení koeʻuhí ko ia” (Ngaahi Akonaki ʻa e Kau Palesiteni ʻo e Siasí: Sione Teila [tohi lēsoni ʻa e Lakanga Taulaʻeiki Faka-Melekisētekí mo e Fineʻofá, 2001], 11).

T&F 78:18: “Ke mou fiefia, he te u tataki atu ʻa kimoutolu. ʻOku ʻamoutolu ʻa e puleʻangá pea ʻoku ʻamoutolu ʻa hono ngaahi tāpuakí, pea ʻoku ʻamoutolu ʻa e ngaahi koloa ʻo e taʻengata.”