Taimi Feʻinasiʻakí

ʻE Tamai Hēvani, ʻOkú ke ʻI ai?

FAI ʻE Linda Christensen

“Ko ia ʻoku ou pehē ai kiate kimoutolu, Ko e meʻa kotoa pē ʻoku mou holi ki aí, ʻo ka mou ka lotu, tui ʻoku mou maʻu ia, pea te mou maʻu ia” (Maʻake 11:24).

ʻI he moʻui ʻa Sīsū ʻi he māmaní, naʻe haʻu ha kakai tokolahi ke fanongo ki Heʻene ngaahi leá. Naʻa nau ʻomi ʻenau fānaú ke tāpuakiʻi ʻe Sīsū, ka naʻe fekau ʻe he kau ākongá ke nau ʻalu mei ai. Naʻe pehē ʻe Sīsū, “Tuku ke haʻu kiate au ʻa e tamaiki īkí, pea ʻoua naʻa taʻofi ʻa kinautolu: he ʻoku ʻo e kakai peheé ʻa e puleʻanga ʻo e ʻOtuá” (Maʻake 10:14). Naʻe ʻofa ʻa Sīsū ʻi he fānau īkí peá ne tāpuakiʻi ʻa kinautolu.

ʻOku fakamanatu mai ʻe he foʻi hiva ʻa e Palaimelí “Lotu ʻa ha Kiʻi Tamasiʻí” ʻa e talanoa ko ia ʻi he folofolá mo akoʻi kitautolu fekauʻaki mo e lotú.

Tamai Hēvani, ʻOkú ke ʻi ai?
ʻokú ke ongoʻi nai siʻeku lotú?
ʻOku mamaʻo ʻa Hēvaní,
Ka ʻoku ofi mai heʻeku lotú.
Tamai Hēvani, ʻoku ou manatua
Lea ʻa Sīsū ki he kau ʻākongá:
“Tuku ke haʻu ʻa e fānaú.”
Tamai te u aʻu atu ʻi he lotú.

ʻOku ʻofa ʻa e Tamai Hēvaní ʻiate koe. Ko ʻEne fānau koe. ʻOkú Ne fie maʻu ke ke lotu maʻu pē kiate Ia—ʻi ha faʻahinga taimi mo ha feituʻu pē. ʻOku fakamanatu atu ʻe he veesi hoko ʻo e foʻi hiva ko ʻení ke ke lotu.

Lotu, ʻokú ne ʻi ai;
Lea, ʻoku fanongo mai.
ʻene fānau koe;
ʻĀtakai ʻaki koe ʻene ʻofá.
Ne fanongo atu;
ʻokú ne ʻofa atu.
He ʻoku ʻamoutolu 
ʻa e Puleʻanga ʻo e Langí.

(Tohi Hiva ʻa e Fānaú, 6–7)

ʻEkitivitií

ʻE lava ke ke fakaʻaongaʻi e tohinoa ʻo e lotú ʻi he peesi K4 ke fakamanatuʻi atu ke ke lotu. Toʻo e pēsí, pea tuku ia ʻi ho veʻe mohengá pe ʻi hoʻo folofolá. Valivali e fakatātaá pea hiki e ngaahi meʻa ʻokú ke fie fakamālō ai ki he Tamai Hēvaní ʻi he taimi ʻokú ke lotu aí. ʻOkú Ne ʻofa ʻiate koe mo tali hoʻo ngaahi lotu kotoa pē. ʻOkú Ne tāpuakiʻiʻaki koe ʻa e ngaahi meʻa ʻokú ke fie maʻú.

Ngaahi Fakakaukau ki he Taimi Feʻinasiʻakí

Ki muʻa he taimi feʻinasiʻakí, ʻai ha fanga kiʻi fakaʻilonga faingofua ʻe tolu ke pukepuke ʻe he fānaú: Kole, Kumi, Tukituki. Kamataʻaki e taimi feʻinasiʻakí hano tokoniʻi e fānaú ke nau kumi ʻa e Mātiu 7:7 pea mou lau fakataha ia. Pukepuke hake e fanga kiʻi fakaʻilongá pea mou toe fakamanatu e ngaahi foʻi leá mo e fānaú. Mou ako maʻuloto fakataha e potufolofolá. Fai hoʻo fakamoʻoní ʻoku tau ako mei he folofola ʻo kau ki he lotú. Fakaʻaliʻali e fika 305 he Ngaahi Fakatātā ʻo e Ongoongoleleí (Ko e Lotu ʻa ʻĪnosí) mo e fika 403 (Ko e ʻUluaki Mata-Meʻa-Hā-Maí). Mou talanoa ki he ngaahi fakamatala ko ia ʻa e folofolá kau ki he lotú (vakai, ʻĪnosi 1:1–18; Siosefa Sāmita—Hisitōliá 1:14–20). Tuku ha taimi ke fakamatala ai e fānaú ki ha ngaahi meʻa naʻe hoko kiate kinautolu ʻi heʻenau lotú. Fakaʻosiʻaki hono hivaʻi ha foʻi hiva pe himi kau ki he lotú, pea fai hoʻo fakamoʻoní ki he mālohi ʻo e lotú.
Fakaʻaliʻali e fakatātā fika 3-53 mei he sila fakatātā ʻa e Palaimeli 3 pea fai e talanoa kau ki he lotu ʻa Kalolainé (Palaimeli 3, lēsoni 26, p. 140–146). Mou toe lau e tefitoʻi moʻoni fakauike ʻo e ongoongoleleí: “ʻOku fie maʻu ʻe he Tamai Hēvaní ke u faʻa lotu kiate Ia—ʻi ha taimi pē, ʻi ha feituʻu pē.” Veteki ke tuʻu kehekehe e ngaahi foʻi lea he ongo kupuʻi lea ko ʻení: “ui ki hono huafa māʻoniʻoní” mo e “tangi kiate ia.” Hiki he palakipoé ʻa e ngaahi foʻi lea kuó ke vetevetekí pea kole ki he fānaú ke nau ngāue fakakalasi fakataha ke fokotuʻutuʻu totonu e ongo kupuʻi leá (vakai, “Ngaahi Lea Fokotuʻutuʻu Hala,” ʻOku ʻIkai ha Ui ʻe Mahuʻinga Ange ʻi he Faiakó [1999], 225). Fakaafeʻi kinautolu ke nau sio ki he ʻAlamā 34:17–18 ke tokoni ki heʻenau kumi e talí. Fakamatalaʻi ange ko e ongo kupuʻi lea ko ʻení ko ha ongo founga ia hono fakamatalaʻi ʻo e lotú. Fili e ngaahi foʻi lea mahuʻingá (“ua ʻo e ngaahi ngoué,” “ngaahi ngoué,” “ngaahi falé,” “falé,” mo e ngaahi lea pehē) mei he ʻAlamā 34:17–27 ʻa ia ʻoku nau talamai e ngaahi meʻa ke tau lotuá. Hiki kinautolu he palakipoé. Tuku ke kumi ʻe he fānaú ʻi he folofolá pea mou aleaʻi pe ʻoku kaunga fēfē e potufolola ko ʻení ki heʻenau moʻuí. Fai hoʻo fakamoʻoní ki he mālohi ʻo e lotú ʻi hoʻo moʻuí.