ʻI HE ONGOONGÓ
Lava ʻo Maʻu ha Fakamatala ʻi he FamilySearch ki he kau Sōtia mo e Kau Tautahi ʻo Pilitāniá
ʻOku fengāueʻaki ʻa e FamilySearch mo ha Uepisaiti mei he Ngaahi Fonua Fakatahataha ʻo Pilitāniá (United Kingdom) ke lava ʻo maʻu ʻi he ʻInitanetí ha ngaahi lekooti ʻo e kau sōtia mo e kau tautahi Pilitānia ʻo aʻu pē ki he senituli hongofulu mā valú.
Naʻe maʻu ʻe he Findmypast.com mo e FamilySearch ha laiseni ke na hiki ha tatau fakaʻilekitulōnika ʻa e ngaahi lekooti ʻo e kau sōtia maʻu vāhenga mālōlō ʻo Selesiá (Chelsea) mei he taʻu 1760 ki he 1914. Ko e ngāue ʻe tahá te ne fakaʻatā ke maʻu ʻa e ngaahi lekooti ʻo e kau tautahi ʻo Pilitānia mei he taʻu 1835 ki he 1941. ʻOku lahi e ngaahi lekooti ʻo e senituli uofulú ʻe kau ai ha ngaahi tā ʻo e kau tautahí pea mo e ngaahi fakamatala fakafoʻituitui ʻo ʻenau ngaahi folau tautahí.
Tokoni e Ngaahi Fakahinohino ʻi he Fekumi Hisitōlia Fakafāmilí
Kuo toe tānaki atu ʻe he FamilySearch.org ʻa ʻIngilani mo Sikotilani ki he Kumi ʻo e Ngaahi Lekooti Hoʻo Ngaahi Kuí (Finding Records of Your Ancestors) ki heʻene ngaahi fakahinohino ʻi he ʻInitanetí. ʻOku fakamatalaʻi ʻe he polokalama ko ʻeni ʻoku maʻu taʻetotongí ʻa e sitepu kotoa pē ʻo e founga fekumí pea kau ai mo e ngaahi Uepisaiti mahuʻinga mo e ngaahi fakamatala ki hono kumi mo ngāueʻaki e ngaahi lekooti kehe ʻa e Siasí.
ʻOku kau ʻa e ngaahi lēsoní ʻi ha konga ʻo e ngaahi tohi fakahinohino ʻoku kau ki ai ʻa Tenimaʻake, Finileni, Falanisē, ʻAisileni, ʻĪtali, Mekisikou, Noaue pea mo Suēteni. ʻOku lolotonga maʻu atu ʻa e ngaahi fakahinohinó ʻi he lea faka-Pilitāniá, tukukehe pē ʻa e fakahinohino ki Mekisikoú ʻa ia ʻoku lava ke toe maʻu atu ia ʻi he lea faka-Sipeiní. ʻOku ʻi ai foki e fakahinohino maʻanautolu ko ia ʻoku nau fekumi ki heʻenau ngaahi kui ʻAfilika-ʻAmeliká. ʻE lava ke maʻu ʻa e ngaahi fakahinohino ko ʻení mo ha ngaahi tokoni kehe ʻi he FamilySearch.org. Lomiʻi ʻi he Fekumí (Search), pea toe lomiʻi ʻi he Ngaahi Tokoni Ki he Fekumí (Research Helps).
Lava ke Maʻu ʻa e Malangaʻaki ʻEku Ongoongoleleí ʻi he ʻInitanetí
ʻOku lava ke maʻu atu ʻa e tohi lēsoni Malangaʻaki ʻEku Ongoongoleleí ʻa ia ʻoku ngāueʻaki ʻe he kāingalotú mo e kau faifekaú ʻi he funga ʻo māmaní ʻi he ʻInitanetí pe maʻu ia ʻi he PDF ʻi ha lea faka-fonua ʻe 42. ʻE lava foki ke toe maʻu atu hono hiki tatau ʻi he ongó ʻi he lea faka-Pilitāniá ʻi he MP3. Ke ke lava ʻo maʻu ʻa e ngaahi faile ko ʻení, hū ki he GospelLibrary.lds .org pea fili ʻa e Preach My Gospel mei he “Shortcuts” ʻi he tafaʻaki toʻomataʻú. ʻE lava foki ke toe maʻu mo e ngaahi faile ongo ʻa e Siasí ʻi he www.lds.org/mp3/ newarchive.
Lava ke Maʻu ʻa e Tohi Lēsoni ʻo Siosefa Sāmitá ʻi he MP3
Kuo lava ʻeni ke maʻu ʻa e tohi lēsoni Ngaahi Akonaki ʻa e Kau Palesiteni ʻo e Siasí: Siosefa Sāmita ke fakahū ki hoʻo komipiutá mei he ʻInitanetí ʻi he MP3 ʻi ha ngaahi lea fakafonua ʻe 11. ʻOku lava ke maʻu atu ʻa e ngaahi failé ʻi he lea faka-Kenitoni, Pilitānia, Falanisē, Siamane, ʻĪtali, Siapani, Kōlea, Manitalini, Potukali, Lūsia mo faka-Sipeiní. ʻE lava ke maʻu ʻeni kotoa ʻi he www.lds.org/ mp3/newarchive pe ko e lomiʻi ʻi he Listen ʻi he ngaahi vahe takitaha ʻoku maʻu ʻi he LDS.org Gospel Library.