ʻOku ou Fakahoko Hoku Fatongiá, pea ʻe Fakakakato ʻe he ʻOtuá Hono Toengá
Ko ha tokotaha lahi kei talavou au he taimí ni, ka ne tokoniʻi au heʻeku moʻuí ʻe ha meʻa naʻe hoko heʻeku kei siʻí. Ko ʻeku haʻú mei Lenaiko, ko ha kiʻi kolo ʻi Silei. ʻOku ou manatu loto ki he taimi naʻe palesiteni ai ʻeku faʻē ko Lupí ʻi he Palaimelí. Naʻe kei siʻisiʻi pē homau kiʻi koló he taimi ko iá; ko au tokotaha pē naʻe ʻi he Palaimelí. Naʻá ne faiako ki he kalasí. ʻI heʻema aʻu pē ki ʻapi siasi he pongipongi Sāpaté, ʻokú ne pehē mai leva, “Mālō e lelei Sēini. Ko hoʻo faiako Palaimelí au.” Naʻá ne toutou leaʻaki pē e kupuʻi lea ko ʻení ʻi he uike kotoa. ʻE fai ʻema fua lotu mo ʻema hiva, pea hoko atu leva ʻene lēsoní.
Naʻá ne ʻaʻahi maʻu pē ki he fānau naʻe māmālohí ʻa ia naʻá ne ui ʻi he ʻofa “ko ʻeku kiʻi fānau ʻofeiná.” Naʻá ma faʻa ʻilo e fānau ko ʻení ʻoku nau vaʻinga he halá, pea ʻe taʻofi leva ʻe heʻeku faʻeé e kaá peá ne lea fiefia atu, “ʻEi, tau fetaulaki he lotú he ʻaho Sāpaté.” ʻE ʻio mai honau tokolahi. Ka ʻi he ʻaho Sāpaté, ko au pē mo ʻeku faʻeé ʻe ʻi aí.
Taimi ʻe niʻihi ne u ʻita he ʻikai ke haʻu e fānaú ni ki he lotú. Ne u pehē ange, “Kuo feʻunga ā, fineʻeiki. ʻOku ʻikai ke nau fie haʻu kinautolu.” Ka te ne tali mai pē ʻi he loto ʻofa, “ʻOku fie maʻu ke u fatongiaʻaki hoku uiuiʻí mo kei kātaki pē.”
Naʻe hoko ha meʻa fakaofo ʻi ha ʻaho ʻe taha. Naʻe haʻu ki he lotú ha tamasiʻi ko Kālosi ʻo ne pehē, “Sio ki ai Sisitā Lupi, naʻá ku talaatu pē te u haʻu.” Mālō ia kuó ma toko ua ʻeni. Naʻe fotu mai mei he fofonga ʻo ʻeku faʻeé ʻa e fiefia, pea ko e taimi kotoa pē naʻe haʻu ai ʻa Kālosi ki he kalasí, ʻe pehē mai ʻe heʻeku faʻeé kiate au, “Sio, ʻoku fie maʻu ke tau vilitaki pea ʻe fakakakato ʻe he ʻOtuá hono toé.”
ʻI he ʻaho ʻe taha ne kamata ke haʻu ai ʻa Kālosi mo ha tamasiʻi ko ʻAlekisisi hono hingoá. Naʻa mau saiʻia he vaʻinga toko tolú, pea ʻoku mau kei kaungāmeʻa pē he ʻahó ni. Talu mei he ʻaho ko iá mo e kamata ke tokolahi ange e fānau naʻe haʻú.
Ne tukuange ʻeku faʻeé mei hono uiuiʻí hili ha taʻu ʻe ua mei ai. ʻI he taimi naʻá ne mavahe ai mei he Palaimelí kuo feʻunga mo e fānau ʻe toko 35 naʻa nau maʻu Palaimeli ʻi he uike kotoa pē. Meʻa fakaʻofoʻofa moʻoni ʻa e vakai atu ki he ʻofa ʻa e fānaú ki heʻeku faʻeé ʻo hangē ko ʻene ʻofa kiate kinautolú. Kuo ʻosi ʻeni e taʻu ʻe 10 mei he taimi naʻe tukuange ai iá, pea ʻoku tokolahi ange e Siasí heni he taimí ni, ka kuo teʻeki ai pē lakasi ia ʻe ha taha ʻi heʻene ʻomi ʻa e fānau ʻe toko 35 ki he lotú!
Ko au ʻoku palesiteni Palaimeli he taimi ní. ʻOku ou ʻofa he fānau iiki ko ʻeni kuo nau akoʻi lahi aú. ʻOku ou fakamālō ʻi he uiuiʻi fakaʻofoʻofa ko ʻení pea mo e faʻifaʻitakiʻanga ʻo e loto vilitakí mei heʻeku faʻeé. ʻOku ou ʻilo ʻoku moʻui ʻa e Tamai Hēvaní pea ʻoku moʻoni e lea naʻe fai ʻe heʻeku faʻeé: “ʻOku ou fai hoku fatongiá, pea ʻe fakakakato ʻe he ʻOtuá hono toengá.”