Tokoni ‘a e Tohi Lēsoni Fo‘ou ‘a e Nesilií ke Fakalahi Ange ‘a e Tokanga ki he Ako‘í mo e Akó

ʻE vavé ni pē hano aʻutaki atu ha tohi lēsoni hā fakaʻofoʻofa ki he ngaahi lokiako ʻo e nesilií ʻo e Siasí kotoa.

ʻOku ʻi he tohi lēsoni ko ʻení, Vakai Ki Hoʻomou Fānau Īkí ha lēsoni ʻe 30 ʻa ia ʻoku fakatefito ʻi he tokāteline ʻo e ongoongoleleí pea ʻoku faʻufaʻu pē ia maʻá e ngaahi kalasi nesilií.

Kimuʻá, ne fakahinohinoʻi ʻa e kau faiako ʻi he kalasi nesilií ke nau fakafeʻungaʻi ʻa e ngaahi lēsoni mei he tohi lēsoni Palaimeli 1 ʻa ia ʻoku ngāueʻaki ki he kalasi Palaimeli taʻu tolú ki heʻenau kalasí. ʻOku fakaʻatā leva ʻe he maʻuʻanga tokoni foʻou ko ʻení ʻa e kau faiakó ke nau fai ha lēsoni ʻoku feʻunga ange maʻá e fānau ʻoku māhina 18 ki he taʻu 3.

ʻOku kau ʻi he lēsoni kotoa pē ha fakatātā fakalanu pea mo hano tā laineʻi ʻo ha fakatātā ʻa ia ʻe lava ke hiki hano tatau pe tā hano tatau ke tokoni ki hono fakamālohia ʻo e ngaahi tefitoʻi moʻoni ʻoku akoʻi ʻi he lēsoní. ʻOku kau ʻi he lēsoni kotoa pē ha ngaahi fokotuʻu ki hono ngāueʻaki ʻo ha ngaahi fakatātā, tokoni fakafaiako mo ha ngaahi ʻekitivitī kehe ʻe lava ke fili mei ai.

Ne fokotuʻutuʻu ʻeni ke lava ʻo feliliuaki pea ʻoku ʻomi ʻe he maʻuʻanga tokoní ha faingamālie ki he faiakó ke ne fai e lēsoní ʻi ha faʻahinga hokohoko pē pe fai hokohoko pē ʻi he uiké ke fakamamafaʻi ha tefitoʻi moʻoni ʻoku ʻikai mahinongofua ki he toʻu ko ʻení.

ʻOku ʻi ai e ngaahi tefito hangē ko e “Te u lava ʻo Lotu Ki he Tamai Hēvaní” pe “ʻE Lava ke Nofo Fakataha ʻa Hoku Fāmilí ʻo Taʻengata,” pea ʻe lava ke tokoni ʻa e ngaahi lēsoni ko ʻení ke langa ha fakavaʻe ʻo e mahinó ʻi ha faʻahinga tūkunga pē pea lava ke ngāueʻaki ia ʻe he mātuʻá ko ha meʻangāue ki he akoʻí ʻi ʻapi.

Naʻe pehē ʻe Sisitā Siulolo C. Lani ko e palesiteni lahi ʻo e Palaimelí, “ʻoku mau fiefia ke maʻu ʻa e tohi lēsoni foʻou ko ʻeni ʻa e nesilií. Ne faʻu ia maʻá e fānaú, maʻa ʻenau tupulaki fakalaumālié pea mo e ngaahi meʻa te nau aʻusia fakasōsialé. ʻE toe mahuʻinga tatau pē foki ia ʻi hono ngāueʻaki ʻe he kau taki nesilií mo e mātuʻá.”

ʻE lava ke maʻu ʻa e Vakai Ki Hoʻomou Fānau Īkí ʻi ha lea fakafonua ʻe 27 ʻi he fakaʻosinga ʻo e taʻu 2008 pea ʻe tufaki atu ia ki he kau taki lakanga fakataulaʻeiki fakalotofonuá. ʻE lava foki ke toe maʻu atu ia mei he tufakiʻanga nāunau ʻa e Siasí ʻi he ldscatalog.com.