Ko e Faʻifaʻitakiʻanga ʻa Palesiteni Kalānité
Kalasi, kātaki ʻo paasi mai hoʻomou ʻū laʻipepá ki muʻa.” Naʻe ala atu ʻa Haiti ki hono tuʻá ke toʻo mai e laʻipepa ʻa Molí. Naʻá ne manako ke sio ʻi he mataʻitohi fakaʻofoʻofa ʻa Molí peá ne toki paasi ia ki muʻa. Hangē ne huʻu taha pē mo maau ʻene mataʻitohí. Naʻe sio hifo ʻa Haiti ki heʻene laʻipepa ʻaʻaná pea naʻá ne mā ke sio ha taha ʻi heʻene mataʻitohi koví. Naʻá ne fakahū ʻene laʻipepá ʻi lalo he laʻipepa ʻa Molí peá ne paasi atu ia ki muʻa.
ʻI he lue atu ʻa Haiti ki he matapaá, naʻá ne kole ange ki heʻene faʻeé, “Fineʻeiki, te ke lava ʻo hiki ʻeku ngāue fakaakó maʻaku?” Naʻe mataʻitohi fakaʻofoʻofa foki mo ʻene faʻeé. Mahalo pē kapau ʻe hiki ʻe heʻene faʻeé ʻene ngāue fakaako mei ʻapí, he ʻikai te ne fuʻu ongoʻi mā.
Naʻe fakamatalili ange ʻene faʻeé, “Ko e hā ʻokú ke fie maʻu ai ke u hiki hoʻo ngāue fakaakó? ʻOku fasi ho nimá?”
Naʻe fakamatala ange ʻe Haiti e mataʻitohi fakaʻofoʻofa ʻa Molí ki heʻene faʻeé. “Pehēange mai naʻe toe lahi ange ʻeku ako tohinima he taʻu kuo ʻosí.” Naʻe tangutu hifo ʻa Haiti he tēpilé ʻo hili hono kumukumú ʻi hono nimá.
Naʻe pehē ange ʻe heʻene faʻeé, “ʻOkú ke ʻilo Haiti, te ke mataʻitohi lelei ʻo hangē ko ha toe taha pē kapau te ke ngāue malohi ki ai. Ko e meʻá pē ke ke fakapapauʻi te ke fai ia.”
Naʻe ʻikai ke fuʻu loko tui ki ai ʻa Haiti. Naʻá ne fakakaukauloto atu ki he mataʻitohi ʻa Molí peá ne fakakaukau he ʻikai pē teitei tatau ʻene mataʻitohí ʻaʻana mo e mataʻitohi ʻa Molí.
Naʻe fehuʻi ange ʻe heʻene faʻeé, “ʻOkú ke manatuʻi e palōfita ko Hiipa J. Kalānité?”
Ne hanga hake ʻa Haiti. “ʻIo. Naʻa mau ako ki ai ʻi he Palaimelí.”
“Naʻá ne mataʻitohi kovi ʻaupito heʻene kei siʻí. Naʻá ne fie maʻu lahi ke toe lelei ange ʻene mataʻitohí ko ia naʻá ne toutou ako tohi pē kae ʻoua kuo fakaʻofoʻofa ʻaupito ʻene mataʻitohí peá ne maʻu pale ʻi he mataʻitohi leleí.”
Naʻe ʻohovale ʻaupito ʻa Haiti. Naʻá ne fakaʻapaʻapaʻi e kau palōfitá, ka naʻe ʻikai ʻaupito pē te ne ʻilo ʻe ia naʻe ʻi ai haʻanau ngaahi palopalema hangē ko iá ʻi heʻena kei talavoú. Naʻá ne fakakaukau leva kapau naʻe lava ʻa Hiipa Kalānite ʻo ngāue ke toe lelei ange ʻene mataʻitohí, ta ʻe lava pē mo ia.
Naʻe ngāue mālohi ʻa Haiti ki heʻene mataʻitohí ʻi ʻapiako he ʻaho hono hokó. Naʻe faingataʻa ʻene ʻuluaki kamatá. Naʻe pau ke ne nofo ia he tuku ʻa e akó ʻo fakaʻosi hono hiki ʻene ngaahi lēsoní, ka naʻe fakalotolahiʻi ia ʻe he talanoa kia Palesiteni Hiipa J. Kalānité ke ne kei hokohoko atu pē.
Naʻe ʻosi e ngaahi uike lahi pea toki kamata ke fakatokangaʻi ʻe Haiti ʻoku kiʻi fakalakalaka ange ʻene mataʻitohí. Naʻe kei taimi lahi pē ʻene hiki ʻene ngaahi ngāue fakaakó, ka naʻe fakaʻau pē ke lelei ange ʻene mataʻitohí.
ʻI he ʻaho ʻe taha naʻe fakatokangaʻi ai ʻeni ʻe Moli. Naʻá ne pehē ange, “ʻOku fakaʻofoʻofa ʻaupito hoʻo mataʻitohí, Haiti.”
Naʻe kula e mata ʻo Haití. “Mālō.” Naʻe ʻai ʻene kiʻi malimali.
ʻI he pō ko iá, naʻe fakapipiki ʻe Haiti ha kiʻi tohi ki heʻene faʻee ʻi he ʻaisí. Naʻe faiʻaki ʻeni ha mataʻitohi fakaʻofoʻofa.