Fakakaungāmeʻá
Ko e Fakapulipuli ʻa ʻOumā Ke Vālelei Ai mo e Niʻihi Kehé
ʻOKU LOTU, HIVAʻI E NGAAHI HIVA PALAIMELÍ, MO AKO ʻA E FĀNAU ʻI HE MĀMANÍ KĀTOA KI HE ONGOONGOLELEÍ—ʻO HANGĒ PĒ KO KOÉ! ʻI HE MĀHINA NÍ, TE TAU FEʻILOAKI AI MO ʻOUMĀ SALAKATO ʻO E KAU ‘ĀNGELO ʻI HONITULASÍ.
ʻOku ʻikai ke faʻa vālelei maʻu pē ʻa e fanga manupuná mo e pusí mo e kulií. ʻOku meimei ke tuli maʻu pē ʻe ha taha ʻo kinautolu ha taha ʻo e faʻahinga kehe koeé.
Ka ʻi he ʻapi ʻo e tamasiʻi taʻu hiva ko ʻeni ko ʻOumā Salakato ʻi Honitulasí, ʻoku ʻikai ko ha meʻa foʻou ke sio ʻoku tuʻu e foʻi kakā lanu matá ʻi hono nimá kae sio hifo pē ʻa e pusí mei he ʻató, pe ke ʻalu holo pē ʻa e pusí ʻi honau peito ʻi tuʻá kae tokoto pē ʻa e kulií he veʻe matapaá. Hangē naʻe vālelei pē ʻa e tokotaha kotoa ia.
Naʻe malimali pē ʻa ʻOumā mo fakahū e foʻi kakaa ki hono loto ʻaá ka ne ʻalu ʻo fafanga e fanga moá. ʻOkú ne fiefia ke tokoni ʻi hono tokangaʻi ʻo e fanga manu ʻa honau fāmilí. ʻOku ʻikai ke ngata ʻi he fiefia e mātuʻa ʻa ʻOumā ʻi heʻene tokoní—ka ko e taha foki ia ʻo e ngaahi fakapulipuli ʻa ʻOma ke ne vālelei ai mo e niʻihi kehé.
Ko e Fetauhiʻakí
ʻOku maʻu ʻe he tokotaha kotoa pē ʻi he fāmili Salakató ha faingamālie ke tokoni ai. Ka ko ʻOumā foki ʻoku lahi tahá, pea ʻokú ne ʻiloʻi ʻoku ʻamanaki mai ʻene mātuʻá ke ne tokoni ki hono kiʻi tokoua mo e tuofefine īkí ʻi he taimi te na fie maʻu tokoni aí.
ʻOku mahuʻinga kia ʻOumā ke ne fakaʻapaʻapa ki heʻene mātuʻá mo fakamālohia hono fāmilí. ʻOku fefalala ʻaki e fāmili Salakató he ʻoku ʻikai tokolahi honau kaungāʻapí. Ko e fale ofi taha maí ʻe lue ki ai ʻi ha miniti ʻe 10 nai.
Ko ia neongo ʻoku sio ʻa ʻOumā ki hono ngaahi kaungāmeʻá ʻi ʻapi ako pea ʻi he lotú he ʻaho Sāpaté, ka ʻokú ne fakamoleki ha taimi lahi mo hono kiʻi tokoua taʻu ono ko ʻĀnoló, mo hono kiʻi tuofefine taʻu fā ko Natalaí. ʻOku nau vālelei ʻo hangē pē ko e vālelei ʻenau fanga monumanú.
ʻOku pehē ʻe ʻOumā “ʻOku mau feinga ke ʻoua naʻa mau kē,” he ʻoku fakafiefia ange ʻa e hoko ko e ngaahi kaumeʻá.
Tuku Taimi ke Nau Fakataha Ai
ʻOku lahi ʻaupito e meʻa ke fai ʻe ʻOumā, ʻĀnolo, mo Natalai ʻi he taimi ʻoku nau fakataha aí. ʻOku manako e fāmilí ʻi hono hivaʻi fakataha e ngaahi himí. Ko e himi ʻoku manako taha ai ʻa ʻOmaá ko e “Akoʻi Au Ke u ʻEva he Māmá” (Tohi Hiva ʻa e Fānaú, 70).
ʻOku lahi e fanga kiʻi vaʻinga ʻoku fai ʻe he toko tolú ni. Ko e taha ʻo e ngaahi vaʻinga ʻoku nau manako taha aí ko e langa-toí, ʻo nau toi takai ʻi fale pea mo e ʻuluʻakau ʻoku tuʻu takai ʻi honau ʻapí. Ko e vaʻinga ʻe taha ko e malemalé. ʻOku nau taufetuli takai ʻi he feituʻu ʻataʻatā he tuʻafalé.
Ko e lau ʻeni ʻa ʻĀnolo fekauʻaki mo hono tokoua lahí, “ʻOku ou saiʻia he vaʻinga mo iá.”
Ko e Moʻui ʻi he Teleʻa ʻo e Kau ʻĀngeló
Neongo ʻoku saiʻia ʻa ʻĀnolo ke vaʻinga mo ʻOumā, ka ʻoku fie maʻu ʻe Natalai ia ke na tā fakatātā.
ʻOku fiefia ʻa ʻOumā he tā fakatātā mo valivali ʻaki ʻene ʻū peni kalá. ʻOkú ne angamaheni ʻaki hono tā e funga fonuá, ʻotu moʻungá, mo e falé. Pea ʻoku ʻikai ha ofo ai. ʻOku lahi e ngaahi meʻa fakaʻofoʻofa ke tā fakatātaaʻi ʻi he feituʻu ʻokú ne nofo ai he ʻotu moʻungá ʻofi ki Velei ti ʻEniselesi (Valle ti Angeles), ko ha kolo naʻe nofo ai ha kau tā valivali ʻiloa. Naʻa mo e hingoá, ʻa ia ko hono ʻuhingá ko e “Teleʻa ʻo e Kau ʻĀngeló,” ʻoku fakaʻofoʻofa mo ia.
ʻOku fonu e ngaahi teleʻa mo e ʻotu moʻunga ʻoku nau ʻātakaiʻi e fale ʻo ʻOumaá ʻi he ʻuluʻakau mo e ʻakau matala fakaʻofoʻofá. Ko hono moʻoní, ʻoku nofo e fāmili ʻo ʻOumaá ʻi ha faama matalaʻiʻakau pea ko ʻene tangataʻeikí ʻokú ne tokangaʻi e ngaahi matalaʻiʻakau ko ia ʻe fakatau atu koeʻuhí ko ʻenau fakaʻofoʻofá.
ʻOku fonu e ʻū pepá he ngaahi fakatātā lanu fakaʻofoʻofa ʻa ʻOmaá. Pea ʻoku faʻa nofo mo Natalai ʻi hono tafaʻakí ʻo na valivali.
Ako ke Angaleleí
ʻOku tokoni e vālelei mo e ngāue fakataha ʻa e fāmili ʻo ʻOumaá ke fakamālohia ai kinautolu. Pea pehē foki ki heʻenau ʻalu fakataha ki he lotú mo lau folofola fakatahá.
ʻOku pehē ʻe ʻOumā, “ʻOku lahi e meʻa ʻoku ou ako ʻi he Palaimelí. Ko ha kau faiako lelei ʻaʻakú.”
ʻOku ako ʻa ʻOumā ʻi he Palaimelí ʻo kau kia Sīsū, pea ʻokú ne pehē ʻoku tokoniʻi ia ʻe heʻene ako ʻo kau kia Sīsuú ke ne ʻiloʻi e founga ke ne tokoni ai ki heʻene mātuʻá pea hoko ko ha foha lelei.
ʻOku fakatefito e manako ʻa ʻOumaá ki hono lau e ngaahi talanoa mei he Tohi ʻa Molomoná. ʻOkú ne pehē, “ʻOku ou saiʻia ʻia Nīfai.” Ko e ngaahi talanoa ʻokú ne manako taha aí ko e vaʻa ukameá mo hono foʻu ʻe Nīfai e vaká. Ko ha foha lelei ʻa Nīfai ʻa ia naʻá ne feinga maʻu pē ke fakamālohia hono fāmilí.
ʻOku pehē ʻe ʻOumā ʻi he ʻosi ʻene fafanga moá, “Naʻe talangofua ʻa Nīfai.” Naʻá ne tuku e meʻakai ʻa e moá peá ne kiʻi tatali siʻi ke sio pe ʻoku ʻi ai mo ha toe meʻa kehe ʻe lava ke ne fai pea toki lele ʻo kau he vaʻinga malemalé. “ʻOku ou feinga foki mo au ke u talangofua.”