Walay Paglubad nga mga Istorya sa Ebanghelyo
Ipahinungod ang Inyong mga Buhat
Si Neal A. Maxwell nagserbisyo og duha ka tuig isip assitant ngadto sa Napulog Duha ug sulod sa lima ka tuig sa Kapangulohan sa Seventy sa wala pa siya mapaluyohi isip sakop sa Korum sa Napulog Duha ka mga Apostoles niadtong Oktubre 3, 1981. Siya namatay niadtong Hulyo 21, 2004, didto sa Siyudad sa Salt Lake human sa walo ka tuig nga pakigbisog sa leukemia. Gipamulong ni Elder Maxwell kining walay pagkupas nga sermon kalabut sa pagpahinungod atol sa kinatibuk-ang komperensya niadtong Abril 2002.
Kini nga pakigpulong gitumong ngadto sa dili hingpit apan naningkamot gihapon diha sa mga ginsakupan sa pagtuo. Sa kanunay, ang akong kaugalingon maoy labing nagkinahanglan niini.
Kita may kalagmitan nga maghunahuna kabahin pagpahinungod nga mao lamang ang paghatag, kon gisugo sa langit, sa atong materyal nga mga kabtangan. Apan ang kinatapusan sa pagpahinungod mao ang pagtugyan sa kaugalingon ngadto sa Dios. Kasingkasing, kalag, ug hunahuna mao ang malukpanon nga mga pulong ni Kristo sa paghulagway sa unang kasugoan, nga sa kanunay, dili sa panagsa, sundon (tan-awa sa Mateo 22:37). Kon tumanon, niana ang atong mga buhat, isip resulta, hingpit nga mapahinungod alang sa walay katapusan nga kaayohan sa atong mga kalag (tan-awa sa 2 Nephi 32:9).
Ang mao nga pagkahingpit naglakip sa manunutong pagtagbo sa mga pagbati, mga hunahuna, mga pulong, ug mga binuhatan, ang kaatbang gayud sa panaglagyo. “Kay unsaon pagkasayud sa usa ka tawo sa agalon kinsa siya wala makaalagad, ug kinsa usa ka dili kaila ngadto kaniya, ug layo gikan sa mga lawom nga mga pagbati ug katuyoan sa iyang kasingkasing?” (Mosiah 5:13).
Daghan ang mobaliwala sa pagpahinungod tungod kay kini lisud sabton o lisud buhaton. Ang mga makugihon taliwala kanato, bisan pa niana, nakasinati og balaan nga pagkawala matagbaw tungod kay ang pag-uswag gisagulan og paglangay-langay. Busa, ang mahigugmaong tambag gihatag uban sa panghimatuod niini nga paggiya, pag-awhag sa pagpadayon sa panaw, ug paghupay samtang kita sa tinagsa makasinati sa tinuod nga mga ang-ang sa kalisud.
Paghingpit sa Pagkamanunuton
Ang espirituhanong pagkamanunuton dili makab-ot diha-diha, apan pinaagi sa hinay-hinay nga kauswagan ug pinaagi sa sunod-sunod nga paggamit sa tikanganan nga mga bato. Ang tikanganan nga mga bato gihimo aron tagsa-tagsaon sa paggamit. Sa katapusan ang atong mga kabubut-on “gituhop ngadto sa kabubut-on sa Amahan” samtang kita “mauyunon sa pagdawat … mahimo ingon sa usa ka bata nga motugyan ngadto sa iyang amahan” (Mosiah 15:7; 3:19). Kon dili, bisan pa sa pagpaningkamot, magpadayon kitang mobati nga nabalda tungod sa kaguliyang sa kalibutan.
Mga paghulagway nga naglakip sa ekonomikanhon nga pagpahinungod importante. Sa dihang si Ananias ug si Safira mibaligya sa ilang mga kabtangan, ilang ”gikuhaan ang halin” (tan-awa sa Mga Buhat 5:1–11). Daghan kaayo nato ang hugot nga mokupot sa maong “bahin,” bisan sa paghimo sa atong mga obsesyon sama sa mga kabtangan. Sa ingon, bisan unsa pay gihatag na kanato, ang katapusang porsyon mao ang pinakalisud nga ihatag. Ako uyon, nga ang dili tanan nga pagpahinungod sa atong mga kaugalingon sa gihapon dalaygon apan kini nagpakita, labaw lang og gamay, sa pamalibad nga, “mihatag na man ko” (tan-awa sa James 1:7–8).
Kita mahimong, pananglit, adunay piho nga mga kahanas nga sayop natong gituohan nga ato sa usa ka paagi. Kon kita magpadayon sa paggunit niadto labaw pa kay sa Dios, kita nag-ukon-ukon sa pagsunod sa unang kasugoan. Tungod kay ang Dios mipahulam kanato og “gininhawa … sa matag gutlo,” ang sobrang pagtagad niining mga makabalda wala giawhag! (Mosiah 2:21).
Usa ka babag makita kon kita moserbisyo sa Dios sa hilabihan uban sa panahon og mga kwarta apan sa gihapon mopugong og bahin sa atong mga kaugalingon, nagpakita nga kita dili pa hingpit nga Iya.
Ang uban adunay kalisud kon ang piho nga mga buluhaton moabut diha sa ilang katigulangon. Si Juan Bautista usa ka sumbanan, gani, naghisgot sa nagkadaghan nga panon ni Jesus, “Siya kinahanglan nga magatubo, samtang ako kinahanglan nga magakunhod” (Juan 3:30). Ang sayop nga pagtuo mahitungod sa atong mga buluhaton karon isip mao lamang ang timailhan kon unsa ka dako ang gugma sa Dios kanato nagdugang lamang sa atong pagduha-duha sa pagpadayon. Mga kaigsoonan, ang atong tagsa-tagsa nga katakus balaan nang gipahimutang sa Dios isip “mahinungdanon”; dili kini mag-usab-usab sama sa stock market.
Ang ubang mga tikanganan nga mga bato nagpabilin nga wala magamit tungod kay, sama sa adunahan, matarung nga batan-ong lalaki, kita dili pa andam sa pag-atubang kon unsay kulang pa kanato (tan-awa sa Marcos10:21). Ang nahibilin sa pagkahakog makita pinaagi niana.
Ang pag-ukon-ukon mahitabo sa daghan kaayong mga paagi. Ang terrestrial nga gingharain, pananglit, maglakip sa “madungganon,” nga sa tataw kaayo dili tigsaksi og mga bakak. Apan sa gihapon sila “dili maisug diha sa pagpamatuod ni Jesus” (D&P 76:75, 79). Ang labing maayong paagi sa maisugong pagpamatuod mahitungod ni Jesus mao ang pagkamakanunayon nga mas mahimong sama Kaniya, ug kana nga pagpahinungod nga makapalambo nianang sulundon nga kinaiya (tan-awa sa 3 Nephi 27:27).
Ayaw Pagbutang og Laing mga Dios diha sa atubangan sa Dios
Sa pag-atubang niining gihisgutan nga mga hagit nga akong gihisgutan, ang atong espirituhanong pagkamanunuton dako og ikatabang—usahay makatabang kanato sa “pagtugyan” sa mga butang, bisan ang mortal nga kinabuhi, sa laing mga panahon sa “paghupot,” ug sa lain pang panahon sa paggamit sa sunod nga tikanganan nga bato (tan-awa sa 1 Nephi 8:30).
Apan kon kita kulang sa katarung, ang sunod nga mga lakang ingon og malisud. Bisan og nakahibalo kon giunsa sa pagpanalangin sa Dios ang kaarang Israel sa pag-ikyas gikan sa gamhanan nga Paraon ug sa iyang mga panon, ang kulang og panglantaw nga si Laman ug Lemuel sa gihapon kulang og hugot nga pagtuo sa Dios sa pagtabang kanila batok sa usa ka Laban lamang.
Kita usab mosimang kon kita matinguhaon kaayong mopahimuot niadtong kinsa atong mga labaw sa atong mga trabaho ug anaa sa dagkong mga katungdanan. Ang pagpahimuot sa “laing mga dios” kay sa tinuod nga Dios nakasupak sa unang kasugoan (Exodo 20:3).
Kita usahay manalipod sa atong kaugalingong mga kinaiya ingon og kining gipakita sa laing bahin naglangkob sa atong pagkatawo. Sa ingon, ang pagkatinun-an usa ka “pisikal nga dula,” ingon nga gipamatuod ni Propeta Joseph:
“Ako sama sa usa ka dako, sagalsalon nga bato … ug ang bugtong magpasinaw nga akong makuha mao kon ang usa ka bahin mabagnus pinaagi sa pagkaigo ngadto sa laing butang, nga moigo uban sa nagkakusog nga pwersa. … Sa ingon ako mahimong hamis ug sinaw nga pana diha sa sudlanan sa Makagagahum.”1
Tungod kay kita mas andam moampo kay sa magpahinungod sa atong kaugalingon ngadto sa Dios, ang pagpugong niini nga “bahin” naghikaw sa labing mahait og salabutan sa pagtabang sa mga buhat sa Dios. Layo ra kaayo nga mahisama ni Moises, kinsa nakakat-on sa mga butang nga “wala niya mahunahuna” (Moises 1:10) Apan, sa kasubo, mga kaigsoonan, tungod kay makuti kaayo ang relasyon tali sa kabubut-on ug sa atong pagkatawo, adunay daghan kaayong pag-ukon-ukon. Ang pagtugyan sa salabutan sa tinuod usa ka kadaugan, tungod kay kini ang paagi ang Dios mopauswag kanato sa “mga dalan nga labi pang hataas” (Isaias 55:9).
Sa bali, ang hilabihan nga pagtagad bisan ngadto sa maayong mga butang makapakunhod sa atong debosyon ngadto sa Dios. Sama pananglit, ang usa ka tawo mahimong nalinga pag-ayo sa dula ug sa matang sa pag-atiman sa lawas nga atong makita taliwala kanato. Ang usa ka tawo mahimong motahud sa kinaiyahan ug apan mosalikway sa kinaiya sa Dios. Ang usa ka tawo mahimong adunay dili ordinaryong pagtagad sa maayong musika ug maingon man sa maayong trabaho. Sa mao nga mga kahimtang, ang “mas mahinungdanon nga mga butang” sa kasagaran nakalimtan (Mateo 23:23; tan-awa usab sa 1 Mga Taga-Corinto 2:16). Ang Labing Halangdon lamang mao ang makagiya kanato sa hingpit ngadto sa labing maayo nga mabuhat ninyo ug nako.
Diha sa duha ka mahinungdanon nga mga sugo, si Jesus tataw nga mipahayag pag-ayo, nga ang tanan nagsukad, ug dili ang bali (tan-awa sa Mateo 22:40). Ang unang sugo dili ibaliwala tungod lamang sa atong hilabihan nga pagpaningkamot sa dili kaayo importante, kay kita wala magsimba og mas ubos nga dios.
Ilha ang Kamot sa Dios
Sa dili pa makatagamtam sa mga ani sa matarung nga mga paningkamot, unahon una nato ang pag-ila sa kamot sa Dios. Kondili, ang pagpangatarungan makita, ug kini naglakip sa, “Ang akong gahum ug ang kabaskog sa akong mga kamot maoy naghatag kanako niini nga bahandi” (Deuteronomio 8:17). O, kita “manghambog” sa atong mga kaugalingon, sama sa gibuhat sa karaan nga Israel (gawas sa gituyo nga gamay nga kasundalohan ni Gideon), pinaagi sa pagpanghambog nga “ang akong kaugalingon nga kamot maoy nagluwas kanako” (Mga Maghuhukom 7:2). Ang pagpanghambog sa atong kaugalingong “kamot” nakahimo niini nga mas lisud sa pag-ila sa kamot sa Dios diha sa tanan nga mga butang (tan-awa sa Alma 14:11; D&P 59:21).
Sa usa ka dapit nga gitawag og Meribah, usa sa labing bantugan sukad, nga si Moises, gikapoy sa pagpinangayo sa mga tawo og tubig. Sa makadiyot, si Moises “namulong kanila,” nag-ingon, “Makapaagas ba kami og mga tubig alang kaninyo?” (Salmo 106:33; Numeros 20:10; tan-awa usab sa Deuteronomio 4:21). Ang Ginoo mitudlo sa talagsaon nga si Moises pinaagi sa pagsulti niana nga sayop ug gipadayon siya og pagpapalambo. Kita makahimo usab nga sama ka maaghup ni Moises (tan-awa sa Numeros 12:3).
Si Jesus wala gayud, wala gayud, wala gayud mawala sa Iyang tumong! Bisan og Siya nagpadayon sa paghimo og daghang mga kaayohan, Siya nasayud kanunay nga ang Pag-ula naghulat, nangamuyo uban ang panan-aw, “Amahan, luwasa ako gikan niining taknaa: Dili, alang niining maong tuyo nahiabut ako niining taknaa” (Juan 12:27; tan-awa usab sa 5:30; 6:38).
Samtang kamo ug ako mopalambo og dugang gugma, pagkamainantuson, ug pagkaaghup, mas labi kitang kinahanglang mohatag ngadto sa Dios ug sa mga tawo. Dugang pa, walay lain nga gibutang nga tukma sama kanato sa atong sa kahigayunan sa tawhanong kinabuhi.
Tugotan ta, nga ang tikanganan nga mga bato modala kanato ngadto sa bag-ong teritoryo nga tingali magduha-duha kita sa pagsuhid. Sa ingon, ang malampuson nga tiggamit sa tikanganan nga mga bato mga gamhanan nga tigdasig alang sa nahibilin kanato. Sa kasagaran kita mas maminaw niadtong hilom natong gidayeg. Ang gutom nga usikan nga anak nahinumdom sa mga pagkaon sa iyang panimalay, apan nadani usab siya sa laing mga handumanan, nagpahayag “motindog ug moadto ako sa akong amahan” (Lucas 15:18).
Ang Pagpahinungod Mouli ngadto sa Dios Unsay Iya
Sa pagpaningkamot alang sa hingpit nga pagtugyan, ang atong mga kabubut-on maglangkob sa tanan nga kinahanglang atong ihatag gayud sa Dios. Ang kasagaran nga mga regalo ug ang mga gigikanan niini nga atong ihatag ngadto Kaniya mahimong makatarunganong markahan og “Iuli ngadto sa Nagpadala,” uban sa dakong titik nga N. Bisan kon ang Dios makadawat niining usa ka giuli nga gasa, ang hingpit nga matinud-anon makadawat sa “tanan nga [Iya]” (D&P 84:38). Unsa nga pagbinayloay!
Hangtud nianang higayuna, ang kamatuoran magpabilin: Gihatagan kita sa Dios sa atong mga kinabuhi, sa atong kabubut-on, sa atong mga talento, ug sa atong mga kahigayunan; Siya mihatag kanato sa atong mga kabtangan; Siya mihatag kanato sa lugway sa atong kinabuhi inubanan sa gikinahanglan nga mga pagginhawa (tan-awa sa D&P 64:32). Gigiyahan sa mao nga panglantaw, kita makalikay sa dagkong mga sayop. Ang uban niini dili kaayo makalingaw kay sa pagpaminaw sa double quartet ug masaypan nga Tabernacle Choir.
Dili ikatingala nga si Presidente [Gordon B.] Hinckley … mipasabut sa atong pagkatawo sa pakigsaad, naghatag og gibug-aton sa pakigsaad sa sakrament, ikapulo, ug sa templo, nahisgot sa sakripisyo nga “mao gayud ang lintunganay sa Pag-ula.”2
Ehemplo ni Jesus sa Pagkaaghup
Talagsaong pagkaaghup nakab-ot sa Manluluwas samtang nag-atubang Siya sa kaguol ug panghingutas sa Pag-ula ug “buot nga [Siya] unta dili moinom sa mapait nga kopa, ug mobiya” (D&P 19:18). Sa atong gamay, dili hingpit nga pagbanabana, kita moatubang sa mga pagsulay ug buot nga kini unta kuhaon.
Hunahunaa kini: Unsa ka importante ang pangalagad ni Jesus ko Siya mihimo og dugang mga milagro apan wala ang mas labaw nga milagro sa Gethsemani ug sa Kalbaryo? Ang Iyang mga milagro nakahatag og bulahan nga paglugway sa kinabuhi ug nakapakunhod sa pag-antus — alang sa uban. Apan sa unsa nga paagi kini nga mga milagro makomparar sa labing mahinungdanon nga milagro sa kinatibuk-ang Pagkabanhaw? (tan-awa sa 1 Mga Taga-Corinto 15:22). Ang pagdaghan sa mga pan ug mga isda nga gipakaon sa gutom nga mga tawo. Bisan pa, ang mga tawo sa wala madugay gigutom pag-usab, samtang kadtong kinsa miambit sa Pan sa Kinabuhi dili gayud gutumon pag-usab (tan-awa sa Juan 6:51, 58).
Sa pagpamalandong ug pagpadayon sa pagpahinungod, masabtan nga kita magduha-duha sa unsay gikinahanglan. Apan ang Ginoo mahupayong miingon, “Ang akong grasya igo alang kaninyo” (D&P 17:8). Mituo ba gayud kita Kaniya? Siya misaad usab sa paghimo sa huyang nga mga butang nga malig-on (tan-awa sa Ether 12:27). Andam ba kitang mosunod niana nga proseso? Apan kon kita magtinguha sa kahingpitan, dili nato ikapabilin ang bahin!
Sa pagbutang sa atong mga kabububt-on nga motuhop kanunay sa kabubut-on sa Amahan sa tinuod nagpasabut nga nadugangan ang atong pagkatawo ug mas makahimo sa pagdawat sa “tanan nga ang [Dios] anaa” (D&P 84:38) Gawas pa, unsaon nga kita masaligan sa Iyang “tanan” hangtud ang atong mga kabubut-on mas sama sa Iyaha? Ni ang Iyang “tanan” hingpit nga mapasalamatan sa dili kaayo mapasaligon.
Sa walay lipod-lipod, ang potensyal sa atong kaugalingon ang atong giluiban pinaagi sa pagpugong sa unsay “bahin.” Wala na kinahanglana ang pagpangutana, “Ako ba Ginoo?” (Mateo 26:22). Maayo pa, mangutana kita mahitungod sa atong tagsa-tagsa ka mga babag, “Ginoo, mao ba kini?” Tingali nakahibalo na kita sa tubag sa dugay nang panahon ug magkinahanglan nga mopasalig sa pagbuhat unsay atong nahibaloan.
Ang labing dakong kalipay diha sa maanindot nga plano sa Dios sa katapusan gitagana alang niadtong kinsa andam sa pagpalambo ug sa pagbayad sa bili sa pag-adto sa Iyang gingharian. Mga kaigsoonan, “duol, magbag-o kita [niining] nagpadayon nga panaw.”3
Sa pangalan sa Ginoo sa pinatuy-od nga kamot (tan-awa sa D&P 103:17; 136:22), bisan si Jesukristo, amen.Gidugangan og mga subhead, gihimo nga standard ang spelling, style, ug ang mga tinubdan nga gikutloan.
Detalye gikan sa si Kristo ug ang Dato nga Batan-ong Magmamando, ni Heinrich Hofman, sa maayong kabubut-on sa C. Harrison Conroy Co.
Dili ang Akong Pagbuot maoy Matuman kon Dili ang Imo, ni Harry Anderson, © Seventh-Day Adventist Church, dili mahimong pakopyahan
Talagsaong pagkaaghup nakab-ot sa Manluluwas samtang nag-atubang Siya sa kaguol ug panghingutas sa Pag-ula ug “buot nga [Siya] unta dili moinom sa mapait nga kopa, ug mobiya.”
Litrato sa sakrament pinaagi ni Grant Heaton, mahunahuna, KINABUHI NI KRISTO, PINAAGI NI ROBERT T. BARRETT, DILI MAHIMONG PAKOPYAHAN
Ang pagdaghan sa mga pan ug mga isda nga gipakaon sa gutom nga mga tawo. Bisan pa, ang mga tawo sa wala madugay gigutom pag-usab, samtang kadtong kinsa miambit sa Pan sa Kinabuhi dili gayud gutumon pag-usab (tan-awa sa Juan 6:51, 58).