Mga Pangutana ug mga Tubag
“Unsay akong mahimo aron ang akong mga pag-ampo dili magbalikbalik ug mas makahuluganon?”
Ang mga kasulatan mipatin-aw nga ang walay kapuslanan mao ang problema (tan-awa sa Mateo 6:7). Usahay kamo kinahanglang mobalik sa importante nga mga butang sa inyong mga pag-ampo. Apan kon kamo mobalik-balik sa mga pulong nga wala maghunahuna, wala kamo makigsulti sa Langitnong Amahan sa tinud-anay. Aron malikayan ang walay kapuslanan, pagkat-on sa pag-ampo uban sa “tinuod nga katuyoan” (tan-awa sa 2 Nephi 31:13; Moroni 7:9; 10:4)— mao kana, pag-ampo uban sa kinasingkasing ug uban sa katuyoan sa paglihok pinaagi sa hugot nga pagtuo.
Sa 3 Nephi ang mga tinun-an sa Manluluwas nag-ampo “sa walay paghunong,” apan sila wala mobalik-balik sa daghan nga mga pulong, kay kini gihatag ngadto kanila unsa ang kinahanglan nga ilang i-ampo” (3 Nephi 19:24). Ang Espiritu Santo makagiya sa inyong mga pag-ampo ug mohimo niini nga mas makahuluganon (tan-awa sa Mga Taga-Roma 8:26). Makatabang usab ang paggahin og panahon sa pag-ampo sa usa ka hilom nga dapit kon kamo wala magdali.
Sa katapusan, hunahunaa ang daghang mga butang nga inyong maampo. Kamo makatagamtam og daghang mga panalangin matag adlaw, ug kamo nagkinahanglan og langitnong panabang sa daghang mga sitwasyon. Pasalamati ang Langitnong Amahan alang sa inyong mga panalangin, ug pag-ampo alang sa mga butang nga inyong gikinahanglan. Kamo makaampo alang sa kapasayloan, panabang sa mga pagsulay, lig-on nga pagpamatuod, ug panalipod batok sa tintasyon.
Dili hinakog nga mga Pag-ampo
Usahay kon kita mag-ampo, sa akong hunahuna kita naghinakog— naghunahuna lamang sa atong mga kaugalingon ug unsay atong gusto. Hunahunaa ang uban ug ang ilang panginahanglan usab. Ipha ang kada panalangin, ug pasalamati ang Langitnong Amahan tungod niini. Ang pag-ampo dili lamang alang sa Langitnong Amahan nga maminaw sa atong mga gusto ug mga pagbagulbol apan usab alang kanato nga maminaw ngadto Kaniya. Unsaon nato sa pagdawat sa pagpadayag kon kita magdali-dali sa pagsulti unsay atong gusto ug dayon moligid sa higdaanan? Pangutana Kaniya unsay Iyang gusto nga inyong buhaton. Kamo mahimong mas maayo nga tawo.
Rebecah W., 16, Idaho, USA
Tuguti ang Espiritu Santo nga Mogiya Kaninyo
Paggahin og panahon sa pagpamalandong sa mga butang nga mapasalamaton kamo kaayo ug unsa nga mga butang nga labi ninyong gikinahanglan sa inyong kinabuhi. Ang Espiritu mogiya kaninyo ug mohatag kaninyo sa mga tubag ug mga sugyot nga moabut isip mga ideya, mga hunahuna, mga pag-aghat. Mahimo usab nga kamo maghupot og journal diin inyong masulat kini nga mga hunahuna ug mga ideya alang sa pakisayran sa umaabut.
Elder Sebo, 21, Texas Houston Mission
Pamalandong sa Inyong Adlaw
Kon ako mag-ampo sa gabii, ako maghunahuna sa unsay akong nabasa sa mga kasulatan. Akong paningkamutan ang paghinumdom unsay akong nabuhat nga matarung ug unsay akong kinahanglan nga usbon. Ako mohangyo sa Langitnong Amahan sa pagtabang kanako sa mga kalisud niana nga adlaw. Mohangyo ako Kaniya sa pagtabang kanako kanunay sa paghinumdom sa Iyang tambag ug mohatag kanako og kusog sa pagsunod niini. Tungod kay ang matag adlaw lahi, bisan og nagbalikbalik ang atong gibuhat, lain-laing mga butang mahitabo kanunay. Kana mao ang sitwasyon, sa pagpamalandong mahitungod sa atong adlaw, kita sa kanunay adunay lain-laing mga butang nga pangayoon ug pasalamatan.
Kétia F., 20, Palmas, Brazil
Pag-ampo og Kusog
Pangita og panahon ug lugar nga kamo mag-inusara ug mag-ampo og kusog. Kon kamo mag-ampo og kusog, bation ang mas personal ug mas makahuluganon. Mas sayon ang paglikay sa walay kapuslanan ug sa pagpugong nga ang inyong hunahuna maglatagaw. Sama kini sa usa ka panagsultihanay uban sa Langitnong Amahan.
Elder Marra, 20, Colorado Colorado Springs Mission
Pag-ampo ug Dayon Paminaw
Samtang kamo mobati sa panginahanglan sa pagsalig sa Ginoo ug mopalambo sa kalidad sa inyong relasyon uban Kaniya, hunahunaa unsay inyong gikinahanglan ug luhod sa pag-ampo. Hunahunaa ang Langitnong Amahan, ug pakigsulti Kaniya sama sa inyong Amahan, nga mao Siya. Sultihi Siya sa tanan nga inyong gibati. Pagsinsero sa pagpakigsulti, kinasingkasing. Salig Kaniya, pasalamat Kaniya, pangayo Kaniya og pasaylo, tagamtama ang Iyang pagpakig-uban, ipadayag ang inyong gugma ngadto Kaniya, ug dayon paminaw pag-ayo sa mga tubag.
Raúl A., 20, Mexico City, Mexico
Pag-ampo alang sa mga Indibidwal
Pagplano og sayo, bisan kon sulod lang sa pipila mga minuto sa paghan-ay sa imong mga hunahuna ug sa labing sinsero nga mga tinguha, siguroha nga kamo mas mo-focus sa mga pulong nga inyong gisulti ngadto sa inyong Langitnong Amahan. Hunahunaa ang inyong pamilya, kabanayan, ug ang uban kinsa magkinahanglan sa inyong mga pag-ampo. Adunay daghang kaayong mga tawo nga nagkinahanglan og panabang, giya, ug proteksyon.
Mag-focus sa tinagsa nga mga panalangin ug mag-ampo sa detalye makausab sa kasagaran nga “Palihug panalangini ako nga makabaton og maayong adlaw” ngadto sa “Palihug giyahe ako sa akong mga desisyon sa paghimo og positibo nga ehemplo ngadto sa uban.” Kadto mao ang mga pag-ampo nga inyong ihambin sa inyong kasingkasing tungod kay kini mas Kristohanon— kini mao gyud unta ang paagi.
Hannah T., 14, Maryland, USA
Litrato ni Presidente Monson pinaagi sa Busath Photography