Mensahe sa Visiting Teaching

Jesukristo, Mao ang Kahayag, Kinabuhi ug Paglaum sa Kalibutan

Itudlo ang mga kasulatan ug mga kinutlo nga makatubag sa mga panginahanglan sa mga sisters nga inyong bisitahan. Pagpamatuod sa doktrina. Dapita kadtong inyong gitudloan sa pagpakigbahin unsay ilang gibati ug nakat-unan.

Sa Unsa nga Paagi nga si Jesukristo, mao ang Kahayag, ug Kinabuhi sa Kalibutan?

(1 Nephi 17:13). “Ug Ako usab mao ang inyong kahayag diha sa kamingawan; … busa, tungod kay mohupot sa akong mga sugo kamo pagatultulan ngadto sa gisaad nga yuta; ug kamo mahibalo nga pinaagi kanako kamo pagatultulan.”

Elder Dallin H. Oaks sa Korum sa Napulog Duha ka mga Apostoles: “Si Jesukristo, mao ang kahayag, ug kinabuhi sa Kalibutan. Ang tanang mga butang iyang gibuhat. Ubos sa direksyon ug sumala sa plano sa Dios nga Amahan, si Jeuskristo mao ang Tiglalang, ang tinubdan sa kahayag ug sa kinabuhi sa tanang mga butang. …

“Si Jesukristo mao ang kahayag sa kalibutan tungod kay siya ang tinubdan sa kahayag nga ‘nagpadayon gikan sa atubangan sa Dios aron sa pagpuno sa walay katapusan nga kawanangan’ (D&P 88:12). Ang Iyang kahayag ‘mao ang matuod nga kahayag, nga nagaiwag sa matag usa ka tawo nga moabut sa kalibutan’ (D&P 93:2). Ang iyang ehemplo ug ang iyang mga pagtulun-an nagdan-ag sa dalan nga atong pagalaktan. …

“Si Jesukristo mao ang kahayag sa kalibutan tungod sa iyang talagsaon nga pagkabutang sa unsay gitawag sa kasulatan nga ‘mahinungdanon ug mahangturon nga laraw gikan sa kamatayon’ (2 Nephi 11:5). Ang Iyang pagkabanhaw ug ang iyang Pag-ula miluwas kanato sa pisikal ug espirituhanon nga kamatayon” (“The Light and the Life,” Liahona, Dis. 1997, 42–43; tan-awa sa New Era, Dis. 1996, 6).

Unsaon Nako sa Pagpangita og Paglaum diha kang Kristo?

Presidente Dieter F. Uchtdorf, Ikaduhang Magtatambag sa Unang Kapangulohan: “Ang ebanghelyo ni Jesukristo adunay balaan nga gahum sa pagbayaw kaninyo ngadto sa mas taas nga kalipay gikan sa unsay makita usahay nga dili maantus nga salagubangon o kahuyang. Ang Ginoo nasayud sa inyong mga kahimtang ug sa inyong mga hagit. Siya miingon ngadto ni Pablo ug kanatong tanan, ‘Ang akong grasya igo alang kanimo.’Ug sama ni Pablo kita makatubag: ‘Kay ang akong gahum ginahingpit diha sa kahuyang. Sa ingon niana, labi pang igakalipay ko diay hinoon ang pagpasigarbo tungod sa akong mga kahuyang, aron ang gahum ni Kristo magapandong kanako’ (2 Mga Taga-Corinto 12:9)” (“Wala ba Kitay Rason nga Maglipay?” Liahona ug Ensign, Nob. 2007, 19).

Julie B. Beck, kinatibuk-ang presidente sa Relief Society: “Si Mormon nangutana, ‘Ug unsa … kana nga kamo molaum?” Ang iyang mga tubag nagsulti kanato sa tulo ka mahinungdanon nga mga paglaum: ‘Kamo magbaton og paglaum pinaagi sa pag-ula ni Kristo ug sa gahum sa iyang pagkabanhaw, aron mabanhaw ngadto sa kinabuhi nga dayon’ (Moroni 7:41).

“Sa dihang kamo gibunyagan, kamo nahimong mga sumasalmot sa unang mahinungdanon nga paglaum, ang Pag-ula ni Kristo. Sa matag higayon nga kamo takus nga moambit sa sakrament, kamo adunay kahigayunan sa pagsugod pag-usab. … Ang inyong paglaum ug hugot nga pagtuo sa Manluluwas molambo samtang kamo maghinulsol ug mohimo og personal nga mga kausaban. …

“Ang ikaduha nga mahinungdanon nga paglaum mao ang Pagkabanhaw. Kamong tanan gisaaran nga pinaagi sa atong Manluluwas nga si Jesukristo mabanhaw. …

“Uban sa paglaum sa Pag-ula ug sa Pagkabanhaw, kamo adunay ikatulo nga mahinungdanon nga paglaum, ang paglaum sa kinabuhing dayon. … Tungod kay kamo adunay usa ka Manluluwas, kamo nagtuo usab sa usa ka malipayon, kinabuhing dayon sa paglalang, pagserbisyo, ug pagkat-on. Kamo anaa na sa higpit ug pig-ot nga dalan, ug adunay paglaum nga masanagong nagpahiyom kaninyo. … Kinahanglan lang kamo nga magpabilin, magpadayon uban sa kahayag sa paglaum” (“Kanamo ang Paglaum Mopahiyom,” Liahona ug Ensign, Mayo 2003, 103–5).

Detalye gikan sa Ang Nabanhaw nga Jesukristo, ni Grant Romney Clawson; border: detalye gikan sa Jesukristo, ni Harry Anderson