Mga Panalangin sa Templo sa usa ka Pamilya nga Dili Tanan Miyembro

Ni Kay Przybille

Ang akong pagsulod sa templo nakahatag kanako og mga panabut nga nakapalambo sa akong relasyon sa akong bana, kinsa dili usa ka Santos sa Ulahing Adlaw, ug sa among mga anak.

Niadtong Hunyo 1986 akong gidala sa sakyanan ang akong inahan ngadto sa Cardston Alberta Temple aron makadawat siya sa iyang endowment. Nakadawat na ako sa akong endowment, apan ang akong dili miyembro nga bana ug ako nagpuyo sa hilit nga dapit sa British Columbia, ug akong nakalimtan nga ni-expire na ang akong rekomen. Busa, nakakuyog ako sa akong inahan kutob lang sa talad hataganan sa rekomen [recommend desk] apan dili na makauban pa kaniya. Migawas ako, misandig sa bong-bong sa templo, ug mihilak.

Human niana nga kasinatian, ako nakahukom nga dili na gayud magpabilin sa gawas sa templo pag-usab. Ang akong bana misuporta kanako sa akong desisyon, ug ako sa wala madugay nakasulod na sa templo kanunay kutob sa akong mahimo. Didto akong nakat-unan ang mga baruganan nga nakahimo og dakong kalainan sa akong personal nga kinabuhi ug sa mga relasyon uban sa pamilya ug mga higala.

Nakapausab sa Akong Kinabuhi

Una, ako nakamatikod og kausaban sa gitas-on sa akong pailub. Migahin ako og daghang mga katuigan sa pagpaningkamot sa pagkontrol sa akong temper nga wala magmalampuson. Sa dihang ang akong pagsulod sa templo nagtudlo kanako mahitungod sa akong relasyon ngadto sa akong Langitnong Amahan ug sa ubang mga tawo, ang akong kinaiya nausab. Ako nakaamgo nga ang akong pamilya ug mga higala mao ang mga tawo nga akong nailhan sa wala pa ako moanhi dinhi. Wala sila mahiapil sa akong kinabuhi aron sa pagtuis o pagsamok-samok kanako apan sa pagpakigtambayayong uban kanako aron ako makakat-on sa mga leksyon sa kinabuhi. Ako nakasabut samtang ako naningkamot nga makat-on unsay ilang gipaningkamutan sa pagtudlo kanako, ug ako nakabaton og pailub sa pagdawat nga sila mouswag sa ilang kaugalingong gikusgon. Ako nakaamgo usab nga ang kinabuhi dili usa ka pakigbisog sa pagtudlo sa uban nga mahimong hingpit aron nga ako magmalipayon, usa kini ka malipayon nga panaw paingon sa kahingpitan uban sa mga tawo nga akong gimahal.

Ang ikaduhang kausaban mao ang akong kinaiya ngadto sa akong bana. Sa wala pa ang among kaminyoon, ako determinado sa pagbutang kaniya nga pangulo sa pamilya ug dili gayud mopahilayo gikan sa among relasyon. Bisan pa sa akong tinguha, ako naglisud sa pagdawat sa iyang mga pagpili ug usahay mitugot sa iyang mga kinaiya nga moapekto sa akong kalipay. Didto sa templo akong nakat-unan nga ang kaming duha adunay kalagmitan nga mahimong hingpit nga mahangturong mga kauban. Gikan sa akong bag-ong punto nga pag-obserbar, akong nakita nga kon kami magtambayayong , kami nagkahiusa. Ang among mga kahuyang ug mga kalig-on, mga tinguha ug mga talento nagkakomplimento pag-ayo sa usag usa nga kami mas lig-on isip usa ka team kay sa kami isip mga indibidwal.

Sa dihang nakat-on ako sa pagdawat sa mga kalainan sa akong bana, ako dili na kaayo kritikal ug misagop sa espiritu sa pagtinabangay ug pagtambayayongay sa among kaminyoon. Akong nakaplagan nga ako mas kusog nga nagtubo ngadto sa tawo nga ako gusto nga mahimo. Dugang pa, sa dihang ang akong bana mibati nga mas dugang tinabangay gikan kanako, siya mas mahigugmaon na usab ngari kanako.

Ang ikatulo nga ideya sa kauswagan mao ang pagpangita og hugot nga pagtuo nga akong ikatugot sa among upat ka mga anak, kinsa dagko na karon, sa pagpuyo sa ilang mga kinabuhi nga dili ako mobati nga responsable sa paghimo kanila nga magpuyo sa piho nga paagi. Ang uban kanila dili kaayo aktibo sa Simbahan, apan ako sa sa gihapon buot nga moimpluwensya kanila alang sa maayo nga dili manghilabot sa ilang kabubut-on. Sa usa ka piho nga pagbisita ngadto sa templo, akong gibutang ang ilang mga pangalan sa prayer roll ug nag-ampo og taas ug kinasingkasing alang kanila. Ako nakadawat og dili matukib nga malinawon nga kasiguroan nga ang tanan mamaayo ra kanila.

Sa dihang namalandong sa kasinatian sa kaulahian, ako nakaamgo nga ang Langitnong Amahan nahigugma kanila mas labaw kay sa akong paghigugma tungod kay Siya mas nakasabut kanila pag-ayo. Siya gusto nga mopanalangin kanila ug mopabalik kanila ngadto Kaniya, ug Siya mohatag kanila og mga kahigayunan sa pagkat-on. Karon kon ako magsugod sa pagkabalaka, ako mahinumdom niana nga kasinatian ug mobuhat unsay akong mahimo, nga nakahibalo nga ang Ginoo mobuhat sa uban.

Ang ikaupat nga kausaban sa akong kinabuhi miabut isip dakong kalinaw nga misulod kanako, resulta kabahin sa akong pagsulod sa templo nga nakahatag kanako og mas maayong mahangturong panglantaw. Ako masaligon nga ang Ginoo mao ang nagdumala, nga adunay igo nga mga kapanguhaan niini nga yuta alang kanato nga magpuyo nga komportable, nga adunay nga tinubdan sa hiyas diha sa desyerto sa dautan. Wala na ako maghunahuna sa akong kaugalingon nga nag-inusara. Ang Espiritu Santo mao ang akong kauban, ug ako makasulti ngadto sa akong Langitnong Amahan diha sa akong pag-ampo sa akong tibuok adlaw. Kaniadto maglisud ako sa akong mga desisyon, karon ako magtinguha na sa mga aghat sa Espiritu ug mobuhat niini samtang ako maghimo og mga pagpili. Ug tungod kay dili na ako mobati sa panginahanglan nga ang uban magpuyo sa paagi nga sa akong hunahuna nga sila magpuyo, ako adunay dugang panahon ug kalagsik sa “pagbuhat sa [akong] kaugalingon kaluwasan” (Mormon 9:27).

Kining bag-ong panglantaw nakaalsa og hilabihan ka bug-at gikan sa akong mga abaga. Ang Ginoo mipasabut sa dihang Siya miingon:

“Isangon ninyo ang akong yugo diha kaninyo, ug pagtuon kamo gikan kanako; kay ako maaghup ug mapaubsanon sa kasingkasing: ug makakaplag kamog pahulay sa inyong mga kalag.

“Kay masayon ang akong yugo, ug magaan ang akong luwas” (Mateo 11:29–30).

Mga Panalangin sa Pamilya

Ang padayon nga pagtambong sa templo importante ngari kanako kon ang bugtong mga panalangin nga akong madawat mao ang personal nga kalinaw, kasiguroan, ug pailub. Apan dihay laing mga kasinatian—daghan pa—nga nakapanalangin kanako ug sa akong pamilya.

Miapil ako sa family history ug adunay daghang talagsaong mga kasinatian nga naglakip sa mga sakop sa pamilya, sa mortal ug kadtong atua lapas sa tabil.
Niadtong Nobyembre 1993 ang among ikaduhang anak nga babaye naminyo sa templo, ug ako nakatambong sa pagbugkos.
Niadtong Mayo 2006, human sa 37 ka tuig nga kaminyoon, ang akong bana nagpasakop sa Simbahan. Niadtong Agosto 2007 siya ug ako nabugkos, ug ang among ikaduhang anak nga babaye nabugkos ngari kanamo. Ang among kinamagulangan nga anak nga babaye, kinsa nabugkos ngadto sa iyang bana ug anak nga babaye niadtong Nobyembre 2006, nabugkos ngari kanamo niadtong Agosto 2008.

Mahangturon akong mapasalamaton ngadto sa usa ka inahan kinsa migiya sa agianan pinaagi sa pagpabunyag sa dihang ako nag-edad og pito ug kinsa midasig kanako sa pagkuha pag-usab sa akong rekomen sa templo. Ang pagsunod sa iyang ehemplo nakahatag og daghang personal nga mga panalangin, ug kadtong mga panalangin miabut ngadto sa ubang mga sakop sa akong pamilya.

Didto sa templo akong nakat-unan nga ang akong bana ug ako adunay kalagmitan nga mahimong mahangturong mga kauban sa hingpit. Gikan niining bag-ong punto sa pag-obserbar, ako nakakita nga kami mas lig-on isip usa ka team kay sa kami isip mga indibidwal.

Litrato nga gihulagway ni Craig Dimond; gilitratohan ni Cardston Alberta Temple by Jed A. Clark