Pagpundok ngadto sa Templo
Sa dihang si Benedito Carlos do Carmo Mendes Martins nakahukom sa pagdala sa iyang pamilya ngadto sa labing duol nga templo niatong 1992, nagkinahanglan siya og 15 ka adlaw nga dili motrabaho aron sa paghimo sa malisud nga pagbiyahe ngadto nganhi sa Manaus, sa amihanang Brazil. Busy kaayo sa iyang kompaniya, bisan pa niana, ang iyang boss wala mosugot nga dili siya motrabaho.
Tungod kay ang pamilya nangandam, nakasakripisyo, ug nagtigum og kwarta aron makabiyahe, sila nag-ampo aron unta sila makahimo sa pag-adto. Ang ilang mga pag-ampo sa wala madugay gitubag.
“Ang adlaw sa dili pa ang pagbiyahe, ako nahiling nga adunay sakit,” miingon si Brother Martins. “Ako nalipay pag-ayo nga nasakit!”
Ang iyang doktor diha-diha miresita og tambal ug duha ka semana nga medical leave gikan sa trabaho, nga, subay sa balaod, ang iyang kompaniya obligado nga mohatag. Pagkasunod adlaw ang pamilya miadto sa templo.
“Akong gidala ang akong medisina, ug panahon sa biyahe ako nakadawat og mga injection,” miingon si Brother Martins. Sa dihang panahon na sa iyang pagpauli, ang mga sakit nawala.
“Mipauli ako uban sa hugot nga pagtuo ug usa ka pagpamatuod sa mga ordinansa sa templo,” siya miingon, “ilabi na sa mga ordinansa nga mabugkos sa akong asawa ug tulo ka mga anak.
Sa wala pa ang Manaus mahimong kabahin sa Caracas Venezuela Temple District niadtong 2005, ang pinakaduol nga templo, nahimutang sa liboan ka mga milya sa habagatang silingan sa Brazil. Ang ubang mga Santos sa Ulahing mga Adlaw sa Manaus determinado kaayo nga moadto sa templo nga ilang gibaligya ang ilang mga balay, magamit nga transportasyon, mga hiraminta—bisan unsa nga bililhon—aron makakwarta.
Aron makaabut sa São Paulo, ang mga miyembro mobiyahe sakay og barko sa Rio Negro ngadto sa duol sa sumpay sa Amazon ug gikan sa silangan ngadto sa Rio Madeira—nga adunay distansya nga mga 70 ka mga milya (115 km). Dayon mobiyahe sila og labaw sa 600 ka mga milya (965 km) habagatang silangan sa Rio Madeira ngadto sa siyudad sa Pôrto Velho. Gikan didto mosakay sila og bus ug mobiyahe og laing 1,500 ka mga milya (2,400 km) ngadto sa São Paulo. Human makaserbisyo sa balay sa Ginoo, sila mobiyahe og pito ka adlaw sa pagpauli.
Sa diha nga ang mga Santos gikan sa Manaus nangandam sa paghimo sa ilang unang biyahe ngadto sa templo sa Caracas, nalipay sila pag-ayo nga sila mipahayag, “Karon moabut na lamang og 40 ka mga oras aron makaabut ngadto sa templo!” Aron makaabut ngadto sa Caracas, ang mga Santos kinahanglang mobiyahe og 1,000 ka milya (1,600-km) sakay sa bus nga maglakip sa pagbiyahe agi sa walay nagpuyo nga mga bahin sa kalasangan sa Amazon ug mobalhin gikan sa dako nga bus ngadto sa mas gamay nga bus sa utlanan sa Brazil sa Venezuela. Ang distansya mas mubo, apan ang biyahe nagkinahanglan gihapon og igo-igong pagsakripisyo sa kwarta, nga nakadugang sa galastuhan sa pagkuha og mga visa.
Samtang ang mga Santos manakay, sila manganta, “Rise, Ye Saints, and Temples Enter.”1 Aron magpadayon ang balaan nga pagtahud ug magpabilin ang tumong sa katuyoan sa ilang pagbiyahe, sila naghimo og mga fireside diha sa bus ug manan-aw og mga salida sa Simbahan sama sa The Mountain of the Lord.
Sa usa ka journal nga gihimo niadtong kinsa kabahin nianang unang pagbiyahe, ang mga miyembro sa Simbahan nahinumdom sa ilang mga panalangin, dili sa ilang mga sakripisyo. Usa ka sister misulat: “Karon moadto ako sa templo sa unang higayon. Kagahapon ako misaulog sa akong ika-20 nga anibersaryo isip usa ka miyembro sa Simbahan —daghan kaayong mga oras, mga adlaw, ug mga katuigan sa paghulat ug pagpangandam. Ang akong kasingkasing napuno sa pasalamat ug kalipay alang sa akong mga higala, mga lider sa priesthood, ug ilabi na ni Jesukristo, sa Iyang pag-ula, ug niini nga kahigayunan sa pag-adto sa balay sa akong Langitnong Amahan.”
Usa ka igsoon kinsa nabugkos sa iyang asawa ug mga anak niana nga biyahe miingon nga ang templo mihatag kaniya og panan-awon sa kahangturan. “Ako walay pagduha-duha nga kon kita maghupot sa mga pakigsaad nga atong gihimo didto sa templo, kita mas magmalipayon ug mas makabaton og buhong nga kinabuhi,” siya misulat. “Akong gihigugma ang akong pamilya, ug akong buhaton ang akong kutob sa mahimo nga ikauban sa celestial nga gingharian.”
Ang Brazil Manaus Mission gitukod niadtong Hulyo 1, 1990, aron isangyaw ang ebanghelyo ngadto sa unom ka mga estado sa amihanang Brazil. Nianang higayon, ang Simbahan wala mailhi niadto nga mga estado ug adunay pipila lang ka mga miyembro. Apan sama sa gipahayag sa Ginoo diha sa Basahon ni Mormon, kadtong kinsa maghinulsol ug moduol ngadto Kaniya pagaiphon nga sakop sa Iyang mga katawhan sa ulahing mga adlaw (tan-awa sa 3 Nephi 16:13).
Karon adunay walo ka mga stake sa siyudad sa Manaus, sa Estado sa Amazona, dugang mga stake sa ubang mga stake, ug pito ka mga district sulod sa mga utlanan sa misyon. Samtang ako namalandong sa pagtubo sa Simbahan ug sa tahas nga anaa sa mga templo sa pagpaningkamot sa Ginoo sa pagpundok sa Iyang mga anak, ang akong hunahuna nakabig ngadto sa Iyang saad diha sa Basahon ni Mormon: “Oo, ug unya ang buhat, mosugod, uban sa Amahan taliwala sa tanan nga mga nasud sa pag-andam sa agianan diin ang iyang mga katawhan pagapundukon ngadto sa yuta sa ilang kabilin” (3 Nephi 21:28).
Isip mission president sa Manaus gikan niadtong 1990 hangtud sa 1993, akong nakita ang Amazon nga mga katawhan nga midawat sa mga baruganan sa gipahiuli nga ebanghelyo ni Jesukristo, nga nagpasakop sa Simbahan, ug “moabut ngadto sa pakigsaad” (3 Nephi 21:22). Isip resulta, ang gahum sa priesthood nagsugod sa pagpanalangin sa ilang mga kinabuhi ug sa ilang mga pamilya—ilabi na pinaagi sa mga ordinansa sa templo.
Ang mga miyembro sa Simbahan sa amihanang Brazil nagmaya niadtong Mayo 2007 sa dihang ang Unang Kapangulohan mipahibalo nga usa ka templo, ang ikaunom sa Brazil, tukuron sa Manaus. Alang sa pamilyang Martin ug ang nagtubo nga gidaghanon sa mga Santos sa Ulahing mga Adlaw sa amihanang Brazil, nga makabaton og templo sa Manaus usa ka dakong panalangin. Alang sa daghang mga Santos sa tibuok kalibutan, hinoon, ang pagsulod sa templo magpadayon nga magkinahanglan og dakong sakripisyo.
Hinaut nga kita nga nagpuyo duol sa templo magpakita sa atong pasalamat pinaagi sa pagdugang sa atong pagsulod sa templo. Ug hinaut nga kita, sama sa mga Santos sa amihanang Brazil, misunod sa ehemplo sa mga Nephite kinsa “naghago sa hilabihan” sa pagpundok ngadto sa templo “nga aron unta sila … anaa sa dapit diin si Jesus mopakita sa iyang kaugalingon ngadto sa pundok sa mga katawhan” (3 Nephi 19:3).
Gihulagway ni Steve Kropp
Paghimo sa Manaus Brazil Temple ni Craig Lofgreen
Ang Architectural rendering sa templo nga tukuron sa Manaus, Brazil.