Mga Panagna sa Pag-anhi ni Kristo
Kalendaryo sa Pag-abut ni Kristo
Kamo makaandam alang sa Pasko karon pinaagi sa paghinumdom kon giunsa sa uban pag-andam alang Kaniya kaniadto.
Daghang mga propeta sa Biblia ug sa Basahon ni Mormon nanagna sa pagkatawo ug pagpangalagad ni Jesukristo gatusan ka mga tuig sa wala pa ang tinuod nga panghitabo. Sa 12 ka mga adlaw sa wala pa ang Pasko, kining kalendaryo sa pag-abut maoy mahimong usa ka pakisayran sa kasulatan mahitungod sa pagkatawo ug kinabuhi sa Manluluwas ug sa mga kalihokan nga inyong mabuhat aron mahimong mas sama ni Kristo. Basaha ang mga kasulatan matag adlaw, ug kon kamo gusto, sulayi ang gitukma nga kalihokan. Uban sa pagtugot sa inyong mga ginikanan, mahimo kamong mogamit sa mga ideya gikan niini nga kalendaryo sa family home evening.
Si Presidente Thomas S. Monson miingon: “Sulod sa pipila ka mga gutlo, mahimo bang dili nato hunahunaon ang mga lista sa Pasko, uban ang mga regalo niini nga mahalon kaayo tan-awon. Bisan gani atong talikdan ang mga bulak alang ni Mama, ang espesyal nga kurbata alang ni Papa, ang nindot nga monyeka, ang tren nga motaghoy, ang dugay nang gihulat nga biseklita—bisan gani mga libro ug mga video—ug itumong ang atong mga hunahuna ngadto sa hinatag sa Dios nga mga gasa nga molungtad.”1
Kon ang panahon sa pasko magkaduol na, ibutang unsay inyong nakat-unan diha sa inyong hunahuna ug kasingasing, ug sauloga ang Pasko sa tibuok tuig pinaagi sa pagserbisyo sa uban.
Disyembre 13
Si Isaias, usa ka propeta sa Daang Tugon, nanagna nga usa ka putling babaye manganak sa anak sa Langitnong Amahan. Kini nga mga asoy sa kasulatan gisulat labaw sa 700 ka mga tuig sa wala pa ang Iyang pagkatawo.
“Ania karon ang usa ka ulay manamkon, ug magaanak, og usa ka anak nga lalaki, ug pagatawgon ang iyang ngalan nga Emmanuel” (Isaias 7:14;tan-awa usab sa 2 Nephi 17:14).
“Kay alang kanato ang usa ka bata matawo, alang kanato ang usa ka anak nga lalaki gihatag: ug ang kagamhanan igatungtong sa iyang abaga: ug ang iyang ngalan pagatawgon nga Kahibulongan, Magtatambag, Dios nga Makagagahum, Amahan nga walay Katapusan, Prinsipe sa Pakigdait” (Isaias 9:6; tan-awa usab sa 2 Nephi 19:6).
Sa mainampoong paagi pagpili og usa ka higala o sakop sa pamilya, o mga miyembro sa ward o branch. Sa sekreto pagbilin kaniya og gamay nga regalo, sama sa makaon, hunahuna gikan sa mga kasulatan, o usa ka kard sa Pasko.
Disyembre 14
Si Nephi nakakita og usa ka panan-awon sa birhen nga si Maria ug sa batang si Jesus.
“Ug siya miingon ngari kanako: Tan-awa, ang birhen nga imong nakita mao ang inahan sa Anak sa Dios, sumala sa kahimtang sa unod.
“Ug nahinabo nga ako nakakita nga siya gibayaw sa Espiritu; ug human siya ibayaw sa Espiritu sulod sa usa ka panahon ang anghel namulong ngari kanako, nag-ingon: Tan-awa!
“Ug ako mitan-aw ug nakakita sa birhen pag-usab, nagkugos og bata diha sa iyang mga bukton.
“Ug ang anghel miingon ngari kanako: Tan-awa ang Kordero sa Dios, oo, gani, ang Anak sa Amahan sa kahangturan!” (1 Nephi 11:18–21).
Paghimo og lista sa Pasko sa mga butang nga gusto ninyong ihatag kay sa mga butang nga gusto ninyong maangkon.
Disyembre 15
Ang mga propeta nagpamatuod sa misyon ni Kristo dinhi sa yuta. Ang mosunod mao ang asoy ni propeta Abinadi, kinsa nagpuyo sa mga 150 B.C.:
“Ug sa ingon ang lawas nahimo nga ulipon ngadto sa Espiritu, o ang Anak ngadto sa Amahan, ingon nga usa ka Dios, nag-antus sa pagtintal, ug wala motugyan ngadto sa mga pagtintal, apan mitugot sa iyang kaugalingon aron pagatamayon, ug pagabunalan, ug gisalikway sa iyang mga katawhan.
“Ug human sa tanan niini, human makabuhat og daghan nga kahibulongan nga mga milagro taliwala sa mga katawhan, …
“… siya ilansang sa krus, ug patyon, ang lawas nahimo nga ulipon ngadto sa kamatayon, ang kabubut-on sa Anak ingon nga gituhop ngadto sa kabubut-on sa Amahan” (Mosiah 15:5–7).
Pagluto og pagkaon alang sa Pasko, ug ihatag kini ngadto sa usa ka pamilya sa inyong ward o branch. Ang paghatag makatabang nga madugangan ang panaghiusa ug panaghigalaay sa ward.
Disyembre 16
Si Alma nanagna sa mosunod ngadto sa katawhan ni Gideon sa mga 83 B.C.:
“Ang Anak sa Dios moanhi dinhi ibabaw sa yuta. …
“Ug tan-awa, siya matawo ni Maria, … ingon nga usa ka birhen, usa ka bililhon ug pinili nga tawo, kinsa gilandongan ug gipanamkon pinaagi sa gahum sa Espiritu Santo, nanganak og usa ka bata nga lalaki, oo, gani ang anak sa Dios.
“Ug siya magpadayon, mag-antus sa mga sakit ug mga kasakit ug mga pagtintal sa matag matang; ug kini aron ang pulong matuman nga nag-ingon nga siya modala diha kaniya sa mga sakit ug mga balatian sa iyang mga katawhan.
“Ug siya modala diha kaniya sa kamatayon, nga siya mahimo nga mohubad sa mga higot sa kamatayon diin naghigot sa iyang mga katawhan; ug siya modala diha kaniya sa ilang mga kahuyang, nga ang iyang kasingkasing mahimo nga mapuno uban sa kalooy” (Alma 7:9–12).
Paghatag og regalo sa pagserbisyo ngadto sa tawo nga nanginahanglan. Dapita ang inyong pamilya sa pagtabang kaninyo sa pag-ila sa serbisyo nga inyong ikahatag.
Disyembre 17
Si Jesukristo nahigugma sa matag anak sa Dios ug dili gayud makalimot bisan usa. Si Exequiel nanagna nga ang Ginoo mao ang magbalantay ug mopundok sa Iyang nawala nga karnero.
“Kay mao kini ang giingon sa Ginoong Jehova: Ania karon, ako gayud bisan ako, magasusi sa akong mga karnero, ug magapangita kanila.
“Ingon nga usa ka magbalantay nga magasusi sa iyang panon sa adlaw nga anaa siya sa taliwala sa iyang mga karnero nga nanagkatibulaag ngadto sa halayo, mao man pangitaon ko ang akong mga karnero; ug luwason ko sila gikan sa tanang mga dapit. …
“Ug kuhaon ko sila gikan sa mga katawhan … ug dad-on ko sila ngadto sa ilang kaugalingong yuta; ug akong pasibsibon sila sa kabukiran sa Israel” (Ezekiel 34:11–13).
Paggahin og panahon uban sa inyong mga manghod, kabanay, o higala. Basaha ngadto kaniya ang istorya sa Pasko sa Lucas 2.
Disyembre 18
Bisan og si Jesukristo hingpit, Siya kinahanglan gihapon nga bunyagan aron sa pagtuman sa tanang pagkamatarung. Ang mosunod mao ang asoy sa panagna ni Lehi, nga girekord ni Nephi:
“Ug ang akong amahan miingon nga siya kinahanglan mobunyag dinha sa Bethabara, unahan sa Jordan; ug siya usab miingon nga siya kinahanglan mobunyag uban sa tubig; gani siya kinahanglan mobunyag sa Mesiyas uban sa tubig.
“Ug human siya makabunyag sa Mesiyas uban sa tubig, siya kinahanglan motuo ug mopamatuod nga siya mibunyag sa Kordero sa Dios, kinsa mokuha sa mga sala sa kalibutan” (1 Nephi 10:9–10).
Paghatag og regalo nga panahon pinaagi sa paggahin og panahon uban sa masakiton, sa tigulang, o biyuda sa inyong ward o kasilinganan. Hangyoa siya sa pagsulti kanimo mahitungod sa usa ka paborito nga Pasko.
Disyembre 19
Si Samuel ang Lamanite nanagna sa mga timailhan nga naglibut sa pagkatawo sa Manluluwas:
“Ug tan-awa, siya miingon ngadto kanila: Tan-awa, ako mohatag nganha kaninyo og usa ka timailhan; kay lima pa ka tuig ang moabut, ug tan-awa, unya moabut ang Anak sa Dios sa pagtubos sa tanan nga motuo sa iyang ngalan.
“… Adunay daghan kaayo nga mga kahayag sa langit, nga diha sa gabii nga siya dili pa moabut walay kangitngit, nga sa ingon mopakita ngadto sa tawo ingon og kini adlaw. …
“Ug tan-awa, adunay bag-o nga bitoon nga mosubang, nga sa sukad wala pa ninyo masud-ong; ug kini usab usa ka timailhan nganha kaninyo” (Helaman 14:2–3, 5).
Isulat sa inyong journal unsa ang gipasabut sa Pasko nganha kaninyo ug unsa ang mga tradisyon sa adlaw sa pangilin sa inyong pamilya.
Disyembre 20
Sa wala pa ang pagkatawo ni Kristo, si anghel Gabriel mibisita ni Maria.
“Ug sa ikaunom ka bulan ang anghel nga si Gabriel gipadala gikan sa Dios ngadto sa usa ka lungsod sa Galilea nga ginganlan og Nazaret,
“Ngadto sa usa ka dalagang birhin nga pangasaw-on sa usa ka lalaki nga ginganlan og si Jose, nga kaliwat ni David; ug ang ngalan sa dalagang birhin mao si Maria.
“Ug ang anghel miadto ug miingon kaniya, “Kumusta ka, babayeng hinatagan sa grasya, ang Ginoo anaa uban kanimo: dalaygon ikaw diha sa mga kababayen-an. …
“… Kay naangkon mo ang kahimuot sa Dios.
“Ug tan-awa, magasamkon ikaw, ug igaanak mo ang usa ka bata nga lalaki, ug siya imong panganlan si Jesus” (Lucas 1:26–28, 30–31).
Pundoka ang mga miyembro sa pamilya ug mga higala aron manaygon sa kasilinganan, o manganta og mga awit sa pasko sa inyong kaugalingong panimalay.
Disyembre 21
Si Nephi, ang apo ni Helaman, matinud-anong naghulat sa pag-anhi sa Ginoo. Apan ang dili matuohon miingon ngadto kaniya, “Tan-awa ang panahon milabay na, ug ang mga pulong ni Samuel wala matuman; busa, ang inyong hingpit nga kalipay ug hugot nga pagtuo mahitungod niini nga butang nakawang lamang” (3 Nephi 1:6).
Dayon si Nephi “migula ug miyukbo sa yuta, ug nangamuyo pag-ayo ngadto sa iyang Dios alang sa iyang mga katawhan” (v. 11).
Ang Ginoo miingon ngadto ni Nephi, “Ihangad ang imong ulo ug pagmaya; kay tan-awa, ang panahon duol na, ug niini nga gabii ang timailhan ihatag, ug pagkaugma moabut Ako diha sa kalibutan, pagpakita ngadto sa kalibutan nga Ako motuman sa tanan ko nga gipamulong pinaagi sa ba-ba sa akong mga balaan nga propeta” (v. 13).
Sa inyong mga pag-ampo, ipadayag ang pasalamat ngadto sa Langitnong Amahan alang sa gasa sa Iyang Anak.
Disyembre 22
Sa katapusan, ang mga panagna sa pagkatawo ni Kristo natuman.
“Ug nahinabo nga ang mga pulong nga midangat kang Nephi natuman, sumala nga sila gipamulong. …
“Ug dihay daghan, kinsa wala motuo sa mga pulong sa mga propeta, kinsa natumba ngadto sa yuta ug nahimo nga sama sila sa mga patay … kay ang timailhan diin gikahatag anaa duol na. …
“Ug nahinabo nga walay kangitngit sa tibuok niana nga gabii, apan kini mahayag ingon sa udtong tutok. …
“Ug nahinabo usab nga usa ka bag-o nga bitoon mopakita, sumala sa pulong” (3 Nephi 1:15–16, 19, 21).
Gihatag ni Jesukristo kanato ang labing dakong gasa sa tanan, ang Iyang kinabuhi. Ipakita ang imong pagpasalamat ngadto sa inyong mga ginikanan pinaagi sa pagsulat og pasalamat kanila sa maayong mga butang nga ilang nahimo alang kaninyo. Disyembre 23
Disyembre 23
Sa gabii sa pagkatawo ni Kristo, usa ka anghel ang nagpakita ngadto sa matarung nga mga magbalantay sa karnero didto sa Bethlehem aron sa pagsangyaw sa mga balita sa pagkatawo ni Kristo.
“Ug iyang gianak ang iyang panganay nga usa ka lalaki, ug kini iyang giputos sa mga bakbak ug gipahigda sa pasungan, kay wala na may luna alang kanila sa balay nga abutanan.
“Ug niadtong dapita may mga magbalantay sa mga karnero didto sa sibsibanan, nga nanagtukaw sa kagabhion sa pagbantay sa ilang mga hayop.
“Ug, mitungha kanila ang usa ka anghel sa Ginoo, ug ang himaya sa Ginoo misidlak libut kanila: ug giabut sila og dakong kalisang.
“Apan ang anghel miingon kanila, ayaw na kamo kalisang: kay, tan-awa, gidad-an ko kamog maayong balita sa dakung kalipay, nga magaabut sa tanang mga tawo.
“Kay alang kaninyo natawo karon sa lungsod ni David ang Manluluwas nga mao ang Kristo nga Ginoo” (Lucas 2:7–11).
Paghimo og saad nga mas magmalipayon ug mas mabination nga tawo.
Disyembre 24
Kita, isip mga Kristiyano, mobarug isip mga saksi ni Jesukristo matag adlaw sa tuig pinaagi sa hugot nga pagtuo ug maayong mga buhat. Si Propeta Joseph Smith ug Sidney Rigdon mihatag niini nga saksi:
“Ug karon, human sa daghang mga pagpamatuod nga gihatag mahitungod kaniya kini mao ang pagpamatuod, ang katapusan sa tanan, nga kami naghatag mahitungod kaniya: Nga siya buhi!
“Kay kami nakakita kaniya, gani sa tuo nga kilid sa Dios; ug kami nakadungog sa tingog nga nagpamatuod nga siya mao ang Bugtong Anak sa Amahan—
“Nga pinaagi kaniya, ug ngadto kaniya, ug tungod kaniya, ang mga kalibutan nalalang, ug ang mga lumulupyo niana mao ang anak nga mga lalaki ug anak nga mga babaye sa Dios” (D&P 76:22–24).
Ipakigbahin ang inyong pagpamatuod sa Manluluwas sa sunod nga angay nga higayon, sama sa miting sa pagpuasa ug pagpamatuod.
Paghulagway ni Scott Greer