Ang Dili Magpaila nga Tighatag
“Ang Dios nahigugma sa malipayong maghahatag” (2 Mga Taga-Corinto 9:7).
Ako ganahan sa tanang mga butang kabahin sa Pasko: ang mga suga, mga panaygon, panahon uban sa pamilya—tanan nga mga butang nga atong gihimo aron sa pagsaulog sa pagkatawo ni Jesus. O, ug ako labi sa tanan ganahang modawat og mga pinaskohan. Ako nagsugod pagbuhat sa akong listahan sa pangandoy sa Pasko sa Septyembre pa.
Usa ka tuig, ang akong listahan hapit sama kataas sa akong bukton. Ug ako kanunay naghunahuna sa mga butang nga akong idugang niini. Ako naghinamhinam nga mipakita niini ngadto sa akong papa. “Bahin niana, David, akong nakita kon unsa ang imong gustong makuha para sa Pasko,” siya miingon samtang iya kining gitan-aw. “Apan unsa man ang imong ihatag?”
“Ako naghimo og mga regalo para kanimo ug kang mama sa eskwelahan. Sa Biyernes dad-on ko ni Mama sa pagpamalit og mga regalo para kang Shannon ug Jon. Busa ako nang giplanohan ang tanan.”
“Hmmm,” mao ra ang gisulti ni Papa. Tungod sa pipila ka mga katarungan wala siya ganahi sa akong tubag. Ako dili ganahan sa tuno nga “hmmm.”
Sa sunod family home evening, ang akong mga ginikanan naghisgot kabahin sa ideya sa paghatag ug pagdawat ug ang tinuod nga kahulugan sa Pasko. Akong nakita nga ang listahan sa akong mga pangandoy nagkamubo kada minuto. Ila kaming gipangutana kon kami aduna bay mga ideya aron makatabang kanamo sa paghinumdom nga mas manggihatagon. Si Shannon miwara-wara sa iyang kamot nga naghinamhinam. Ang akong magulang nga lalaki, nga si Jon, ug ako miagulo. Uban ni Shannon, ang mga ideya sa kasagaran naglakip sa pagbuhat og mga butang para sa ubang mga tawo, sama sa pagpangguna sa tanaman sa among mga silingan.
“Kita mamili og pipila ka mga tawo kinsa nag-inusara o nanginahanglan ug dili mopaila nga mobilin sa mga regalo diha sa ilang hagdanan ,” si Shannon misulti nga naghinamhinam.
“Dili bati nga ideya,” miingon si Jon. “Kini mahimong labing sekreto.”
“Kini sa tinud-nay mahimong makalingaw,” ako naghunahuna.
Kami nagkasinabut nga kini mahimong labing nindot nga plano. Kami mipili og duha ka mga pamilya. Ang usa mao ang pamilya Swenson diha sa among ward. Dihang nagsugod si Brother Swenson pagbalik og eskwela, sila ingon og wala nay igong nga kwarta. Sila usab adunay daghang mga anak, kinsa ganahan kaayo nga modawat og mga sorpresa sa Pasko. Ang laing pamilya mao sila si G. ug Gng. Perez, mga tigulang nga magtiayon kinsa nagpuyo ubos diha sa may dalan. Ingon og sila kanunay nga mag-inusara.
Kaming tanan nanlakaw para mopalit og mga regalo. Kami nagkasabut nga mopalit niini gamit ang pipila sa kwarta nga amo untang gamiton para ipalit sa among kaugalingong mga regalo. Para kanako maayo kini. Ako nalingaw gayud kaayo sa pagpili og mga duwaan para sa Swenson nga gagmay’ng mga batang lalaki. Sa ingon ang akong gusto nga mga butang dili na kaayo ingon ana kaimportante.
Kami nakahukom nga mohatag og usa ka regalo matag gabii sa kada pamilya magsugod sa 12 ka adlaw sa dili pa mag-Pasko. Sa dihang ang unang gabii miabot, ako nagsinina og itom gikan sa ulo hangtud sa tudlo sa tiil, ug si Jon ang nagmaneho sa sakyanan padulong sa balay sa mga Swenson. Hinayhinay nakong gibutang ang unang regalo ngadto sa balkon, mipabagting sa doorbell, ug midagan palayo kutob sa akong mahimo. Ako eksaktong nakalayat sa koral sa dihang ang usa sa mga bata miabli sa pultahan. Ako makadungog sa ilang mga tingog nga nasorpresa sa dihang ilang nakita ang regalo. Ako mibati ingon og ako mobuto sa tumang kahinam ug kalipay. Ang akong kinabuhi isip Usa ka Dili Magpaila nga Tighatag nagsugod.
Ang mga panghitabo nagka-anam og kamaayo—ug mas nagkalisud. Kami kinhanglang moadto sa lain-laing mga oras kada gabii ug usahay bisan sa buntag tungod kay ang mga bata sa pamilyang Swenson nagsugod og tan-aw sa bintana aron sa pagsakop namo. Ug sa matag panahon nga ako mokamang nga mosaka sa hagdanan sa mga Perez, akong mahunahuna si Gng. Perez nga nagpaabot didto, andam nga kalit nga moabli sa pultahan, iya kong gakson, ug sultihan ako unsa ako kabuotan. Kinahanglan nga ako nang likayan. Ang pagtipig og sekreto katunga lamang sa kalingaw.
Hinoon, kadto nga tuig mao lamang ang sinugdanan. Ang Pasko human niana, kami mipili og pamilya kansang anak nga babaye nagsige og balik-balik sa ospital onse na ka bases nianang tuiga ug laing pamilya kinsa ang inahan adunay kanser. Wow—wala ako makaamgo nga ang ubang mga tawo adunay mga kalisud. Karon nga
ang Pasko ania na usab, kami mihukom nga motabang og tulo ka pamilya. Ang labing lisud nga bahin mao ang pagpili kanila. Adunay daghan kaayong mga tawo nga nagkinahanglan og gamay nga kalipay sa Pasko.
Para sa akong kaugalingong listahan? Kada tuig kini nagkamubo. Ako nagkapuliki kaayo sa paghimo sa akong Dili Magpaila nga Tighatag nga mga plano nga ako wala nay igong panahon para maghunahuna sa akong kaugalingon. Adunay mga regalo nga angay pilion ug mga paagi nga angay planohon.
Usa ka butang ang sigurado—labing nindot ang magbuhat og mga butang para sa uban. Walay makatupong sa pagbati nga akong gibati kon ako makakita sa sorpresa ug kahinam diha sa mga nawong sa mga tawo nga among gitabangan. Ang paghatag nahimo na nakong usa sa akong paboritong butang kabahin sa Pasko.
Mga paghulagway ni Matt Smith; gilitratohan sa Busath Photography