Unsa ang Anaa Kanato Bisan Gamay Maigo Ra
Duol na ang Pasko, apan niining tuiga kami dili mosaulog nga may daghang pagkaon ug mga duwaan. Si papa namatay, ug si Mama mao lamang nagsugod og dawat sa gamayng pension isip usa ka balo, uban sa gamay nga kwarta gikan sa pagpaabang og balay.
Kami anaa sa lawak dawatanan sa among apartment, sa Rio de Janeiro, Brazil. Ang kwarto hilom. Sa kalit lamang, kami nakadungog og usa ka tingog nga ingon og adunay bag-o lang miabot gawas sa bilding.
Ako mibangon ug mitan-aw sa mga salipud sa bintana, gikan didto akong makita ang entrada sa among bilding. Ako nakakita og usa ka walay pinuy-anan nga babaye. Aduna siyay pipila ka mga bag ug nagsul-ob og gisi nga mga sinina. Ako siyang gi-obserbahan sa pipila ka mga minuto, masusihon nga mitan-aw kon unsa ang iyang buhaton. Siya miabli og usa ka gamay nga sako sa papel, mikuha og pipila ka mga biskwit, ug misugod sa pagkaon niini. Pagkahuman niya og kaon siya miabli og laing gamayng sako nga adunay pipila ka mga sinsilyo ug nagsugod sa pag-ihap niini.
Natandog ang akong batan-ong kasingkasing, ug hinayhinay nakong gitawag ang akong inahan, “Adunay usa ka tigulang nga babaye sa gawas. Dali ug tan-awa.” Ang akong inahan nitan-aw, ug siya usab natandog. Iya akong gisugo sa pagkuha sa lata kon asa kami magtipig og gamay nga kwarta, ug hilom kaayo, siya mibiya sa among apartment ug sa hilom nga paagi iyang gihulog ang mga kwarta nga papel gikan sa bintana nga anaa sa agianan sa bilding.
Ako nagpabilin sa among bintana ug nagtan-aw nga nangahulog ang mga kwarta nga papel. Ang tigulang nga babaye nakakita nga nahulog ang usa ug dayon lain ug lain na usab. Naningkamot sa pagpangita kon asa gikan ang kwarta, siya mitan-aw sa mga bintana sa bilding. Sirado kining tanan. Dayon usa ka talagsaon ang nahitabo. Siya mihangad ngadto sa langit ug gisaka niya ang iyang nangunot nga mga kamot. Dayon iyang gibutang ang iyang mga kamot sa iyang dughan ug nagpasalamat alang sa mga gasa nga iyang nadawat.
Luyo sa mga salipud sa bintana, kami nagguol nga mapasalamaton nga unsa ang anaa kanamo igo lamang sa paghatag og kalipay ngadto sa usa ka tawo nga adunay mas gamay nga naangkon.