O Mai e Faalogo i le Siufofoga o se Perofeta

O Le Alofa O Se Perofeta

Saunia e Peresitene Dieter F. Uchtdorf

Fesoasoani Lua i le Au Peresitene Sili

Mai se saunoaga i le konafesi aoao ia Aperila 2008

I ni tausaga ua mavae, sa auai atu ai Peresitene Thomas S. Monson i se konafesi faarisone i Hamburg, Siamani, ma sa o se faamanuiaga ia te au le malaga faatasi ma ia.

Sa fesili Peresitene Monson e uiga ia Uso Michael Panitsch, o le sa avea muamua ma se peresitene o le siteki ma o se tasi o paionia malosi o le Ekalesia i Siamani. Sa ou ta’u atu ia te ia o Uso Panitsch o loo ma’i tigaina, ma ua le toe mafai ona fealuai ma le mafai ai ona auai mai i a matou sauniga.

Sa fesili mai Peresitene Monson pe mafai ona ma asiasi atu ia te ia.

Sa ou iloaina e le’i leva atu na faia ai se taotoga o Peresitene Monson i lona aao a’o le’i malaga mai i Hamburg, ma e le mafai ona savali e aunoa ma le tiga. Sa ou faamatala atu o Uso Panitsch e nofo i le fogafale lona lima o se fale e leai ni lifi eletise. E tatau ona ma uia le faasitepu e vaai o ia.

Peitai sa tumau lava le manao o Peresitene Monson. Ma o lea na ma o ai.

Ou te manatua le faigata ia Peresitene Monson ona a’e i na faasitepu. Sa na o ni nai faasitepu lava i le taimi ona tatau lea ona tu e malolo. Sa leai ma se upu faaseā na ia saunoa ai, ma sa le manao foi e toe foi. Ona o le fale e maualuluga ona taualuga, o lea sa foliga mai ai na faavavau le aluga o faasitepu, peitai sa faaauau pea ma le fiafia Peresitene Monson seia ma taunuu i le potu o Uso Panitsch i le fogafale lona lima.

Ina ua ma taunuu i ai, sa matagofie le ma asiasiga. Sa faafetai atu Peresitene Monson ia te ia mo lona soifuaga o auaunaga tuuto ma faafiafia o ia i ni foliga ataata. Ae ma te le’i tuumuli, sa ia tuuina atu ia te ia se faamanuiaga faaleperisitua matagofie.

Sa mafai ona filifili Peresitene e malolo i le va o a matou sauniga uumi. Sa mafai foi ona ia fesili e maimoa i nisi o mataaga matagofie o Hamburg. E tele taimi ou te mafaufau ai i le tulaga ese na ai, e ui lava i le tele o mataaga matagofie i lena aai, ae o le tasi sa sili atu lona manao e fia vaai i ai nai lo se isi lava mea, o se tagata o le Ekalesia ua vaivai ma ua le toe fealuai.

Sa malaga mai Peresitene Monson i Hamburg e aoao atu ma faamanuia i tagata o le atunuu. Ae i lea lava foi taimi, sa tulimatai atu lava o ia i le tasi.

A o talanoa le Aposetolo o Peteru e uiga ia Iesu, sa ia ofoina mai lenei faamatalaga faigofie: “Sa femaliuai [o Ia] ma agalelei” (Galuega 10:38). O le mea lava foi lea e tasi e mafai ona ta’ua e uiga i le tamalii ua tatou lagolagoina o le perofeta a le Atua.

A’eaina o Faasitepu

Na savali Peresitene Monson i ni faasitepu se tele ina ia fesoasoani atu ia Uso Panitsch. Ia mafaufau i ni mea eseese se tolu e mafai ona e faia e fesoasoani atu ai i se tasi, ae maise lava i le fale. Tusi se ata pe tusi i luga o faasitepu taitasi ina ia fesoasoani e te manatua ai ou manatu.

Er Spricht Deutsch (“E Tautala o Ia i le FaaSiamani”)

O Peresitene Uchtdorf o le tagata muamua lea mai Siamani ua auauna atu i le Au Peresitene Sili. A o laitiiti o ia, sa tautala o ia i le faaSiamani. O le taimi nei pe a saunoa o ia i konafesi aoao, e tautala i le faaPeretania. Vaai i le fuaiupu o loo le taumatau mai le saunoaga a Peresitene Uchtdorf sa tuuina mai i le Konafesi Aoao ia Aperila 2008. Vaai pe mafai ona e faaliliuina ia upu faaSiamani i lau lava gagana.

“Ou te fiafia i le mauaina o le avanoa matagofie e ta’u ai a’u o se tagata o le die Kirche Jesu Christi der Heiligen der Letzten Tage.”

“Ou te tatalo ina ia aumai e le Atua ia te a’u le Kraft ma se malamalamaaga Herz e faalautele ai lenei valaauga paia.”

“Ou te matua lagona le faagaeetia e galue felatai ai ma Präsident Monson. … O ia o se Prophet Gottes.”

Tauagavale ma le taumatau pito i luga: ata na tusia e Beth M. Whittaker; taumatau: ata na tusia e Sam Lawlor