Savali a Faiaoga Asiasi

Faafailele le Tupulaga Fai A’e

Ia aoao atu ma le agaga tatalo mau ma upusii nei po o, pe afai e manaomia, se isi mataupu faavae o le a faapea ona faamanuiaina ai uso o loo e asia. Ia molimau atu e uiga i le aoaoga faavae. Ia valaaulia i latou o loo e aoaoina e faasoa mai mea ua latou lagonaina ma aoaoina.

MFF 123:11: “O le tiute tatau foi ia i tatou i le tupulaga fai a’e uma.”

O Le A Lo’u Tiutetauave i le Tupulaga Fai A’e?

Elder Neal A. Maxwell (1926–2004) o le Korama a Aposetolo e Toasefululua: “Na faapolopoloina e le Alii mo le taimi lenei, ua tatau nei ona puipuia … ma saunia [le tupulaga fai a’e] mo lo latou taimi faapitoa i le talafaasolopito o tagata! Sa taofia i latou ina ia omai i lenei taimi, peitai ua manaomia nei ina ia uunai i latou i luma e faafeiloa’i la latou galuega na tofia i ai i latou. …

“E leai se eseesega o le autalavou ma tagata ua faamoemoeina e liliu mai. E i ai taimi faigata na e amata ai ona ma’au atu o latou loto—i le Alii pe o ese mai foi ia te Ia. O nei taimi o faaiuga e le mafai ona fatuina i taimi uma, ae a tulai mai loa, e le tatau lava ona maumauina. E masani lava, o nei taimi e oo mai i talanoaga filemu ma le migao ma matua, matua o matua, se epikopo, se taitai matua, po o se paaga amiotonu” (“Unto the Rising Generation,” Ensign, Ape. 1985, 8, 10).

Elder Ronald A. Rasband o le Au Peresitene o Fitugafulu: “Ua agavaa o tatou tupulaga fai a’e mo la tatou taumafaiga aupito sili e lagolago ma faamalosia i latou i lo latou aga’iga’i atu i le tulaga faatagata matua. … I a tatou taga taitasi e fai, o nofoaga uma tatou te o i ai, o talavou taitasi o le Au Paia o Aso e Gata Ai tatou te feiloai i ai, e ao ina faateleina lo tatou iloa o tulaga manaomia mo le faamalosiauina, faafaileleina ma le avea ma se uunaiga mo le lelei i o latou olaga” (“O Tatou Tupulaga Fai A’e,” Liahona, Me 2006, 47).

E Mafai Faapefea Ona Ou Faafaileleina le Tupulaga Fai A’e

{Peresitene Gordon B. Hinckley (1910–2008): “Ia aua lava nei galo o nei fanau o atalii ma afafine o le Atua ma e ao ona outou vaavaaia e pei o a outou lava, o Ia na ulua’i avea ma matua ae tou te lei avea ma matua ma e na te lei aveesea Lana aia tatau faamatua po o le naunau i Ana fanau iti nei. … Ia tausia a outou fanau i le alofa, i aoaiga ma apoapoaiga a le Alii. Ia tausia faalelei a outou fanau iti. Ia faaulufale mai i latou i o outou aiga, ma faafaileleina i latou ma alolofa i ai ma o outou loto atoa. Atonu o le a latou faia i ni aso a sau, ni mea tou te le mananao latou te faia, peitai ia onosai, ia onosai. E le faapea ua e toilalo pe afai sa e taumafai” (“O Afioga Tulei a le Perofeta Soifua,” Liahona, Me 1998, 26–27).

Julie B. Beck, peresitene aoao o le Aualofa: “O le faafailele o lona uiga o le galueaiina, tausia, ma ia faaola. … O le faafailele e manaomia ai le faatulagaina, onosai, alofa, ma le galue. O le fesoasoani i le tuputupu a’e e ala i le faafailele, o se matafaioi mamana moni lava ma le faatosina ua faaee mai i tamaitai.” (“O Tina Ua Latou Iloa,” Liahona, Nov. 2007, 76, 77).

Barbara Thompson, fesoasoani lua i le au peresitene aoao o le Aualofa: “I le avea ai o ni uso o le Aualofa, e mafai ona tatou fesoasoani atu le tasi i le isi e faamalolosia aiga. Ua tuuina mai ia i tatou avanoa e tautua ai i le tele o tulaga. Tatou te feiloai pea ma tamaiti ma le autalavou atonu o loo manaomia le mea tonu e mafai ona tatou ofoina atu. O outou na uso matutua o loo i ai ni fautuaga e sili atu ona lelei ma le poto masani e faasoa atu i tina laiti. O nisi taimi e ta’u mai ai pe fai e se taitai o Tamaitai Talavou po o se faiaoga o le Peraimeri ia le mea tonu o loo manaomia e faamalosia ai se mea o loo taumafai se matua e aoao atu. Ma e mautinoa lava, tatou te le manaomia se isi valaauga faapitoa e aapa atu ai i se uo po o se tuaoi” (“Ou te Faamalosia Oe; Ou te Fesoasoani ia te Oe,”Liahona, Nov. 2007, 117).

Ata pue ma tua atu o le ata na saunia e Craig Dimond