Manatu mo Afiafi Faaleaiga

O nei fautuaga faafaiaoga ua saunia e tuuina atu ai ia te oe nisi o manatu. E mafai ona e fetuunaia mo lou aiga.

“Faamanuiaga o le Malumalu,” i. 12: Faaali atu se ata o se malumalu. Tuu se ata o se aiga i totonu o le potu e faafesagai ma le ata o le malumalu. A o e faia se aotelega o le tusiga, sii atu le ata o le aiga ia latalata atu i le malumalu. Fesili atu i tagata o le aiga po o a ni o latou lagona pe a taunuu atu le aiga i le malumalu. Faitau le Mataupu Faavae ma Feagaiga 109:7–23, ma vaavaai mo ni auala faaopoopo e saunia ai mo le malumalu ma faamanuiaga ia e oo mai ona o le auai atu i le malumalu. (Tagai foi i le saunoaga a Silvia H. Allred, “Malumalu Paia, Feagaiga Paia,” mai le Konafesi Aoao ia Oketopa 2008.)

“O au? O Se Leoleo Mamoe o Isaraelu?” i. 30: Faitau le vaega “Toe Taitai Mai i Latou,” ma talanoa pe faapefea ona avea i tatou ma ni leoleo mamoe i isi. Ina ia fai o se gaoioiga mo tamaiti laiti, ia auauai i le lalafi ma sue e le tasi le isi faapei o se leoleo mamoe o loo sue ni mamoe ua leiloloa. Mafaufau i tagata e mafai ona e fesoasoani e toe aumai “i totonu o le lafu.” Faaiu e ala i le tatalo mo se taitaiga i auala e fesoasoani atu ai ia i latou. (Tagai foi i le saunoaga a Elder Eduardo Gavarret, “Toe Foi i le Aiga,” mai le Konafesi Aoao ia Oketopa 2008.)

“Amata i le Tatalo,” i. 40: Ia faia se aotelega o ni manatu autu mai le tusiga. Toe faitau le parakalafa muamua o le vaega “O Se Tasi E Talanoa Atu I Ai.” Fai atu i tagata o le aiga e faasoa atu ni taimi na faamalosia ai i latou e ala i tatalo faaleaiga. Ina ia faamamafa atu le taua o le tatalo mo isi, mafaufau e faitau parakalafa mulimuli e tolu o le saunoaga a Elder David A. Bednar, “Tatalo e le Aunoa,” mai le Konafesi Aoao ia Oketopa 2008.

“O Le Vavega i Totila,” i. U6: Faitau le tala, ma talanoa i luitau sa fetaiai ma le aiga o Raoul a o latou sauni e malaga atu i le malumalu. Ia mafaufau e fai faatasi o se aiga ni totila po o le faatinoina o laasaga o le faiga o totila, mai le totoina o sana e oo i le faatauina atu o totila i tagata tafafao mai fafo. Ia faaiu i le faitauina o le upusii a Elder Dennis B. Neuenschwander.

Faaaoga le Talalelei

“E le faigata ona tauaveina ia mataupu faavae o le upu e faavavau ma faaaogaina i o tatou manaoga patino. Afai e mananao ina ia fua mai ni fua, pe faamanuiaina foi, e tatau ona olaola le upumoni i olaga o tagata.”

Elder Bruce R. McConkie (1915–85) o le Korama o le Au Aposetolo e Toasefululua, i le O Le Aoao Atu, E Leai Se Isi Valaauga E Sili Ai (1999), 10.

Valaau mo ni Tusiga

O a ni aafiaga na fesoasoani ia te oe e te iloa lelei ai le Faaola? Pe na faapefea ona e mauaina se agaga faafetai sili atu mo le ma le malamalamaaga e uiga i le salamo, faamagaloga, o le Togiola, o le faamanatuga, po o isi vaega o le galuega ma le misiona a le Faaola? Faamolemole auina mai se faamatalaga o ou aafiaga ma mea na e aoaoina mai ai i le [e-mail].