Faamamaina o Lotoa o le Malumalu

Saunia e Joshua J. Perkey

Mekasini a le Ekalesia

I Kentucky, i le faaitu i saute o le Iunaite Setete, a oo i le taumafanafana e vevela ma piipii. I se tasi aso na iloa ai e tagata ua sosolo le limu laumeamata i le pa o loo sio ai le Malumalu i Louisville Kentucky. Ma sa le na o sina mea laitiiti—sa matua tele lava!

Sa tonu loa i tamaiti o le Peraimeri a le Uarota Lua a Crestwood i le Siteki a Louisville Kentucky e faia i ai se fuafuaga. Sa latou faia se gaoioiga i se tasi aso mafanafana o Iuni. “Sa matou aveina ni ieie ma ni paelo vai ma fasimoli e fufulu ai le pa ma fesoasoani e tausi ia mama le maota o le Tama Faalelagi,” o le tala lea a Sara M., e 10 tausaga. Sa susū pala o ia, peitai “sa malie aua sa i ai uma a matou uo iina.”

Na fai mai Josh H., e 9 tausaga, sa fai si ona lelava i le fufuluina o vaega maualuluga o le pa. Peitai sa toatele le au fesoasoani. O le mea moni, na toetoe o tamaiti uma o le Peraimeri na omai, pe tusa ma le 75 o i latou uma. O le toatele sa latou o mai ma o latou uso ma tuafafine ma tinā ma tamā e fesoasoani.

Sa iloa e tamaiti sa latou i ai i lotoa o le malumalu, o lea sa latou taumafai ai ia migao. Ma sa leai se tasi na tomumu i le faigata o le galuega. “Sa matou taumafai malosi e olo ese palapala aua ua fai sina umi o i ai,” o le tala lea a Megan H., e 6 tausaga. Peitai sa matua aoga lava. “Sa ou iloa sa matou tausia le maota o lo tatou Tama Faalelagi.”

O le lagona foi lea o Sara. “Sa ou matua lagonaina le Agaga aua sa ou iloa sa fiafia le Tama Faalelagi ona sa matou faia lena mea,” o lana tala lea.

Ina ua maea le galuega, sa faapotopoto uma tagata i le fale Lotu na sosoo ane e ai sosisi vevela ma talatalanoa e uiga i mea na latou aoaoina.

Ua tau le mafai ona faatali tamaiti Peraimeri mo le taimi e mafai ai ona latou o i totonu o le malumalu e faia papatisoga mo e ua maliliu. Ae mo le taimi nei, ua latou fiafia lava i le iloaina sa latou fesoasoani i le faamanaiaina o le vaaiga i fafo—faapei ona tatau ona i ai le maota o le Tama Faalelagi.