O Le Vavega i Totila
“O mai ia outou, sei tatou o ae i le mauga o le Atua, i le fale o le … Atua” (2 Nifae 12:3).
Na o mai i le matou fale i Hondura ni alii talavou se toalua na fai ni o la ofutino papae ma ni fusiua. “Ma te o mai mai Le Ekalesia a Iesu Keriso o le Au Paia o Aso e Gata Ai,” sa la fai mai ai.
Sa talia i la’ua e Mama e o mai i totonu [o le fale]. Sa aoaoina lo matou aiga e faifeautalai e uiga i le talalelei a Iesu Keriso. E ui ina sa na o le iva o’u tausaga, ae sa ou lagonaina i totonu o lo’u loto le moni o a la’ua upu.
“O le a se mea e tatau ona matou faia e avea ai o ni tagata o le Ekalesia a Keriso?” Sa fesili atu ai Papa.
“Ia papatisoina,” o le tala lea a le isi alii faifeautalai.
Sa papatisoina Mama, Papa, ma a’u ina ua mavae le masina e tasi. O lo’u uso o Toma, sa na o le ono ona tausaga, na toe lua tausaga ona papatisoina lea o ia.
A o faaauau pea ona aoaoina i matou i le talalelei, sa faamatalaina e faifeautalai le auala e mafai ai ona faamauina faatasi aiga i totonu o le malumalu.
O le malumalu na aupito lata mai o Kuatemala, e tele kilomita e mamao ai. O lona uiga e tatau ona matou totogia ni pasese o le pasi mo aso e lua o le faigamalaga ma le nonofo ai i se fale mautotogi i le taulaga mo ni po se lua. Sa leai sa matou tupe mo se malaga faapenei, peitai sa le mananao Mama ma Papa e avea lena ma mea e taofia ai i matou mai le o atu i le malumalu.
O tausaga uma lava sa totoina ai e lo matou aiga le sana. Sa matou faaaogaina e faia ai ni totila e faatau atu i tagata malaga sa ui mai i le matou nuu.
Sa aumai e Mama se pepa ma se penitala. Sa ia faaopoopoina ni fuainumera ma faapea mai, “E tatau ona tatou faatauina atu ni totila se 2,500 e totogi ai la tatou faigamalaga.”
Sa ou ofo. O le matua tele lava o na totila! “Tatou te lei faatauina atu lava ni totila ua sili ona tele,” sa ou fai atu ai.
Sa leai se foliga popole o Mama. “O le a saunia e le Alii,” o lana tala lea. Fai mai Mama ia te au, “O Raoul, o oe ma Toma e tatau ona fesoasoani ia papa e tau le sana.”
Sa ma fesoasoani maToma ia Papa e tau le sana. O aso uma lava, e faamalū ai e Mama le sana, fai paluga, ma falai totila. Sa ma o ma Toma e faatau atu totila i le nuu.
“Sa sau ananei se pasi o tagata turisi,” sa ou ta’u atu ai ia Mama ina ua ma foi atu i le fale i le aso muamua. “E tele totila sa ma faatauina atu.”
“O se vavega,” o le tala lea a Mama.
O aso uma lava sa matou faatauina atu ai ni totila se tele. I na o ni nai masina ae na matou sefeina ai le tupe sa matou manaomia e alu ai le matou malaga i Kuatemala. Peitai sa ou popole pea. Sa ou faalogo i tala e uiga i tagata faomea ia latou te taofia pasi e ui i le vaomatua. Sa latou faoina mea taua uma a pasese.
“Ae e faapefea ia tagata faomea?” o lau fesili lea.
“O le a puipui i tatou e le Alii,” o le tali lea a Mama. Ona ia fesili mai lea, “Raoul, e te talitonu i le talalelei?”
“Ioe.”
“E tatau la ona e iloa e tatau ona tatou faia mea uma i lo tatou malosi e mulimuli ai i le Alii ma Ana perofeta.”
O le mavae o le tausaga e tasi talu ona matou papatiso, na saunia ai lou aiga e faia le malaga i le malumalu. Sa matou o i le pasi e agai atu i le Aai o Kuatemala. O le a le galo lava ia te a’u le Agaga sa ou lagonaina a o faamauina faatasi lo’u aiga mo le olaga nei ma le faavavau.
O lena po, a o ou tootuli e fai la’u tatalo, sa ou faafetai atu i le Tama Faalelagi mo faamanuiaga o le malumalu.
Ata na tusia e Jim Madsen