O Le Tusi Ata [Fou] o le Talalelei

Saunia e Michael G. Madsen

Atinae o Mataupu Aoaoina a le Ekalesia

O se tasi o tusi taugofie e fusi i uaea ua tuuina atu ai nei i le Au Paia o Aso e Gata Ai le avanoa e maua ai ata lanu e 137 mo le faaaogaina i le aoaoina ma le aoaoina atu o le talalelei.

I le ofisa o Peresitene Thomas S. Monson o loo tautau ai se atavali o le Faaola na tusia e le tusiata o Heinrich Hofmann. Na saunoa le perofeta o lenei atavali e faamanatu atu ai ia te ia e fai le mea ua finagalo le Faaola na te faia. E mafaia e ata ona aumaia se faatosinaga mamana ia i tatou taitoatasi, e pei lava ona faia e lenei atavali ia Peresitene Monson.

Ona o se naunautaiga e tuuina atu ni ata taugofie mo tagata o le au paia e faaaoga i vasega o le Ekalesia ma i o tatou aiga, ua tuuina mai ai e le Ekalesia le Tusi Ata o le Talalelei ua i ai ni atavali ma ni ata pue se 137. O nei ata e mafai ona o faatasi ma lesona e aoaoina i soo se mea mai Aoaoga Faavae o le Talalelei e oo i taimi o fetufaaiga a le Peraimeri. E mafai foi ona faaaogaina i afiafi faaleaiga, suesuega faaletagata lava ia o tusitusiga paia, galuega faafaifeautalai, ma faiaoga o aiga po o faiaoga asiasi.

O ata taitasi o loo i lenei tusi e valaaulia ai se taimi o aoaoga—o le avanoa e faamatala ai se tala mai tusitusiga paia ma aoao atu ai se mataupu faavae. Ina ia fesoasoani ia i tatou, o le Tusi Ata o le Talalelei o loo aofia ai se lisi o ata e fesootai i a latou tala i tusitusiga paia. O le suesueina o nei mau o le a faalolotoina ai lo tatou malamalamaaga o mea na tutupu ma mataupu faavae o le talalelei o loo faaalia i ata taitasi.

O auala nei e tolu e mafai ona faaaogaina ai le Tusi Ata o le Talalelei i le aoaoina atu o se lesona:

1. Mafaufau e valaaulia tagata taitoatasi e sue ia mau e fesootai ma se ata faapitoa. Fai atu ia i latou e faitau leotele le mau pe otooto mai a o outou talanoaina faatasi le ata.

2. Mafaufau e fai atu i tagata taitoatasi e faamatala mea o loo latou vaaia i se ata. O a aoaoga faavae o loo aoao mai i le ata? E mafai faapefea ona tatou faaaogaina na mataupu faavae i o tatou olaga i aso nei?

3. A uma ona aoaoina se mataupu faavae faapitoa, fai atu i isi e sue i le Tusi Ata o le Talalelei, e vaai mo ni ata o loo faaalia ai lena mataupu faavae. Fesili atu i tagata taitoatasi po o a ni o latou lagona pe a latou vaai i le ata i le mae’a ai ona latou talanoaina o lona uiga.

I a tatou aoaoga uma ma le aoaoina atu o le talalelei, ia tatou saili ma le agaga tatalo i musumusuga (tagai MFF 42:14–17). A o tatou faia, o le a aumaia e le Agaga Paia isi manatu i o tatou mafaufau ua fetuunaiina ia fetaui ma manaoga o i latou o loo tatou aoaoina. O Le Tusi Ata [Fou] o le Talalelei o se meafaigaluega taua ua mafai ona fesoasoani ia i tatou e fesoasoani atu ai i le tasi ma le isi ia omai ia Keriso ma maua faamanuiaga o le ola e faavavau.

Mana o Mea Faitino

“O faiaoga e naunau e faateleina le tomai e malamalama ai le tagata aoao, na te faaaogaina foi mea faitino. O le toatele lava o tagata e sili atu ona latou aoao ma umi se taimi e manatua ai, pe a e tuuina atu ni manatu i le faaaogaina lea o ata, o faafanua, o se faavasegaina o upu, po o isi mea e vaaia, nai lo le na ona tautala atu.”

O Le Aoao Atu, E Leai Se Isi Valaauga E Sili Ai (1999), 191.

E Mafai Faapefea Ona Ou Maua le Tusi Ata o le Talalelei?

1. E mafai ona e maua se lomiga i le initoneti i le www.gospelart.lds.org.

2. E mafai ona e faatauina mai le Tusi Ata o le Talalelei (aitema nu. 06048) i la outou faletusi.

3. I le Iunaite Setete ma Kanata, e mafai ona e okaina le tusi i le initoneti i le www.ldscatalog.com pe telefoni i le 1-800-537-5971.

Mai le tauagavale: Faatusa o Keriso, na saunia e Heinrich Hofmann, faaaloaloga a le C. Harrison Conroy Co.; ata na saunia e Matthew Reier, Hyun-Gyu Lee, ma Christina Smith