Taimi o Fetufaaiga

Matou te Talitonu o le Aiga Ua Faauuina e le Atua

“O le aiga o le totonugalemu lea o fuafuaga a Le Foafoa, mo le taunuuga e faavavau o Lana fanau” (“O Le Aiga: O Se Folafolaga i le Lalolagi”).

O Amalekia o se tagata amioleaga. E tele mea sa ia folafola atu i tagata Sa Nifae pe afai latou te faia o ia ma tupu. E toatele tagata sa talitonu ia te ia ma liliu ese mai le amiotonu.

Sa avea Moronae ma taitai au o autau a Sa Nifae. Sa amiotonu ma talitonu o ia ia Iesu Keriso. Ina ua faalogo Moronae e toatele tagata ua taitaieseina e Amalekia, sa oo ina ita Moronae ia te ia. Sa ia iloa ua i ai tagata i tulaga matautia o le aveesea o o latou saolotoga.

Sa saesae e Moronae se fasi ofu mai lona ofu ma tusia ai, “O le mea lenei e faamanatuina ai lo tatou Atua, ma la tatou ekalesia, ma saolotoga, ma lo tatou filemu, ma a tatou ava, ma a tatou fanau” (Alema 46:12). Sa ia faamauina le fasi ie i le pito o se laau ma taua ai o le tagavai o le saolotoga. Ona ia tatalo ai lea mo tagata ma asiasi atu ia i latou, ma faalelea le tagavai o le saolotoga ma valaau atu ia Sa Nifae ia au faatasi ma ia i le puipuiga o lo latou saolotoga. (Tagai i le Alema 46:1–21.)

O loo e ola i se vaitaimi lea o loo i ai tagata e faapei o Amalekia o loo mananao e taitaieseina i tatou mai le mulimuli atu i le fuafuaga a le Tama Faalelagi. O aiga o se tasi lea o vaega e sili ona taua o lena fuafuaga.

E finagalo le Tama Faalelagi ia malamalama tagata o le Ekalesia i Lana fuafuaga mo aiga. Na tusia e le Au Peresitene Sili ma le Korama a Aposetolo e Toasefululua “O Le Aiga: O Se Folafolaga i le Lalolagi” e folafola atu ai mea o loo tatou talitonu i ai e uiga i aiga. E pei o le tagavai o le saolotoga, o le folafolaga e mafai ona uunaia ai i tatou ia manatua ma faamatala atu mea tatou te talitonu i ai.

Gaoioiga

Aveese itulau U4, ma faapipii i se pepa malo. Tautau le folafolaga i se mea e mafai ona vaai atu i ai lou aiga ma manatua ai le taua o le faamalosia e le tasi o le isi.

Manatu mo Taimi o Fetufaaiga

“O Le Aiga: O Se Folafolaga i le Lalolagi” o se faaaliga o aso nei. Fai atu i tamaiti e faalogo pe faafia ona latou faalogo i upu “[o le a] faaalia” po o le “[ua] faaalia” a o latou faia faatasi le mataupu faavae o le faatuatua lona iva. Ia aoao atu o loo faaauau pea ona faaalia mai e le Atua Lona finagalo i Ana fanau. O lenei fesootaiga mai le Atua ua taua o faaaliga. Tuu atu i tamaiti taitasi se kopi “O Le Aiga: O Se Folafolaga i le Lalolagi” ma faamatala atu o le folafolaga o se faaaliga ua tuuina mai i o tatou aso e ala mai i auauna filifilia a le Atua. Ia tuuina atu i vasega taitasi ni fuaiupu eseese po o se fasifuaitau mai le folafolaga ma o loo i ai nisi o upu o loo misi. Tuu atu ia i latou e galulue faatasi e faatumu avanoa i upu sao. Mo se faataitaiga: “O Le o le lea o a Le Foafoa mo le taunuuga e faavavau o Lana fanau.” Ia tuu atu i vasega taitasi e tutu ma tauloto le latou fasifuaitau po o le fuaiupu ua uma. Usu le fuaiupu muamua o le “O Le Aiga e Ou le Atua” (Liahona, Oke. 2008, U12–U13). Ia faamamafa atu o le folafolaga i le aiga o se faaaliga mai le Atua ma e tatau ona tatou malamalama ma ola i ona aoaoga. Toe ao mai kopi o le folafolaga; o le a e toe faaaogaina i le vaiaso lona tolu.
“O Le Aiga: O Se Folafolaga i le Lalolagi” o loo aoao mai ai le taua o le faaipoipoga. Valaaulia ni nai tagata o le uarota po o le paranesi ua uma ona faatagaina e le epikopo po o le peresitene o le paranesi e auai i se talanoaga faavaega e uiga i le taua o le faaipoipoga (tagai “Talanoaga Faavaega,” O Le Aoao Atu, E Leai Se Isi Valaauga E Sili Ai [1999], 184–85). A o le’i oo i le taimi o le fetufaaiga, tuu atu ia i latou ni fesili o le a e fesiligia. Faataitaiga: Pe o faapefea ona faamanuiaina oe ma lou toalua e le Tama Faalelagi? Pe mafai ona e faasoa mai se tala e uiga i se aoaoga o le talalelei sa fesoasoani ia te oe e avea ai ma se toalua lelei? O a ni mea e mafai ona fai e tamaiti i le taimi nei ina ia saunia ai e faaipoipo i se aso o i luma? Atonu e te manao e fautua atu ia i latou e auai i le talanoaga faavaega e toe faamanatu le “O Le Aiga: O Se Folafolaga i le Lalolagi.” Tuu atu i tamaiti e auauai i le filifilia ma le faitauina o se fesili. Tuu atu i tagata o le talanoaga faavaega e tuuina mai ni a latou tali. Molimau atu i le taua o le faaipoipoga i le fuafuaga a le Tama Faalelagi.

Ata na saunia e Matthew Reier