O Faamanuiaga o le Auauna Atu
Ua faamanuiaina e tagata o le Ekalesia olaga ma faamalolosia molimau a o latou mulimuli i faataitaiga a le Faaola o le auauna atu i isi.
O faataitaiga lelei o le auaunaga a Peresitene Thomas S. Monson ua lauiloa i tagata o le Ekalesia a Iesu Keriso o le Au Paia o Aso e Gata Ai. Sa aapa atu o ia ia i latou o e manaomia le fesoasoani i le sili atu ma le onosefulu tausaga, i le tuuina atu o le faamafanafanaga ma le filemu i le anoano o tagata taitoatasi ma auauna atu o ia lava i e mamai ma puapuagatia.1
Na saunoa Peresitene Monson, “O aso nei, o loo i ai loto e tatau ona faafiafia, o loo i ai galuega e tatau ona fai—e oo lava i agaga faapelepele e tatau ona laveai.” “O e mamai, o e vaivai, o e fiaaai, o e ua tuulafoaiina, o e manunua, o e ua faaesea, o e matutua, o e leai ni mea e nonofo ai, o loo fetagisi mai mo la tatou fesoasoani.”2
I lana auaunaga patino, na faaalia ai e Peresitene Monson le eseesega i le va o letaitaia ma le auauna atu. O tagata o le Ekalesia latou te taitaia polokalama ma sauniga, ae latou te auauna atu i tagata taitoatasi, alolofa atu ia i latou ma avea ma o latou toomaga. I le aapa atu i isi, na faataitai ai Peresitene Monson i le Faaola, o le na “le sau o ia ina ia auauna tagata ia te ia, ae peitai ia auauna o ia”(Mareko 10:45).
E pei ona faapupula mai e faamatalaga e fa o loo ta’ua i lalo, o le tagata o le Au Paia o Aso e Gata Ai e “alu ia ma ia … faapea ona fai” (Luka 10:37) e faamanuia ai isi, le Ekalesia, ma i latou lava.
O Le Samaria ma le Paluga mo Panikeke
O lo’u toe manuia i le maea ai o se taotoga laitiiti, sa le faigofie e pei ona sa ou manatu o le a i ai. Ae peitai i le avea ai ma se peresitene o le Aualofa a le uarota, sa ou manatu ai e tatau ona ou tuuina atu le fesoasoani i isi, ae le o le talosaga atu mo se fesoasoani. I le taeao o le Aso Gafua, i le tolu o aso talu ona mae’a lo’u taotoga, sa tatau ai ona ou fafaguina i luga [la’u] fanau e toafitu ma sauni mo le aoga. Sa ou mafaufau pe tatau ona vavao la’u tama teine matua e nofo mai e fesoasoani [i le vaaiga] o le pepe.
A o faasolo nei manatu i lo’u mafaufau, ae tatagi loa ma le logo o le faitotoa. O Viki Woodard, o lo’u fesoasoani muamua ma se uo lelei, na sau e fesoasoani mai. Sa ia faapea mai na sau o ia e fai ni panikeke. Sa ia u’uina mai se pesini o le paluga falaoamata ma fesili mai po o fea na te maua ai se falai. Sa matua fiafia tamaiti.
Ina ua mae’a le ti o le taeao, sa alu loa Viki e ave tamaiti i le aoga, faamama mea uma, ma alu ma ave le pepe i lona aiga ae na faatoa aumai lava ina ua oo i le taimi e moe ai i le aoauli. Mulimuli ane, ina ua ou fesili po o ai o vaaia lana fanau laiti, sa ia faapea mai, e lua ni itula o loo nofo ai lona toalua mai le galuega ina ia mafai ona ia fesoasoani mai ia te a’u.
O le auaunaga a Viki ma lona toalua i lena aso na mafai ai ona toe maua mai lo’u malosi ma fesoasoani i lo’u manuia atoatoa.
Beverly Ashcroft, Arisona, ISA
I Se Aupito Itiiti o i Latou Nei
I se tasi aso a o na o ma’ua ma lo’u atalii laitiiti le matou fale, na ou see ai i se sitepu ma ou pau ai. Na iu ai i le tiga faifaipea o lo’u manava mo le tele o aso, o lea na ou alu ai e vaai se fomai.
Sa ou maitaga i le taimi lena, ma o suesuega a fomai na iloa ai ua pau ese le afuafu o le pepe. O lenei tulaga na manaomia ai lava lo’u matua malolo lelei, ne’i maumau le pepe.
Sa ou popole ona e toatolu le ma fanau laiti ma e le gafatia ona ma totogia se [tagata] e fesoasoani mai. Ae peitai, ina ua faalogo uso o la’u paranesi i le tulaga na ou i ai, na omai ai loa e fesoasoani e aunoa ma se tau fai atu i ai. Sa latou faatulagaina i latou lava i ni vaega se tolu e fesoasoani mai ia te a’u i le taeao, aoauli, ma le afiafi.
Na latou omai e fai le tagamea, auli, kuka, faamama, ma fesoasoani i la’u fanau i a latou meaaoga e aumai i le fale. O se uso na suafa ia Ruti, o le na papatiso i le Ekalesia i le taimi na o’u ma’i ai, sa matua masani lelei i ai lo matou aiga. Sa fesoasoani Ruti, o se teine tausima’i, i le po ma faia o’u tui na tatau ona fai.
Ou te le i tau fesili atu mo se mea; na iloa lelei e nei uso o’u manaoga ma sa latou taulimaina mea uma. Afai ae toatele atu le au fesoasoani nai lo i latou na manaomia, ona nofo lea o se uso se toatasi ma te tafafao. E tolu masina na latou faia ai lenei mea.
Na aumai e nei uso ia te a’u le malosi, alofa, ma le tuuto. Na latou tuuina mai o latou taimi ma taleni. Sa latou faia ni osigataulaga ina ia i ai iina. Latou te le’i fai mai lava mo se taui. Sa latou alolofa ma auauna atu, ma mulimuli i faataitaiga a le Alii, o le na aoao mai i tatou, “E moni ou te fai atu ia te outou, aua na faia e outou i le tasi o e aupito itiiti o o’u uso nei, o a’u lea na outou faia i ai” (Mataio 25:40).
Enilze do Rocio Ferreira da Silva, Parana, Pasila
Na o le Aumai Lava o o Latou Lavalava
A o i ai lo’u toalua, o Brandon, i Orlando, Florida, i se malaga faapisinisi, na ala a’e o ia i se tasi po ua maualuga lava lona fiva ma sa faigata ona manava. Sa telefoni atu o ia mo se taavale e ave ai ma’i faafuasei mo le aveina atu o ia i le falema’i, lea na ia iloa ai na ogaoga lona limonia.
Talu ai e i ai le ma fanau laiti ma Brandon ua amata ona savavali, o lea sa le mafai ai ona ou malaga faatopetope atu mai lo matou aiga i Penisilivenia e agai atu i Florida. Sa ou telefoni atu ia Brandon i aso uma, ma le faamoemoe ia faasolosolo manuia ina ia mafai ona toe fo’i mai ia i matou.
Peitai sa atili faaletonu le tulaga o Brandon. Ina ua faatauanau mai se teine tausimai ou te alu atu i le falemai i se taimi vave lava, sa amata ona ou mafaufau po o ai e mafai ona vaaia le ma fanau tama.
Sa malie mai lo’u tina e nofo mai lana galuega mo se taimi ma fai mai o le a sau i se vave e mafai ai, peitai, o le malaga a le vaalele na tatau ona ou alu ai, na aluese a o le i taunuu mai o ia. Sa ou telefoni atu i nisi o uo pe mafai ona latou vaaia la’u fanau tama seia taunuu mai lo’u tina. Na fai mai sa’u uo mai le Aualofa o Jackie Olds, e fiafia o ia e vaai i laua.
“Tau lava o le aumai o o laua lavalava ma napekini,” sa ia fai mai ai, “ma o le a ou vaaia i laua i le tele o aso e manaomia ona e alu ai.”
Sa amata ona ou musu aua o lenei uso, e i ai foi lana ia fanau e toatolu, ma e pisi tele lona olaga, ae sa ia faatauanau mai pea. Ina ua ou oo atu e momoli i ai la’u fanau, sa faamafanafana mai ia te a’u i le faapea mai, “Aua e te popole mai ia i laua. Ia [e] popole ia malosi Brandon ma aumai o ia i le fale. Sa ou tausia muamua foi isi tamaiti faatoa tau savavali.”
Sa ou iloa ai i lena taimi o le a saogalemu tamaiti, fiafia, ma lelei ona vaai, lea lava sa faia ai. Na mafai ona ou faatasi atu i lo’u toalua, o le sa matua ma’i tigaina i le taimi na ou taunuu ai i le falemai. Ae ina ua mavae ni nai aso, sa faapea ona malosi lelei o ia e toe foi mai i le aiga.
Ou te faafetai lava i se uo lelei o le na tali mai—e sili atu ma le mea e mafai ona ou talosaga atu ai mo ia—ma auauna mai ai ia i matou i le taimi na manaomia ai se fesoasoani.
Kelly Parks, Penisilivenia, ISA
Auaunaga i Tafatafa o se Moega
O Uso Anderson, o le peresitene tiotio o Alii Talavou a le uarota ma e 35 ona tausaga, o se ituaiga taitai o le autalavou sa faamemelo i ai tagata uma: o se faifeautalai ua mae’a se misiona, o se tamā o se fanau e toalima, o se fai pisinisi, ma e talavou. Ae o lenei ua maua i le gasegase o le kanesa o le toto. Ina ua faalogo Ryan Hill o le fesoasoani muamua o le korama a ositaulaga, i lenei tala mai le epikopo, sa gaoioi loa, e telefoni atu i ositaulaga taitoatasi o lana korama, o e toaaga ma e le toaaga.
“O le a matou o i le falemai e asi Uso Anderson. Matou te manaomia tagata uma. E mafai ona e sau?” sa ia fai atu ai i ana valaau uma.
“Ou te le mautinoa pe mafai ona ou oo atu,” sa fai mai ai le isi ositaulaga. “E le iloa pe ou te faigaluega.”
“O le a matou faatali la se ia e manava mai,” na tali atu ai Ryan. “O le mea lenei e tatau ona tatou faia faatasi.”
“Ua lelei,” sa fai mai ai le sui lea o le korama. “Se’i ou vaai pe mafai ona fesuiai a ma taimi faigaluega ma se isi tagata.”
Na o uma ositaulaga e 11 i le falemai. Sa i ai uma iina i latou sa le toaaga mai ma i latou na le misia se sauniga i Aso Sa. Sa latou talie faatasi, ma fetagisi ma tatalo ma faia a latou fuafuaga mo le lumanai. I masina na mulimuli mai, sa latou faatulagaina ai ni taimi e mili ai alofivae o Uso Anderson pe a faigata ona fegasoloai lona toto, ma auauai e foai atu se vaega o o latou toto i taimi o togafitiga sa tai lua itula ma fai ina ia maua e [Uso Anderson] tau lava o o latou toto, ma sa faapea foi ona tietie atu i le 20 maila (32km) i le po o le siva tele a le aoga ma a latou paga (e aofia ai ni tamaitai talavou se toalua e le auai i le Ekalesia) i tafatafa o lona moega i le falemai ina ia i ai sona sao i o latou aafiaga a o aooga ai i le aoga maualuga.
I ona aso mulimuli, sa fai atu ai Uso Anderson ia i latou ia fai ni a latou misiona, faaipoipo i le malumalu, ma ia fesootai pea le tasi i le isi. I le sili atu ma le sefululua tausaga mulimuli ane, i le foi mai ai i aiga mai ni misiona, faaipoipo i le malumalu, ma amata o latou lava aiga, o loo latou manatua pea nei taimi taua o aafiaga faaleagaga o auaunaga faatasi ma lo latou taitai peleina.
Norman Hill, Texas, ISA
Ata na tusia e Gregg Thorkelson