[Na] Aoga Lava le Faatalitali
Ina ua ou ulufale atu i le Malumalu o Buenos Aires Atenitina faatasi ma le autalavou o la matou uarota e fai papatisoga mo e ua maliliu, sa matou faatalitali mo ni nai minute i totonu o le potu e faafeiloai ai tagata e ulufale atu i le malumalu. Ona fai mai lea o le aufaigaluega o le malumalu matou te o i totonu o le potu tele na i ai ni nofoa matou te toe faatalitali ai foi.
Ona o le Aso Toonai lea, na toatele ai tagata mai Atenitina atoa na o mai i le malumalu. Sa matou faatalitali ai iina mo le lua ma le afa itula, sa na o le saofafai filemu lava. Sa amata ona feoai solo ni manatu le lelei i lo’u mafuafau: “E mafai faapefea ona latou fai mai matou te faatali i lenei taimi atoa? Ua ou le lava, ma o le mea moni sa sili ai pe a na ou le sau, aua ua ma’imau le taimi.”
Sa ou tu i luga ma amata ona ou savali ese atu mai le potu tele. E le’i umi ae oo mai se tasi o le aufaigaluega ma fai mai: “Le autalavou e, faamolemole aua tou te le to’a. Ua ou iloa ua leva ona outou faatalitali, ae tou te silafia? I le lalolagi o agaga, e tele ni seneturi na faatalitali ai le faitau miliona o tagata mo lenei taimi, ma ou te ta’u atu ia te outou, o loo matua mananao lava i latou ia oo mai ia lo latou avanoa. O loo faataunuu e le usoga ia papatisoga ma faamauga, ma e le mafai ona latou faia nisi mea nai lo mea o loo latou faia.”
Ina ua ia saunoa mai i nei upu, sa ou lagonaina lo’u maasiasi. Na ou iloaina sa ou manatu faapito aua sa ou le manao e tuuina atu ni itula mo na tagata o e na faatalitali i le fia o tausaga, ma latou te le’i maua le avanoa na ou mauaina ou te faalogo ai i le Ekalesia moni ma ia papatisoina ai i le fogaeleele.
Sa toe sau foi le tagata faigaluega, ma amata ona valaau mai igoa mai le matou uarota. Na tuu mai e se uso ia i matou ni ofu papae ia na toeitiiti lava a fetaui lelei. Ina ua uma ona fai o matou lavalava, sa ia noaina o matou lauulu i ni manoa papa’e.
Ona, matou savavali lea e aunoa ma ni seevae i nofoa uumi o le potu mo papatisoga. Sa malūlū ma maualuga le kapeta ma na pei lava matou te le’i savavali ai luga.
Ina ua oo i lo’u taimi, sa ou popole lava e pei ona sa i ai foi i le aso o lo’u lava papatisoga. Peitai sa agalelei le aufaigaluega ma sa latou onosai lava ia i matou taitoatasi o lea na maoae ai le lagona [na ou mauaina].
Ina ua ou aluese mai le faatanoa, sa faatalitali mai se uso ia te au ma se solotaele pa’epa’e tele ma se ataata tele. Na sui ou lavalava ma ou alu atu i totonu o se potu lea na faamauina ai a’u. O le uso lava lea na tuuina mai ia te au le solotaele, sa ma o atu faatasi ma faafetai mai ia te au mo lo’u naunau e fai le galuega a le Alii.
Ina ua ou tuua le malumalu, na ou iloaina ai o se tasi lea o aafiaga aupito sili ona matagofie o lo’u olaga. O le malumalu o se nofoaga paia ma o loo i ai iina le Agaga o le Alii, e taitaia Lana galuega maoae. E aoga ai lava le faatalitali.
Ata na tusia e John Zamudio