O Le Papatisoga o Tinamatua

Marilena Kretly Pretel Busto, São Paulo, Pasila

I le aso 30 o Iuni, 2001, sa tatagi ai le telefoni a o o’u faia se keke o le aso fanau o la’u tama teine. Sa ta’u mai ia te a’u e lo’u uso i Pasila, ua maliu lo matou tinamatua.

Sa faanoanoa le tala na tau mai, peitai sa ou le faanoanoa. Aua, sa soifua si ou tina matua pele na latalata i le 102 o ona tausaga. Sa ou fiafia aua ua saoloto o ia mai lona soifua matua, tino faaletino ma ua alu atu i le lalolagi o agaga.

Ona amata lea ona ou mafaufau i le talafeauga o lona maliu ma le aso fanau o lau tama teine, ma sa ou tomanatu pe sa i ai se taua o le taimi [o lona maliu]. A o mavae atu aso, sa ou iloa ai: o le a faigofie ona ou manatua ou te papatiso mo lou tinamatua pe a atoa le tausaga talu ona maliu. Sa ou tauaveina lenei tiutetauave, ma le iloaina lea e tatau ona ou faatali seia lata ina aulia le isi aso fanau o la’u tama teine.

Sa vave lava le alu o le tausaga. Ae peitai, sa ou le maua le avanoa ou te alu ai i le malumalu i le aso tonu lea na atoa ai le tausaga talu ona maliu lo’u tinamatua, aua sa ou nofo i Potukale ma auai atu i le Malumalu i Madrid Sepania. Peitai sa leai se aso na mavae atu ou te le’i mafaufau ai i lo’u tiute o le papatisoina mo Tinamatua Sosefina.

Ana le oo lava ia Oketopa o le 2002 e le mafai ona matou o i le malumalu. Sa matou o ma lo’u toalua ma le ma tama tama, o Mataio, o lē sa sauni e maua ona faaeega paia e sauniuni ai mo lana misiona. Sa ou fiafia o le a ou alu i le malumalu, ma sa ou mafaufau atonu o le a ou lagonaina se lagona faapitoa pe a ou papatiso e fai ma sui o lou tinamatua.

Sa faia e lo’u toalua le papatisoga, peitai sa leai se mea na ou lagonaina. Sa faia e la’u tama tama le faamauga, peitai sa leai foi se mea na ou lagonaina. Sa te’a atu lo’u popole i le leai o se lagona na ou faalogoina, ma sa ou fiafia ua faia sauniga mo lo’u tinamatua.

Ina ua mae’a le faaeega paia, sa matou o atu i le potu o faamauga e faamau ai lo’u tinamatua i ona matua. A o ma tootuli faafesagai i le fata faitaulaga e faia le sauniga ma ua amata ona saunoa le fai faamauga, sa ou lagonaina le pei e sipaka mai lava i lo’u ulu seia oo i lo’u tino atoa. E faigata ona famatalaina, peitai i lena faalogona ootia, sa ou mautinoa ai le fiafia o Tinamatua Sosefina ina ua faamauina o ia i ona matua.