Nofoaga o le Toafilemu
Mo nei tamaitai talavou e toalua i le Ripapelika Tominika, o le malumalu e sili atu lava nai lo o se fale matagofie. O se faamanatu lelei foi lea o o latou faamoemoega faapelepele ma miti.
E manatua pea e Dilicia Soto, e 16 [ona tausaga], le aso na faapaiaina ai le malumalu i lona nuu o Santo Domingo i le Ripapelika Tominika: “Sa na o le iva ou tausaga i le taimi lena, ae sa ou faapea, ‘Oka! Ua i ai se malumalu iinei!’ Sa masani ona ou vaai i tagata o o atu i isi atunuu ina ia faamauina ai ma osifeagaiga ai. Sa ou mafaufau, ‘O lea la o le a matou le o ma le matou aiga i se isi atunuu aua o lea ua lata mai lo matou malumalu.’”
O le asō ua tu maualuga ai ma le malualii lena malumalu i le laumua, e ese le mataina ma ona tumutumu ma lotoa e faamamaina lelei, lea e manatu ai le toatele o tagata fegasoloai o se falesa tele. E fiafia lava Dilcia e faamatala mai e sili atu foi le paia o le malumalu nai lo le falesa tele. I lotoa o le malumalu o loo i ai se mamalu filemu e matua ese lava mai le tele o le pisi o auala ma maketi i le taulaga.
O le nofoaga lenei o le toafilemu na o mai i ai Dilcia ma lana uo o Kelsia St. Gardien, e 14 tausaga, i se taimi e le’i mamao atu. O i la’ua uma o nisi o le Uarota a Mirador o le Siteki o Santo Domingo Dominican Republic Independencia. Na i ai muamua i la’ua uma i le malumalu e faia papatisoga mo e ua maliliu. Ae o le aso lenei, sa o mai ai i laua e savalivali i togalaau, e talanoa, ma ia lagona mai fafo o le maota le Agaga lea o loo tauaveina i totonu o le malumalu.
Faanaunauga o Dilcia
“E tele naua lo’u alofa mo le Alii, ma ou te matua faafetai mo mea ua Ia faia i lo’u olaga,” o le tala lea a Dilcia. “O lo’u aiga patino o ni tagata o le Ekalesia, ae o fafine, tamaloloa o lo matou aiga, ma o’u tausoga e leai. A o mai i latou i lo matou fale, ou te sauniuni lava i taimi uma ma se Tusi a Mamona aua e le iloa pe i ai se avanoa e faasoa atu ai le talalelei ia i latou.” Na te faasoaina atu foi le talalelei i ana uo ma “i soo se tagata atonu ma te fetaui e fia iloa moni le Ekalesia.” Ma o taimi uma lava na te faia ai, fai mai o ia, “E malosi lava lo’u lagonaina o le Agaga. Soo se taimi lava e fetufaai atu ai la’u molimau, ou te toe lagonaina ai le moni o le Ekalesia.”
Na te manatua se lesona o le seminare e uiga i le ata o le faaolataga. “A o le’i i ai lenei lalolagi, sa tatou i ai i se Fono tele i le Lagi, ma sa tatou filifili ai e mulimuli i lo tatou Tama Faalelagi ma talia le taulaga o le a faia e Iesu Keriso e fai ai ma o tatou sui,” o lana tala lea. “Na faamalamalama mai e lo matou faiaoga, e mafai ona tatou iloa sa tatou usitai i lo tatou Tama Faalelagi i lena taimi aua ua tatou i ai i le lalolagi i le taimi nei ma ni tino o aano ma ivi. Ina ua ia fai mai lena faamatalaga, sa ou iloaina e moni. I a’u tatalo i lena po, sa ou tagi ma tuuina atu le faafetai i le Atua mo lena malamalama.”
Na sii mai e Dilcia le 1 Korinito 3:16: “Tou te le o iloa ea o le malumalu outou o le Atua, o loo nofo foi le Agaga o le Atua i totonu ia te outou?” Fai mai a ia, “Afai foi o a’u o se malumalu, e tatau foi ona pei o se malumalu lo’u mamā ma le matagofie. O se faamanuiaga ofoofogia le i ai i totonu o lenei Ekalesia ma le avea o se tamaitai talavou amio mama!”
Fai mai o ia o lona faanaunauga sili lava ia toe mafuta faatasi ma lona Tama Faalelagi i se aso. “Ou te matua faafetai lava ona ua Ia tuuina mai ia te i tatou le malumalu ina ia mafai ona tatou faia ai mea uma e tatau ona tatou faia e toe foi atu ai ia te Ia,” na ia fai mai ai. “O le ituaiga auala sili e faafetaia ai o Ia o le ola lea i le ala ua Ia aoao mai ai i tatou e ola ai.”
Fai mai Dilcia, “E finagalo le Alii ia tatou ulufale atu i Lona maota, ia aoao e uiga ia te Ia, ma ia tatou galulue e agai atu i le faavavau ia te Ia.” Fai mai o ia e fiafia e auai i papatisoga mo e ua maliliu aua “o se auala lea e fesoasoani ai ia i latou o e o loo faatalitali mai i le isi itu o le veli, e faia se mea mo i latou lea e le mafai ona latou faia mo i latou lava.”
O Tautinoga a Kelsia
E ioe foi i ai Kelsia. “E manaomia e o tatou tuaa i tatou e faia le galuega, ma ou te iloa o le a latou faafetaia i tatou,” o lana tala lea. “O loo o’u tulimatai faapitoa atu i le vaaia o lo’u tinamatua o lē ou te le’i iloaina i lenei olaga. O le a matou faamautinoaina e faia uma ona galuega faalemalumalu mo ia.”
O le talanoa e uiga i le malumalu e aumaia ai ni lagona o’oo’o ia Kelsia. “Ua ou tautino e faia ni filifiliga o le a fesoasoani ia te au ina ia faamauina ai i lo’u aiga,” o lana tala lea. “E tatau ona tatou faaaloalo i le talalelei ma usitai i poloaiga al pie de la letra [i le mea tonu o loo tusia ai],” o lana tala lea. “Tatou te faia aua tatou te alolofa i lo tatou Tama Faalelagi, ma o le usiusitai o le auala lea tatou te faaali atu ai lo tatou loto faafetai ia te Ia.”
Na auai lona aiga i le Ekalesia ia Tesema 2006, i le ono o tausaga talu ona siitia atu ona matua mai Haiti i le Ripepalika Tominika. “Ou te matua faafetai lava i faifeautalai o e na tuitui mai i lo matou faitotoa. Sa maoae le lagonaina o le Agaga ma le aoao e uiga i le fuafuaga a le Tama Faalelagi mo i tatou. Talu ona oo mai le talalelei i o matou olaga, ua sili atu le vavalalata o lo matou aiga. Ou te faafetai lava i Lona tuuina mai ia te a’u o se aiga e ese le lotogatasi, e oo lava i taimi e sili ona faigata. O le mafaufau e mafai ona tatou maua le avanoa e faamau faatasi ai e faavavau e foliga mai o se tasi lea o faamanuiaga silisili o faamanuiaga uma.”
O loo auai i le taimi nei ona matua i se vasega e sauniuni ai mo le malumalu, ma ua faamanatu atu ai ia te ia e saunia mo le aso o le a faaipoipoina ai o ia i le malumalu. “O la’u sini autu lava lena, ia ma agavaa ma so’u toalua o le lumanai mo le tasi ma le isi ma ia agavaa e avea o se aiga e faavavau.”
Fefaasoaai i le Toafilemu
Na savalivali atu nei uo e toalua ma ui atu i le pou o loo agiagia ai le tagavai a lo latou atunuu i le mālū o le afiafi. “E oo lava i le tagavai i le malumalu e faamanatu mai ai ia i maua ia faamaoni,” o le tala lea a Dilcia. “E sili atu nai lo na o ni lanu. O loo i ai le mautauave Dios, patria, libertad [O le Atua, atunuu, saolotoga] ma o loo faaalia ai se satauro Kerisiano ma Tulafono e Sefulu. E faamanatu mai ai ia i maua o lo matou atunuu na faavaeina e tagata o e na talitonu i le Atua ma o loo taua lava le Atua iinei.”
Sa la pasia foi le faitotoa o le malumalu, lea o loo i ai upu Santidad al Señor, la Casa del Señor (E Paia i le Alii, o le Maota o le Alii) o loo tusia ai i luga ae o le faitotoa, e pei ona i ai i malumalu uma lava.
“Soo se taimi lava ou te faitauina ai na upu, e faatumulia lava au i se molimau mamana e faapea ua moni ia,” na fai mai ai Dilcia. “Ou te manatua lo matou o mai ai iinei ma le matou vaega o le Mutuale i se tasi afiafi, mo na o se asiasiga i lotoa [o le malumalu]. Ina ua uma le matou asiasiga, na fesili mai le epikopo pe o a ni lagona na matou lagonaina iinei. Sa matou talanoa e uiga i ai ma iu ai i se tali e tasi le upu: toafilemu.”
Ma sa savavali ese atu Kelsia ma Dilcia ma mafaufau i lena tali atoatoa e tasi le upu … atoatoa aua o le malumalu o le nofoaga o le toafilemu.
Ata na pueina e Richard M. Romney