O au? O Se Leoleo Mamoe o Isaraelu?
Sa avea a’u o se molimau o le, ma o se tagata na auai i le faitau afe o asiasiga auauna atu i isi. Ou te molimau atu i le ofoofogia o le liligi mai o le Agaga lea na faapea ona auai faatasi ma i latou.
O se tasi o faiga masani e tulaga ese ai le Ekalesia a Iesu Keriso o le Au Paia o Aso e Gata Ai o le i ai lea o leoleo mamoe e le totogia. E leai ni a tatou faifeau e totogi i uarota, paranesi, siteki, ma itu o le Ekalesia; ae, e feauaunaai le au paia o le tasi i le isi.
Ua tofu tagata uma O Le Ekalesia a Iesu Keriso o le Au Paia o Aso e Gata Ai ma se valaauga ina ia avea ma se leoleo mamoe o Isaraelu. O le au paia-leoleo mamoe e auauna atu i au epikopo ma peresitene o paranesi, o ni taitai perisitua ma ausilali, o ni au ofisa ma failautusi, o ni faiaoga o soo se ituaiga—e aofia ai faiaoga o aiga ma faiaoga asiasi—ma le anoano o isi tulaga.
O leoleo mamoe e le totogia e i ai ni nai itu e tutusa ai. E tofu ma mamoe e fafaga, faamalosi, ma auauna atu i ai. Ua valaauina i latou taitoatasi e le Alii e ala i Ana auauna tofia. E taitoatasi i latou ma tali atu i le Alii mo lona tulaga faatausimea o se leoleo mamoe.
Sailia o le Mamoe ua Leiloa
Na tuua e Iosefa Serge Merilus lona atunuu o Haiti i le 19 o ona tausaga ma alu atu i le Dominican Republic i le 1980 e su’e sana galuega. I le mavae ai o le sefuluvalu masina na toe foi ai o ia i Haiti, fia faaipoipo, ma toe foi atu i Dominican Republic faatasi ma lana manamea fou, o Marie Reymonde Esterlin.
A o amata lo laua olaga faaipoipoina i lo laua atunuu fou, na oo ia Iosefa se aafiaga o le matelaina faaleagaga. Sa la asiasi atu ma Marie i le tele o ekalesia e saili ai ia faamalieina lena matelaina, ae peitai i le avea ai o ni tagata e tautatala i le faaHaiti Creole i se atunuu e tautatala faaSipaniolo, sa faigata ai ona la malamalama ma malamalama foi isi ia i laua. Mulimuli ane na latou fetaui ai ma ni faifeautalai se toalua a le Au Paia o Aso e Gata Ai, o e na valaauliaina i laua i le lotu. I le mavae ai o le auai atu o Iosefa ma Marie i nai sauniga lotu, sa aoaoina ai loa i laua ma le faapalepale e faifeautalai i lesona i le faaSipaniolo, ma na papatisoina ai i laua ia Setema 1997.
Na valaauina Iosefa e galue i le au peresitene o le Aoga Sa, sosoo ai ma le avea ma se fesoasoani i le au peresitene o le paranesi, ma mulimuli ane ai o se peresitene o le paranesi. Ae peitai ona o ni feeseeseaiga ma lagona tiga, o le tele lava na mafua mai ona o le sese o fesootaiga, na ala ai ona le toe toaaga i le Ekalesia ia Iosefa, Marie, ma le la fanau e toalima, ma na matua galo ai foi i tagata o le Ekalesia i le lotoifale.
I le gasologa o le isi fitu tausaga, na maua ai le isi fanau e toafa a le ulugalii ma la aumaia ai foi mai Haiti se tama ma se teine o o la aiga i lo latou aiga. Na ala i le tele o taumafaiga na lelei ai le tautala faaSipaniolo ma le faaPeretania a Iosefa ma amata ai loa ona faiaoga i le faaPeretania ma le faaHaiti Creole mo se kamupani i le lotoifale.
Ia Aokuso 2007 i le faagasologa o le sailia o mamoe leiloloa a le Alii, na oo atu ai ni taitai perisitua se toalua, i le faitotoa o le aiga. Na la iloaina ai o loo i ai pea molimau a Iosefa ma Marie i le talalelei, e ui lava ua fitu tausaga la te le i toe auai atu i sauniga. Na valaaulia e taitai le aiga e toe o atu i le lotu, lea na latou faia i le aso lava na sosoo ai—le toa 13 uma o i latou. O loo latou auai atu pea talu mai lena aso.
O le taimi nei o loo avea ai Iosefa ma se taitai misiona i le paranesi i Barahona, o loo i le itu i sautesisifo o le Dominican Republic. O loo galulue foi ona atalii matutua e toalua i tofiga faaleautaitai i le paranesi, ae o lona tei tama, lea na faatoa faauuina o se toeaina, ua avea nei ma peresitene o Alii Talavou. E le’i mamao atu na malaga ai le aiga i le malumalu, lea na faamauina ai i latou o se aiga e faavavau.
Mafaufau i ai, e 13 mamoe na leiloloa ua toe maua nei ona na naunau nei tagata o le au paia-leoleo mamoe e saili, fafaga, ma toe aumai lenei aiga i le lafu a le Alii. Na taitaiina lava i laua i lenei aiga e pei lava ona o le a taitaiina ai oe ma a’u a o tatou sailia mamoe ua leiloloa o e o i la tatou vaaiga.
Sa avea a’u o se molimau o le, ma o se tagata na auai i le faitau afe o asiasiga auauna atu i isi. Ou te molimau atu i le ofoofogia o le liligi mai o le Agaga lea na faapea ona auai faatasi ma i latou. Ua ou vaai i le tele o mamoe na leiloloa ua toe foi mai ma lagona le olioli lea e oo mai a o toe faafeiloaiina mai i latou i le lafu. Ua ou vaaia loto na faagaeetiaina, faamanuiaga na tuuina atu, loimata maligi, molimau na tuuina atu, tatalo na faia ma taliina mai, ma le faaalia o le alofa. Ua ou vaai i olaga na suia.
Fafagaina o le Lafu
O se taimi i le va o le 592 ma le 570 T.L.M., na fetalai mai ai le Atua i Lana perofeta o Esekielu e uiga i leoleo mamoe faatamala. Ona o lo latou faatamala, na taapeape ai le lafu. E uiga i na leoleo mamoe, na fetalai ai le Alii:
“Le atalii e, o le tagata, ia e vavalo atu i leoleo mamoe o Isaraelu, ina vavalo atu ia, ma e fai atu ia te i latou, Ua faapea ona fetalai mai o le Alii o Ieova i leoleo mamoe[:] … e le tatau ea i leoleo mamoe ona fagaina o le lafu? …
“Ua outou le faamalosia e ua vaivai, ua outou le faamalolo i le ua ma’i, ua outou le fusia foi le ua gau, o le ua tulia ua outou le toe aumaia, o le ua se ua outou le sailia. …
“… Ioe, na faataapeapeina foi la’u lafu i le fogaeleele uma, ae leai se na suesue i ai, leai foi se na sailia.
“Ua faapea ona fetalai mai o le Alii o Ieova; … ou te sueina atu foi la’u lafu ia te i latou” (Esekielu 34:2, 4, 6, 10).
I le tele o tulaga, ua avea ai i tatou ma ekalesia ua ano i e toaaga i le lotu. Tatou te faia ni taumafaiga tetele e aumai ai le fafagaina faaleagaga ma faalelagona mo i latou o e omai i le lotu, ae faapefea i latou ua leiloa lo latou auala atu i le falelotu?
Afai e maua so’u valaauga e galue ai i le Ekalesia, o lona uiga o loo i ai ni a’u mamoe o e ua i ai so’u tiute paia e auauna atu i ai ma tautuaina. Mo se faataitaiga, i le avea ai o se faiaoga o a’u o se leoleo mamoe e le gata ia i latou o e omai i la’u vasega ae faapena foi ia i latou e le omai. O loo ia te a’u se tiute e saili ai i latou, faamasani ma i latou, avea ma a latou uo, auauna atu i o latou manaoga, ma toe aumai i latou i le lafu.
Toe Taitai Mai i Latou
I le avea ai o ni tagata o le au paia-leoleo mamoe e lelei pe a tatou manatua ma mafaufau loloto i aoaoga o loo i le Luka 15. I lena mataupu na aoao mai ai e le Alii ia faataoto i le mamoe na leiloa, le tupe na leiloa, ma le atalii faamaumau oa. E auga uma le tolu i “le mea na leiloa” ae na toe maua. I le faataoto o le mamoe na leiloa, na fesili ai le Alii:
“O ai ea so outou e ana mamoe e selau, afai e leiloa le tasi, e le tuua e ia le ivagafulu ma le iva i le vao, ae alu ma saili i le na leiloa, seia maua?
“A maua, ua faafuata ma le olioli.
“A oo atu foi i lona aiga, ua faapotopoto ai i ana uo ma e tuaoi ma ia, ua fai atu ia te i latou, Ia tatou olioli ia; aua ua ou maua la’u mamoe na leiloa.
“Ou te fai atu ia te outou, e faapea foi ona tele o le olioli i le lagi i le tagata agasala e toatasi e salamo, ae itiiti i e amiotonu e toaivagafulu ma le toaiva e le tusa i ai le salamo” (Luka 15:4–7).
I le faataoto, sa na o le tasi lava le mamoe na se ma leiloa ai, ae peitai e seasea ona tupu lena mea i a tatou uarota ma paranesi. Ae peitai, o le faatatauina o le faataoto e tumau lava, e tusa lava po o le a le aofai o mamoe ua o ese mai le lafu.
E le o ta’u mai i le faataoto le umi o le faagasologa o le toe foi manuia mai. Ia tatou taumafaiga faaleoleo mamoe, o nisi mamoe e toe foi mai pe a mavae se asiasiga se tasi, ae o isi e manaomia ai ni tausaga o faamalosiauga faifaipea ma le agamalu.
A o faia le faagasologa o le toe aumaia o o tatou uso ma tuafafine, aua nei galo ia i tatou mamoe e tatau ona tatou “toe aumaia … i le talalelei” e “pele i le loto o le Leoleo Mamoe.”1 Na te silafia i latou uma taitoatasi. E alofa o Ia ia i latou taitoatasi i se alofa atoatoa. Ona o i latou o Ana mamoe, o le a Ia taitaiina ai i tatou, faatonu i tatou, ma musuia i tatou i mea tatou te fai atu ai pe afai o le a tatou ole atu ma faalogo i le leo o le Agaga. E ala i le mana o le Agaga Paia, o le a tali lelei mai ai le toatele a o tatou aapa atu ma le faamaoni ma le loto maualalo.
Tau ina ia tatou manatua o tatou tiutetauave o ni leoleo mamoe ina ia tatou tali lelei atu i le Alii e uiga i la tatou tausiga o mamoe ua Ia tofiaina mai ia i tatou taitoatasi.
Faamatalaga mai le O Le Ala i Peteleema, saunia e Joseph Brickey; taumatau: faamatalaga mai le Kaino ma Apelu, saunia e Robert T. Barrett
Le Toe Leiloa, saunia e Greg K. Olsen, e le mafai ona kopiina; ata pue na saunia e Laureni Fochetto