Fesili ma Tali
“I lo’u aiga e tele ni tausaga e mamao ai le avea o a’u ma uii. “Ou te lagona lava i taimi uma le faaesea o a’u mai gaoioiga ma talanoaga a nai o’u tei. O le a se mea e mafai ona ou faia e faaleleia atili ai a matou fegalegaleaiga?”
O lenei luitau e mafai ona avea ma se avanoa e faailoa atu ai i ou uso ma tuafafine e te fia lagonaina lou aafia atili i o latou olaga. Atonu latou te le o iloa lou lagona faaesea. E mafai foi ona e talanoa i ou matua e uiga i lenei mea. O le a i ai ni o laua manatu lelei.
Fautua atu i nai ou tei ni gaoioiga e mafai ona outou faia faatasi, ma mafaufau i ni mataupu e mafai ona e talanoa atu i ai ia i latou. Ia teu i lou mafaufau a latou fuafuaga ma mea e fiafia i ai a o e fuafuaina ni auala e faaalu faatasi ai o outou taimi. O le faalogo atu ia i latou ma faaali atu le fiafia ia latou gaoioiga, o le a le gata ina faaleleia atili ai au fesootaiga ma i latou ae e fesoasoani foi e te aoao ai. O loo latou faia ni mea atonu e te ono faia foi i nai tausaga e le o toe mamao.
Manatua le taua o aiga i le fuafuaga a le Tama Faalelagi. Afai e te tatalo mo Lana fesoasoani, e mafai ona Ia musuia oe i manatu e faaleleia atili ai a outou fegalegaleaiga ma nai ou tei. Ia maua le lototele e te galue ai i uunaiga e te maua.
Talanoa ma i Latou
I lo’u aiga, e mamao foi le va o le avea o a’u ma uii, ae o le mea na ou iloaina, na manana’o foi nai ou tei e iloa lelei a’u e pei foi ona ou manao ia ou iloa lelei i latou. Atonu o le a matua fiafia nai ou tei pe a e valaau atu ia i latou e tau lava ina talatalanoa pe valaaulia foi i latou tou te o e faiaiga i se taimi. Ta’u atu ia i latou mea o loo tutupu i lou olaga. O le a matua taua ia i latou lou lagonaina o le lagolelei e faasoa atu ou manatu ma lagona ia i latou. Ia e talanoa atu foi ia i latou e uiga i mataupu faaleagaga. O le a fesoasoani lena ia te oe e te latalata atili atu ai e le gata ia i latou ae faapena foi i lou Tama Faalelagi.
Kelsey H., 16, Alberta, Kanata
Ia Avea ma se Faataitaiga Lelei
Na ou oo foi i lenei tulaga faigata. Ou te manatu o le mea sili e mafai ona tatou faia o le avea ma se faataitaiga i o tatou uso ma tuafafine matutua. O lenei auala, o le a faapea ona i ai le alofa ma le filemu ia i tatou. E tatau ona tatou ta’u atu ia i latou lo tatou alolofa tele ia i latou, ma e tatau ona tatou taumafai e tutu faatasi o se aiga. O le a latou iloa i se taimi lo tatou alolofa ia i latou. Ou te iloa o nei mea o le a faasolosolo lava ina lelei.
Ádám B., 16, Gyor-Moson-Sopron, Hanikeri
Faaalu Faatasi [o Outou] Taimi
E faigata i nisi o taimi ona faaalu faatasi o tatou taimi ma ou uso ma tuagane matutua ona o aoga ma isi gaoioiga o aso taitasi. Ae a mafai, tau lava o lou alu atu ma talanoa ia i latou, faamatala ia i latou lou aso, ma vaai po o a mai i latou. Afai o i ai ni ou faafitauli i se mea, e mafai ona e fesili atu mo so latou manatu ina ia latou iloa e te faatauaina o latou manatu. Ia fai i latou e pei ona e manao latou te faia ai oe. E mafai ona outou taaalo ma faaalu faatasi o outou taimi—e fesoasoani tele lena. E tatau foi ona e ta’u atu ia i latou lou alofa tele ia i latou. Ae o le mea taua lava, o le tatalo. O le a fesoasoani mai le Tama Faalelagi ia te oe i taimi uma.
Katherine M., 14, Idaho, ISA
Ia Agalelei ia i Latou
I le avea ai ma uii o lo’u aiga, o nisi taimi ou te lagona ai le faaesea mai gaoioiga ma talanoaga a nai ou tei, ma ia te a’u o se mea e tiga. Ae a ou mafaufau ia Iesu Keriso, ou te iloa ai o le fefaasoaai ma lo’u aiga i tulaga faatauaina masani, e mafai ai ona matou faamalosia ma uunaia le tasi ma le isi. Ia agalelei ma faaaloalo i tagata uma. Faaali atu lou fiafia ia i latou, ma faailoa atu i ai e te alofa ia i latou.
Joseph M., 16, Leyte, Filipaina
Olioli i Taimi Uma Tou te Faatasi Ai
O nisi taimi ou te lagona ai le faagaloina o a’u ona e i ai lava gaoioiga a o’u tuafafine, e pei foi o o’u matua. A o faagasolo pea le olaga, na iu ina ou malamalama e alolofa uma lava i latou ia te a’u ma e le faapea e le mananao e faaalu o latou taimi ma a’u, ae o soo se mea lava e i ai lava lona taimi. E taua tele le fiafia i taimi uma e mafai ona outou faatasi ai, e talie, ia agalelei, ia agaalofa, ma le sili i mea uma ia faaali atu lou alofa ia i latou. E taua tele lou tatalo ma ole atu i lo tatou Tama e fesoasoani ia te oe ia e latalata atu i ou uso ma tuafafine. O le a Ia faafofoga ia te oe ma o le a fesoasoani ia te oe.
Roberto S., 18, Santiago, Chile
Faaavanoa se Taimi e Talanoa Ai
O a’u lava le uii o se fanauga e toafitu. Ao o’u laitiiti, sa ou lagona le faaesea, ae sa ou iloa foi e alolofa i latou ia te a’u, e sili atu nai lo lo’u manatu. Atonu e le mafai ona e fesootai atu ia i latou i le taimi nei, ae o taimi aupito lelei na matou maua ma nai ou tei o le taimi matou te talanoa ai. Sa ou iloa ai sa latou faatuatuaina tele a’u, ma o loo faapena ai lava. Ina ia mafai ona talanoa atu ia i latou, ou te taumafai ai lava e fesoasoani atu i o latou tiute, agalelei ia i latou, aloese mai le ita ia i latou, ma au faatasi ma i latou ina ia mafai ona latou fesoasoani mai ia te a’u. Na fesoasoani lena mea ou te lagona ai lou aofia ma le alofaina.
Maria H., 19, Aai o Mekisiko, Mekisiko