O Faamanuiaga o le Malumalu
Mai se saunoaga na tuuina atu i le faigalotu a le Iunivesite o Polika Iaga i le aso 15 o Novema, 2005. Mo le anotusi atoa o le saunoaga i le Igilisi, tagai i le http://speeches.byu.edu.
O le malumalu o se maota paia, o se nofoaga paia lea e faataunuuina ai sauniga faaola talafeagai e saunia ai i tatou mo le faaeaga.
O faamanuiaga o faaeega paia o le malumalu e alagatatau mo i tatou taitoatasi e pei lava ona i ai o tatou papatisoga. O le mafuaaga lea e tatau ai ona saunia i tatou lava ina ia tatou mamā e ulu atu i le malumalu o le Atua.
O le avanoa e ulu atu ai i le malumalu ma ia tauave i o tatou luga feagaiga paia e osia ai i totonu, o se tasi lea o faamanuiaga aupito maoae e mafai ona tatou maua i le olaga nei. Ma, a uma ona tauave i o tatou luga na feagaiga, ona avea lea o lo tatou usiusitai i le ola ai i na feagaiga o se faailoaga o lo tatou faatuatua, tuuto, ma le tautinoga faaleagaga e ava i lo tatou Tama Faalelagi ma Lona Alo, o Iesu Keriso. O lo tatou usiusitai e saunia ai foi i tatou ia ola faatasi ma i La’ua i le faavavau. O sauniga faaola o le malumalu e alagatatau i le—ma o le taulaiga tupito foi lea—o le fuafuaga e faavavau o le fiafia.
O Le Aoaoga Faavae o Malumalu
O le malumalu o se nofoaga moni lea e te “i ai i le lalolagi ae le o ni o le lalolagi.” Pe a e mafatia ma i ai ni filifiliga taua e faapea ona mamafa i lou mafaufau ma lou loto, e mafai ona e aveina atu ou atugaluga i le malumalu ma maua mai ai se taitaiga faaleagaga.
E tatau ona tatou maua se molimau ma se lagona o le migao i le malumalu o le maota o le Alii. Ina ia puipuia le paia o le malumalu ma ia valaaulia ai le Agaga e faamanuia i latou o e ulu atu i le malumalu paia mo o latou sauniga ma feagaiga, ua aoaoina ai i tatou e leai se mea eleelea e tatau ona ulu atu i le malumalu. O le migao i totonu o le malumalu o se itu taua lea o le valaauliaina o le Agaga e nofo ai i totonu i taimi uma o aso uma.
A o ou laitiiti, sa aumai au e lo’u tama mai Long Island, Niu Ioka, ina ia ou savalivali i lotoa o le Malumalu o Sate Leki, ia ou pai atu i le malumalu, ma ia talanoaina le taua o le malumalu i lo’u olaga. O le mea lena na ou tautino ai e i ai se aso o le a ou toe foi mai ai ia maua ia sauniga o le malumalu.
I le talafaasolopito atoa, i tisipenisione uma lava, ua poloaiina ai e le Alii ia perofeta e tatau ona fausia malumalu ina ia mafai e Lona nuu ona maua sauniga o le malumalu. Sa faamanuiaina Mose ma le fanauga a Isaraelu i se malumalu feaveai, o le falefetafa’i, lea na faataunuuina ai sauniga paia i lalo o le tulafono a Mose—ma, na i ai taimi na afio mai ai le Alii iina e talanoa ma Mose. Na faamaeaina e le Tupu o Solomona se malumalu matagofie i Ierusalema, lea na faaleagaina mulimuli ane. Ma, i le taimi o le galuega a Keriso, na fausia ai se isi malumalu i Ierusalema.
Ua tatou aoao mai le Tusi a Mamona na fausia e Nifae se malumalu “e uiga faatasi ma le malumalu a Solomona” (2 Nifae 5:16). Na aoaoina e isi perofeta sa Nifae, na aofia ai Iakopo ma le Tupu o Peniamina, ia tagata i le malumalu (tagai Iakopo 1:17; Mosaea 1:18).
O se itu taua, ina ua faaali mai le Alii toetu o Iesu Keriso i sa Nifae i le T.A. 34, na afio mai o Ia i le malumalu (tagai 3 Nifae 11:1–11).
Na aoao mai le Perofeta o Iosefa Samita, “E le atoatoa le faatulagaina o le Ekalesia, i lona faatulagaga tatau, ma e le mafai, sei iloga e faamaeaina le Malumalu, lea o le a maua ai nofoaga mo le faataunuuina o sauniga o le Perisitua.”1
O le Malumalu o Katelani o le malumalu muamua lea i nei aso e gata ai, ma na i ai sona sao taua i le toefuataiina mai o ki o le perisitua. O se taunuuga o se tatalo, na asiasi mai ai Iesu ia Iosefa Samita i le Malumalu o Katelani i le aso 3 o Aperila, 1836 (tagai MFF 110). Na faaali mai le Faaola i le mamalu ma taliaina le Malumalu o Katelani e fai ma Ona maota. I lena mea na tupu, na faaali mai ai foi Mose, Elaia, ma Elia ina ia mafai ona tuuina mai ki o le perisitua sa latou umia. Na toefuatai mai e Elia ki o le mana o faamauga, e pei ona folafolaina mai e Malaki, ina ia mafai ona tatou olioli i le atoaga o faamanuiaga o le malumalu i o tatou olaga.
Na faamaeaina e o tatou augatama paionia le Malumalu o Navu ma faataunuuina ai i totonu sauniga paia. O le Malumalu o Navu o le malumalu muamua lea na faatinoina ai sauniga o le faaeega ma faamauga, lea na faamaonia ai le malolosi tele o paionia a o latou onosaia faigata o le sopoiaina o laufanua valevalenoa e agai atu i Siona i le Vanu o Sate Leki. Sa faaeeina i latou i le mana i totonu o le malumalu paia. Sa faamauina le tane ma le ava o le tasi i le isi. Sa faamauina fanau i o latou matua. O le toatele o i latou na toesea tagata o o latou aiga i le ala ona o le oti, ae na latou iloaina e le o le iuga lea mo i latou. Sa faamauina i latou i totonu o le malumalu mo le faavavau atoa. Mulimuli ane, e ala i faaaliga na maua e Peresitene Polika Iaga, na fausia ai e le Au Paia nisi malumalu i Sisifo.
O le asō ua 130 malumalu o loo faaaogaina, ua mafai ai e tagata faamaoni o le Ekalesia i le lalolagi atoa ona o atu i le maota o le Alii e maua ai o latou sauniga o le malumalu ma osi feagaiga ai ma Ia.
O Sauniga o le Malumalu
O le faamoemoega autu o le malumalu o le tuuina mai ai lea o sauniga e manaomia mo lo tatou faaeaga i le malo selesitila. O sauniga o le malumalu e taitaiina atu ai i tatou i lo tatou Faaola ma tatou maua ai faamanuiaga lea e oo mai ia i tatou e ala i le Togiola a Iesu Keriso. O malumalu o iunivesite aupito sili ia o le aoaoga ua iloa e tagata, ua tuuina mai ai ia i tatou le malamalama ma le poto e uiga i le Foafoaga o le lalolagi. O aoaoga o faaeega paia e aumaia ai le taitaiga i le ala e tatau ona taitaiina ai o tatou olaga iinei i le olaga i le tino. O le uiga o le upu faaeega paia o le “meaalofa.” O le sauniga e i ai se faagasologa o aoaoga i le ala e tatau ona tatou ola ai ma feagaiga tatou te osia ina ia ola amiotonu ai e ala i le mulimuli i lo tatou Faaola.
O le isi sauniga taua o le faamauina lea mo le faavavau i le faaipoipoga faaselesitila. O lenei feagaiga o le faaipoipoga e mafai ai e tamaiti ona faamauina i o latou matua ma o tamaiti e fananau i totonu o le feagaiga e avea ma se vaega o se aiga e faavavau.
Ua aoao mai le Mataupu Faavae ma Feagaiga ia i tatou: “Soo se mea e te faamaufaailogaina i le lalolagi o le a faamaufaailogaina foi i le lagi; soo se mea foi e te fusifusia i le lalolagi, i lo’u igoa ma la’u upu, ua faapea mai ai le Alii, o le a fusifusia ai e faavavau i le lagi” (MFF 132:46).
A tootutuli se ulugalii i le fata faitaulaga, ma i le avea ai ma sē e faia faamauga, ua ou nofouta i lo’u tiute o se sui o le Alii. Ua ou iloa o le mea e faamaufaailogaina i le lalolagi e faamaufaailogaina moni i le lagi—e le matatalaina pe afai e tumau faamaoni i latou na faamauina ma tumau e oo i le iuga.
Ua ou matauina i le aluga o tausaga le tele o ulugalii o e na mafai ona faatumauina ni faaipoipoga malolosi ma le taua a o latou tumau faamaoni i feagaiga na latou tauaveina i o latou luga i totonu o le malumalu. O nei ulugalii faamanuiaina na i ai ni mea sa tutusa ai i latou.
Muamua, na iloa e nei ulugalii taitoatasi pe o ai i latou—o atalii ma afafine o le Atua. Sa latou faatutuina ni sini e faavavau ina ia toe mafuta faatasi ma lo tatou Tama Faalelagi ma Lona Alo, o Iesu Keriso. Sa latou taumafai e tuu ese ala o le tagata o le lalolagi (tagai Mosaea 3:19).
Lona lua, ua latou iloa aoaoga faavae ma le taua o sauniga faaola o le malumalu ma feagaiga o le malumalu ma le tatau ai i le ausiaina o sini e faavavau.
Lona tolu, ua latou filifili e maua faamanuiaga e faavavau o le malo o le Atua nai lo mea e le tumau o le lalolagi.
Lona fa, ua iloa e nei ulugalii pe a faamauina i latou mo le olaga nei ma le faavavau atoa, ua latou filifilia se soa e faavavau—ua uma o latou aso o aumoega! E leai se mea e tatau ai fua ona toe vaavaai solo!
Lona lima, o nei ulugalii e muamua mafaufau le tasi i le isi nai lo i latou lava. O le manatu faapito e punitia ai lagona faaleagaga. O le talanoa ma le Alii i le tatalo, latou te tutupu ae faatasi ai ae le o le eseese. Latou te talatalanoa le tasi i le isi, lea e le mafai ai ona avea ni mea laiti ma ni mea tetele. E vave ona latou talanoa e uiga i “tiga laiti” ma se popolega laitiiti o le faatiga [o le tasi i le isi]. O le auala lenei, afai e tulai mai ni faafitauli ma oo mai le ita, e leai ni lagona tiga e pa atu. E sili le masua atu o sina faanoanoa laitiiti a’o lei tulai mai ni finauga tetele i le ita. Latou te naunau e faatoese atu ma talosaga atu mo se faamagaloga pe afai na latou faatiga i e latou te alolofa i ai. Latou te fefaaaliai le alofa o le tasi mo le isi ma atili vavalalata ai. Latou te siitia ma faamalosi e le tasi le isi.
O Faamanuiaga o le Malumalu
O le malumalu o se maota paia, o se nofoaga paia lea e faataunuuina ai sauniga faaola e tatau ai e saunia ai i tatou mo le faaeaga. E taua lo tatou mauaina o se malamalamaaga mautinoa e faapea, o a tatou sauniuniga e ulu atu i le maota paia ma o lo tatou auai i nei sauniga ma feagaiga o nisi ia o mea e tutupu e sili ona taua o le a tatou oo i ai i o tatou olaga i le tino.
Sa tatou o mai ma le lotomalie mai le afioaga o le Atua le Tama i lenei olaga faataitai ma le saolotoga, ma le iloa o le a tatou maua “le faafeagai o mea uma” (2 Nifae 2:11). O lo tatou faamoemoega o le tauave i o tatou luga o le ofutau atoatoa o le Atua ma tetee atu i “u fanafana mu o le amioleaga” ma le talipupuni o le faatuatua ma le pelu o le Agaga (tagai MFF 27:15–18), ia tumau e oo i le iuga, ma ia agavaa e tutu atu ma ola i le afioaga o le Atua le Tama ma Lona Alo, o Iesu Keriso, mo le faavavau atoa—ina ia maua le mea ua taua o le ola e faavavau.
Ata pue o le Malumalu o Sate Leki na saunia e Welden C. Andersen; taumatau: ata na saunia e John Luke
Sa faamanuiaina Mose ma le fanauga a Isaraelu i se malumalu feaveai, o le falefetafa’i, lea na faataunuuina ai sauniga paia i lalo o le tulafono a Mose—ma, na i ai taimi na afio mai ai le Alii iina e talanoa ma Mose.
Ata na tusia e Ted Henninger