Kòmanse avèk priyè
W ap chèche repons? Adolesan sa yo nan Otawa, Kanada, di priyè se kote pou w kòmanse.
Lè Jenni ki gen laj 15 an pale sou yon priyè ki te jwenn repons, li kòmanse pa fè eskiz. Li regrèt pou l admèt ke li pa t kenbe abitid priye regilyèman pandan preske yon ane. Bagay yo pa t ap twò byen mache nan lavi li—ni nan lekòl, ni avèk zanmi li, ni menm nan legliz la.
Yon jou swa, jan Jenni eksplike, li te vle gade yon fim. Li te bese ba pou chèche fim nan nan dènye etaj bibliyotèk la lè je li te tonbe sou foto yon tonton li ki te mouri trajikman yon ti tan anvan sa. Briskeman, pwa tout pwoblèm li te genyen yo te anvi fè l kriye. Jenni di, “Nan moman sa a menm m te konnen m te bezwen priye.” Li te mete ajenou kote li te ye a epi l te priye.
Jenni dekri jan l te resevwa repons li a: “Osito k m te fini, m te jwenn repons pou kesyon m yo. Mwen te santi ke tout bagay te anfòm ankò. Tout bagay ta pral OK. Tout bagay konsènan tonton mwen OK. M te reyalize ke m renmen lekòl ak zanmi m yo. Lamenm m te fin priye a, m te konnen ke m te dwe tounen legliz paske se pou mwen sa t ap bon. Sa te vrèman frape m, epi m te santi anpil rekonfò ak chalè. M konnen Papa m ki nan syèl la renmen mwen epi l ap ede m travèse difikilte yo. ”
Pou Jenni, priyè sa a se youn nan priyè li te toujou vle fè men pou yon rezon li pat kapab. Kounyeya, menm lè l panse ak sa, li gen menm santiman rekonfò a vini ankò ak menm asirans ke repons li a te soti nan men Senyè a.
Jenni Holt soti Otawa, bèl vil kapital Kanada ki konstwi sou rivaj byen bwaze Rivyè Otawa a. Li menm ak zanmi l yo nan pye Otawa a nan Ontario te pale avèk Church Magazines sou fason priyè afekte lavi yo.
Ki kote repons yo soti?
Youn nan bagay ki pi enteresan adolesan nan Otawa yo te diskite sete fason repons priyè yo te vini. Dabò, Susan Brook te di, “Si ou vle yon repons, ou bezwen ouvè zòrèy ou pou li.”
Susan te di repons li yo pafwa vini apati lekti ekriti yo. Li te gen yon bon egzanp: “Yon jou, m te vrèman fatige anpil, epi m te fache ak tout moun. M pa t vle pale. M sonje m te li nan ekriti yo, m pa sonje kikote, e li te di, ‘Rete enb.’ Sa te touche m. Sa se repons mwen.” D&A 112:10
Ariana Keith koute avèk atansyon lè l legliz la. Li te di, “M panse anpil nan priyè nou yo jwenn repons atravè oratè yo nan legliz la. Te gen yon lè kote m te anvi benediksyon patriyakal mwen. Apresa semèn anvan m te gen randevou pou al resevwa l la, patriyach pye nou an te vini nan pawas nou an epi li te pale. M te priye pou sa anpil e sete yon gwo bagay pou m te tande l.”
Mackenzie Loftus te di repons priyè li yo souvan vini atravè fanmi li. Li te priye konsènan yon desizyon familyal, epi “M te santi Lespri a lamenm, ak konesans ke desizyon nou t ap p ran an sete bon bagay la.”
Pafwa repons lan literalman mache vin jwenn nou. Lè Thomas Francis ak fanmi li te deplase ale Otawa, li te oblije fè nouvo zanmi nan yon nouvo lekòl. Li te priye pou l jwenn bon zanmi. Thomas te di, “Yon jou, yon moun nan klas mwen te avanse sou mwen epi l te di, ‘Ou vle vin rankontre zanmi m yo?’ Depi lèsa a, nou rete zanmi. Sa te ede m anpil.”
Dawson Lybbert te gen yon bagay ase enpòtan pou l te di konsènan repons priyè yo. Li te di, “Pafwa ou pa resevwa repons w ap tann nan, men w ap jwenn repons ou bezwen an.” Li te di pafwa ou pa ka vrèman wè li lamenm, men ou kapab lè ou gade dèyè.
Yon moun ou ka pale avèk li
Plizyè nan adolesan yo te di kijan li enteresan pou gen yon fanmi ki priye ansanm. Kyffin de Souza espesyalman renmen konnen ke fanmi li priye ansanm chak swa. Nou gen yon ajennda kote chak fwa se tou pa yon moun. M santi Lespri a, epi m konnen ke si m lwen lakay mwen, y ap priye pou m ka ansekirite.”
Bénédicte Bélizaire renmen priye avèk paran li chak maten. Li te di, “Mwen ale nan chanm yo, epi nou priye. Mwen gen temwayaj ke Sentespri a avèk mwen, e si jamè m bezwen èd li, m ap mande Pè Selès la pou li.”
Zanmi li Ruth Decady te di, “Li vrèman enpòtan ke lè nou fè priyè nou yo, nou konnen ke Pè Selès la ap koute. Gen yon moun ki la pou nou.”
Katie Cameron renmen fason priyè fè l santi l. “Lè m pale avèk Senyè a, se kòmsi reyèlman gen yon moun ki vle pale avèk mwen. M konnen m ka di li tout bagay.”
Priyè ki fèt pou lòt moun
Jènjan yo—espesyalman sa ki nan laj prèt yo tankou Ronan Filamont, Fred King, ak Dawson ak Davin Lybbert—te pale sou siyifikasyon ak devwa sakre pou fè priyè Sentsèn yo pou manm pawas yo ak branch yo.
Dawson te di, “Priye sou Sentsèn nan fè ou reflechi pi seryezman sou siyifikasyon li. M gen otorite Prètriz sa a, e m santi ke m pa ka abize l.”
Fred sonje l te fè priyè Sentsèn nan lè li te fèk òdone prèt: “Li te difisil odepa, epi m te ap plede fè erè. Yon fwa m te oblije rekòmanse plizyè fwa. Men Lespri a te chichote m ke sa pa fè anyen si m te oblije eseye yon kantite fwa; finalman m t ap di l byen. Sete yon santiman enteresan.”
Priyè mande preparasyon
Plizyè nan adolesan yo te pale konsènan bagay enpòtan yo dwe fè pou prepare pou priye. Matt Larson gen yon referans nan ekriti yo kole sou mi nan chanm ni, Doktrin ak Alyans 78:19: “Yon moun ki resevwa tout bagay avèk remèsiman, lap glorifye; epi bagay ki sou tè sa a ap ajoute sou sa li genyen, menm yon santèn fwa, wi, menm plis.”
Nick Moolenbeck te di, “Priyè pa mache si m sèlman mande san reflechi seryezman ak san m pa mete kè mwen ak nanm mwen ladan.”
Pouvwa mirakile lapriyè
Sierra Lybbert gen yon bèl istwa konsènan priyè. Lè li te gen dezan, yon cheval te pase sou men li. Gwo pous li te koupe, epi plizyè dwèt te fann. Paran li te kouri soti nan yon lopital ale nan yon lòt avèk li pou yo te ka jwenn yon chirijyen ki te vle fè operasyon sa a ki te sanble enposib. Li di, “Yon doktè te di paran m ke chirijyen an pa t gen yon priyè pou reyisi. Manman m te di li ke chirijyen an pa t genyen yon sèl moun k ap priye pou li—li te gen anpil. Manman m te rele tanp lan pou ajoute non m sou lis priyè a.”
Kounyeya, nan laj 13 an, Sierra ka fonksyone avèk men li. Gwo pous li travay byen, epi li leve l anlè pou kèk lòt tifi nan pawas li wè. Yo pa t janm vrèman tande istwa a. Tout sa yo te ka wè sou men Sierra sete yon ti sikatris, difisil pou remake ki antoure rasin gwopous li. Rezilta a sanble vrèman etonan.
Sierra te di, “Sa fè m santi m kontan lè m konnen sa priyè ka fè pou mwen. Se yon bagay mèvèye nan lavi mwen.”
Tout moun sanble yo dakò avèk Kale Loftus lè li te di, “Priyè se yon gwo abitid pou yon moun akeri.”
Anwo: Bridgitte Leger, Jenni Holt, Dawson Lybbert, Dayna Conway, Rebekah Wagoner, ak Alexander Richer-Brule, ansanm ak lòt jèn ki soti nan pye Otawa nan Ontaryo yo (agòch), konnen èd ki soti nan Pè Selès la separe pa yon priyè sèlman.
Anwo, soti anlè: Fred King ak Ronan Filamont dakò kr priyè Sentsèn nan sakre epi yo dwe fè li avèk reverans. Kyffin de Souza rekonesan pou priyè familyal.
Jèn nan Otawa yo priye pou rekonfò pandan moman difisil yo, pou èd avèk devwa lekòl yo ak zanmi yo, epi pou benediksyon yo vle. Yo konnen ke Pè Selès la reponn priyè yo. Dawson Lybbert di, “Pafwa ou pa resevwa repons w ap tann nan, men w ap jwenn repons ou bezwen an.”
Anwo: Matt Larson li yon ekriti ki tache sou mi li anvan l priye, epi Nick Moolenbeck di priyè mande efò.
Anwo, soti agòch: Ruth Decady, Katya Gallant, ak Bénédicte Bélizaire dakò ke se yon bèl ide pou mande Pè Selès la pou voye Sentespri a. Anba: Katie Cameron, Carolyn Albers, ak Sierra Lybbert renmen santiman yo genyen lè yo priye.
Koute, pa Michael Jarvis Nelson
Foto pa Janet Thomas