Benediksyon nan pran swen yo
Manm Legliz yo beni lavi ak fòtifye temwayaj pandan y ap imite egzanp Sovè a pou pran swen lòt moun.
Ministè egzanplè Prezidan Thomas S. Monson nan byen koni nan pami manm Legliz Jezikri pou Sen Dènye Jou yo. Pandan plis pase swasantan li lonje lamen bay moun ki nan bezwen, bay rekonfò ak lapè pou moun san konte epi pèsonèlman pran swen malad ak aflije.1
Prezidan Monson te deklare: “Jodi a gen kè pou nou fè kontan, gen aksyon ki pou fèt—gen menm nanm presye pou sove. Malad yo, fèb yo, moun ki grangou yo, moun ki frèt, moun ki blese, moun ki solitè, moun ki granmoun, moun k ap ere, yo tout ap kriye mande èd.” 2
Nan ministè pèsonèl li, Prezidan Monson montre diferans ant administre ak ministre. Manm Legliz yo administre pwogram yo ak òdonans yo, men yo ministre moun endividyèlman, yo renmen yo, epi pote yo sekou. Nan lonje lamen bay lòt moun, Prezidan Monson imite Sovè a, ki “te vini non pa pou moun rann ni sèvis, men pou l rann moun sèvis.” (Mak 10:45).
Jan kat resi ki suiv yo ilistre a, Sen Dènye Jou ki “ale, epi fè … menm bagay la tou” yo (Lik 10:37) beni lòt moun, Legliz la, ak tèt yo.
Samariten avèk pat pou krèp la
Gerizon mwen apre yon ti operasyon pa t osi fasil ke yo te fè m panse. Men antanke prezidant Sosyete Sekou, mwen te santi ke m te dwe bay lòt moun èd, non pa mande èd. Nan Lendi maten, twa jou apre operasyon m nan, mwen te gen pou prepare sèt timoun yo pou lekòl. Mwen t ap mande tè mwen si m pa t ap kenbe pi gran pitit fi m nan lakay pou ede m avèk ti bebe a.
Pandan panse sa yo t ap pase nan tèt mwen an, yo te sonnen nan pòt la. Vickie Woodard, premyè konseyè mwen epi bon zanmi mwen, te vin pou ede. Li te anonse ke li te vini pou fè krèp. Li te gen yon bòl plen ak pat pou krèp nan men li epi li te mande ki kote li te ka jwenn yon pwalon pou l fri yo. Timoun yo te kontan anpil.
Apre dejene a, Vickie te mennen timoun yo lekòl, li te pwòpte, epi li te pran tibebe a mennen lakay li jiska midi. Nan apre, lè m te mande l kiyès ki t ap okipe timoun piti pa l yo, li te di m ke mari li te mande dezèdtan nan travay li pou l te kapab vin ede mwen.
Sèvis Vickie ak mari l te rann mwen jou sa a te pèmèt mwen rasanble fòs mwen epi sa te ede nan gerizon mwen.
Beverly Ashcroft, Arizona, Etazini
Pou pi piti pami moun sa yo
Yon jou pandan m te lakay mwen poukont mwen avèk pi piti pitit gason m nan, mwen te glise sou yon mach epi m te tonbe. Sa te ba n m doulè nan vant ki te pèsiste plizyè jou, konsa m t al wè yon doktè.
Mwen te ansent lè sa a, e tès yo te endike ke plasenta a te vin detache. Kondisyon sa a te mande repo konplè, oubyen mwen te ka pèdi bebe a.
Mwen te enkyè paske nou te gen twa timoun piti e mwen pa t ka peye pou èd. Sepandan, sè yo nan branch mwen an, te vin konnen kondisyon mwen epi, san yo pa t menm mande yo, yo te vin ban m èd. Yo te òganize tèt yo an twa gwoup ki te ede m nan maten, aprèmidi, ak aswè.
Yo te vini pou lave, pase, fè manje, netwaye, epi ede pitit mwen yo fè devwa yo. Yon sè ki te rele Rute, ki te batize nan Legliz la pandan m te nan kabann mwen, te vin byen koni lakay nou. Rute, yon enfimyè, te ede ban m piki lannuit yo ki te nesesè yo.
Mwen pa t bezwen mande anyen; sè sa yo te prevwa tout bezwen mwen epi yo te pran swen tout bagay. Lè yo te gen plis èd pase sa te nesesè, youn nan sè yo te konn vin chita avèk mwen pou pale. Yo te fè sa pandan twa mwa.
Sè sa yo te ban m fòs, lanmou, ak devouman. Yo te ban m tan yo ak talan yo. Yo te fè sakrifis pou yo te la. Yo pa t janm mande anyen anretou. Yo te renmen epi yo te sèvi, pandan yo t ap suiv egzanp Senyè a, ki te anseye nou: “An verite m ap di nou, chak fwa nou te fè sa pou youn nan pi piti pami frè m yo, se pou mwen nou te fè li” (Matye 25:40).
Enilze do Rocio Ferreira da Silva, Paraná, Brezil
Sèlman pote rad yo
Pandan mari m, Brandon, te nan Òlando, an Florid, nan biznis, li te reveye yon lannuit avèk yon gwo lafyèv ak difikilte pou respire. Li te rele yon anbilans pou mennen l lopital, kote li te aprann li te fè yon pneumonie grav.
Paske Brandon avèk mwen te gen pitit gason tou piti, mwen pa t kapab vwayaje imedyatman soti lakay nou nan Pennsilvani pou m ale Florid. Mwen te rele Brandon chak jou, esperan ke li t ap amelyore pou l te ka retounen lakay vin jwenn nou.
Sepandan, kondisyon Brandon te vin pi grav. Lè yon enfimyè lopital la te mande m pou m te vini nan lopital la osi vit mwen te kapab, mwen te kòmanse ap panse sou kimoun ki t ap kapab pran swen pitit gason nou yo.
Manman m te dakò pou l te kite travay li epi l te di ke li t ap vini osi vit li te kapab, men avyon pou m te pran an t ap dekole anvan l te rive. Mwen te rele kèk zanmi pou m te wè si yo te ka rete avèk pitit mwen yo jiskaske manman m te rive. Yon zanmi nan Sosyete Sekou a, Jackie Olds, te di li t ap kontan pou gade yo.
Li te di: “Sèlman pote rad yo ak kouchèt epi m ap kenbe yo pou kèlkeswa tan ou bezwen pran.”
Mwen te kòmanse pa refize paske sè sa a, avèk twa timoun pa l yo, te gen yon lavi okipe, men li te ensiste. Lè m te depoze timoun yo yon ti bout tan apre, li te rekonfòte mwen kote l te di: “Pa bay tèt ou pwoblèm pou yo. Sousye sèlman pou w fè Brandon refè epi mennen l retounen lakay. Mwen abitye pran swen timoun piti.”
Mwen te konnen lè sa a ke timoun mwen yo t ap oke, kontan, byen okipe, e se sa k te fèt. Mwen te kapab rete avèk mari mwen, ki te vin pi grav letan pou m te rive nan lopital la. Men apre kèk jou, li te vin refè ase pou l te retounen lakay.
Mwen rekonesan pou yon bon zanmi ki te reponn—plis pase sa m t ap mande li—epi li te pran swen nou nan yon tan bezwen.
Kelly Parks, Pennsylvania, Etazini
Sèvis bò yon kabann
Frè Anderson, prezidan Jènjan pawas nou an ki te byen dinamik epi ki te gen 35 an, sete kalite jèn dirijan tout moun te admire: ansyen misyonè, papa senk timoun, biznismann, jèn nan kè li. Men kounyeya li te gen kansè. Apre l te fin resevwa nouvèl sa a nan men evèk la, premye konseye nan kowòm prèt yo, te antre an aksyon, li te rele chak prèt aktif ak inaktif pou vin nan kowòm nan.
Li te repete pou chak apèl: “Nou pral lopital pou al wè Frè Anderson. Nou bezwen tout moun. Èske w ka vini?”
Yon prèt te di: “Mwen pa si ke m ka vini. M ap oblije al travay.”
Ryan te reponn: “Enben, n ap tann jiskaske ou sot nan travay. Sa a se yon bagay nou dwe fè ansanm.”
Manm kowòm nan te di: “Oke. M pral wè si m ka chanje lè avèk yon lòt moun.”
Tout 11 prèt yo te ale lopital la. Sa ki te mwens aktif yo ak sa ki pa t janm rate yon Dimanch yo te la. Ansanm, yo te ri epi yo te kriye epi yo te priye epi yo te fè plan pou demen. Nan mwa k te suiv yo, yo te pwograme tan pou fwote pye Frè Anderson lè sikilasyon an te difisil, yo te pran tan pou fè don san pandan sesyon dezèdtan pou l te ka gen san pa yo sèlman, epi yo te menm kondi sou 20 mil (32 kilomèt) nan jou gradyasyon an avèk mennaj yo (enkli de jènfi ki pa t manm Legliz la) pou mennen yo bò kabann ni nan lopital la pou l te ka pataje eksperyans lekòl yo avèk yo.
Nan dènye jou l yo, Frè Anderson te mande yo pou yo sèvi misyon, marye nan tanp, epi youn kenbe kontak avèk lòt. Plis pase douzan apre, pandan yo retounen sot nan misyon, marye nan tanp, epi kòmanse fanmi pa yo, yo toujou raple yo eksperyans espirityèl desizif sa yo yo te fè ansanm nan sèvi dirijan byeneme yo a.
Norman Hill, Texas, Etazini
Ilistrasyon pa Gregg Thorkelson