Tuuina atu o le Molimau

Maria Kaneva, Blagoevgrad, Palekeria

“O le a ou alu muamua,” e fai mai ai Irinka i Aso Sa muamua taitasi o le masina. O le uumauina o le nofoa ma mata e sagisagi fiafia, sa taumafai ai o ia ia maua le loto toa. E na o le iva tausaga o Irinka, peitai e foliga mai o ia lava le tagata e sili ona toa i tagata uma e toavalu lea e omai soo i le lotu i lana paranesi i Palekeria.

A o le’i tu o ia i luga, e masani lava ona faatali Irinka e vaai pe i ai se isi tagata e manao e molimau muamua. E vaavaai atu faalilolilo tagata uma ia te ia ma faatali mo ia e alu i luma. Mulimuli ane, e savali atu o ia i le pulelaa, ma se ataata lapoa, E aumai e le peresitene o le paranesi se nofoa e tu ai i luga ina ia mafai ona ia iloa atu le au paia. E tilotilo atu Irinka, le tamaitiiti e toatasi i le Peraimeri, i le aulotu to’agaogao ma amata ona tautala atu.

E le foliga popole o ia i le vaavaai atu o tagata uma ia te ia. Sa faalologo le au paia i lona leo malu. A o ia tautala atu e uiga ia Keriso, i tusitusiga paia, ma le moni o le Ekalesia, sa ia faia se faatosinaga i molimau a isi tagata uma.

A nofo o ia i lalo, e filemu mea uma ma e foliga mai e pai atu le Agaga i loto o isi. Ona tu lea i luga o se tasi o le au paia e fai se molimau, faapea ma se isi ma le isi …