Ko ha Fakamoʻoni ʻo e Palōfitá
“ ʻIlonga ha meʻa kuó u lea ʻaki ʻe au ko e ʻEikí, kuo u lea ʻaki ia; … neongo pē ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē” (T&F 1:38).
Hili pē hoku papitaiso mo hilifaki nimá, kuo pehē mai leva heʻeku kui-fefiné, “Kuó ke maʻu he taimí ni ʻa e Laumālie Māʻoniʻoní, pea ʻoku mahuʻinga ke ke maʻu ha fakamoʻoni ki he palōfitá.” Naʻe ʻikai fuoloa mei ai ne u ʻalu ki heʻeku fuofua konifelenisi lahí—ko e konifelensi ʻo ʻOkatopa 1949.
Ko ha meʻa naʻe lelei. Naʻá ku mohe ai ʻi he ʻapi ʻo ʻeku ongo kuí. ʻOku ou manatuʻi ʻeku ʻā hengihengia hake he pongipongi Tokonakí ʻo heka pasi ki he loto kolo ʻo Sōleki Sití mo ʻeku kui fefiné. Naʻá ma luelue ai ki he Temipale Sikueá ʻo tuʻu laine fuoloa moʻoni. ʻI he taimi ne ma aʻu atu ai ki he Tāpanekalé, naʻá ma tangutu he tulikí ʻi mui.
Ki muʻa pea kamata ʻa e fakatahá, naʻe lōngonoa pea tuʻu ʻa e taha kotoa pē ki ʻolunga. Naʻe toki hū mai leva ʻa Palesiteni Siaosi ʻAlipate Sāmita (1870–1951). Naʻá ku lava pē ʻo sio kia Palesiteni Sāmita mo hono ongo tokoní. Kuo teʻeki ngalo ʻiate au ʻa e ongo naʻá ku maʻu ʻi heʻeku fuofua sio ki he palōfitá. Naʻá ku ongoʻi ha faʻahinga meʻa mātuʻaki makehe. Naʻá ku ʻilo ko e palōfita ia ʻa e ʻEikí.
Ko ha meʻa mātuʻaki mahuʻinga ʻaupito ia. ʻOku ou ongoʻi tatau pē mo e taimi ʻoku ou sio ai ki he Palesiteni ʻo e Siasí he taimi ní. Kuó u ʻosi hoko ʻeni ko ha Taki Māʻolunga fakataha mo ha Kau Palesiteni ʻe toko tolu ʻo e Siasí. Pea ko e taimi ʻoku hū mai ai ʻa e Palesitení, ʻoku ou kei maʻu pē ʻa e fakamoʻoni ko iá: “Ko e palōfitá ia.”
ʻOku ʻikai ke ke fuʻu kei siʻi koe ke ke maʻu ha fakamoʻoni ko e Palesiteni ʻo e Siasí ko e palōfita ia ʻa e ʻEikí. Ka ʻo ka ke maʻu ʻa e fakamoʻoni ko iá ʻi hoʻo kei siʻí, ʻe hoko ia ko ha ivi tuʻumaʻu ʻi hoʻo moʻuí. Te ke lava ʻo ʻilo ko e moʻoni ʻoku ʻi ai ha palōfita ʻa e ʻEikí pea ʻoku tāpuekina kitautolu ʻi he taimi ʻoku tau fakafanongo tokanga ai ki he meʻa ʻokú ne akoʻí.
Tā fakatātaaʻi ʻe Dan Burr