Pōpoaki ʻa e Faiako ʻAʻahí
Fakamālohia ʻa e Tui ki he ʻOtua ko e Tamaí mo Sīsū Kalaisi tuʻunga ʻi he Ako Fakatāutaha ʻo e Folofolá
Akoʻi e ngaahi potufolofola mo e ngaahi lea ko ʻení, pe ko ha tefitoʻi moʻoni kehe, kapau ʻe fie maʻu, te ne faitāpuekina ʻa e kau fafine ʻokú ke ʻaʻahi ki aí. Fakamoʻoni ʻo kau ki he tokāteliné. Fakaafeʻi ʻa kinautolu ʻokú ke akoʻí ke nau fakamatala atu ha meʻa ne nau ongoʻi mo ako.
“ ʻI heʻeku toki mali foʻou atú, … naʻe fakaafeʻi au ki ha maʻu-meʻatokoni hoʻatā maʻá e kau Fineʻofa kotoa pē ʻi homau uōtí, ʻa ia kuo [nau] lau ʻa e Tohi ʻa Molomoná pe ko ha tohi hisitōlia nounou pē ʻo e Siasí. Naʻe tātātaha pē foki ʻeku lau folofolá, ko ia naʻe totonu ke u kau atu ki he maʻu meʻatokoni hoʻataá ʻaki haʻaku lau ha kiʻi tohi nounou he naʻe faingofua pea vave ange ia kiate au. ʻI heʻeku maʻu ko ia ʻeku meʻatokoni hoʻataá, naʻe ongo mālohi mai kiate au neongo naʻe lelei ʻa e tohi hisitōliá ka naʻe totonu pē ke u lau ʻa e Tohi ʻa Molomoná. Naʻe ueʻi au ʻe he Laumālie Māʻoniʻoní ke u liliu ʻa ʻeku tōʻonga lau folofolá. ʻI he ʻaho pē ko iá, ne u kamata lau ai e Tohi ʻa Molomoná, pea kuo teʻeki ai pē ke tuku ʻeku lau iá. … Tupu mei heʻeku kamata lau fakaʻaho ʻa e folofolá, kuó u ako ai ʻo kau ki heʻeku Tamai Hēvaní, Hono ʻAlo ko Sīsū Kalaisí pea mo e meʻa ʻoku fie maʻu ke u fai ke u hangē ai ko Kinauá. …
“… ʻE lava ke hoko ʻa e fefine kotoa pē ko ha faiako ʻo e tokāteline ʻo e ongoongoleleí ʻi hono ʻapí, pea ʻoku fie maʻu ʻe he fefine kotoa pē ʻi he Siasí ke ne ʻiloʻi ʻa e ongoongoleleí, ʻi heʻene hoko ko ha takimuʻa mo ha faiakó. Kapau kuo teʻeki ai ke ke fakatupulaki ʻa e tōʻonga moʻui ko hono ako fakaʻaho ʻo e folofolá, peá ke kamata leva he taimí ni pea toutou ako ia ke ke mateuteu ai ki homou ngaahi fatongia ʻi he moʻuí ni pea mo e taʻengatá foki.”1
Julie B. Beck, palesiteni lahi ʻo e Fineʻofá.
“ ʻE tokoni ʻetau ako folofolá ki heʻetau ngaahi fakamoʻoní mo e fakamoʻoni ʻa hotau fāmilí. ʻOku tutupu hake ʻetau fānaú he ʻahó ni kuo takatakaiʻi kinautolu ʻe ha ngaahi leʻo ʻoku nau fakaʻaiʻai ke nau siʻaki ʻa e ngaahi meʻa ʻoku totonú kae fekumi ki he ngaahi meʻa fakafiefia ʻo e māmaní. ʻE uesia kinautolu ʻe he ngaahi ivi tākiekina ko iá tuku kehe kapau ʻoku nau maʻu ha fakavaʻe mālohi ʻi he ongoongolelei ʻo Sīsū Kalaisí, ha fakamoʻoni ki he moʻoní, mo nau fakapapauʻi te nau moʻui anga-māʻoniʻoni. Ko hotau fatongia ke fakamālohia mo maluʻi kinautolu.”2
Palesiteni Thomas S. Monson
“[ʻOku tau fie maʻu hotau houʻeiki fafiné ke nau hoko ko ha kau mataotao ʻi he folofolá. … ʻOku fie maʻu ke mou maheni mo ʻene ngaahi moʻoni taʻengatá ke lelei kiate kimoutolu, pea ki he taumuʻa ʻo hono akoʻi hoʻomou fānaú pea mo kinautolu kotoa ʻe ʻi he malumalu homou ivi tākiekiná.]”3
“[ʻOku fie maʻu hotau ngaahi ʻapí ke tāpuekina ʻaki ha kau fafine mataotao he folofolá—tatau ai pē pe ʻoku ʻikai ke ke mali pe ʻosi mali, kei talavou pe toulekeleka, uitou pe nofo mo ha fāmili… . Mou mataotao ʻi he folofolá—ʻo ʻoua ʻe tuku hifo ʻa e niʻihi kehé, ka ke hiki hake ʻa kinautolu!]4
Palesiteni Sipenisā W. Kimipolo (1895–1985).
Faitā ʻa Matthew Reier