Manatuʻi ʻo e ngaahi meʻa maʻongoʻonga ʻa e ʻOtuá
Feʻauhi ʻAati Fakavahaʻa-puleʻanga Hono Valú
Fakakaukau ki he ngaahi meʻaʻofa mo e ngaahi tāpuaki lahi ʻa ʻetau Tamai Hēvani mo Sīsū Kalaisi kuó Na foaki kiate kitautolú. ʻI heʻetau fakatokangaʻi ʻa e ngaahi meʻaʻofa mo e ngaahi tāpuaki ko ʻení ʻi heʻetau moʻuí, ʻoku tau fakahaaʻi ai ha ʻaʻapa ki he ʻOtuá mo fakamālohia ʻetau fakamoʻoni fakafoʻituituí. ʻE lava ke fakahaaʻi ʻetau tuí ʻi he ngaahi nota ʻo ha himi, ʻi hano fakafōtunga ʻo e ʻumeá, pe ʻi ha mata ʻo ha polosi tā valivali.
ʻOku hangē ʻete hū ki he fakaʻaliʻali ʻo e Feʻauhi ʻAati Fakavahaʻa-puleʻanga Hono Valú ʻi he Senitā Konifelenisí ʻi Sōleki Siti ʻi ʻIutaá, ko haʻate hū atu ki ha houalotu fakamoʻoni ʻa e kāingalotú mei ha fonua ʻe 44. ʻI he Tokāteline mo e Ngaahi Fuakava 115:5 ʻoku tau lau ai, “Tuʻu hake pea ulo atu, koeʻuhí ke hoko ʻa hoʻomou māmá ko ha fuka ki he ngaahi puleʻangá,” pea ko e ngāue ʻoku fakahoko ʻe he kau ʻaati ko ʻeni ʻo e Siasí ko ia tofu pē.
Ko e feʻauhi fakataʻu-tolu ko ʻení ʻoku kau ai ha ngaahi tāvalivali mo ha ngaahi ngāue fakameaʻa ʻoku nau fakafōtunga ʻa e kaveinga ko e “Manatuʻi ʻa e Ngaahi Meʻa Maʻongoʻonga ʻo e ʻOtuá.” ʻOku kau ha ngaahi kaveinga hangē ko hotau ʻapi fakamāmaní, ongoongolelei kuo fakafoki maí, pea mo e Fakalelei mahuʻinga ʻa hotau Fakamoʻuí ʻi he ngaahi meʻa ne fakafōtunga ʻe he kau ʻātí. ʻI he ngaahi meʻa ne fakahū mai ʻe 1,089, ko ha ʻaati ai ʻe meimei 200 naʻe fili ke fakaʻaliʻalí, ʻo kau ai ha ngaahi Pale Fakalāngilangi ʻe 20 mo ha ngaahi Pale Fakatau ʻe 18. Neongo kuo ʻosi a e fakaʻaliʻali ko ʻeni ʻi he Senitā Konifelenisí, ka ʻe kei lava pē ʻo fai hano mamataʻi ʻi he ʻinitanetí ʻi he ArtExhibit.lds.org. ʻOku ʻomi ʻe he mamata ʻi he ʻātí ha faingamālie ke fakamālohia fakalaumālie ai kitautolu ʻe he ngaahi fakamoʻoni ko ʻeni ʻoku tau lava ʻo ala ki aí.
Toʻohemá: The Child (Ko e Tamasiʻí), tā ʻe Kathleen Bateman Peterson, USA, Pale Fakalāngilangí
“ ʻOku fekauʻaki ʻa e tāvalivali ko ʻení mo e meʻaʻofa maʻongoʻonga taha ʻa e ʻOtuá kiate kitautolú—ʻa e moʻuí.”
ʻOlungá: Ko Hai Te ne Lava ʻo Maʻu ha Fefine Angamaʻa? II, tā ʻe Louise Parker, Saute ʻAfilika, Pale Fakatau (Purchase Award)
“ Naʻá ku fie fakafōtunga ʻa e folofolá [Lea Fakatātā 31] pea pehē ki hono fakamanatua ʻo e ngaahi ʻulungāanga tukufakaholo ʻo e kakai fefiné ʻi ʻAfiliká. ʻOku nau matuʻaki nima-meaʻa mo foaki pea mo moʻui … ʻi honau lāngilangí.”
Laló: ʻOfá, tā ʻe Nnamdi Okonkwo, Naisīlia, Pale Māʻolunga (Merit Award)
“Ko e tā-tongitongi polonise ko ʻení ko ha fakaʻapaʻapa ia ki he tuʻunga fakaefaʻeé.”
Toʻohemá: Teu Fai Ho Finangaló, tā ʻe Ramon Ely Garcia Rivas, ʻEkuatoa, Pale Fakatau (Purchase Award)
“ ʻE lava ke mamata ha taha ki hono akoʻi ʻe he ongo faifekau kei talavoú ha fāmili fie-fanongo ʻoku nofo ʻi ha fale tētē faʻu mei he ʻakau ko e palasá, ʻa ia ʻoku angamaheni ai ʻa e kakai ʻo e Vaitafe Papahoioó ʻi ʻEkuatoa.”
Toʻomataʻú: Mālōlō lolotonga e Fonongá, tā ʻe Carmelo Juan Cuyutupa Caares, Pelū
“Naʻe maʻu pē ʻe he kau paioniá ha kiʻi fiefia lolotonga ʻenau fonongá ʻo nau kiʻi mālōlō taimi siʻi ai, neongo ʻenau ongosiá, pea nau kiʻi mālōlō ai.”
Toʻohemá: Naʻe ʻIkai ke Nau Veiveiua, tā ʻe Joseph Brickey, USA
“ ʻIo, kuo akonekina ʻa [e kau tau loto toʻá] ʻe heʻenau ngaahi faʻeé, kapau ʻe ʻikai te nau taʻetui, ʻe fakahaofi ʻa kinautolu ʻe he ʻOtuá” (ʻAlamā 56:47).
ʻOlungá: Tau Fakafetaʻi (Lea Fakatātā 22:6), tā ʻe Elisabete Lina Miota, Palāsila
“Ko e lotu ʻoku akoʻi ʻe he mātuʻá ko e ʻuluaki fetuʻutaki ia mo e Tamai Hēvaní ʻe lava ke ako mo fakahoko ʻe ha pēpē māhina ʻe 16.”
Toʻomataʻú: Ngaahi Sitepu ʻo e Tuí, tā ʻe Alfred Igbinigie, Naisīlia
“ ʻOku fakafōtunga mai ʻe he tā-tongitongi ʻakau ko ʻení ʻa e ngaahi faingataʻaʻia ʻa e Kāingalotu ʻi Mīsulí, 1838.”
ʻOlungá: Agape, tā ʻe Valeriano Ugolini, ʻĪtali
“Ko e tā-valivali ko ʻení ko ha ʻata mo ha fakafōtunga ia ʻo e ʻofa ʻa e ʻOtuá ki he tangatá, mo e ʻofa ʻa e tangatá ki he ʻOtuá, hangē ko ia ʻi he Sione 3:16.”
ʻI laló: Ngaahi Matapā ʻo e Langí, tā ʻe Emily McPhie, USA, Pale Fakatau (Purchase Award)
“[ʻI heʻeku vakai ki heʻeku kiʻi taʻahiné] ne u fakatumutumu pea haʻu mo e loʻimatá ki hoku matá. Naʻe hangē naʻe fakaava mai ʻa e ngaahi matapā ʻo e langí ʻi hono kiʻi fofongá mo lilingi mai ʻa e ʻofá mo e māmá. Ko e fānaú ko ha meʻaʻofa fungani.”
Toʻohemá: Kau Fononga Saliote ʻa Mātiní, Fāmili Melá, tā ʻe Douglas McGarren Flack, USA
“Naʻe hao moʻui kotoa ʻa e fāmili ʻe toko hiva ko ʻení ʻi he fononga ki Saioné.”
Toʻomataʻú: Kuo Aka, tā ʻe Heidi Renee Somsen, Kānata
“Hangē ko hono fakamaʻu ʻe he ngaahi aká ʻa e fuʻu ʻakaú ki he kelekelé, ʻoku pehē ʻa e fakamaʻu ʻo e ngaahi fāmili ʻi he ongoongoleleí ʻaki ʻa e ʻofá pea ʻi he ngaahi ouau ʻo e temipalé.”
Toʻomataʻú: Teuteu ki he Sāpaté, tā ʻe Mthulisi Ncube, Simipāpuē
“ ʻOku lau ʻe he kiʻi taʻahiné ha potu folofola naʻe ʻoange, pea ʻoku fō ʻe he kau fafiné ʻa e valá ʻi heʻenau teuteu ki he Sāpaté he feituʻu ʻuta ʻo Saute ʻAfiliká.”
ʻOlungá: Vao-ʻakau Ketisemaní, tā ʻe Derek J. Hegsted, USA
“Lolotonga haʻaku folau ki ʻIsileli, naʻá ku ʻilo ai ha ngaaahi ʻulu ʻōlive ʻo u fifili ai ki he ʻuhinga ne “faʻa ʻalu” ai ʻa Kalaisi ki Ketisemaní (vakai, Sione 18:2). … ʻOku ʻi ai ha fetuʻutaki ʻa e faʻahinga meʻa moʻui kotoa pē mo e Toko Taha Fakatupu Maʻongoʻongá ni. … ʻI he tā-valivalí, ʻoku hangē ʻoku taau ke tau fakaʻapaʻapaʻi ʻa e meʻa kotoa pē ʻoku fakamoʻoni ki Hono fakalangí.”
ʻI ʻolungá: Fehangahangai mo ʻItānití, tā ʻe Del Parson, USA
“ ʻI he fakaʻosinga ʻo e ʻahó, ne fakakaukau ʻa e Fakamoʻuí ki he palani ʻa ʻEne Tamaí. ʻOku fakafofongaʻi ʻe he ngaahi fanā ʻo e ngaahi vaka toutaí ʻa e ngaahi kolosi naʻe tatali kiate Ia ʻi he konga fakaʻosi ʻo ʻEne moʻui ʻi māmaní.”
Toʻohemá: Akoʻi Au Ke U ʻAʻeva he Māmá, tā ʻe Ai Meng Tsai, Taiuani, Pale Fakatau (Purchase Award)
“Kuó u fakafōtunga ʻa e foʻi fakakaukau ʻi he hiva ʻiloa ko ʻeni ʻa e fānaú.”
ʻI ʻolungá: Kuo Fakamolemoleʻi ʻEne Ngaahi Angahalá, he Naʻá ne ʻOfa Lahi, tā ʻe Roger Cushing, USA
“Naʻe ʻai ʻe he tui mo e fakatomala ʻa e fefiné ke ne kumia e fakamolemole ʻa e ʻEikí. … Pea ʻi he ʻofa huhuʻi ʻa e ʻEikí, ne fakatupu ai ha ʻamanaki lelei ʻiate ia.”