Ko e Hā ʻOku Totongi ai e Foaki ʻAukaí?

ʻOku maʻu ʻe Lepeka ʻAlisoni Tisi, ko ha tāutaha kei talavou mei Siamane ʻoku lolotonga ʻi he Uooti Uinitafeó ʻi Suisalani, ha fakamoʻoni ki he ʻaukaí pea mo e ngaahi tāpuaki ʻoku maʻu mei he totongi ʻo ha foaki ʻaukai ʻoku lahí. Naʻe tupu hake ʻa Lepeka ʻo mamata ʻi he totongi foaki ʻaukai ʻene ongomātuʻá, pea ʻi he taimi naʻe kamata ai ke maʻu ʻene vahé, naʻe kamata leva ke foaki mo ia ʻiate ia pē.

ʻOkú ne pehē, “Naʻe ʻi ai ha ngaahi taimi naʻá ku lava ai ke totongi ha foaki ʻaukai naʻe lahi.” Pea ʻi he ngaahi taimi ko iá, ʻokú ne pehē, “Naʻe ʻikai ke u teitei fiekaia ʻi he sinó pe laumālié.” ʻOkú ne pehē ko e ngaahi ongo ʻo e fiekaia mei he ʻaukaí ʻoku mole vave, ka ko e ngaahi tāpuaki ʻo e fafangaʻi fakalaumālie ko ia ʻoku maʻu ʻi hono tokoniʻi ʻo e kakai kehé ʻoku tolonga—ʻo aʻu ʻo taʻengata.

Naʻe feinga maʻu pē ʻa Lepeka ke ne totongi ha foaki ʻaukai taʻe fekauʻi. ʻOkú ne pehē, “Kuo teʻeki ai haʻaku palopalema ʻaʻaku ʻi hono foaki iá. Ne u mei lava pē ke fakaʻaongaʻi ʻa e paʻanga ko ʻení ki ha meʻa kehe. Ka ʻoku ou fakakaukau maʻu pē, ʻ ʻOku tokoni ʻeni ki he kakai ʻoku nau fie maʻu iá.’ ”

ʻOku pehē ʻe ha taha ʻo e ngaahi kaungāmeʻa ʻo Lepeká, ʻa Sēsika Suope (Jessica Schwabe) ʻo e Kolo Hanová ʻi Siamane: “ ʻOku ʻai ʻe he totongi foaki ʻaukaí ʻa e ʻaukaí ke toe ʻuhingamālie ange; ʻokú ne ʻai ke kakato. Ko e foaki ʻaukaí ko ha konga ia ʻo e ʻaukaí ʻo ʻikai maʻatautolu ka maʻá e kakai kehé, maʻá e kakai ʻoku masivá.” ◼